Friday, November 13, 2009

ထူးခြားသော စေတနာရှင်

လွန်ခဲ့သော ၁၅-နှစ်ခန့်က ဖြစ်သည်။ ကျွန်တော်သည် ပညာရေးသင်တန်းတခုတွင် သင်တန်းသားတဦးနှင့် ခင်ခင်မင်မင်ရှိခဲ့ဖူးသည်။ ထိုသူငယ်ချင်းပြောပြ၍ သူ၏အဘွားဖြစ်သူ အကြောင်းကို သိခွင့်ရခဲ့ပေသည်။ ယခု သူ၏အဘွားအကြောင်းကို ကျွန်တော်ကတဆင့် ပြန်ပြောပြခြင်း ဖြစ်ပါသည်။

အဘွား၏အမည်ကား (ဒေါ်စိန်ပွင့်) ဟူ၏။ အဘွား အသက် ၅၀-အရွယ်၊ ၁၉၅၇-ခုနှစ်ခန့်က ခင်ပွန်းဖြစ်သူ ကွယ်လွန်ခဲ့သည်။ သားတဦး (ကျွန်တော့သူငယ်ချင်း၏ ဖခင်) သာရှိသည်။ သို့သော် သားဖြစ်သူနှင့်လည်း အတူမနေ။ မိမိဘာသာ သင့်သလို လုပ်ကိုင်စားသောက်နေထိုင်ခဲ့သည်ဟု ဆို၏။

အဘွား ဒေါ်စိန်ပွင့်တွင် ကောင်းမြတ်သော စေတနာရှိသည်။ ငယ်စဉ်ကတည်းက သူတပါးကို ကျွေးချင်၊ မွေးချင်သည်။ နှမြောတွန့်တိုမှု ၀န်တိုမှု မရှိပေ။ ဤသို့ဖြင့် တဦးတည်း နေလာရသောဘ၀တွင် ရှိပြီးသား စေတနာကောင်းပေါ်တွင် ထပ်ဆင့်၍ မွန်မြတ်သန့်စင်လှသော အလုပ်တခုကို ဆုံးဖြတ်ချက်ချ၍ လုပ်ကိုင်ခဲ့သည်။

၎င်းအလုပ်ကား အခြားမဟုတ်ပါ။ ဆက်ရက်များ၊ စာကလေးများကို ကရုဏာထား ကျွေးမွေးခြင်းဖြစ်၏။ အဘွားသည် နံနက်တုံးခေါက်လျှင် အိပ်ရာ ထသည်။ ဆွမ်းချက်သည်။ ထို့နောက် ဆွမ်းကပ်သည်။ ဘုရားရှိခိုးသည်။ တတ်သိသရွေ့မေတ္တာပို့သည်။ ညချမ်းအခါတွင်လည်း ၀တ်မပျက်ခဲ့ပါ။

မိုးစင်စင်လင်းသောအခါ ငှက်ကလေးများကို အစာကျွေးသည်။ ငှက်ကလေးများ တဖွဲ့ပြီးတဖွဲ့လာ၍ စားသောက်ကြသည်။ အဘွားကို မကြောက်ကြ။ ကျွေးစတုန်းကဖြင့် ငှက်ကလေးများသည် အဘွားကိုကြောက်သဖြင့် အနားသို့ မကပ်ရဲကြပေ။ အတော်ကြာ၍ ရန်မမူမှန်း သိလာသောအခါ အဘွား၏အနားသို့ ချဉ်းကပ်လာကြသည်။ ရဲရဲဝံ့ဝံ့ စားသောက်ကြ၏။

အဘွား၏ ကုသိုလ်ရေး လုပ်ဆောင်ချက်များတွင် ရွာဦးကျောင်းမှ သံဃာတော်များနှင့် ကိုရင်များကို ဆွမ်းလောင်းလှူခြင်းလည်း ပါဝင်သည်။ ဤတွင် ကျွန်တော့သူငယ်ချင်း ပြောပြသောစကားကို သတိရမိပါသည်။ ဤစာကို ရေးမိသည်မှာလည်း သူငယ်ချင်း၏ အောက်ပါစကားကြောင့်ပင် ဖြစ်သည်။

အဘွားက ငှက်ကလေးတွေ အစာကျွေးတယ်ဆိုတော့ လုပ်ရိုးလုပ်စဉ် မမှတ်ပါနဲ့။ အိမ်မှာရှိတာကို လွယ်လွယ်ကူကူယူပြီး ကျွေးတာမျိုး မဟုတ်ဘူးဗျ။ နွေရောက်ရင် အဘွားက တောင်းကလေးတလုံးနဲ့ လယ်ကွက်တွေထဲမှာ စပါးနှံတွေ ကောက်သင်းကောက်တယ်။ နွေဆို စပါး ၅-တင်း ၆-တင်းလောက်ရတယ်။ ဒီစပါးတွေကို သိမ်းထားပြီး မိုးရာသီ ငှက်ကလေးတွေ အစာရှာခက်တဲ့ အချိန်မှာ စွန့်ကြဲကျွေးတော့တာပဲဗျို့။ ငှက်ကလေးတွေ စားသောက် ဆူညံနေတာကိုကြည့်ပြီး တနွေလုံး မောခဲ့သမျှ အမောပြေသွားတာပဲတဲ့။

ဤကဲ့သို့ ပင်ပင်ပန်းပန်း ရှာဖွေ၍ လှူခဲ့သော ကုသိုလ်ကောင်းမှုကြောင့်ဟု ယူဆရပေမည်။ အဘယ့်ကြောင့်ဆိုသော် ၁၉၆၇-ခုနှစ်က တနိုင်ငံလုံး စပါးစိုက်ခင်းများ ပိုးကျသည်။ စပါးအထွက်ညံ့သဖြင့် ဆန်ဈေး အလွန်ကြီးခဲ့သည်။

ထိုအချိန်တွင် အဘွားဒေါ်စိန်ပွင့်သည် အသက် ၆၀-ခန့် ရှိပါပြီ။ သားဖြစ်သူမှာလည်း သူ့မိသားစုပင် ထမင်းချက်ရန် ဆန်မရှိပါ။ မိခင်ဖြစ်သူအတွက် ဆန်ဝယ်ပေးချင်သည့်တိုင် လွယ်လွယ်နှင့် ၀ယ်မရနိုင်ပါ။ သို့သော် အဘွားဒေါ်စိန်ပွင့်ကား ဒုက္ခမဖြစ်ခဲ့ပါ။ လယ်သမားအချို့က မကြာခဏ ဆန်များလာပို့သည်။ အဘွားစား၍ပင် မကုန်၊ အိမ်နီးချင်း ကလေးအချို့နှင့် နွမ်းပါးသူ အဘိုး အဘွား နှစ်ဦးကိုပင် ခေါ်၍ ကျွေးလိုက်နိုင်သေးသည်။

အဘွားဒေါ်စိန်ပွင့်သည် သတ္တ၀ါတို့အပေါ် ထားရှိသော အလွန်မြင့်မြတ်ဖြူစင်သည့် ကြီးမားသော စေတနာအဟုန်ကြောင့် အစားအစာ အလွန်ရှားပါးသောကာလမျိုးမှာပင် မပူမပင် ၀၀လင်လင် စားသောက်ခဲ့ရသည်ဟု လူအများက လက်ခံပြောဆိုခဲ့ကြသည်ဟု ဆိုပါသည်။

( မောင်သောင်းဝင်း-စစ်ကွင်း)
( မြတ်မင်္ဂလာ ၂၀၀၂-မတ်လ)

1 comment:

Hnin said...

အခုလို အင်မတန် တန်ဖိုးရှိတဲ့ article များကို မျှဝေပေးနေတဲ့ လူကြီးမင်း ကို အထူးကျေးဇူးတင်ပါတယ်။ ကျွန်နှုပ် သည် ယခု လူကြီးမင်း ၏ blog ကို ပုံမှန်လာရောက် ဖတ်ရှုသူတယောက်ပါ။ ဆက်လက် ပြီးလဲ အခုလို ဘာသာရေး နှင့် ယဉ်ကျေးမှုစာပေများကို မျှဝေပေးနိုင်ပါစေလို့ ဆုတောင်လျှက်။