Sunday, November 1, 2009

တူသောအကျိုးပေး

ကျွန်တော်တို့ ကျေးရွာလေးသည် ပဲခူးတိုင်း၊ လက်ပံတန်း မြို့နယ်အပိုင် လက်ပံတန်း သာရဝေါသွား မီးရထားလမ်းနံဘေးတွင် တည်ရှိသည်။ ရွာရှိ အချို့လူငယ်များသည် လမိုက်ရက်ညများတွင် အိမ်မွေးကြောင်များကို ရှာဖွေသတ်ဖြတ် စားသောက်လေ့ရှိပါသည်။ အထူးသဖြင့် မင်္ဂလာဆောင်ညများတွင် အုပ်စုလိုက် ကြောင်လိုက် ထွက်ကြသည်။ ရရှိလာသော ကြောင်များကို ညတွင်းချင်းပင် ချက်၍ အရက်နှင့် မြည်းလေ့ရှိပါသည်။

ကြောင်လိုက်ရာတွင်လည်း လူနှစ်ဦး သုံးဦး အပြင် ခွေးများပါ ခေါ်ဆောင်သွားကြသည်။ ရွာနှင့် အတော်ဝေးဝေး အစာရှာထွက်သော ကြောင်ကို လူနှင့်ခွေးများက ညှပ်၍ လိုက်သောအခါ မပြေးသာသည့်အဆုံး နီးစပ်ရာ သစ်ပင်ပေါ်သို့ တက်ပြေးကြရှာသည်။ ထိုအခါ ခွေးက အပင်အောက်မှစောင့်၍ သခင်ကိုအသံပြု ခေါ်လေ့ရှိသည်။ လူက အပင်ပေါ်တက်၍ လက်လှမ်းမီလျှင် တုတ်ဖြင့် ရိုက်ချ လက်လှမ်းမမီလျှင် လောက်လေးခွဖြင့် ပစ်ချရပါသည်။ ပစ်ခတ်ရာတွင်လည်း နှာတံအပေါ် မျက်ခုံးနှစ်ဖက်ကြား ချိန်ပစ်မှသာ သေချာပေါက် ရပါသည်။

ရွာထဲတွင် နိုင်ဇော်ဆိုသူသည် လောက်လေးခွပစ် အလွန်တော်သည်။ ကြောင်လိုက်ရာတွင် နှာတံအပေါ် မျက်ခုံးနှစ်ဖက်ကြားကို အမြဲတမ်း မှန်အောင်ပစ်နိုင်သူ ဖြစ်သည်။ ထိုနည်းဖြင့် ကြောင်းများကို ပစ်ခတ်စားသောက် ရောင်းချခဲ့သည်မှာ မနည်းတော့ပေ။

တနေ့တွင် နိုင်ဇော်တယောက် ထင်းပေါက်ရာတွင် သစ်စလွင့်စဉ်၍ နှာတံအထက် မျက်ခုံးနှစ်ဖက်ကြားကို ထိမှန်သွားသည်။ ဖြစ်စတွင် သွေးအနည်းငယ်စို့၍ နာကျင်မှု အနည်းငယ်သာ ဖြစ်ခဲ့သည်။ လေးရက်ခန့်ကြာသောအခါ ထိုနေရာမှ လောက်စာလုံးခန့် ဘုကြီးထွက်လာပါသည်။

မောင်နိုင်ဇော် ဘုထွက်သည့်နေရာမှာကဲ့သို့ ရွာထဲမှ လူငယ်တယောက်လဲ သွေးရိုးသားရိုး ဖြစ်ပေါ်လာသော ဘုကို ဆရာဝန်ထံ ခွဲစိတ်ကုသခံယူခဲ့ရာ ပျောက်ကင်းခဲ့ဖူးသည်။ နိုင်ဇော်လည်း ထိုဆရာဝန်ထံတွင် ခွဲစိတ်ကုသ ခံယူခဲ့ပါသည်။ ခွဲစိတ်ပြီးခါစတွင် ပျောက်ကင်းသွားသလို ရှိသည်။ ရက်နှစ်ဆယ်ခန့် ကြာသောအခါ တဖြည်းဖြည်း ထိုနေရာမှပင် ဘုထပ်မံ ထွက်ရှိလာသည်။ ပထမထွက်ခဲ့သော ဘုထက်ပင် ကြီးလာပါသည်။ နိုင်ဇော်တယောက် လက်ငင်း ၀ဋ်လည်လာပြီဆိုသည်ကို သတိထားမိဟန် မတူ။ ကြောင်လိုက်မြဲ လိုက်လျက်ပင်။

ထိုကဲ့သို့ ဖြစ်ရခြင်းသည် ၀ဋ်နာ ကံနာဖြစ်၍ ခွဲစိတ်ကုသသော်လည်း ပျောက်မသွားဘဲ ၀ဋ်မှာအမြဲ ငရဲမှာအပ ဆိုသည့်အတိုင်း တူသောအကျိုး တန်ပြန်ခံစားရသည်ဟု ယုံကြည်ယူဆမိပါသည်။

( မြင့်ထွဋ်ခေါင် )

( မြတ်မင်္ဂလာ ၂၀၀၂-ခု ဇန်န၀ါရီလ )

No comments: