Friday, November 20, 2009

ပိဏ္ဍပါတ်ဆွမ်း

၂၀၀၁-ခုနှစ်စာရင်းအရ မြန်မာနိုင်ငံတွင် လက်ရှိသာသနာပြုလျက်ရှိသော ရဟန်းတော်ပေါင်းမှာ တသိန်းခုနစ်သောင်းကျော် ရှိသည်။ အတိအကျဆိုရလျှင် ရဟန်းတော်ပေါင်း ၁၇၀၁၆၅-ပါးရှိသည်။ ထိုရဟန်းတော်များသည် ဘုန်းတော်ကြီးကျောင်း ၅၁၈၁၄-ကျောင်းတွင်း သီတင်းသုံးလျက် ရှိကြသည်။

ထိုရဟန်းတော်များ၏ အဓိကလိုအပ်ချက်မှာ ဆွမ်းပင်ဖြစ်သည်။ ဆွမ်းမရှိပါက မရပ်တည်နိုင်။ သာသနာပြုရေးမှာလည်း ဆုတ်ယုတ်သွားမည်သာ ဖြစ်သည်။ ထို့ကြောင့် မြန်မာပြည်သူ ဒကာ ဒကာမ များကလည်း စေတနာသဒ္ဓါတရား ထက်သန်စွာဖြင့် ဆွမ်းကို လှူဒါန်းကြသည်။

ဆွမ်းလှူရာ၌ ပိဏ္ဍပါတ်ဆွမ်းလောင်းခြင်းသည် အဓိကအခန်းက ပါဝင်သည်။ ပိဏ္ဍပါတ်ဆွမ်းဟူသည် နေ့စဉ်ဆွမ်းခံသော ရဟန်းအား လောင်းလှူသည့်ဆွမ်းပင် ဖြစ်သည်။ မြန်မာပြည်သူ ဗုဒ္ဓဘာသာဝင်တို့သည် မိမိတို့ရပ်ရွာ၊ ရပ်ကွက်၊ မြို့နယ်အတွင်း သီတင်းသုံးကြသော သံဃာတော်တို့ကို ဂန္ထဓူရ ၀ိပဿနာဓူရ နှစ်မျိုးကို ကောင်းစွာအားထုတ်နိုင်စေရန် ရည်သန်၍ ပိဏ္ဍပါတ်ဆွမ်းလောင်းအသင်းများ ဖွဲ့စည်းကြသည်။ ထိုဆွမ်းလောင်း အသင်းများတွင် လူငယ် လူလတ် လူကြီးတို့ စုပေါင်းပါဝင်ကြသည်။ အလှူငွေကောက်ခံ၍သော်၎င်း၊ မိမိကိုယ်တိုင် ထည့်ဝင် လှူဒါန်း၍သော်၎င်း အလှူငွေရှာဖွေကာ ဆွမ်းလောင်းလှူကြသည်။

အချို့အဖွဲ့များမှာ နေ့စဉ်နေ့တိုင်း ရက်မပျက် လောင်းလှူကြသည်။ အချို့အဖွဲ့များမှာ တနင်္ဂနွေ တနင်္လာ စသည်ဖြင့် မိမိတို့ တတ်နိုင်ရာ ရက်ကိုရွေး၍ တနင်္ဂနွေဆွမ်းလောင်းအသင်း၊ တနင်္လာဆွမ်းလောင်းအသင်း စသည်ဖြင့် အမည်တပ်ကာ လောင်းလှူကြသည်။ အချို့အဖွဲ့များမှာ ၀ါတွင်းကာလ ဥပုသ်နေ့တိုင်း လောင်းလှူကြ သည်။ အချို့အဖွဲ့များသည် ၀ါတွင်းကာလ၌ တ၀ါတွင်းလုံးဖြစ်စေ၊ တပတ်ဖြစ်စေ တရက်ဖြစ်စေ လောင်းလှူကြ သည်။

ဤပိဏ္ဍပါတ်ဆွမ်းလောင်းခြင်းကြောင့် သံဃာတော်များ ဆွမ်းကိစ္စကို လွယ်လွယ်နှင့် အဆင်ပြေကြသည်။ မိမိနှစ်သက်ရာ ပရိယတ္တိစာပေများကို ကောင်းစွာသင်ယူနိုင်ကြသည်။ မိမိအားသန်ရာ တရားဘာဝနာတို့ကို ကောင်းစွာ အားထုတ်နိုင်ကြသည်။ အလွန်ပင် အကျိုးကြီးသော အကျိုးထူးသော ကောင်းမှုကြီးဖြစ်သည်။

စင်စစ် ပိဏ္ဍပါတ်ဆွမ်းလောင်းခြင်းသည် မြန်မာပြည်သူတို့၏ မွန်မြတ်သော စေတနာကို ဖော်ပြသကဲ့သို့ ရှိသည်။ ထို့အပြင် စုပေါင်းလုပ်ကိုင်တတ်မှု၊ ချစ်ကြည်မှု၊ ညီညွတ်မှုတို့ကိုလည်း ဖြစ်စေသည်။ ထို့ကြောင့် ခေတ်အဆက်ဆက် မြန်မာဘိုးဘွားတို့သည် ပိဏ္ဍပါတ်ဆွမ်းလောင်းခြင်းအမှုကို ကောင်းမြတ်သော ရိုးရာယဉ်ကျေးမှုတရပ်အဖြစ် ဆောင်ရွက်လာခဲ့ကြသည်။ ယခုခေတ် မြန်မာတို့ကလည်း ဘိုးဘွားယဉ်ကျေးမှု အမွေအနှစ်ကိုထိန်းသိမ်းစောင့်ရှောက်၍ မြတ်သော ပိဏ္ဍပါတ်ဆွမ်းလောင်းခြင်းအမှုကို ဆက်လက်ဆောင်ရွက် နေကြပေသည်။ အလွန်ဝမ်းမြောက်ဂုဏ်ယူဖွယ်ရာ ကောင်းမှုကြီးဖြစ်၍ ကျွန်ုပ်တို့ လှိုက်လှဲစွာ သာဓုခေါ်မိ ပါသည်။

No comments: