Wednesday, January 13, 2010

အရောင်အလင်း လေးမျိုး

အခါတပါး၌ မြတ်စွာဘုရားသည် သာဝတ္ထိပြည် ဇေတ၀န်ကျောင်းတော်တွင် သီတင်းသုံးနေတော်မူ၏။ ထိုအခါ ညဥ့်တညဥ့်၏ သန်းခေါင်ယံအချိန်လောက်တွင် နတ်သားတပါးသည် မြတ်စွာဘုရားထံ လာရောက်၍ ဤသို့မေးလျှောက်သည်။

မြတ်စွာဘုရား-
လောကကြီးကို တောက်ပြောင်ထွန်းလင်းစေတတ်ကုန်သော အရောင်အလင်းတို့ကား အဘယ်မျှရှိပါကုန်သနည်း ဘုရား။ ထိုအလင်းရောင်အကြောင်းကို သိလိုပါသဖြင့် ရှင်တော်ဘုရားထံ တပည့်တော်တို့သည် လာရောက်၍ မေးလျှောက်နေခြင်း ဖြစ်ပါသည်ဘုရား-ဟု လျှောက်ထားသည်။
မြတ်စွာဘုရားက-အို နတ်သား လောက၌ အရောင်အလင်း လေးမျိုး ရှိ၏။ ဤလေးမျိုးမှ တပါး ငါးခုမြောက် အရောင်အလင်းဟူ၍ကား မရှိ။

နေမင်းသည် နေ့အခါ၌ ထွန်းလင်းတောက်ပ၏။ လမင်းသည် ညဥ့်အခါ၌ ထွန်းလင်းတောက်ပ၏။
မီးသည် နေ့ရောညပါ ထွန်းလင်းတောက်ပ၏။ ထွန်းလင်းတောက်ပသော အရောင်တို့တွင် မြတ်စွာဘုရားတည်းဟူသော အရောင်အလင်းသည် အမြတ်ဆုံးဖြစ်၏။ အသာဆုံးအရောင်အလင်း ဖြစ်၏-ဟု ဟောတော်မူသည်။

မှတ်ချက်။
မြတ်စွာဘုရားတည်းဟူသော အရောင်အလင်း ဆိုသည်မှာ-
(၁) မဂ်ဉာဏ် ဖိုလ်ဉာဏ် သဗ္ဗညုတဉာဏ်ဟူသော ဉာဏာလောက။ (ဉာဏ်တော်အလင်း)
(၂) မြတ်စွာဘုရားတွင် ကောင်းစွာဖြစ်သော ကိုယ်တော်မှထွက်သော ပီတိအလင်းသည် ပီတိအာလောက။ (ပီတိအလင်း)
(၃) မျက်စိအကြည် အရောင်အလင်း ဟူသော ပသာဒါလောက။ (ပသာဒအလင်း)
(၄) သတ္တ၀ါတို့၏ စိတ်နှလုံးမှ မောဟ အမိုက်ကို ပယ်ခွါရန် တရားဒေသနာ ဟောကြားခြင်းဟူသော ဓမ္မာလောက။ (တရားအရောင်အလင်း) ဟု ၄-မျိုးရှိသည်။ (အဋ္ဌကထာ-ဋီကာ)

(သဂါထာဝဂ္ဂသံယုတ် ဒေ၀တာသံယုတ် သတ္တိဝဂ် ပဇ္ဇောတသုတ် ပါဠိတော် အဋ္ဌကထာနှင့် ဋီကာ)

( ဦးငွေအောင်မွန်)
(မြတ်မင်္ဂလာ ၂၀၀၃-ခု ဧပြီလ)

No comments: