Thursday, November 19, 2009

ထေရ၀ါဒဗုဒ္ဓဘာသာ နှင့် မဟာယာနဗုဒ္ဓဘာသာ နှိုင်းယှဉ်ဝေဖန်ချက် ( ၁၇ )

( ယခင်လမှ အဆက် )

ဒီကနေ့ ဘုန်းကြီး သမ္မာဒိဋ္ဌိအကြောင်းကိုပဲ ဆက်ဟောပါ့မယ်။ ဗုဒ္ဓရှင်တော်ရဲ့ အပေါ်မှာ သဒ္ဓါတရားဖြစ်ပြီး ထိုသဒ္ဓါတရားကို အခြေခံပြီး ပေါ်ပေါက်လာတာကို သမ္မာဒိဋ္ဌိ။ သဒ္ဓါတရား အခြေခံအုတ်မြစ်ရှိတဲ့ သမ္မာဒိဋ္ဌိ။ အဲဒီ သဒ္ဓါက ဘယ်မှာရှိတဲ့ သဒ္ဓါလဲ။ ဗုဒ္ဓရှင်တော်ရဲ့ ကျေးဇူး ၂-ပါး
(၁) မကောင်းတာ တားတယ်။
(၂) ကောင်းရာ ညွှန်ကြားတယ်။
အသေးစိတ်တွေ ကိုယ့်ဟာကို ဆက်လေ့လာပါ။ အဲဒီလို ဆရာသမားအနေနဲ့ ရပ်တည်ပြီးတော့ လောကကြီးကို ဆုံးမတော်မူတဲ့ ဘုရားအပေါ်မှာ သဒ္ဓါရောက်ရင် အဲဒီသဒ္ဓါကို သမ္မာဒိဋ္ဌိလို့ ခေါ်တယ်။ အဲဒီသမ္မာဒိဋ္ဌိသည် သဒ္ဓါတရားကို အခြေခံတယ်။ ရတနတ္တယ သမ္မာဒိဋ္ဌိမှာ သဒ္ဓါဟာ ပဓာနဖြစ်တယ်။

ဝိပဿနာ သမ္မာဒိဋ္ဌိကျတော့ ပညာသည် ပဓာနဖြစ်သွားတယ်။ ဒါ ဘုရားနဲ့ ပတ်သက်လို့ ဒီအချက်တခုကို မှတ်သားထားပါ။ နောက် တရားတော်ပေါ့လေ။ တရားတော်ဆိုတဲ့ စကားလုံးအစား ဓမ္မ-လို့ပဲ သုံးကြပါစို့။ ပရိယတ္တိဆိုလဲ ဓမ္မပဲ။ ပဋိပတ္တိဆိုလဲ ဓမ္မပဲ။ ပဋိဝေဓဆိုလဲ ဓမ္မပါပဲ။ အဲဒီလို ဓမ္မ ၃-ခုရှိတယ်။ ဘယ်ဓမ္မမဆို ဗုဒ္ဓရှင်တော်ဘုရား ၄၅-နှစ်ပတ်လုံး ဟောခဲ့တဲ့ စကားတော်အားလုံးကို ဒီဓမ္မပုဒ်ထဲမှာ အကုန်ထည့်ထားတယ်။ သုတ်ရော ၀ိနည်းရော အဘိဓမ္မာရော အကုန်လုံး ဒီအထဲပါတယ်။ ဓမ္မံ သရဏံ ဂစ္ဆာမိ-ဆိုရင် သုတ္တန်တင် မဟုတ်ဘူးနော်။ ၀ိနည်း၊ အဘိဓမ္မာတွေပါ အကုန်လုံးပါတယ်။ အဲဒီဓမ္မကရော ဘာလုပ်ပေးသလဲ။ သတ္တ၀ါအပေါင်းတို့၏ ဘ၀ကန္တာရကို လွန်မြောက်စေနိုင်သော စွမ်းရည်သတ္တိရှိတယ်။

ကန္တာရဆိုတာ လူတိုင်းသိတယ်။ သဲသောင်ပြင်ပေ့ါနော်။ နွေအခါ ရေမရှိတဲ့ အဲဒီသဲသောင်ပြင်ကို သွားတဲ့အခါ နွေခေါင်ခေါင် နေကလဲပူ အဲဒီနေက ပြန်ထွက်လာတဲ့ အပူလှိုင်းတွေကို အဝေးကကြည့်ရင် ရေလှိုင်းနဲ့ သိပ်တူတာပဲ။ ဒါကြောင့် ၃၁-ဘုံ အစုံအဆန်သွားတာဟာ သဲကန္တာရခရီးကို သွားသလိုပဲတဲ့။ အဲဒီလိုဖြစ်နေတဲ့ ကန္တာရကို ကျော်လွှားဖို့ ဆိုလို့ရှိရင် နဂါးကိုးကွယ်လို့မရဘူး။ သိကြားကိုးကွယ်လို့လဲမရဘူး။ ဓမ္မကို ကိုးကွယ်မှ ဒါတွေကို ကျော်လို့ရတယ်။ ဘ၀ခရီးကြမ်း ဘ၀အခက်အခဲ ဘ၀ရဲ့ပင်ပန်းမှုတွေကို ဘာနဲ့ကျော်လွှားမလဲဆိုရင် ဒီဓမ္မနဲ့သာ ကျော်လို့ရတယ်။ တရားမရှိတဲ့သူဟာ ဒါတွေကို မကျော်နိုင်ဘူး။ တရားမရှိတဲ့သူတွေ သို့မဟုတ်-အဲဒီတရားကို မချဉ်းကပ်လိုသော ပုဂ္ဂိုလ်တွေပေါ့လေ။

တမျိုးပြောရရင် သာသနာတော်ရဲ့ အပြင်ဘက်က အစွမ်းရှိတယ်လို့ ထင်ရတဲ့ လူတယောက်ယောက်၊ အရုပ်တမျိုးမျိုး၊ နတ်တမျိုးမျိုးနဲ့ ကျော်လွှားကြည့်မယ်လို့ ကြိုးစားကြည့်ပါ။ ကျော်လွှားနိုင်ရင် ခဏပဲဖြစ်မယ်။ ပြီးတော့ ကန္တာရထဲမှာ အဲဒီလူတွေ ပြန်ရောက်သွားလိမ့်မယ်။ ဓမ္မကတော့ ကျော်ပြီးရင် ကန္တာရထဲ ပြန်ရောက်စရာ မရှိဘူး။ အဲဒါကို ယုံကြည်ပြီးတော့ ကြည်ညိုပြီးနေရင် ဓမ္မက လူသားတွေအတွက် သရဏဖြစ်လာတယ်တဲ့။ ဘ၀အခက်အခဲကို ကျော်လွှားစေတတ်တဲ့အတွက်ကြောင့် နောက်တခုက သက်သာမှုကို ပေးနိုင်စွန်းရှိတဲ့အတွက်ကြောင့် ဓမ္မကသာ လူသားတွေအတွက် သရဏဖြစ်လာတယ်။

တခါတခါ ဆွေမျိုးတွေ ပျက်လို့၊ စီးပွားတွေပျက်လို့၊ ကျန်းမာရေးတွေ ပျက်လို့ အဲဒီလို ပျက်ကြရင်လဲပဲ ပင်ပန်းကြတယ်။ အဲဒီလို ပင်ပန်းလာကြတဲ့လူသားတွေ ဒီဓမ္မနဲ့ တွေ့လိုက်ရင် အပန်းတွေ ပြေသွားတယ်။ တကယ်ကျင့်ရင် တကယ်သိရင် ဒီလူသားတွေ အပန်းပြေစေတယ်။ လူ့လောကကြီးမှာ အပန်းပြေစေတာ တကယ်ပြေစေနိုင်စွမ်းရှိတာဟာ ဓမ္မဖြစ်တယ်။

ဒါမျိုးဖြစ်ရင် ကမ်းခြေက်ိုသွားပြီး အပန်းမဖြေနဲ့၊ ဓမ္မနဲ့ အပန်းဖြေရမယ်။ အဲဒါကြောင့်-ဓမ္မ-က
(၁) ဘ၀အခက်အခဲကိုလည်း လွန်မြောက်စေတယ်။
(၂) ဘ၀ရဲ့ ပင်ပန်းမှု မှန်သမျှကိုလည်း သက်သာစေတယ်။ အဲဒါကို ယုံကြည်ရင် ဓမ္မသည် ကိုးကွယ်ရာဖြစ်ပြီ။ ဒါကြောင့် ကိုးကွယ်စရာကို သရဏ-လို့ ခေါ်တယ်။ ပြီးတော့မှ ဂစ္ဆာမိ-လုပ်တာ။ ဘ၀အခက်အခဲတွေ ကျော်လွှားစေနိုင်တဲ့ အတွက်ကြောင့်၊ သက်သာရာကိုလဲ ပေးစွမ်းနိုင်တဲ့အတွက်ကြောင့် ဓမ္မော-ဓမ္မသည် သတ္တ၀ါတို့၏ သရဏမည်တယ်ရယ်လို့ ကောင်းစွာမသွေ မှတ်ထိုက်ပါပေကုန်သတည်း။

ဓမ္မပြီးသွားပြန်တော့ သံဃာပေါ့။ သံဃာတော်ကို အနည်းငယ်မျှ ပေးလှူကြတဲ့ ပုဂ္ဂိုလ်အပေါင်းတို့အား ကြီးကျယ်များမြောင်သော အကျိုးကျေးဇူးတွေကို ဖြစ်စေနိုင်စွမ်းရှိတဲ့အတွက်ကြောင့် သံဃာတော်များလဲပဲ သရဏံ-သရဏမည်တယ်ရယ်လို့ ကောင်းစွာမသွေ မှတ်ထိုက်ပါပေကုန်သတည်း။

ဒါကြောင့် သံဃာတော်များရဲ့ ဂုဏ်ရည်ကို ယုံကြည်ဖို့လိုတယ်။ သံဃာကို နည်းနည်းလေးပေးလှူတယ်။ ဒါပေမဲ့ ကိုယ့်ဘက်ပြန်ရတဲ့ အကျိုးကျတော့ အလွန်ကြီးကျယ်တယ်။ သံဃာ့ဂုဏ်ကို တိုက်ရိုက်အားဖြင့် ပြောရရင် အရိယာသံဃာဖြစ်တယ်။ အဆင့်မြင့်သံဃာဖြစ်တယ်။ ဥပမာ-အရှင်မဟာကဿပကို လှူလိုက်လို့၊ အရှင်သာရိပုတ္တရာကို လှူလိုက်လို့ နေ့ချင်း ညချင်း သူဌေးဖြစ်သွားတယ်ဆိုတဲ့ ထုံးတွေ အများကြီးရှိတယ်။ အဲဒါ အမြင့်ဆုံး ဥက္ကဋ္ဌနည်းကို ပြောတာ

ဒီကနေ့ မျက်မှောက်သမုတိသံဃာကျတော့ ဘယ်လိုကြည်ညိုရင် အကောင်းဆုံးလဲဆိုတော့ အခု သာသနာတော်ခရီးဟာ နှစ်ပေါင်း ၂၅၀၀-ကျော်ခဲ့ပြီ။ ဒါကြောင့် သာသနာဖြတ်သန်းလာခဲ့တဲ့ ခရီးတလျှောက်လုံးမှာ ဘုရားစကားတော်တွေကို မူရင်းအတိုင်း မပျောက်အောင်၊ မကွယ်အောင် ထိန်းသိမ်းလာခဲ့တာ သံဃာတော်တွေဖြစ်တယ်။ သံဃာတော်တွေထိန်းသိမ်းလို့ သံဃာတော်တွေ မထိန်းရင် တခြားထိန်းတဲ့ပုဂ္ဂိုလ် မရှိဘူး။ အသောကမင်းကြီး အာဏာစက်ထက်တာ မှန်တယ်။ နဂါး၊ ဂဠုန်ကို မှန်းပြီး ကြိမ်စကြာနဲ့ ရိုက်လိုက်ရင်လဲ ရေအောက် ၁၂-မိုင်က နဂါး၊ ဂဠုန် အကုန်ထွက်လာတယ်။ ဘာလိုချင်လဲ မင်းတရား ဒီလိုမေးရင် ပတ္တမြားလိုချင်တယ်ဆိုရင် ဆက်ရတယ်။ ကောင်းကင်ကို ကြိမ်စကြာနဲ့ ရိုက်လိုက်ရင် ကောင်းကင်ရှိ ၁၂-မိုင်အတွင်း ၁-ယူဇနာအတွင်းက နတ်တွေ မနေနိုင်ဘူး။ အနောတတ်အိုင်က ရေတွေ ဘာတွေလာဆက်ရတယ်။ အဲဒီလို အာဏာစက်ရှိတဲ့ မင်းတောင် ဒီအာဏာစက်နဲ့ ဒီပိဋကတ်ကို တည်စေသတည်းလို့ လုပ်လို့မရဘူး။ ဘာနဲ့ ထိန်းလာသလဲဆိုလို့ရှိရင် ဟောဒီဘုရားဟောတဲ့ ပိဋကတ် ၃-ပုံကို သင်ကြားပို့ချပြီး ထိန်းခဲ့တာ။ ဆရာစဉ်ဆက်၊ ဆရာ့နှုတ်ကနေ တပည့်၊ တပည့်က ဆရာပြန်ဖြစ်ပြီး နောက်နောင် တပည့်များကို ဆက်လက်ပို့ချ။ အဲဒီလို နှုတ်ဆင့်ကမ်းပြီး သယ်လာခဲ့လို့ ဒီသာသနာ ဒီအထိရောက်လာတာ။

အဲဒီမှာလဲ တဖက်က မှတ်စရာရှိသေးတယ်။ ဘာလဲဆိုတော့ တဖက်က ပရိယတ္တိဖြစ်တဲ့ ပိဋကတ် ၃-ပုံကို သင်ကြားကြ။ တဖက်က ပဋိပတ္တိကို ကျင့်ကြ။ အင်း-ကိုယ်တော်တို့ သင်ရုံသာ သင်နေတာပါ၊ ကျင့်လဲမကျင့်ကြပါဘူး-လို့ အဲဒီလိုများ ဟန်ချက်မညီတဲ့ အယူအဆမျိုးတွေရှိရင် ဖျောက်ပစ်ကြပါ။ ကဲ ကျင့်ကြံနိုင်မှ ဒီတရား-ဆိုရင်လဲ စာသင်တိုက်တွေ အကုန်ရပ်ပြီး မြန်မာတနိုင်ငံလုံးရှိ သံဃာ ၃-သိန်းကျော် ထိုင်ပြီး တရားကျင့်ကြည့်စမ်းပါ။ နောက် နှစ် ၁၀၀-လောက်ဆိုရင် ဒီသာသနာ ကွယ်သွားမှာ သေချာတယ်။ သင်ကြားပို့ချမှု မရှိရင် မဂ်တရား ဖိုလ်တရားကို မသိနိုင်သဖြင့် မဂ်ဖိုလ်လဲ မဆိုက်နိုင်ဘူး။ နောက်တော့ အကုန်လုံး ပျောက်ကုန်မယ်။

အဲဒီတော့ ပရိယတ္တိတွေကလဲ သာသနာတည်တံ့ရေးမှာ ပဓာန၊ အဲဒါကြောင့် အနည်းငယ်မျှလှူကြတဲ့ ပုဂ္ဂိုလ်တွေလို ကြီးကျယ်ချမ်းသာသော ကောင်းကျိုးများ ပေးနိုင်စွမ်းရှိတဲ့အတွက် သံဃာတော်များလဲ သရဏံ-သရဏမည်ပါပေ၏။

မကောင်းရာ တားပြီး ကောင်းရာညွှန်ကြားလို့ ဗုဒ္ဓရှင်တော်သည် တို့ရဲ့ ကိုးကွယ်ရာ သရဏ။
ဓမ္မသည် ဘ၀အခက်အခဲကို ကျော်လွှားစေနိုင်တယ်။ စိတ်ပင်ပန်းတဲ့အခါလဲ သက်သာမှုကို ရစေနိုင်တယ်။ အဲဒါကြောင့် ဒီဓမ္မလဲပဲ သရဏ။
သံဃာတော်များကိုလည်း နည်းနည်းလေးလှူ၊ များစွာသော ကောင်းကျိုးတွေ တို့တိုင်းပြည် တို့လူမျိုးကို ပေးနိုင်စွမ်းရှိတယ်။ ဒါကြောင့် သံဃာတော်လဲ သရဏ မည်တယ်။ အဲဒါကို ယုံပြီလား။ ယုံပြီဆိုရင် သဒ္ဓါရတယ်။ အဲဒီသဒ္ဓါတရားကို အခြေခံပြီးတော့ ရတနာ ၃-ပါးသည်သာလျှင် ကိုးကွယ်ရာဆိုရင် ဒီပုဂ္ဂိုလ် အယူမှန်သွားပြီ။ ဒါ ရတနတ္တယသမ္မာဒိဋ္ဌိရယ်လို့ ကောင်းစွာမသွေ မှတ်သားထိုက်ပါပေတော့သတည်း။

( သီတဂူဆရာတော် )

( မြတ်မင်္ဂလာ ၂၀၀၂-ဧပြီလ )

No comments: