Wednesday, January 6, 2010

ဘာသာရေး ပြဿနာ ( ၉၈ )

( ဘဒ္ဒန္တတိလောကသာရ ဖြေသည် )

(မေး) (ဉတ်သင်္ကန်းဟူသည်)
အရှင်ဘုရား၊ ကထိန်ကပ်လှူပွဲတွေမှာ ဉတ်သင်္ကန်းမပါဘဲ ကထိန်ခင်းလို့ ရပါသလား၊ ဉတ်သင်္ကန်းပါမှ ဖြစ်မြောက်တယ်လို့ ပြောကြပါတယ်။ ဟုတ်-မဟုတ် ဖြေကြားပေးတော်မူပါဘုရား။ ကထိန်ခင်းရတဲ့အကြောင်းလဲ သိချင်ပါတယ်။ ပြည့်စုံစွာ ဖြေကြားပေးတော်မူပါဘုရား။
(မကေကေ-ပုဇွန်တောင်၊ ရန်ကုန်)

(ဖြေ)
ဉတ်သင်္ကန်းဟူသည်မှာ ကထိန်ခင်းရန် သင်္ကန်းသုံးထည် (နှစ်ထပ်သင်္ကန်းကြီးခေါ် ဒုကုဋ်၊ ကိုယ်ရုံခေါ် ဧကသီ၊ ခါးဝတ်ခေါ် သင်းပိုင်း၊) ကို ဉတ္တိစတုတ္ထကမ္မ၀ါစာဖြင့် ဖတ်၍ ပေးရသည်။ ထို့ကြောင့် ထိုသင်္ကန်းသုံးထည် (တထည်ထည်) ကို ဉတ်သင်္ကန်းဟု ခေါ်ရခြင်းဖြစ်သည်။

ဆိုလိုသည်မှာ နှစ်ထပ်သင်္ကန်းကြီးဖြင့်လည်း ကထိန်ခင်းနိုင်သည်။ ဧကသီဖြင့်လည်း ခင်းနိုင်သည်။ သင်းပိုင်တထည်တည်းဖြင့်လည်း ခင်းနိုင်သည်။ ထို့ကြောင့် ကထိန်တွင် ဉတ်သင်္ကန်းသည် ပဓာနဖြစ်သည်။ ဉတ်သင်္ကန်းမပါဘဲ ကထိန်ခင်း၍ မရ။ ပြဿနာမေးသူအလို ဒုကုဋ်သင်္ကန်းကိုသာ ဉတ်သင်္ကန်းဟု မှတ်ထားဟန်တူပါသည်။ သင်္ကန်းသုံးထည် ဘယ်သင်္ကန်းဖြင့်မဆို ကထိန်ခင်းနိုင်၍ ဉတ်သင်္ကန်းချည်း ခေါ်နိုင်ပါသည်။

ကထိန်ခင်းရခြင်းမှာ ရဟန်းများဖော်ပြပါ သင်္ကန်းသုံးထည်တွင် တထည်ထည်ကို ထားခဲ့ပြီး တပေါင်းလပြည့်အထိ ကင်းကွာ၍ နေနိုင်၊ သွားနိုင်ခြင်းနှင့် သင်္ကန်းစသော သံဃာ့လာဘ်များ ရရှိနိုင်ခြင်းစသော အကျိုးများ ရှိပါသည်။ ကထိန်တိုင်းတွင် ဆရာတော်များ အကျယ်ဟောကြားလေ့ရှိပါသည်။ ဤတွင် အကျယ်မရေးသားတော့ပါ။
*********************************************************************************

(မေး) ( သားကြောဖြတ်ခြင်း)
ဆရာတော်ဘုရား၊ မာတုဂါမများ ပဋိသန္ဓေမတည်အောင် သားကြောဖြတ်ခြင်း၊ ဆေးစားခြင်း၊ ဆေးထိုးခြင်း စသည်တို့၌ ပါဏာတိပါတကံ ထိုက်-မထိုက် သိလိုပါ၍ ဖြေကြားပေးတော်မူပါဘုရား။
(ဒေါက်တာ လင်းထက်အောင်-မေမြို့)

(ဖြေ)
ပါဏာတိပါတ ကံအရာ၌
၁။ သတ္တ၀ါလည်း မှန်စေ
၂။ သတ္တ၀ါဟုလည်း သိစေ
၃။ သေစေလိုသော စေတနာလည်း ရှိစေ
၎။ သေရန် လုံ့လပြုသည်လည်း ဖြစ်စေ
၅။ သေလည်း သေစေ
ဟူသော အင်္ဂါငါးပါးရှိရမည် ဖြစ်ပါသည်။
သားကြောဖြတ်ခြင်း စသည်၌ သတ္တ၀ါဟူ၍ မရှိသေးမီဖြစ်၍ အင်္ဂါ ၅-ပါး မညီညွတ်နိုင်သဖြင့် ပါဏာတိပါတကံ မဖြစ်နိုင်ပါ။
********************************************************************************

(မေး) (ငရဲသားများနှင့် မေတ္တာဘာဝနာ)
အရှင်ဘုရား၊ ငရဲခံနေရသော ငရဲသားများဟာ ချမ်းသာခွင့် မရကြဘဲ သူတို့၏ ခန္ဓာဟာ သေလိုက် ပြန်ရှင်လိုက်၊ ငရဲခံရလိုက် ဖြစ်ကာ သူတို့၏ အကုသိုလ်ကံကုန်မှ ငရဲမှ လွတ်ကြရသည်ဟု မှတ်သားရပါသည်။ အရပ် ၁၀-မျက်နှာ မေတ္တာပွားများနည်းတွင် အောက်အရပ်၌ရှိသော အနန္တစကြာဝဠာ အနန္တငရဲသားတွေကို မေတ္တာပို့တဲ့အခါ သူတို့ချမ်းသာခွင့် ရနိုင်ပါမလားဘုရား။ ရှင်းပြပေးပါရန် ရိုသေစွာ လျှောက်ထားအပ်ပါသည်။
(ကိုဟန်ဝင်း-အင်းစိန်မြို့သစ်၊ ရန်ကုန်)

(ဖြေ)
မေတ္တာပို့ရာတွင် သုခိတ-ဒုက္ခိတ သတ္တ၀ါမှန်သမျှတို့အား ကုန်အောင် နှလုံးသွင်း၍ မေတ္တာပို့ရပါသည်။ ငရဲသား ဒုက္ခိသတ္တ၀ါတွေကို မေတ္တာပို့သကဲ့သို့ လူ-နတ်-ဗြဟ္မာ သုခိတသတ္တ၀ါတွေကိုလည်း မေတ္တာပို့ရပါသည်။ မိမိမေတ္တာပို့သဖြင့် ၄င်းတို့ ဒုက္ခမှ လွတ်မြောက်ကြလိမ့်မည်ဟု ရည်ရွယ်ချက်မထားရပါ။ သတ္တ၀ါမှန်သမျှအား တသဘောတည်း၊ တစားတည်း ထား၍ မေတ္တာပွားများရခြင်းသာ ဖြစ်ပါသည်။

မိမိမေတ္တာပို့သဖြင့် သူတို့ချမ်းသာသွားလိမ့်မည်ဟု သဘောမထားရပါ။ မိမိမေတ္တာရောက်ရန်သာ အာရုံပြု၍ နက်နက်နဲနဲ မေတ္တာပို့ရန်သာ လိုပါသည်။
*********************************************************************************

(မေး) ( မျက်နှာမသစ်မီ)
အရှင်ဘုရား၊ နံနက်စောစော အိပ်ရာကထ၍ မျက်နှာမသစ်ဘဲ မင်္ဂလာရှိသော စကား ဆိုခြင်း၊ ဘုရား၌ ဆီမီး၊ ပန်း၊ ရေချမ်းများ ကပ်လှူခြင်း ပြုကောင်းပါသလား။
(မဒေ၀ီ-မြိတ်မြို့)

(ဖြေ)
နံနက်အိပ်ရာထပြီး ကိုယ်လက်သန့်စင်၍ မျက်နှာသစ်ပြီးမှ ရတနာသုံးပါးနှင့် စပ်သော စကားကို ဆိုခြင်း၊ ဘုရားရှိခိုး ဆုတောင်းခြင်း၊ ပန်း၊ ဆီမီး၊ ရေချမ်း၊ ဆွမ်းများ ကပ်လှူခြင်းတို့ကို ပြုရပါမည်။ မျက်နှာမသစ်ဘဲ ညစ်ပတ်ပေရေသော မျက်စိ မျက်နှာဖြင့် မနေအပ်၊ မလုပ်အပ်ပါ။ မျက်နှာသစ်ရာ၌ မျက်နှာသစ်ရေကို ကိ်ုင်၍ ဤရေကဲ့သို့ သတ္တ၀ါအားလုံး အေးမြကြည်လင် သန့်စင်ကြပါစေ-ဟူ၍ ရေကို ဥပမာထားပြီး မေတ္တာပွားမိအောင် ပွားရန်လည်း လိုအပ်ပါသည်။
********************************************************************************

(မေး) (ကြေးဆင်းတု သရဏဂုံ ပုတီးစိပ်နှင့် ဆုတောင်း)
အရှင်ဘုရား။၊ ၁-နေအိမ်များတွင် ကြေးဆင်းတုတော်ကို ကိုးကွယ်သင့်-မသင့်။
၂-သရဏဂုံသုံးပါးကို ပုတီးစိပ်ရာတွင် အသံမထွက်ဘဲ စိပ်၍ ဖြစ်-မဖြစ်
၃-ယသောဓရာ၊ မိထွေးတော်ဂေါတမီနှင့် မယ်တော်မာယာတို့ကဲ့သို့ဖြစ်ရန် မည်ကဲ့သို့ ဆုတောင်းရမည်နည်း။ ထိုအချက် သုံးချက်ကို ရှင်းလင်းဖြေကြားပေးတော်မူပါဘုရား။
(မဖြူမိုး-ခင်ဦး)

(ဖြေ)
၁-ဘုရားကို ကိုးကွယ်ရာတွင် သစ်သား၊ ကျောက်၊ ကြေး မည်သည့်ဆင်းတုတော်မျိုးမဆို ကိုးကွယ်နိုင်ပါသည်။
၂-ပုတီးစိပ်ဟူသည်မှာ စိတ်နှလုံးထဲမှာ ကြည်ညိုရိုသေစွာ ပွားများရခြင်းမျိုး ဖြစ်သဖြင့် အသံထွက်စရာ မလိုပါ။
၃-ဆုတောင်းဆုယူ ပြုရာတွင် မိမိကိုယ်တိုင်က အလွန်ဖြစ်လိုသော ဆန္ဒ ထက်သန်စွာဖြင့် လိုအပ်သလို လှူဒါန်းပေးကမ်းမှုပြု၍ စွဲမြဲစွာဖြင့် ဘုရားရှေ့တွင် နှုတ်မြွက်တောင်းဆိုရပါမည်။ တခါတောင်း တမျိုးဖြင့် မမြဲမစွဲ ရွှေ့ပြောင်း၍ တောင်းဆိုခြင်းမျိုး မဖြစ်သင့်ပါ။
*********************************************************************************

(မေး) (မြတ်စွာဘုရား နေ့အခါ ကျိန်းစက်ခြင်း ရှိ-မရှိ)
အရှင်ဘုရား၊ မြတ်စွာဘုရားသည် နေ့အခါ၌ ကျိန်းစက်တော်မူကြောင်း ကိုယ်တော်တိုင် ဟောတော်မူသည်ဟု ဆိုပါသည်။ ဟုတ်-မဟုတ်နှင့် မည်သည့်သုတ်တော်၌ နေ့အခါ ကျိန်းစက်တော်မူကြောင်း ဟောတော်မူပါ သနည်းဘုရား။
(သန်းထွန်း-ဓမ္မာစရိယ၊ မော်လမြိုင်)

(ဖြေ)
မဇ္ဈိမနိကာယ် မူလပဏ္ဏာသပါဠိတော် မဟာသစ္စကသုတ် (မ/၁-၃၁၆) ၌ သစ္စကပရိဗိုလ်မေးသဖြင့် မြတ်စွာဘုရားက အဘိဇာနာမိ ခေါ ပနာဟံ အဂ္ဂိဝေဿန-စသည်ဖြင့် ငါဘုရားသည် နွေဥတု၏ နောက်ဆုံးလအခါတွင် နေ့အခါ၌ ကျိန်းစက်တော်မူကြောင်း ဟောတော်မူပါသည်။ အဘယ့်ကြောင့်ဆိုသော် နွေဥတု၏ နောက်ဆုံးလဖြစ်သော နယုန်လပြည့်ကျော် ၁-ရက်မှ ၀ါဆိုလပြည့်အတွင်း အချိန်အခါသည် နေ့တာအရှည်ဆုံး ကာလဖြစ်သဖြင့် တကြောင်း၊ မြတ်စွာဘုရား တရားဟောတော်မူချိန်များ၌ ပင်ပန်းနွမ်းနယ်တော်မူသဖြင့် တကြောင်း၊ နေ့လယ်တွင် ခေတ္တကျိန်းစက်တော်မူသည်ဟု ဆိုပါသည်။ အခြားလတို့တွင်မူ နေ့အခါ ကျိန်းစက်တော်မူခြင်း မရှိဟု မှတ်ရပါမည်။
*********************************************************************************

(မေး) ( သပိတ်ဖုံး)
ဘုရားလက်ထက်က သပိတ်ဖြင့် ဆွမ်းခံကြွရာ၌ သပိတ်ဖုံး အသုံးမရှိကြောင်း ပြောကြပါသည်။ သပိတ်ဖုံးသုံးရန် အပ်-မအပ် ဖြေကြားပေးတော်မူပါဘုရား။
(ဦးသောမဗုဒ္ဓိ-မန္တလေး)

(ဖြေ)
ဘုရားသပိတ်၊ ရောင်ဖိတ်ဖိတ်၊ ဖုံးပိတ်ဘယ်ဖြင့် ပြီးသနည်း-စွယ်စုံကျော်ထင် ပုစ္ဆာအဖြေ၌ ဗုဒ္ဓ၀င်အဋ္ဌကထ၊ အပါဒါန်အဋ္ဌကထာ၊ အင်္ဂုတ္တိုရ်အဋ္ဌကထာတို့၌ တပုဿ ဘလ္လိက ကုန်သည်တို့၏ မုန်းဆွမ်းကို ခံအံ့သောအခါ စတုမဟာရာဇ် နတ်မင်းကြီးလေးယောက်တို့သည် ဣန္ဒနီလာကျောက်ညိုဖြင့် ပြီးသော သပိတ်ကို ကပ်လာကြောင်းကိုသာ ဆိုသည်။ မည်သို့သော အဖုံးပါသည်ဟု ကျမ်း၌မပြချေ။ ကျမ်းပြမှလည်း သိနိုင်မည်-ဟု ဖြေကြားထားသည်။

ရှေးယခင်က စစ်ကိုင်းမင်းကွန်းတွင် ပါဠိတော်ဂိုဏ်းဟူ၍ ပေါ်ခဲ့ဖူးရာ ဆွမ်းခံရာ၌ သပိတ်ဖုံးကိုမသုံး၊ ပါဠိတော်တွင် သပိတ်ဖုံးမရှိ၊ ဘုရားလက်ထက်တော်က သပိတ်ဖုံးမရှိဟု ဆိုကြောင်း ကြားရဖူးသည်။
*********************************************************************************

(မေး) (သွားရောဂါရှင်တို့အတွက် ဂါထာ)
အရှင်ဘုရား၊ တပည့်တော်သည် အသက်ငယ်သော်လည်း သွားရောဂါကို ခံစားနေရသူဖြစ်ပါသည်ဘုရား။ မိတ်ဆွေတဦးထံမှ သွားရောဂါပျောက် ဂါထာ မြတ်မင်္ဂလာစာစောင်တွင် ဖော်ပြဖူးသည်။ ကူးယူမထားမိပါ-ဟု သိရပါသည်။ တပည့်တော်အား သနားငဲ့ညှာသောအားဖြင့် သွားကိုက်ပျောက်ဂါထာကို ထပ်မံဖော်ပြ ပေးတော်မူပါရန် ရိုသေစွာ လျှောက်ထားအပ်ပါသည်ဘုရား။
(မသိင်္ဂီဝင်း-ကျုံပျော်)

(ဖြေ)
ရှေးဆရာကြီးတို့ ပြုစုထားသော သွားတော်လေးဆယ် ဘုရားရှိခိုးဂါထာကို ထပ်မံဖော်ပြလိုက်ပါသည်။ နံနက် အိပ်ရာထ၊ ညအိပ်ရာဝင် တခေါက်စီ ရွတ်ဆိုရှိခိုးပါ။
သတိ ဂတိ ဓိတိ မန္တံ၊ သန္တံ ဒန္တံ သုခါဝဟံ။
စတ္တာလီသ သမဒန္တံ၊ ဗုဒ္ဓံ ၀န္ဒာမိ သာဒရံ။
သတိ ဂတိ ဓိတိ မန္တံ-သတိမြဲအင်၊ ဉာဏ်ထူးလျင်၍၊ ကြည်လင်စွာဘိ၊ တည်ကြည်သော သမာဓိတော်လည်း ရှိတော်မူထသော။
သန္တံ-ငြိမ်သက်အေးချမ်း၊ စိတ်ဝမ်းကြည်လင်တော်မူသော။
ဒန္တံ-ယဉ်ကျေးသိမ်မွေ့၊ ပြကတေ့ နူးညံ့သော စိတ်တော် ရှိတော်မူသော။
သုခါဝဟံ-လူနတ်ဗြဟ္မာ၊ သတ္တ၀ါတို့ ချမ်းသာလေအောင်၊ အစဉ်ရွက်ဆောင်တော်မူတတ်သော။
စတ္တာလီသသမဒန္တံ-စွယ်တော်လေးဆူ၊ ပါဝင်မူ၍၊ စင်ဖြူတင့်တယ် အမျှလေးဆယ်သော၊ ပြည့်ကြွယ်ကြံ့ခိုင်၊ ပုလဲဆိုင် ပုလဲသွေးကဲ့သို့ ဖြူဖွေးသော သွားတော်မြတ်တို့နှင့် ပြည့်စုံတော်မူသော။
ဗုဒ္ဓံ-သစ္စာလေးပါး တရားသိမြင် ဘုရားရှင်ကိုယ်တော်မြတ်ကြီးကို။ အဟံ-(သွားဝေဒနာ ခံရပါ၍ ကျင်နာခံခက် ဆင်းရဲဖက်၍ နေရပါသော) ဘုရားတပည့်တော်သည်။
သာဒရံ-ရိုသေလေးစား ဦးညွတ်တွားလျက် စိတ်ထားကြည်လင် ဦးတော်တင်လျက်။
ဝန္ဒာမိ-လက်ဆယ်စုံမိုး၊ ပျပ်ဝပ်ကျိုးလျက် ရှိခိုးပါ၏ မြတ်စွာဘုရား မြတ်စွာဘုရား။

( မြတ်မင်္ဂလာ ၂၀၀၃-ဖေဖော်ဝါရီလ)

1 comment:

kokomaung.uk said...

အခုလို ပြဿနာအမေးအဖြေတွေ တင်ပြပေးတဲ့အတွက် အရမ်းကျေးဇူးတင်ပါတယ်ဘုရား။