Monday, December 14, 2009

အမြဲပြုံးသော မခင်ပြုံး

ဂျပန်ခေတ်အတွင်းက မခင်ပြုံးဆိုသူ အမျိုးသမီးတယောက် ရှိလေသည်။ မခင်ပြုံးသည် မိဘမရှိရှာပါ။ ဆွေမျိုးသားချင်းများ၏ အိမ်ကလည်း သူ၏ အိမ်နှင့် အနည်းငယ်ဝေးပါသည်။ မခင်ပြုံး၏ မျက်နှာသည် အမြဲတမ်းပြုံးရွှင်နေသော်လည်း သူတပါးကို ပြုံးပြုံးလေးနဲ့ ရက်စက်တတ်သူ ဖြစ်ပါသည်။ နာမည်ကပြုံး၊ လူကပြုံးသော်လည်း အကြင်နာတရား မရှိသဖြင့် လူတိုင်းက မုန်းကြပါသည်။ ဘယ်သူတွေ ဘယ်လိုမုန်းမုန်း မခင်ပြုံးကတော့ ပြုံးမြဲ ရက်စက်မြဲပင်။

တနေ့တွင် သူမ၏ အိမ်တွင်းတနေရာ၌ ပုရွက်ဆိတ်မည်းများ စီတန်း၍ သွားနေကြပါသည်။ ထိုအခါ သူမက ဖယောင်းတိုင်ကြီးတတိုင်ကို ထွန်း၍ ဖယောင်းတိုင်မှကျသော ဖယောင်းရည်များဖြင့် ပုရွက်ဆိတ်များအပေါ် အစက်များလိုက်ချကာ တဟားဟား-ဖြင့် သဘောကျနေပါသည်။ အိမ်နီးချင်းများက မလုပ်သင့်ကြောင်း၊ ၀ဋ်လိုက်တတ်ကြောင်း ပြောကြသော်လည်း အရေးမစိုက်၊ မသိကျိုးကျွံပြု၍ လုပ်မြဲဆက်လုပ်နေပါသည်။

သည်လိုနဲ့ တနေ့တွင် လေယာဉ်ပျံသံများ ကြားကြရသဖြင့် မြို့ပေါ်ရှိ လူအားလုံး ဗုံးခိုကျင်းများရှိရာတွင် ပုန်းအောင်းနေကြပါသည်။ လေယာဉ်ပျံများ တ၀ီဝီဖြင့် ရောက်လာပြီး ဗုံးများကြဲချပါသည်။ တ၀ုန်းဝုန်း တဒိုင်းဒိုင်း ဗုံးပေါက်ကွဲသံများ ကြားရသဖြင့် ဗုံးခိုကျင်းများအတွင်းမှ လူများ အသက်ပင် မရှူရဲအောင် ၀ပ်နေကြရပါသည်။ အသံများ စဲသွားသောအခါမှ မိမိတို့ ပုန်းအောင်းနေရာမှ ထွက်လာကြသည်။ ရင်ဘတ်ကို လက်နှင့်အသာဖိ၍ မိမိအသက်ရှင်နေသေးပါလားဟု သက်ပျင်းချကြရပါသည်။

ထိုအချိန်တွင် မခင်ပြုံးကို မတွေ့ရသဖြင့် ရှာကြရာ သူ၏ ဗုံးခိုကျင်းနေရာအတွင်းမှ ယမ်းငွေ့များ တလူလူ ထွက်နေသည်ကို တွေ့ကြရပါသည်။ သည်တော့မှ ဟယ်-ခင်ပြုံး၊ ခင်ပြုံး ဖြစ်ရလေဟယ်-ဟု စိတ်မကောင်းကြီးစွာ ဖြစ်ကြရပါသည်။

အိမ်နီးချင်းများသည် မခင်ပြုံး ပြုမူခဲ့သော အပြုအမူများကို တရေးရေးဖြင့် မြင်ယောင်ရင်း သူတပါးအပေါ် ရက်စက်တတ်သော မခင်ပြုံးတယောက် မိမိအလှည့်တွင် ပြုံးပြုံးလေးနှင့်မှ ခံသွားနိုင်ရဲ့လားဟု တွေးမိကြပြီး သံဝေဂရ၊ ကြောက်လန့်မိကြရပါတော့သည်။
(ဂျပန်ခေတ် အတွေ့အကြုံကို မေမေ၏ ပြောပြချက်အရ တင်ပြပါသည်။)

( ချယ်ရီ-ရွှေခြံ)
( မြတ်မင်္ဂလာ ၂၀၀၂-ခု နိုဝင်ဘာလ)

No comments: