Friday, December 11, 2009

ဘာသာရေး ပြဿနာ ( ၉၄ )

( ဘဒ္ဒန္တ တိလောကသာရ ဖြေသည် )

(မေး) (ယမကပြာဋိဟာ)
အရှင်ဘုရား မြတ်စွာဘုရား တန်ခိုးပြာဋိဟာ ပြတော်မူသောအခါ ရေမီးအစုံစုံဖြင့် ပြတော်မူသည်ဟု သိရပါသည်။ ပဋ္ဌာန်းကျမ်းကို ဆင်ခြင်သဖြင့် ရောင်ခြည်တော်ခြောက်ပါး ကွန့်မြူးသည့်အခါ၌လည်း ရေမီးအစုံစုံ ပါဝင်သည်ဟု သိရပါသည်။ ထို့ကြောင့် ထိုရေမီးအစုံစုံ နှစ်မျိုးတို့ တူ-မတူကို ဖြေကြားပေးတော်မူပါဘုရား။
(အရှင်ပညာသီရိ-ဓမ္မရက္ခိတကျောင်း၊ မိတ္ထီလာမြို့နယ်)

(ဖြေ)
မြတ်စွာဘုရားသည် ရေမီးအစုံစုံဖြစ်သော ယမကပြာဋိဟာကို ကပိလ၀တ်ပြည် ဆွေတော်မျိုးတော်တို့အလယ်၌ တကြိမ်၊ သာဝတ္ထိပြည် ကဏ္ဍသရက်ပင်ဖြူ၌ တကြိမ် အားဖြင့် နှစ်ကြိမ် ပြတော်မူခဲ့ပါသည်။ ထိုရေမီးအစုံစုံ ယမကပြာဋိဟာကို ပြတော်မူရာ၌ ရေအစုံထွက်ရန် အာပေါကသိုဏ်းကို၎င်း။
မီးအစုံထွက်ရန် တေဇောကသိုဏ်းကို၎င်း။ တလှည့်စီ ၀င်စားရပါသည်။ ဘုရားရှင်၏စိတ်တော် မြန်ဆန်လှသဖြင့် ထိုကသိုဏ်းနှစ်မျိုးကြောင့် ဖြစ်ပေါ်လာသော ရေမီးတို့သည် တပြိုင်နက်ကဲ့သို့ ထွက်ကြွကွန့်မြူးလာကြရပါသည်။

ဘုရားဖြစ်တော်မူစ စတုတ္ထသတ္တာဟ၌ ပဋ္ဌာန်းကျမ်းကြီးကို ဆင်ခြင်တော်မူသောအခါ၌ ထွက်သောအရောင်တို့ကား ရေမီးအစုံစုံ တန်ခိုးပြာဋိဟာ မဟုတ်ပါ။ ရောင်ခြည်တော် ခြောက်ပါးတို့သာ ဖြစ်ပါသည်။ ထိုနီလ ပီတ လောဟိတ သြဒါတ မဉ္ဇိဋ္ဌ ပဘဿရ ဟူသော ရောင်ခြည်တော်တို့ကား ပဋ္ဌာန်းကျမ်းတော်မြတ်ကို ဆင်ခြင်တော်မူ၍ နာမ်ဓာတ်၊ ရုပ်ဓာတ်များ ကြည်လင်လျက် အလိုလို ကွန့်မြူးလာခြင်းသာ ဖြစ်ပါသည်။ ကသိုဏ်း အထူးဝင်စားရသည် မဟုတ်ပါ။
********************************************************************************

(မေး) (ဉေယျဓံတရား ငါးပါး)
အရှင်ဘုရား၊ သမ္မာသမ္ဗုဒ္ဓဂုဏ်တော်အဖွင့်မှာ သဗ္ဗဉ်ဉာဏ်အား၊ စွမ်းပကားဖြင့်၊ များသင်္ခါရ၊ ၀ိကာရဟု၊ လက္ခဏပညတ်၊ နိဗ္ဗာန်ဓာတ်ဟု၊ ငါးရပ်သိရန်၊ ဉေယျဓမ်ကို၊ ဖောက်ပြန်မရှိ၊ ကိုယ်တော်တိုင် သိတော်မူသော-ဟု ဆိုထားသည့်အတိုင်း ဉေယျဓံတရား ငါးပါးသည် သဗ္ဗညုတဉာဏ်တော်ကြီး၏ အရာဖြစ်သည်ဟု ယုံကြည်ပါသည်ဘုရား။ ထို့ကြောင့် တရားအားလုံးတို့သည် ဉေယျဓံတရား ငါးပါးထဲသို့ အကျုံးဝင်သွား လိမ့်မည်ဟုလည်း ယုံကြည်မိပါသည်ဘုရား။ သို့ဖြစ်ပါ၍ တပည့်တော်၏ယုံကြည်မှု မှန်သည်-မှားသည်ကို ခွဲခြားပေးပါဘုရား။ တဖန် ဉေယျဓံတရား ငါးပါးတို့မှ တပါးချင်းအလိုက် ခွဲခြား၍ မည်သည့်တရားများဖြင့် ဆက်သွယ်အကျုံးဝင်ပုံကို တပါးချင်းခွဲခြား၍ ရှင်းလင်းချီးမြောက်ပါရန် ရိုသေစွာ လျှောက်ထားအပ်ပါသည် ဘုရား။
(ဦးခင်မောင်တိုး-မဟာတိုး၊ ရေဦးမြို့)

(ဖြေ)
ဉေယျဓံတရား ငါးပါးတွင် သင်္ခါရမှာ အကြောင်းတရားတို့ ပြုပြင်အပ်သည့် ရုပ်တရား၊ နာမ်တရား အားလုံးပင် ဖြစ်သည်။
ဗောဓိပက္ခိယတရား ၃၇-ပါး၏ တရားကိုယ် ၁၄-ပါးတို့လည်း ပါဝင်ခြင်းဖြစ်သည်။ ထို ၁၄-ပါးတို့မှာ ဆန္ဒ၊ လောကုတ္တရာစိတ်၊ တတြမဇ္ဈတ္တတာ၊ သဒ္ဓါ၊ ပဿဒ္ဓိ၊ ပီတိ၊ အမောဟ၊ ၀ိတက်၊ ၀ီရိယ၊ သမ္မာသင်္ကပ္ပ၊ သမ္မာဝါစာ၊ သမ္မာကမ္မန္တ၊ သမ္မာအာဇီဝ၊ စေတသိက်တို့ ဖြစ်သည်။
ဝိကာရလက္ခဏတို့ကား ရုပ်နာမ်တရားတို့၏ အခြင်းအရာ လက္ခဏာမျှသာ ဖြစ်သည်။ ထိုတရားအားလုံးမှ လွတ်သော နိဗ္ဗာန်တရား၊ ပညတ်တရားများနှင့် ညှိသော် သိစရာတရားအားလုံး အကျုံးဝင်သွားတော့သဖြင့် ပြဿနာရှင်၏ ယုံကြည်ယူဆမှု မှန်ကန်ပါသည်။
(ဗောဓိပက္ခိယတရား ၃၇-ပါးနှင့် တရားကိုယ် ၁၄-ပါးတို့ကို နှိုင်းယှဉ်၍ တပါးချင်း မည်သို့ အကျုံးဝင်ပုံကို လေ့လာကြည့်ရှုနိုင်ပါသည်။) အကျယ်ရေးပြနေစရာ လိုမည် မဟုတ်ပါ။
********************************************************************************

(မေး) ( ရုပ်နာမ် အနိစ္စ)
အရှင်ဘုရား၊ တပည့်တော်တို့၏ ရူပက္ခန္ဓာ (၀ါ) ရုပ်တရား အပေါင်းအစုသည် မျက်စိတမှိတ်လျှပ်တပြက် အချိန်တိုင်းမှာ ဖြစ်ပျက်နေသည်ဟု ဆိုပါသည်။ ထိုတွင် ပျက်သွားသော အဏုမြူရုပ်ကလေးများသည် လုံးဝ ဘာမျှ မကျန်ရှိအောင် သေဆုံးပျောက်ပျက်သွားပါသလား။ သိူ့မဟုတ် အဏုမြူရုပ်ကလးများသည် မသေဆုံးနိုင်သည့်သတ္တိဖြင့် အပေါင်းအစု ခန္ဓာအဖြစ်မှ တခုချင်းခွဲထွက်၍ အကန့်အသတ်မဲ့ အလွန်ကျယ်ပြန့်စွာ လွင့်မျောသွားပါသလား။ ၄င်းနှင့်စပ်၍ အနိစ္စတရားကို ဘယ်လို မှတ်ယူရပါ့မလဲဘုရား။ နာမ်တရား၏ အနိစ္စကိုလည်း သိချင်ပါသည်ဘုရား။
(မောင်ထွန်းမြင့်နိုင်)

(ဖြေ)
နာမ်တရားတို့သည် မျက်စိတမှိတ် လျှပ်တပြက်အတွင်း၌ ကုဋေတသိန်း(မက) ပျက်ကြသည်ဟု ဆိုပါသည်။ ပျက်ရာ၌ ဥပါဒ် ဌီ ဘင် ဟု ခဏငယ်သုံးချက်ရှိရာ ခဏငယ်သုံးချက်ပြည့်တိုင်း နာမ်တရားတခု ပျက်ပါသည်။ နောက်ကံအားလျော်စွာ ပြန်ဖြစ်ပါသည်။ ဤသို့ ဖြစ်လိုက် ပျက်လိုက်ဖြင့် နာမ်တရားသည် မျက်စိတမှိတ်အတွင်း ကုဋေတသိန်း(မက) ပျက်သည်။

ပျက်ရာ၌ အကြွင်းအကျန်မရှိ ပျက်၍ အသစ်ပြန်ဖြစ်ကြသည်။ ရုပ်တရားမှာ နာမ်တရား ၁၇-ချက် ပျက်လျှင် ရုပ်တကြိမ် ပျက်သည်။ ခဏငယ် ၅၁-ချက် တကြိမ်ပျက်သည်။ ၄င်းအပျက်မှာလည်း အကြွင်းအကျန်မရှိ ပျက်ခြင်းသာဖြစ်သည်။ ထို့နောက် ရုပ်နာမ်တို့၏ ခဏိကမရဏ ပျက်စီးနေခြင်းကို မှတ်ရပါမည်။ ထိုရုပ်တရားများကို အဏုမြူ ရုပ်ကလေးများဟု မဆိုပါ။
အဏုပြူတခုလျှင် ပရမာဏုပြူ ၁၆-ခုရှိပြီး
ထိုပရမာဏုမြူတခု တခုမှာလည်း အ၀ိနိဗ္ဘောဂရုပ် ၈-ခုစီ ရှိပါသေးသည်။ ထိုမျှ သိမ်မွေ့လှပါသည်။
အဘိဓမ္မာရုပ်ပိုင်းကို လေ့လာသင့်ကြောင်း ပြောကြားလိုပါသည်။
********************************************************************************

(မေး) (ခြင်္သေ့ရုပ်)
အရှင်ဘုရား၊ ဘုရားစေတီ အဆူဆူများ၌ ခြင်္သေ့ရုပ်များ ပြုလုပ်ထားခြင်းအကြောင်းကို ဖြေကြားတော်မူပါဘုရား။
(သောတုဇန အရှင်ဝရသီရိ-ပုဂံ ညောင်ဦး)

(ဖြေ)
ခြင်္သေ့၊ ဆင်၊ သိန္ဓောမြင်းနှင့် နွားလားဥသဘ-ဟူ၍ တိရစ္ဆာန်အာဇာနည် ၄-မျိုးရှိပါသည်။ ၄င်းလေးမျိုးမှာ မိမိအနီး၌ကပ်၍ မိုးကြိုးကျသော်လည်း လန့်ဖျပ်ကြောက်ရွံ့မှု မရှိကြောင်း၊ မည်သည့်အန္တရာယ်ကိုမျှ မကြောက်ရွံ့ကြောင်း အဆိုရှိသည်။

မဇ္ဈိမဒေသ အသောကမင်းကြီးသည် ဓာတ်တော်တိုက်၊ ဘုရားစေတီစသည်များ၌ ထိုတိရစ္ဆာန်အာဇာနည် ၄-မျိုး ရုပ်တုများကို (တနေရာလျှင် တမျိုး၊ အချို့နေရာတွင် လေးမျိုးလုံး) အစောင့်အရှောက်အဖြစ် ထားလေ့ရှိသည်။ မြန်မာနိုင်ငံ ဗုဒ္ဓသာသနာတွင် ခြင်္သေ့ရုပ်ကိုသာ အသုံးပြုလေ့ရှိပါသည်။ ထို့ကြောင့် ဘုရားအနီးတွင်၎င်း၊ ဘုရားဝင်း တန်ဆောင်းများတွင်၎င်း၊ (ဘုရားဘက်ကို မလှည့်၊ ၀င်လာသူများဘက်သို့ လှည့်၍) အစောင့်အရှောက်အဖြစ် ထားလေ့ရှိရှိပါသည်။
********************************************************************************

(မေး) (ရှောက်သီးသုပ်)
အရှင်ဘုရား၊ ရှောက်သီးသုပ်ကို ညနေမှာ စားကောင်းသည်ဆို၍ တပည့်တော်တို့ ကိုရင်များ သုပ်၍စားပါသည်။ ရှောက်သီးကို အခွံခွာပြီး တစစီမြွှာ၍ ဆီ၊ ဆား၊ ကြက်သွန်တို့ဖြင့် သုပ်ပါသည်။ ငရုတ်သီး စသည် မထည့်ပါ။ ဦးပဉ္ဇင်းများက စားကောင်းသည်ဟု ပြောပါသည်။ စားကောင်းပါသလား ဘုရား။
(ရှင်သောဏ-ညောင်ရွှေ)

(ဖြေ)
ရှောက်သီ၊ သံပရာသီးတို့မှာ အလုံးလိုက် ယာဝဇီဝိက ဆေးဖြစ်၍ အရည်ညှစ်၍ သောက်ခြင်း၊ အဖတ်ကို ၄င်းအတိုင်းစားခြင်းတို့မှာ အပ်သည်ဟု ဆရာတို့က ဆုံးဖြတ်ပါသည်။ သို့သော် ပြဿနာရှင်ရေးသကဲ့သို့ ဆီ-ဆားတို့နှင့် သုပ်လျှင် ကရမ္ဗက-ခေါ် လက်သုပ်စာရင်းသို့ ၀င်သွားသဖြင့် မစားအပ်တော့ပါ။ ချင်း ကြက်သွန်များလည်း တခုစီအနေဖြင့် အပ်သော်လည်း ချင်းသုပ် ကြက်သွန်သုပ်များဖြစ်လျှင် ထို့အတူ မအပ်ပါ။

ရဟန်းများ နေ့လွဲသောအခါတွင် ရှောက်သီးသုပ်၊ ချင်းသုပ်၊ ကြက်သွန်သုပ်များကို စားလျှင် ပါစိတ်အာပတ် သင့်ပါသည်။ သာမဏေများ စားလျှင်လည်း ဒဏ်သင့်ပါသည်။
********************************************************************************

(မေး) ( ဆံပင် ထပ်ရိတ်ခြင်းနှင့် သကြားလုံးစားခြင်း)
အရှင်ဘုရာ၊
(က) ဘုန်းကြီးဝတ်ပြီး ကိုရင်ဝတ်ပြီး လူထွက်သည့်အခါ ဘုန်းကြီးတုန်းက၊ ကိုရင်တုန်းက ဆံပင်နှင့် မနေကောင်းဘူးဆိုကာ ခေါင်းထပ်ရိတ်ခိုင်းကြပါသည်။ ဘုန်းကြီးဆံပင်နှင့် လူဝတ် မနေကောင်းဟုလည်း ပြောကြပါသည်။ လူထွက်သည့်အခါ ခေါင်းပြန်ရိတ်ရန် လိုအပ်ပါသလား။ အကယ်၍ ပြန်မရိတ်ဘဲ နေသော် အပြစ်ရှိပါသလား။
(ခ) ဘုန်းကြီးဝတ်ခြင်း၊ ကိုရင်ဝတ်ခြင်းများ ပြုလုပ်သည့်အခါ ၁၂-နာရီကျော်လျှင် သကြားလုံးမျာ ကပ်လှူ၍ စားတာကို တွေ့ရှိရပါသည်။ သကြားလုံးကပ်ခွင့်၊ စားခွင့်ရှိပါသလား၊ သိလို၍ ဖြေကြားပေးတော်မူပါဘုရား။
(ဇော်လင်းထွန်း-ရန်ကုန်မြို့)

(ဖြေ)
(က) ရဟန်းဘ၀မှ သိက္ခာချသည့်အခါ လုံးဝလူပြန်ဖြစ်သွားသဖြင့် လူ့ဘ၀၌ ရဟန်းဆံပင်ဟူ၍ မရှိတော့။ ထို့ကြောင့် လက်တသစ်၊ နှစ်သစ်ခန့်ပင် ရှည်သည့်တိုင်အောင် လူဖြစ်သောအခါ ဆံပင်ထပ်၍ရိတ်ရန် မလိုအပ်တော့ပါ။
သာမဏေ လူထွက်ရာ၌ လူဝတ် ၀တ်လိုက်လျှင် သာမဏေဘ၀ ပျက်၍ လုံးဝလူပုဂ္ဂိုလ် ပြန်ဖြစ်သွားပါသည်။ ထို့ကြောင့် သာမဏေဆံပင်ဟူ၍ မရှိတော့ပါ။ ပြန်၍ ရိတ်ဖွယ်ကိစ္စလည်း မရှိနိုင်တော့ပါ။

(ခ) ရဟန်းတော်များ စားသောက်ဖွယ်ရာ တို့မှာ-
(၁) ယာဝကာလိက-နံနက်ပိုင်းသာ စားအပ်သော ဆွမ်းသစ်သီးစသည်။
(၂) ယာမကာလိက-ဤနေ့အရုဏ်တက်မှ နောက်နေ့ အရုဏ်ထိသာ အပ်သော အဖျော်ရည်စသည်။
(၃) သတ္တာဟကာလိက-၇-ရက်သာအကပ်ခံ၍ စားသောက်အပ်သော စတုမဓူ ပျားသကာ စသည်များ။
(၄) ယာဝဇီဝိက-တသက်လုံးပင် အကပ်ခံထားပြီး စားသောက်အပ်သော ဆေးဝါးများ-ဟူ၍ ၄-မျိုးရှိသည်။

ထိုတွင် သကြားလုံးမှာ ၃-နံပါတ် သတ္တာဟကာလိက၌ ပါဝင်ပါသည်။ ယနေ့အကပ်ခံထားလျှင် ၇-ရက်အထိ အကပ်မခံဘဲ စားသောက်နိုင်၏။ စားသောက်နိုင်သည်ဆိုသော်လည်း ဆာလောင်ရုံဖြင့် မအပ်။ အားနည်းခြင်း စသော ရောဂါရှိမှသာ အရည်ကို သောက်နိုင်ပါသည်။ အရည်မဟုတ်သော သကြားခဲ၊ ထန်းလျက်ခဲ စသည်တို့ကို အရည်ဖျော်၍ သောက်ရပါသည်။
(သတ္တာဟကာလိက ဆိုသည့်အတိုင်း ၇-ရက်စေ့သွားလျှင် ထပ်မံ၍ အကပ်ခံရသည်။ ထပ်မံ၍ အကပ်မခံဘဲ စားသောက်မိလျှင်၎င်း၊ မစွန့်ပစ်လျှင်၎င်း အာပတ်သင့်ပါသည်။
********************************************************************************

(မေး) ( ပရိဝါသ် မာနတ် ညဥ့်ပြတ် ၀တ်ပျက် ကိစ္စ)
အရှင်ဘုရား၊ ပရိဝါသ် မာနတ် ဆောက်တည်ပြီးသော ညဥ့်အချိန်တွင် ထိုရဟန်းတော်များ မသိဘဲ အခြားရဟန်းများ ကျောင်းအရာမ်တွင်း ၀င်ရောက်လာလျှင် ကံပျက်သည်-မပျက်သည်ကို ဖြေကြားတော်မူပါရန် လျှောက်ထားအပ်ပါသည်ဘုရား။
(ဦးသူရိယ-ရပ်စောက်မြို့)

(ဖြေ)
ပရိဝါသ် မာနတ် ဆောက်တည်နေသော ကျောင်းဥပစာအာရာမ်အတွင်းသို့ အာဂန္တုရဟန်းများ ၀င်ရောက်လာလျှင် ပရိဝါသ် (သို့မဟုတ်) မာနတ်ကို ဒဏ်သားရဟန်းက ကြားလျှောက်ရမည် ဖြစ်ပါသည်။ ၀င်လာသည်ကို မသိ၍ ထွက်ခွာသွားသည့်တိုင်အောင် မကြားလျှောက်မိလျှင် ညဥ့်ပြတ်ခြင်းဖြစ်သည်။ မသိ၍ မကြားလျှောက်ရသဖြင့် ၀တ်ပျက်ခြင်း၊ ၀တ္တဘေဒဒုက္ကဋ် အာပတ်သင့်ခြင်းကား မဖြစ်ပေ။
အဇာနန္တေဿဝ ဥပစာရသီမံ ပ၀ိသိတွာ ဂစ္ဆန္တိ စေ၊ ရတ္တိစ္ဆေဒေါဝ ဟောတိ၊ န ၀တ္တဘေဒေါ။ (ခုဒ္ဒသိက္ခာ ဋီကာ)

( မြတ်မင်္ဂလာ ၂၀၀၂-ခု သြဂုတ်လ)

No comments: