Monday, January 18, 2010

ဘာသာရေး ပြဿနာ ( ၁၀၁ )

( ဘဒ္ဒန္တတိလောကသာရ ဖြေသည် )

(မေး) (၀ိဇ္ဇာဓိုရ်)
အရှင်ဘုရား၊ ၀ိဇ္ဇာဓိုရ်ဟူသည် အဘယ်လူမျိုးဖြစ်ပါသနည်း၊ ၀ိဇ္ဇာဓိုရ်ဖြစ်ရန် မည်သို့အားထုတ်ရပါသနည်း။ ၀ိဇ္ဇာဓိုရ်အမျိုးအစား မည်မျှရှိပါသနည်း။ ၄င်း ၀ိဇ္ဇာဓိုရ်များက သာသနာတော်ကို မည်သို့ အကျိုးပြုပါသနည်း။
(မောင်သုတေသန-ရန်ကုန်)

(ဖြေ)
ဝိဇ္ဇာဓိုရ်တို့သည် အမျိုးတပါး အခြားရှိတော့သည် မဟုတ်ပြီ။ တရာ့တပါးသော လူမျိုးကပင် အတတ်ဝိဇ္ဇာကိုစွဲ၍ ဖြစ်လေသည်။ ယင်းဝိဇ္ဇာဓိုရ်တို့သည် သန်လျက်ဝိဇ္ဇာ၊ မန္တန်ဝိဇ္ဇာ၊ ဆေးဝိဇ္ဇာ-ဟူ၍ သုံးမျိုးရှိရာ သန်လျက်ဝိဇ္ဇာတို့မှာ သန်လျက်၏ အာနုဘော်ကြောင့် ကောင်းကင်သို့ပျံနိုင်သည်။
မန္တန်ဝိဇ္ဇာတို့မှာ မန္တန်၏ အာနုဘော်ကြောင့် ကောင်းကင်သို့ ပျံနိုင်သည်။
ဆေးဝိဇ္ဇာဓိုရ်တို့မှာ သုံးနှစ်တိုင်အောင် တွင်းအောင်၍ ဆေးစားရသည်။

သုံးနှစ်စေ့လျှင် ဆွေမျိုးတပည့်တပန်းတို့က တွင်းမှဖော်၍ ကျွေးမွေးရသည်။ အကျွေးအမွေးကောင်းမှ အသက်ရှည်သည်။ အသက်ရှည် ကျန်းမာလျှင် ဆေးအာနုဘော်ကြောင့် ကောင်းကင်သို့ ပျံနိုင်သည်။ ထိုဝိဇ္ဇာဓိုရ်အတတ်ကို ဆရာသင်၍လည်း အချို့တတ်သည်။ နတ်ဘီလူးတို့ သင်၍လည်း တတ်နိုင်သည်ဟု ဆိုသည်။ ၀ိဇ္ဇာဓိုရ်ဖြစ်လျှင် ကောင်းကင်ပျံနိုင်ရုံမက သူတပါး၏ စိတ်အကြံကိုလည်း သိ၍ ရွှေငွေစသည် တို့ကိုလည်း ဖြစ်စေနိုင်သည်ဟု ဆိုပါ၏။

သာသနာကို မည်သို့ပြုစုသည်ဟု မတွေ့ဘူးပါ။ ၀ိဇ္ဇာဓိုရ်အကြောင်း မကြာခဏမေးကြ၍ လက်ဝဲနော်ရထာ လျှောက်ထုံးကိုမှီး၍ အပြည့်အစုံ ဖြေလိုက်ပါသည်။
*********************************************************************************

(မေး) (ယောက်ျားလျာ၊ မိန်းမလျာ ဝေါဟာရများ)
အရှင်ဘုရား၊ ယခုခေတ်အခေါ် အခြောက်၊ ယောက်ျလျာ၊ မိန်းမလျာ ဝေါဟာရများနှင့် ဘုရားဟောစာပေများ ထဲမှ နပုန်း၊ ပဏ္ဍုက်၊ ကျားဥဘတောဗျည်း၊ မဥဘတောဗျည်း ဝေါဟာရများ ဆက်စပ်ပုံနှင့် သူတို့၏သဘာဝ၊ သူတို့၏ ခံစားနေရသော စိတ်သဘောတို့ကို ရှင်းပြပေးတော်မူပါဘုရား။
(ကိုဟန်ဝင်း-အင်းစိန်မြို့သစ်)

(ဖြေ)
လွန်ခဲ့သော ဘ၀ပေါင်းများစွာ သံသရာက ကာမေသုမိစ္ဆာစာရကံ လွန်ကျူးခဲ့ကြသူ ယောက်ျား၊ မိန်းမများသည် ယင်းကံကြောင့် ငရဲ၌ နှစ်ပေါင်းများစွာ ခံစားခဲ့ရပြီး ဖြစ်သည်။ ငရဲမှလွတ်သောအခါလည်း နွား၊ ဆိတ် စသည် ဖြစ်၍ သင်းကွပ်ခံရခြင်း ဘ၀ပေါင်းတရာမက ဖြစ်ကြရသည်။ ထိုမှနောက် ကျား-မ မဟုတ်၊ ပဏ္ဍုက်၊ ဥဘတောဗျည်းဘ၀များ၌ ဘ၀များစွာဖြစ်ရသေးကြောင်း ဆိုပါသည်။

ထိုမှနောက်လည်း ယုတ်ညံ့သော အဖျက်ဆီးခံမိန်းမ ပြည့်တန်ဆာ စသည်ဖြစ်ရပြီး နောက်ဆုံး ကံကြွင်းကံကျန် အဖြစ်ဖြင့် အခြောက်ခေါ် မိန်းမလျာ၊ ယောက်ျားလျာများ၊ ဘ၀မမှန်သူများ ဖြစ်ရကြောင်း ဆရာတော်ဘုရားကြီး များ ဟောကြားဆုံးမထားချက်များ ရှိပါသည်။ ထိုဟောကြားချက်များအတိုင်း မှတ်သား၍ တရားသံဝေဂ ယူစေ လိုပါသည်။
*********************************************************************************

(မေး)(ဓာတ်တော်မွေတော်)
အရှင်ဘုရား၊ ဘုရားတဆူပွင့်ပြီး ထိုဘုရားသာသနာတော် ကုန်ဆုံးသည့်အချိန်တွင် ထိုဘုရားရှင်၏ ဓာတ်တော်မွေတော်များ အားလုံး ချုပ်ငြိမ်းသွားကြောင်း သိရှိခဲ့ဖူးပါသည်။ သို့သော် ရွှေတိဂုံစေတီတော်တွင် ရှေးဘုရားသုံးဆူနှင့် ဂေါတမမြတ်စွာဘုရား၏ ဓာတ်တော်မွေတော်များရှိကြောင်း သိရပါသည်။ ရှင်းလင်းမိန့်ကြားပေးပါရန် တောင်းပန်လျှောက်ထားအပ်ပါသည်။
(သိန်းလှိုင်-စမ်းချောင်း)

(ဖြေ)
ဘုရားသာသနာကုန်ဆုံးချိန်တွင် ယင်းမြတ်စွာဘုရား၏ ဓာတ်တော်မွေတော် အားလုံးပင် မုန်ညင်းစေ့ခန့်မျှ မကြွင်း ဓာတုပရိနိဗ္ဗာန်ဖြင့် ကွယ်ပျောက်ကြရမြဲပင် ဖြစ်ပါသည်။
လေးဆူဓာတ်ပုံ ရွှေတိဂုံစေတီတော်၌ ဂေါတမမြတ်စွာဘုရား၏ ဆံတော်များသာ ဓာတ်တော်မွေတော်
ဖြစ်ပါသည်။ ကျန်ဘုရားသုံးဆူ ဆိုင်ရာ၌ကား ရေသနုတ်တော်၊ ရေစစ်တော်၊ တောင်ဝှေးတော် ဟူသော အသုံးအဆောင် ပရိဘောဂများသာဖြစ်ရာ ဓာတ်တော်မွေတော်မဟုတ်သဖြင့်၎င်း၊ ဘုရားရှင်များ၏ တန်ခိုးတော်၊ ကမ္ဘာစောင့် နတ်မင်းကြီးများ၏ စောင့်ရှောက်ထိန်းသိမ်းမှုတို့ကြောင့်၎င်း ကမ္ဘာကုန်ဆုံးသည့်တိုင်အောင် တည်ရှိနေနိုင်ပါသည်။
*********************************************************************************

(မေး) (ငရဲခွေးကြီးများ)
အရှင်ဘုရား၊ တပည့်တော်တို့ ငယ်ငယ်က ငိုတယ်ဆိုရင်ပဲ အမေက သားသမီးများကို ကြောက်ရွံ့ ထိတ်လန့်အောင် ငရဲပြည်က ခွေးနက်ကြီး လာပြီဟေ့-ဟု အငိုတိတ်အောင် ခြောက်လှန့်တတ်လေသည်။ ကလေးဘ၀က ကြောက်ခဲ့ရသော ခွေးနက်ကြီး တကယ်ဟုတ်-မဟုတ် ဖန်ဆင်းထားသော ခွေး ဖြစ်နိုင်-မဖြစ်နိုင်ဆိုတာ သိလိုပါသည် ဖြေကြားပေးတော်မူပါဘုရား။
( ကြည်ဖြူသန့်စင်အောင်-ကုက္ကိုတန်းရွာ)

(ဖြေ)
ငရဲပြည်တွင် ငရဲထိန်း၊ ငရဲခွေး၊ ငရဲစွန်၊ ကျီး၊ လင်းတတို့သည် ငရဲသူသတ္တ၀ါတို့အား ညှဉ်းဆဲနှိပ်စက်ရန် ငရဲဆိုင်ရာ ယမမင်းတို့ လက်အောက်တွင် အမှန်ပင်ရှိကြောင်း ကထာဝတ္ထုပါဠိတော် အဋ္ဌကထာ ဋီကာ စသောကျမ်းများ၌ လာရှိပေသည်။ ၄င်းတို့သည် ပကတိ တိရစ္ဆာန်မျိုးများ မဟုတ်ကြ၊ ငရဲသူ ငရဲသားလည်း မဟုတ်ကြပေ။ စတုမဟာရာဇ်ဘုံ အ၀င်အပါ ဝေမာနိက ပြိတ္တာမျိုးများ ဖြစ်ကြသည်ဟု ဆိုသည်။

တေ စ နေရယိကေဟိ အဓိကတရဗာလာရောဟပရိဏတာ အတိဝိယ ဘယာနက သန္တာသ ကုရုရတရပယောဂါစ ဟောန္တိ ဧတေနေ၀ တတ္ထ ကာက သုနက္ခာဒီနံပိ နိဗ္ဗတ္တတိ။(ကထာဝတ္ထု အနုဋီကာ)
********************************************************************************

(မေး) (ပဉ္စာနန္တရိယကံ)
ပဉ္စာနံ-တရိ၊ ငါးပါးရှိ ဂရုကံ။ အ၀ီစိ တည်ဘိဧကန်မြဲသည်ဟု၊ စွဲသိရပါ။
ထိုငါးဖြာ၊ ဘယ်ကံကလွန်သလဲ၊ ငါးပါးစုံ ပြုသူအား၊ မမှားအပါယ်ကျအောင်၊ ဘယ်က ဘယ်ကံပို့ပါလိမ့် မှတ်ဖို့ဖြေခွဲ။
( မောင်ကံကောင်း-ဗဟန်း)

(ဖြေ)
မာတုဃာ ကံအစ၊ အနန္တငါးဖြာ၊ အမှန်ပ လားစရာ-မမှားပါ ၀ီစိ။
ကျဖို့မြဲ ငရဲတွင်၊ အမြဲပင် ပြုတော်သတိ။
ရှေးလေးပါး ကမ္ဘာတိုင်၊ မပါနိုင်သဘိ၊ ကပ္ပဋ္ဌီမရှိတဲ့၊ အ၀ီစိရောက်ရုံ။
သံဃာကို မှန်စွာခွဲသူက၊ ခန္ဓာစဲ လားဝီစိဘုံ၊ ငရဲသက်ဆုံးကုန်အောင်၊ အလုံးစုံခံရ၍၊ အန္တငါးခုမှာ၊ ခွဲကံကသာ။
ဘေဒက သံဃလာသည်၊ ကမ္မဟာ လွန်ဆုံးပလေး။
သေသာနိ စတ္တာရိ ကမ္မာနိ အနန္တရိယာဝ ဟောန္တိ န ကပ္ပဋ္ဌိကာနိ။( အဘိ-ဋ္ဌ ၂-၄၀၉)
********************************************************************************

(မေး) (ပုတီးစိပ်ခြင်း)
အရှင်ဘုရား၊ အချို့သော ပုဂ္ဂိုလ်များသည် ပုတီးစိပ်သောအခါ ခေါင်းကိုကျော်၍ စိပ်၏။
အချို့က ပုတီးခေါင်းမှ ပြန်၍ စိပ်ကြသည်။ မည်သူတို့မှန်သည်-မှားသည်ကို အများသိစေခြင်းငှါ ကရုဏာရှေ့ထား၍ ဖြေကြားပေးပါဘုရား။
(အရှင်ပညာသီရိ-ရန်ကုန်)

(ဖြေ)
ပုတီးစိပ်ရာ၌ မိမိတို့အားသလို စိပ်ကြပါသည်။ ပုတီးခေါင်းကို ကျော်၍၄င်း၊ မကျော်ဘဲ ပြန်လှည့်၍၄င်း၊ အချို့ လက်နှစ်ဖက်ဖြင့်၎င်း၊ အချို့ တဖက်တည်းဖြင့်၎င်း၊ အမျိုးမျိုး စိပ်ကြပါသည်။ ဘယ်က မှန်သည်-ဘယ်က မှားသည်ဟု မဆိုသာပါ။ ပုတီးတလုံးချင်း ဂုဏ်တော်ကို နှလုံးသွင်း၍ သမာဓိရနေရန် အရေးကြီးပါသည်။ မည်သို့ပင်ဖြစ်စေ တကျောင်း-တဂါထာ တရွာ-တပုဒ်ဆန်း ဆိုသလို ပုတီးစိပ်နည်း အမျိုးမျိုးရှိသလို စိပ်ပုံလည်း အမျိုးမျိုး ရှိနိုင်ပါသည်။
********************************************************************************

(မေး) (ပဋ္ဌာန်းဒေသနာတော်)
အရှင်ဘုရား၊ ဂေါတမဗုဒ္ဓရှင်၏ ပထမဦးဆုံး တရားတော်သည် ပဋ္ဌာန်းဒေသနာတော်ဖြစ်သည်ဟု သိရပါသည်။ သို့ပါ၍ ပဋ္ဌာန်းဒေသနာတော် ပေါ်ပေါက်လာပုံကို လိုရင်း တိုရှင်း ဖြေကြားပေးပါရန် ရိုသေစွာ လျှောက်ထားအပ် ပါသည်ဘုရား။
(ရွှေဒေါင်းတောင် မောင်ထွန်းမြင့်-မဲတီး)

(ဖြေ)
မြတ်စွာဘုရား ဘုရားအဖြစ်သို့ ရောက်တော်မူပြီးနောက် စတုတ္ထသတ္တာဟဖြစ်သော ရတနာဃရ ရွှေအိမ်တော်တွင် အဘိဓမ္မာတရားများကို ဆင်ခြင်တော်မူရာ ပဋ္ဌာန်းကျမ်းကို ဆင်ခြင်မိသောအခါတွင် သဗ္ဗညုတဉာဏ်တော်နှင့် ကိုက်ညီ၍ အသွေးတော်၊ အသားတော်များ ကြည်လင်တော်မူကာ ကိုယ်တော်မှ ရောင်ခြည်တော်ခြောက်သွယ် ကွန့်မြူးတော်မူသည်ဟု ဆိုပါသည်။

ထို့ကြောင့် ပဋ္ဌာန်းတရားတော်မှာ နှုတ်တော်မှ ဟောတော်မမူရသေးသည့်တိုင်အောင် ဘုရားအဖြစ်သို့ ရောက်ပြီး စတုတ္ထသတ္တာဟ အတွင်း၌ ဉာဏ်တော်တွင် ပေါ်ပေါက်ခဲ့သည်ဟု ဆိုရပါမည်။ ခုနစ်ဝါမြောက် တာဝတိံသာ နတ်ပြည်တွင် ၀ါဆိုတော်မူသောအခါမှ ၀ါဆိုလပြည့်ကျော် ၁-ရက်နေ့မှစပြီး
ဓမ္မသင်္ဂဏီ ၁၂-ရက်၊
ဝိဘင်းကျမ်း ၁၂-ရက်၊
ဓာတုကထာ ၆-ရက်၊
ပုဂ္ဂလပညတ် ၇-ရက်၊
ကထာဝတ္ထု ၈-ရက်၊
ယမိုက်ကျမ်း ၂၀-ရက်၊
ပေါင်း ၆၅-ရက် ရှေ့အဘိဓမ္မာ ၆-ကျမ်းကို ဟောတော်မူပြီးနောက် ယင်း ခုနစ်ဝါမြောက်ဖြစ်သော မဟာသက္ကရာဇ် ၁၁၀-ပြည့် တော်သလင်းလဆန်းစတွင် ပဋ္ဌာန်းပါဠိတော်ကို စတင်ဟောတော်မူခဲ့ကြောင်း သိရပါသည်။

ပဋ္ဌာန်းပါဠိတော်ကို လူတို့၏ ရက်အပိုင်းအခြားဖြင့် ၂၅-ရက် ဟောတော်မူကြောင်း ဆိုသဖြင့် ထိုမဟာသက္ကရာဇ် ၁၁၀-ပြည့် တော်သလင်းလဆန်းစတွင် ပဋ္ဌာန်းဒေသနာတော် လောက၌ ပေါ်ပေါက်တော်မူလာကြောင်း မှတ်သားဖွယ်ပင်ဖြစ်သည်။
********************************************************************************

(မေး) (သာသနာညှိုးနွမ်းမှု)
အရှင်ဘုရား၊
မြတ်အရှင်၊ မှတ်ချင်လွန်းတာမို့၊ ခွန်းချိုလျှောက်ထား။
သာသနာ၊ ဘယ်တွက်ဘယ်တာကြောင့်၊ ပထမာ အစပျိုးသည့်၊ ကမ္ဘာကျော် ဌာနမျိုးမှာ၊
ညှိုးနွမ်းကာ ကြွေလွင့်ဝေးခဲ့ရ၊ ဖြေပေးပါဘုရား။
( မနန္ဒမာလာ-ဖောင်းပြင်)

(ဖြေ)
မှတ်သားစရာ၊ မြတ်ဘုရားသာသနာ အစထွန်းလေသည့်၊ မြကျွန်းဗမ္ဗူဒိပ်မှာတော့၊ ဇာတ်ရိပ်ရှိန်အဟုန်ကြောင့်၊ သိန်ဂုဏ်ကျဆင်း။
ဗြာဟ္မဏာ၊ ပုဏ္ဏားထိုဆရာတို့၊ ဇာတ်ဝါဒါ အလွန်ပြင်းတာကြောင့်၊ လွန်မင်းမကြာပါဘူး၊ သာသနာ-ဇာတာညှိုးရတယ်၊ ဆိုးတဲ့ဖြစ်ခင်း။

( မြတ်မင်္ဂလာ ၂၀၀၃-ခု မေလ )

No comments: