Wednesday, December 9, 2009

စေတနာမှန်သော ကံတရား

အချိန်ကာလအားဖြင့် မကြာသေးပါ။ တနေ့နံနက်စောစော ၄-နာရီခန့် အိမ်တံခါးများ မဖွင့်သေးမီ အချိန်၌ ဖြစ်သည်။ စာရေးသူကို အိမ်ရှေ့က ခေါ်သံကြား၍ တံခါးဖွင့်ပေးလိုက်သည်။ ညီအမတရင်းတမျှ ရင်းနှီးသော ကျောင်းဆရာမနှင့်အတူ တခါမျှမမြင်ဘူးသော အမျိုးသမီးနှစ်ယောက်ကိုပါ တွေ့လိုက်ရသည်။

ကျောင်းဆရာမသည် ကသာ အထက်ဆန်မည့် မော်တော်ဖြင့် ခရီးဆက်ကြမည့် အမျိုးသမီးနှစ်ယောက်ကို မော်တော်ဆိပ်နှင့်နီးရာ စာရေးသူ၏အိမ်တွင် ခေတ္တတည်းခိုနေခဲ့ရန် မှာကြားသည်။ ထို့နောက် စာရေးသူထံ အပ်နှံ၍ သူ့အိမ်သူ ပြန်သွားပါတော့သည်။

တခါမှမတွေ့ဘူးသော်လည်း အမျိုးသမီး နှစ်ယောက်ထဲမှ အသက် ၃၀-၀န်းကျင်ခန့်ရှိ အသားဖြူဖြူချောချောနှင့် အမျိုးသမီးကို စာရေးသူသည် မြင်မြင်ချင်း ရင်းနှီးချစ်ခင်သွားခဲ့မိသည်။ ထိုအမျိုးသမီးမှာ ရန်ကုန်မြို့ စိတ်ရောဂါအထူးကု ဆေးရုံကြီးမှ ဆရာမတဦးဖြစ်သည်။ သူ့မှာပါသည့် ၀န်ထမ်းကဒ်ကို ထုတ်ပြ၍ စာရေးသူ သိခွင့်ရခဲ့သည်။

ဆရာမလေး ပြောပြချက်အရ သူနှင့်အတူ ပါလာသည့် အမျိုးသမီးမှာ လွန်ခဲ့သည့် တနှစ်ခန့်က ရန်ကုန်မြို့လယ်တွင် စိတ်ဝေဒနာဖြင့် ဟိုသွား၊ သည်သွား ဖြစ်နေခဲ့ရှာသူ ဖြစ်သည်။ စိတ်ရောဂါ အထုးကုဆေးရုံမှ ဆရာဝန် ဆရာမများ၏ ကြိုးစားကုသပေးခဲ့မှုတို့ကြောင့် ထိုအမျိုးသမီးသည် တနှစ်မျှအကြာတွင် သူ့မိသားစုကို ပြန်လည်သတိရလာသည်။ သူ့၌ ကလေးသုံးယောက် ရှိကြောင်းနှင့် သူ့အိမ်သို့ပြန်ချင်ကြောင်း သက်ဆိုင်ရာ တို့ကို ပြောပြပူဆာသည်။ သို့ဖြင့် ဆရာမက သနားကြင်နာ၍ ကိုယ်ချင်းစာမိကာ ထိုအမျိုးသမီးအတွက် တာဝန်ယူခဲ့သည်။ သူ၏ အိမ်ရှိရာအရပ်သို့ မေတ္တာဖြင့် လိုက်လံပို့ဆောင်ပေးခြင်း ဖြစ်သည်။

ကံကတော့ ကောင်းပါတယ် အမရယ်၊ ကိုယ့်စေတနာ ကိုယ့်ကို ပြန်အကျိုးပေးတယ်လို့ ဆိုရပါမယ်။ အခု အမဆီလိုက်ပို့ပြီး အပ်သွားတဲ့ ကျောင်းဆရာမနဲ့ မန္တလေးဘူတာကြီးမှာ ကျွန်မတို့ တွေ့ကြပြီး သူက တလမ်းလုံး ကူညီခဲ့တယ်။ အခုလဲ အမရဲ့အိမ်မှာ မသိကျွမ်းဘဲနဲ့ လုံလုံခြုံခြုံ အိပ်ရ၊ တည်းရတယ်။ အမပဲ စဉ်းစားကြည့်လေ၊ စိတ်ဝေဒနာ ပျောက်ခါစ-လူ ပြောစကားအရ သူနေတဲ့ရွာကို ယုံရအခက်၊ မယုံရအခက်ပဲ။ နောက်ပြီး ဒီအရပ်၊ ဒီဒေသကို ကျွန်မ တခါမှ မရောက်ဖူးဘူး။ သူ့ခမျာ မိသားစုနဲ့ တွေ့ရတော့မယ်ဆိုတဲ့ အတွေးနဲ့ စိတ်အရမ်း လှုပ်ရှားပြီး အချိန်နေရာမရွေး စိတ်ပြန်ဖောက်သွားနိုင်တယ် မဟုတ်လား။ တလမ်းလုံး သူ့ကို ဂရုတစိုက် ကြည့်ပြီး ဆေးတိုက်လာခဲ့ရတယ်။ ကျွန်မမှာ တာဝန်သိပ်ကြီးတာ။ သူ့မိသားစုနဲ့ ပြည်လည်ပေါင်းစည်းစေချင်တဲ့ စေတနာအရင်းခံကြောင့်သာ ခုလိုလိုက်ပို့ဖြစ်ခဲ့ရတာပါ-ဟု ဆရာမက ပြောပြသည်။ ထို့နောက် မနက် ၈-နာရီခန့်တွင် သူတို့သည် ခရီးဆက်ကြသည်။ ကျွန်မလည်းသူတို့ကို တတ်စွမ်းသမျှ ကူညီခဲ့ပါသည်။

စေတနာအရင်းခံမှန်သော ဆရာမလေး ကံကောင်းရှာပါပေသည်။ စိတ်ဝေဒနာပျောက်ကင်းစ အမျိုးသမီးကို သူ၏ရွာမှ မိသားစုထံ အရောက်ပို့ပေးနိုင်ခဲ့သည်။ ဆရာမလေးကိုလည်း ထိုရွာမှ ကျောင်းဆရာမ တဦးက အပြန်ခရီးကို လိုက်ပို့ပေးသည်။ သူတို့ရွာကထွက်သည့် ပစ္စည်းများကိုလည်း လက်ဆောင်ပေးလိုက်ကြ သေးသည်။ စိတ်ရောဂါ အထူးကုဆေးရုံမှ ဆရာမလေး၏ အမည်မှာ ဒေါ်အေးအေးသိန်း ဖြစ်ပါသည်။

( ရွှေမြန်မာ-ကသာ)
( မြတ်မင်္ဂလာ ၂၀၀၂-ခု သြဂုတ်လ )

No comments: