Friday, January 8, 2010

ပဋ္ဌာန်းဒေသနာတော်၏ အကျိုး

လွန်ခဲ့သည့် ၅-နှစ်ခန့်က ဖြစ်သည်။ အသက် ၉၀-အရွယ် အဘိုးဦးချစ်ယုံ နေမကောင်း ဖြစ်ခဲ့သည်။ ဤသို့ နေထိုင်မကောင်းခြင်းမှာ အသည်းအသန်ပင် ဖြစ်တော့သည်။ အဘိုး ဦးချစ်ယုံ နှုတ်မှ-ငါကို လာခေါ်နေကြပြီ၊ ခွေးတွေကလဲ ငါ့ကို လိုက်ဆွဲနေတယ်။ လူတွေကလဲ ၀ိုင်းဆွဲနေတယ်၊ ငါ့ကို ကယ်ကြပါဦး၊ လှစိန်ရေ-ငါ့ကို ကယ်ပါဦး-စသည်ဖြင့် ကယောင်ကတမ်း အော်ဟစ်နေရသည်။

အဘိုးဦးချစ်ယုံ၏ အော်သံကို နားထောင်ပြီး ကျွန်တော် တွေးမိလိုက်သည်။ အဘိုးဦးချစ်ယုံ လားရာဂတိ ကောင်းမည်မဟုတ်၊ ပဋ္ဌာန်းတရား နာစေရန် ကျွန်တော်ကြံမိသည်။ သို့သော် ကျွန်တော်ကိုယ်တိုင်ကလည်း ပဋ္ဌာန်းအကျဉ်းသာရပြီး အကျယ်မရချေ။ သို့ဖြစ်၍ ရွာထဲရှိ ပဋ္ဌာန်းအကျယ်ရသူများကို ခေါ်စေသည်။ ၄င်းတို့ကို ပဋ္ဌာန်းရွတ်ဖတ်စေ၍ ဦးချစ်ယုံအား ပဋ္ဌာန်းတရား နာစေသည်။ ကြားရလား-ဟု မေးရာ ကြားရသည်-ဟု ပြန်ဖြေသည်။

ပဋ္ဌာန်းဒေသနာတော်ကို လူလှည့်၍ တညလုံး အသံမစဲ ရွတ်ဖတ်စေခဲ့သည်။ ကျွန်တော်၏ စေတနာမှာ ဦးချစ်ယုံကို သေခြင်းကောင်းစေရန် ကူညီခြင်းဖြစ်သည်။ နံနက်မိုးလင်းသော် ပဋ္ဌာန်းတရား နာရသော ဦးချစ်ယုံမှာ အော်ဟစ်ရခြင်းဒုက္ခမှ ကင်းဝေးရသည့်အပြင် သေကံမရောက် သက်မပျောက်ဘဲ ကျန်းမာရေး ပြန်၍ကောင်းမွန်လာပါသည်။

အဘိုးဦးချစ်ယုံသည် ပြန်လည်ကျန်းမာပြီး ၂-နှစ်ခန့် ကောင်းမွန်စွာ နေထိုင်ခဲ့ရသည်။ အသက် ၉၂-နှစ် အရွယ်တွင်မှ ကွယ်လွန်သည်။ ကွယ်လွန်ချိန်တွင် ယခင်ကဲ့သို့ အော်ဟစ်ခြင်း မပြုရဘဲ ညင်သာစွာ အသက်ပျောက်သွားသည်။ ပဋ္ဌာန်းဒေသနာတော်ကြီးကို ကြားနာရသောအကျိုး၊ ပဋ္ဌာန်းတရား၏ တန်ခိုးကြောင့်ပင် ဖြစ်သည်။

ဤပဋ္ဌာန်းတရားဖြင့် သူတပါးကို ကူညီခဲ့သော ကျွန်တော်သည် ပဋ္ဌာန်းဒေသနာတော်ကြီးကို ပိုမိုယုံကြည်စွဲမြဲစွာ ရွတ်ဖတ်ပူဇော်ခဲ့သည်။ ယခု အသက် ၈၇-နှစ်ရှိပြီ။ သွားမကျိုး၊ ခါးမကုန်းဘဲ ကျန်းမာစွာသွားလာ နေထိုင်နိုင် ပါသည်။

( မကွေးတိုင်း မြို့သစ်မြို့နယ် ချောက်ကြားကျေးရွာမှ ကျောင်းဆရာ ပင်စင်စား ဆရာကြီး ဦးစိန်လှ-(၈၇)နှစ်၏ ပြောပြချက်ဖြစ်ရပ်မှန်ကို ရေးသားပါသည်။)

(နွယ်-ပညာရေး)

( မြတ်မင်္ဂလာ ၂၀၀၃-ခု ဖေဖော်ဝါရီလ)

No comments: