Monday, December 7, 2009

ထေရ၀ါဒဗုဒ္ဓဘာသာ နှင့် မဟာယာနဗုဒ္ဓဘာသာ နှိုင်းယှဉ်ဝေဖန်ချက် ( ၂၁ )

ဒီကနေ့ ဓမ္မသဘင်မှာလဲ ဝေဿ၀ဏ်နတ်မင်းကြီး စီမံသွားတဲ့ အာဋာနာဋိယသုတ္တန်အကြောင်းကိုပဲ ဆက်ဟော ပါမယ်။ ဒီသုတ်ဟာ ပရိတ်ကြီး ၁၁-သုတ်ထဲမှာ အပ္ပသန္နေဟိ နာထဿ၊ သာသာနေ သာဓုသမ္မတေ-လို့ ဒီလိုစလာပါတယ်။ အကြင်အာဋာနာဋိယသုတ်ပရိတ်ကို ကြီးမြတ်သော လုံ့လ၀ီရိယရှိတော်မူသော ဘုရားရှင် ကိုယ်တော်မြတ်က ဟောကြားတော်မူ၏လို့ ဆိုတယ်။ တကယ်တော့ အဲဒါ ဘုရားဟောတာမဟုတ်ပါဘူး။ ဝေဿ၀ဏ်နတ်မင်းကြီးက ဘုရားထံလာပြီး လျှောက်သွားတာပါ။ အဲဒီပရိတ်မှာလဲ ဘယ်ကစသလဲဆိုရင် ၀ိပဿိဿ စ နမတ္ထု၊ စက္ခုမန္တဿ သိရီမတော-၀ိပဿီမြတ်စွာဘုရားအား ရှိခိုးပါ၏။ ဒီကစတယ်။ ဘုရားရှိခိုးနဲ့စတယ်။ နတ်ရှိခိုးတာမပါဘူး။ အဲဒါ စိစိစစ်စစ် လေ့လာမယ်ဆိုရင် အလွန်မွန်မြတ်တဲ့ စာဟောင်းတွေဖြစ်တယ်။ ဗုဒ္ဓဘာသာမှာ ရှိထားတာကို ဘုန်းကြီးတို့ပရိသတ်က များသောအားဖြင့် အသုံးမပြုမိကြဘူး။ အဲဒီစာတွေရဲ့ ပြောင်းပြန်ကို သွားပြီးတော့ သုံးနေတဲ့အတွက် ဘုန်းကြီးတို့ ဘာသာရေးက တဖြည်းဖြည်း အောက်တန်းကျသွားတယ်။

ဝိပဿိဿ စ နမတ္ထု၊ စက္ခုမန္တဿ သိရီမတော။
သိခိဿပိ စ နမတ္ထု၊ သဗ္ဗဘူတာ နုကမ္ပိနော။
ဝေဿဘုဿ စ နမတ္ထု၊ နှာတကဿ တပဿိနော။
ဝိပဿီအစရှိတဲ့ ဘုရားများကို ရှိခိုးတာပဲ။ နောက်ဆုံးကျတော့မှ သကျပုတ္တဿ သိရီမတော-ဆိုပြီးတော့ ဂေါတမဘုရားရှင် ကိုယ်တော်မြတ်ကို ရှိခိုးတယ်။ ၀ိပဿီ၊ သိခီ၊ ဝေဿဘူ၊ ကကုသန်၊ ကောဏာဂုံ၊ ကဿပ၊ ဂေါတမ ဘုရားခုနစ်ဆူတို့ကို ရှိခိုးပါ၏။ ရှိခိုးပုံကြီးကိုလဲ ကြည့်လိုက်ပါဦး။

သယနေ အာသနေ ဌာနေ၊ ဂမနေစာပိ သဗ္ဗဒါ။ ဒီလိုရှိခိုးတာ။ တခါတလေလေး ထိုင်ပြီးတော့ အိပ်ရာထချိန် လေးမှာ ရှိခိုးတာမဟုတ်ဘူး။
သယနေစ-အိပ်နေတဲ့အခါမှာလဲပဲ အဲဒီ သတ္တာနံ ဗုဒ္ဓါနံ-ဘုရားခုနစ်ဆူတို့ကို။ နမာမိ-ရှိခိုးပါ၏။
အာသနေစ-ထိုင်နေတုန်းမှာလဲပဲ အဲဒီဘုရားခုနစ်ဆူတို့ကို။ နမာမိ-ရှိခိုးပါ၏။
ဂမနေစ-သွားနေတုန်းမှာလဲပဲ ရှိခိုးပါ၏။
ဌာနေစ-ရပ်နေတုန်းမှာလဲပဲ ဘုရားခုနစ်ဆူကို ရှိခိုးပါ၏။
အဲဒီတော့ သွားလဲပဲ ရှိခိုးမယ်။ ထိုင်နေလဲ ရှိခိုးမယ်။ ရပ်နေလဲ ရှိခိုးမယ်။ အိပ်နေလဲ ရှိခိုးမယ်။ ဘုရားက တဆူတည်း မဟုတ်ဘူး။ ခုနစ်ဆူ။

အဲဒီ ဘုရားခုနစ်ဆူကို သွား၊ ရပ်၊ ထိုင်၊ လျောင်း ဣရိယာပုထ် ၄-ပါးစလုံးမှာ ရှိခိုးမယ်။ ၄-ပါးစလုံးကို စိတ်ထဲမှာ ရှိခိုးတာလား။ နှုတ်က မမြွက်ဘူးလားဆိုတော့ မနသာ- ၀စသာ-အပြည့်အစုံပါတယ်။ မနသာစ-စိတ်ဖြင့်၎င်း။ ၀စသာစ-နှုတ်ဖြင့်၎င်း။ ကာယေနစ-ကိုယ်ဖြင့်၎င်း။ သတ္တာနံ ဗုဒ္ဓါနံ-ဘုရားခုနစ်ဆူတို့ကို။ နမာမိ-ရှိခိုးပါ၏။ အဲဒီတော့ ဘုရားခုနစ်ဆူလုံးကို ဣရိယာပုထ် ၄-ပါးစလုံးမှာ ကိုယ် နှုတ် စိတ် ၃-ပါးလုံးနဲ့ ရှိခိုးနေပါတယ်တဲ့။

အဲဒီလို သာသနာကို မှီခိုကြည်ညိုနေတဲ့ ပုဂ္ဂိုလ်တွေကိုလဲပဲ ဒီနတ်မင်းကြီးများက အမြဲတမ်း စောင့်ရှောက် ပါမယ်ဘုရားလို့ ဝေဿ၀ဏ်နတ်မင်းကြီးက ဘုရားကို လျှောက်သွားတယ်။ ဝေဿ၀ဏ်ကလဲ သူ့သဘောနဲ့သူ လာလျှောက်တာမဟုတ်ဘူး။ သိကြားမင်းက လျှောက်ခိုင်းတာပါ။ သာသနာကို မှီခိုကြည်ညိုနေကြတဲ့
ပုဂ္ဂိုလ်တွေကို အရပ်လေးမျက်နှာမှာရှိတဲ့ နတ်မင်းကြီး ၄-ယောက်က စောင့်ရှောက်ရမယ်။ သူတို့က မင်းတို့ကို ရှိခိုးရမယ်ဆိုတာ မပါဘူး။ ငှက်ပျောသီး၊ အုန်းသီး-တင်မယ်လဲ မပါဘူး။ ကန်တော့ပွဲ ထိုးမယ်လဲ မပါဘူး။ မင်းတို့တတွေ တို့ကို စောင့်ရမယ်ပဲပါတယ်။ ဘယ်သူ့အမိန့်နဲ့ စောင့်ရမှာလဲ အဆင့်ဆင့်ပြောရင် ဘုရားရှင်ရဲ့ အမိန့်။ ဘုရားကို ဘယ်သူက ဒီလိုလာပြီး လျှောက်သွားသလဲ။ ဝေဿ၀ဏ်နတ်မင်း။ ဝေဿ၀ဏ်ကို ဘယ်သူက တာဝန်ပေးသလဲ သိကြားမင်း။ အဲဒီလို သိကြားမင်းတို့ ဝေဿ၀ဏ်နတ်မင်းတို့၊ ဘုရားရှင်တို့ရဲ့အမိန့်နဲ့ စေလွှတ်တာဖြစ်တော့ တို့ကို စောင့်ရမယ်ဆိုတော့ ကျန်တဲ့ လောကပါလနတ်မင်းကြီးတွေကလဲ မနေရဲဘူး။ စောင့်ရတယ်။

ဗုဒ္ဓဘာသာမှာ နတ်ကိုးကွယ်မှု ရှိသလားဆိုရင် ဘုန်းကြီးတို့ကတော့ ကာကွယ်ပြီးတော့ ပြောနေတာပဲ။ နတ်ကိုးကွယ်ခြင်း မရှိပါဘူးလို့တော့ ပြောနေတယ်။ အာဋာနာဋိယသုတ်က ဘယ်လိုလဲဆိုရင် ဘုန်းကြီးက ဒီလိုပဲ ရှင်းချင်တယ်။ မဟာသမယသုတ် ဘယ်လိုစသလဲဆိုရင် အဲဒါကတော့ နောက်တပိုင်း၊ နောက်တနေရာမှာ တခါပြောပြမယ်။ ခု အာဋာနာဋိယ သုတ်သဘောကတော့ ဒီအတိုင်းပဲ နဂါး၊ ဂဠုန်၊ ကုမ္ဘဏ်၊ ယက္ခ၊ ဂန္ဓဗ္ဗ ဒါ ပူဇော်ဖို့ မဟုတ်ဘူး။ ရှိခိုးဖို့လဲ မဟုတ်ဘူး။ ဘုရားခုနစ်ဆူတို့ရဲ့ အမိန့်။ ဒါ့အပြင် သိကြားနဲ့ ဝေဿ၀ဏ်တို့ရဲ့ အမိန့်နဲ့ မင်းတို့တတွေ တို့ကိုစောင့်ရှောက်။ ဒါပဲ လုပ်လိုက်ရုံ ရှိတာပဲ။ ငှက်ပျောသီး၊ အုန်းသီးလဲ သူတို့အတွက် တင်ဖို့ ဘာမှမလိုပါဘူး။ အဲဒါ ဗုဒ္ဓဘာသာနဲ့ နတ်၊ နတ်နဲ့ ဗုဒ္ဓဘာသာ၊ ဒါထက် စိတ်ဝင်စားစရာတွေလဲ အများကြီး ရှိဦးမှာပေါ့။ အာဋာနာဋိယသဘောကတော့ ဒီလောက်ပဲ ရှိတယ်။

အပ္ပသန္နေဟိ နာထဿ၊ သာသနေ သာဓု သမ္မတေ။
စိတ်ကောင်းရှိတဲ့ သူတော်ကောင်း အကုန်လုံးက အကောင်းသမုတ်တဲ့ ဒီသာသနာတော်ကို နဂါး၊ ဂဠုန်၊ ကုမ္ဘဏ်၊ ယက္ခ၊ ဂန္ဓဗ္ဗတွေက မကြည်ညိုဘူးတဲ့။ ဝေဿ၀ဏ်နတ်ရဲ့ လျှောက်ထားချက်ထဲမှာ ဒီလိုကို ပါတယ်။ အဲဒီတော့ မကြည်ညိုတဲ့ကောင်တွေ ကြည်ညိုအောင် လုပ်ဖို့ကတော့ ခက်တယ်။ ဒါကြောင့် အမိန့်နဲ့ စောင့်ရှောက်ခိုင်းမှပဲ ဆိုပြီး ကြမ်းတမ်းတဲ့ အကောင်တွေကို စောင့်ရှောက်ဖို့။ နှိမ်နင်းဖို့ အတွက် ဒီသုတ်ကို စီမံတာဖြစ်တယ်။ ဒါကြောင့်ကို အမိန့်ပေးတဲ့သုတ်လို့ ခေါ်ဆိုရမှာဖြစ်တယ်။

ဒီလိုဆိုရင် ဒီကနေ့ဗုဒ္ဓဘာသာ သူတော်စင်တွေ မိမိတို့ကိုးကွယ်ရာမှာ အဓိကက ဘာလဲဆိုရင် အမှန်သိဖို့က အရေးကြီးတယ်။ အမှန်တရားကို သိပြီဆိုလို့ရှိရင် ဘာသာရေးက မှန်သွားတာပဲ။ ဒါကြောင့် သဒ္ဓါ-ဆိုတဲ့ ယုံကြည်မှုသည် အသိဉာဏ်မှာ အခြေခံတယ်။ ဗုဒ္ဓဘာသာက သဒ္ဓါတရားနဲ့ အသိဉာဏ် တွဲသွားမှ။ ဒီနှစ်ခု ဟန်ချက်ညီမှ ဘာသာရေး အဆင့်အတန်း မြင့်တယ်။ ဒါကို အားလုံးနားလည်သင့်တယ်။

ရဟန်းတို့-အကြင်သူသည် ဗုဒ္ဓကို၎င်း၊ ဓမ္မကို၎င်း၊ သံဃာကို၎င်း ကိုးကွယ်ခြင်းသို့ရောက်၏။ ထိုဘုရား တရား သံဃာကို ကိုးကွယ်ခြင်းသို့ ရောက်နေသော ပုဂ္ဂိုလ်သည် မွန်မြတ်သော အရိယသစ္စာ ၄-ပါးကို မှန်ကန်သော ပညာဖြင့် မြင်၏။
ဒုက္ခကိုလည်း မြင်၏။
ဒုက္ခ၏ အကြောင်းဇစ်မြစ်ကိုလည်း မြင်၏။
ဒုက္ခကို လွန်မြောက်ပုံကိုလည်း မြင်၏။
ဒုက္ခ၏ ချုပ်ငြိမ်းကြောင်း အကျင့်ကောင်း နည်းကောင်းကိုလည်းမြင်၏။
သစ္စာ ၄-ပါးတရားကို မှန်ကန်သော ဉာဏ်ပညာဖြင့် မြင်၏။ ဤကဲ့သို့ သစ္စာကို မြင်ထားတဲ့ ရတနာ ၃-ရပ်ကို ဆည်းကပ်ကိုးကွယ်ခြင်းသည် ဘေးရန်ကင်း၏။ ဤကဲ့သို့ ကိုးကွယ်ခြင်းသည် မွန်မြတ်ပါပေ၏။ ဤကဲ့သို့သော ကိုးကွယ်ခြင်းကိုအကြောင်းပြု၍ သတ္တ၀ါအပေါင်းတို့သည် ဒုက္ခအပေါင်းမှာ ကောင်းစွာမသွေ လွတ်မြောက်နိုင်ကြ လေကုသတည်း။

( သီတဂူ ဆရာတော်)
( မြတ်မင်္ဂလာ ၂၀၀၂-ခု သြဂုတ်လ)

No comments: