Friday, January 15, 2010

မဇ္ဈိမဒေသ

( သံဝေဇနိယ လေးဌာန)
၁။ မြတ်စွာဘုရား ဖွားမြင်တော်မူရာ လုမ္ဗိနီ ဥယျာဉ်နေရာ။
၂။ ဘုရားအဖြစ်သို့ ရောက်တော်မူရာ ဗုဒ္ဓဂယာရှိ ဗောဓိပင်နှင့် ရွှေပလ္လင်တော်။
၃။ ပဉ္စ၀ဂ္ဂီ ၅-ဦးတို့အား တရားဦးဟောတော်မူရာ မိဂဒါဝုန်။
၎။ မြတ်စွာဘုရား ပရိနိဗ္ဗာန် စံဝင်တော်မူရာ ကုသိနာရုံ အင်ကြင်းရဂုံနှင့် အခြား ဗုဒ္ဓ၀င်နေရာများဖြစ်သော သာဝတ္ထိပြည်၊ ရာဇဂြိုဟ်ပြည်၊ ပါဋလိပုတ်ပြည်နှင့် နာလန္ဒာတက္ကသိုလ် စသည်တို့အကြောင်းကို ရေးသား ဖော်ပြပါမည်။


(၁) လမ္ဗိနီ ဥယျာဉ်
ဘုရားအလောင်းတော် မွေးဖွားရာဌာနဖြစ်သည့် လုမ္ဗိနီဥယျာဉ်သည် နီပေါနိုင်ငံအတွင်း၌ တည်ရှိသည်။ အိန္ဒိယနိုင်ငံ နယ်စပ်မှ ၆-မိုင်ခန့်ဝေးကွာသည်။ လုမ္ဗိနီဥယျာဉ်သည် လွန်ခဲ့သောနှစ်ပေါင်း ၁၅၀၀-ကျော်က အင်ကြင်းပင်ပျိုတို့ ဖြင့် ဝေဆာနေခဲ့သည်။ သုဒ္ဓေါဒနမင်းကြီး၏ ကပိလ၀တ်နေပြည်တော်နှင့်အဉ္စနမင်းကြီး၏ ဒေ၀ဒဟ နေပြည်တော်နှစ်ခုအကြား၌ တည်ရှိခဲ့သည်။ လုမ္ဗိနီဥယျာဉ်၌ ဖူးမြော်လေ့လာခဲ့ရသည့် ဌာနများမျာ-
၁။ ဘုရားအလောင်း ဖွားမြင်ရာ အထိမ်းအမှတ်ဖြစ် ည့် အသောကမင်းကြီး၏ ကျောက်စာတိုင်။
၂။ မယ်တော်မာယာ သားတော် ဖွားမြင်ခန်းရုပ်တု။
၃။ ဖွားမြင်ပြီးနောက် ဘုရားအလောင်း ခြေ ၇-လှမ်း လှမ်းရာ စေတီတော် ၇-ဆူ။
၎။ မယ်တော်နှင့် သားတော်တို့ ရေသန့်စင်ရာ ရေကန်ငယ်။
၅။ နီပေါဗုဒ္ဓဘာသာ ဘုန်းတော်ကြီးကျောင်း။
၆။ လောကမဏိစူဠာစေတီတော်နှင့်
၇။ မြန်မာရွှေကျောင်းတော်တို့ ဖြစ်ကြသည်။

(၂) ဗုဒ္ဓဂယာ-
မြတ်စွာဘုရားသည် မဂဓတိုင်း (ယခု အိန္ဒိယနိုင်ငံ ဗီဟာပြည်နယ်) ဂယာမြို့အနီး မဟာဗောဓိပင်ရင်း၌ သဗ္ဗညုတရွှေဉာဏ်တော် ရတော်မူခဲ့သည်ကို အကြောင်းပြု၍ ဤဌာနကို ဗုဒ္ဓဂယာ-ဟုခေါ်တွင်သည်။ ၄င်းဒေသ၌ စာရေးသူ ဖူးတွေ့ခဲ့ရသည့်ဌာနများမှာ-
၁။ သဗ္ဗညုတရွှေဉာဏ်တော်ကို ရတော်မူရာ မဟာဗောဓိပင်။
၂။ မြတ်စွာဘုရား မာရ်ငါးပါးကို အောင်မြင်တော်မူရာ အပရာဇိတပလ္လင်။
၃။ ဗောဓိပင်နှင့်ရွှေပလ္လင်နေရာ၌ သီရိဓမ္မာသောကမင်းကြီး စတင်တည်ထားကိုးကွယ်ခဲ့သော မဟာဗောဓိစေတီတော်။
၎။ မြတ်စွာဘုရား ဘုရားအဖြစ်သို့ ရောက်တော်မူပြီးနောက် ခုနစ်ရက် ခုနစ်လီ စံနေတော်မူသည့် သတ္တဌာန နေရာများ ဖြစ်သည်။

၎င်းသတ္တဌာန နေရာများမှာ-
၁။ ဗောဓိပင်နှင့်ရွှေပလ္လင် (ပလ္လင်္က သတ္တာဟ)
၂။ အနိမိသ စေတီတော် (အနိမိသ သတ္တာဟ)
၃။ ရတနာစင်္ကြံတော် (စင်္ကမ သတ္တာဟ)
၎။ ရတနာဃရ ရွှေအိမ်တော် (ရတနာဃရ သတ္တာဟ)
၅။ အဇပါလ ဆိတ်ကျောင်းညောင်ပင် (အဇပါလ နိဂြောဓ သတ္တာဟ)
၆။ မုစလိန္ဒာအိုင် ( မုစလိန္ဒ သတ္တာဟ)
၇။ ရာဇာယတန လင်းလွန်းပင် ( ရာဇာယတန သတ္တာဟ) စသော နေရာတို့ဖြစ်သည်။
ထို့ပြင် နေရဉ္ဇရာမြစ်၊ သုဇာတာအိမ် နေရာ၊ သေနာနိဂုံးရွာ၊ သုဇာတာ ဃနာနို့ဆွမ်း ဆက်ကပ်ရာနေရာ၊ ဒုက္ကရစရိယာ ကျင့်တော်မူရာ ဒုင်္ဂစရိတောင်လိုဏ်ဂူ၊ ဥရုဝေလရသေ့ကြီး ကျောင်းသင်္ခမ်း၊ မင်းတုန်းမင်းကြီး၏ ဇရပ်တော်နှင့် ကုသိုလ်တော် ကျောက်စာတိုက်တို့ကိုလည်း ကြည့်ရှုလေ့လာခဲ့ကြပါသည်။

( ၃ ) မိဂဒါဝုန်
မြတ်စွာဘုရားသည် ဘုရားဖြစ်တော်မူပြီးနောက် ပဉ္စ၀ဂ္ဂီ ၅-ဦးတို့အား ဓမ္မစကြာတရားဦး ဟောတော်မူရာ မိဂဒါဝုန်ဥယျာဉ်သည် ရှေးအခေါ် ကာသိတိုင်း၊ ဗာရာဏသီပြည်မှ ၆-မိုင်ခန့်အကွာတွင် တည်ရှိသည်။ ယခုအိန္ဒိယနိုင်ငံ ဥတ္တရာပရာဒေ့ရ်ှပြည်နယ် ဗာရာဏသီမြို့ အနီး ဆာရာနတ်ဟုခေါ်တွင်သော အရပ်တွင် ရှိသည်။ ၄င်းအရပ်ဒေသ၌ စာရေးသူ လေ့လာဖူးတွေ့ခဲ့ရသော နေရာဌာနများမှာ-
၁။ ဓမ္မစကြာတရားဦး ဟောကြားရာဌာနဖြစ်သော ဓမ္မရာဇိက စေတီတော်နေရာ။
၂။ အနတ္တလက္ခဏသုတ် ဟောကြားရာဌာနဖြစ်သော ဓမ္မေခစေတီတော်။
၃။ မြတ်စွာဘုရားရှင် ပထမ၀ါကပ်တော်မူရာ နန္ဒိယကျောင်းတော်။
၎။ အသောကမင်းကြီး၏ ကျောက်စာတိုင်။
၅။ မူလဂန္ဓကုဋီတိုက်နှင့် ဒက္ခိဏသာခါ ပင်ပွားတော်။
၆။ ပဉ္စ၀ဂ္ဂီငါးဦးတို့နှင့် တွေ့ဆုံရာ ချောက်ကန္တီစေတီတော်။
၇။ မိဂဒါဝုန်ပြတိုက်။
၈။ မြန်မာပြည်မှလှူဒါန်းသော ပဉ္စ၀ဂ္ဂီငါးဦးတို့အား တရားဦးဟောသည့် ဘုရားဗိမာန်တော်တို့ ဖြစ်ကြပါသည်။


( ၄ ) နာလန္ဒာမြို့
နာလန္ဒာမြို့သည် အရှင်သာရိပုတ္တရာ၏ ဖွားရာဇာတိ ဖြစ်သည်။ မြတ်စွာဘုရား သက်တော်ထင်ရှားရှိစဉ်အခါက ထိုနာလန္ဒာမြို့သို့ အကြိမ်ပေါင်းများစွာ ကြွတော်မူခဲ့သည်။ နာလန္ဒာမြို့သည် ယခင်က မဂဓတိုင်း (ယခု ဗီဟာ ပြည်နယ်) တွင် ရှိပါသည်။ ပါဋလိပုတ်နှင့် ၅၅-မိုင် ကွာဝေးပြီး ရာဇဂြိုဟ်နှင့် ၇-မိုင် အကွာတွင် တည်ရှိသည်။ ထိုမြို့တွင် ခရစ်နှစ် ၅-ရာစုခန့်မှစ၍ ကြီးကျယ်ခမ်းနား ကျော်ာကားလှသော နာလန္ဒတက္ကသိုလ် ကျောင်းတော်ကြီးထွန်းကားခဲ့သည်။ ထို့ပြင် ထိုတက္ကသိုလ် ကျောင်းဝင်းအတွင်း၌ပင် အရှင်သာရိပုတ္တရာ စေတီတော်ကိုပါ လေ့လာဖူးမြော်ခဲ့ပါသည်။

( ၅ ) ကုသိနာရုံ-
မြတ်စွာဘုရား ပရိနိဗ္ဗာန်စံဝင်တော်မူရာဖြစ်သော ကုသိနာရုံ အင်ကြင်းရဂုံသည် ဘုရားရှင်လက်ထက်က မလ္လတိုင်း ကုသိနာရုံပြည် မလ္လာမင်းတို့၏ ဥယျာဉ်ဖြစ်ခဲ့သည်။ ယခုအခါ ဥတ္တရာပရာဒေ့ရှ် ပြည်နယ်အတွင်း ကုရှိနာဂါရ်အမည်ရှိသော ရွာကလေးတခုသာ ဖြစ်ပါသည်။ ၄င်းဒေသ၌ စာရေးသူ လေ့လာဖူးမြော်ခဲ့ရသော နေရာဌာနများမျာ-
၁။ မြတ်စွာဘုရား ပရိနိဗ္ဗာန်စံဝင်တော်မူပုံကို ထုလုပ်ထားသော ပရိနိဗ္ဗာန ရုပ်ပွားတော်။
၂။ ဘုရားရှင် ပရိနိဗ္ဗာန်စံတော်မူရာ၌ တည်ထားသော မဟာပရိနိဗ္ဗာန စေတီတော်။
၃။ ဘုရားရှင်၏ ဥတုဇရုပ်ကလာပ်တော်ကို တေဇောဓာတ် လောင်ကျွမ်းရာနေရာ၌ တည်ထားသော မကုဋဗန္ဓ စေတီတော်။
၎။ တေဇောဓာတ် လောင်ကျွမ်းရာနေရာ၌ ကြွင်းကျန်သော မီးသွေးများကို စုပေါင်းဌာပနာ၍ တည်ထားသော အင်္ဂါရ စေတီတော်။
၅။ မြတ်စွာဘုရား ရေကြည်တော်သုံးရာနေရာ။
၆။ မြတ်စွာဘုရား ပရိနိဗ္ဗာန် စံတော်မမူမီ ရေသုံးသပ်တော်မူသော ကကုဓာမြစ်နေရာဌာတို့ ဖြစ်ပါသည်။

( ၆ ) သာဝတ္ထိ-
မြတ်စွာဘုရားရှင် လက်ထက်တော်က ကောသလတိုင်း ပသေနဒီကောသလမင်းကြီး၏ ထီးနန်းစိုက်ရာ သာဝတ္ထိပြည် ဖြစ်သည်။ ယခုအခေါ် ဆာဟေ့မဟေ့ (ခေါ်) ဆရာဗစတီ ဖြစ်သည်။ ဥတ္တရာပရာဒေ့ရ်ှပြည်နယ်၊ ဗာဗာလ်ရာမ်ပူမြို့မှ ၇-မိုင်အကွာတွင် တည်ရှိသည်။ ၄င်းဒေသ၌ ဖူးမြော်လေ့လာခဲ့သည့် နေရာဌာနများမှာ-
၁။ မြတ်စွာဘုရားရှင် ၂၄-၀ါတိုင်တိုင် ၀ါကပ်တော်မူခဲ့ရာ အနာထပိဏ်သူဌေး ဆောက်လုပ်လှူဒါန်းခဲ့သော ဇေတ၀န်ကျောင်းတော်ရာ။
၂။ ဘုရားရှင်အသုံးပြုသော ရေတွင်းဟောင်း။
၃။ ဘုရားရှင်လက်ထက်အခါက အရှင်အာနန္ဒာ၏ အစီအစဉ်ဖြင့် စိုက်ပျိုးခဲ့သော အာနန္ဒဗောဓိပင်။
၎။ တိတ္တိတို့အား တန်ခိုးပြာဋိဟာ ပြတော်မူရာဌာန (သရက်ဖြူကုန်း)
၅။ သာဝတ္ထိမြို့တော်ဟောင်းတို့ ဖြစ်ကြသည်။


( ၇ ) ရာဇဂြိုဟ်
မြတ်စွာဘုရားရှင် လက်ထက်က မဂဓတိုင်း၊ ရာဇဂြိုဟ်ပြည်ဟု ခေါ်သည်။ ဗိမ္ဗိသာရမင်းကြီးနှင့် သားတော် အဇာတသတ်မင်းတို့၏ နေပြည်တော်ဖြစ်ပါသည်။ ရာဇဂြိုဟ်မြို့သည် ပါဋလိပုတ်၏အရှေ့ဘက် ၆၅-မိုင်အကွာ တောင်ငါးလုံး ၀ိုင်းရံထားသော မြို့ဖြစ်သည်။ ယခု ဗီဟာပြည်နယ်၊ ရ(ဂ်ျ)ဂီး-ဟု ခေါ်တွင်သည်။ ဘုရားအလောင်း တောထွက်တော်မူပြီးနောက် ပထမဆုံး ဆွမ်းခံကြွရာနှင့် ဘုရားဖြစ်တော်မူပြီးနောက် ပထမဆုံး သံဃာတော် အခြံအရံ တထောင်ဖြင့် ကြွရောက်သီတင်းသုံးရာ မြို့ဖြစ်သည်။ ၄င်းဒေသတွင် ဖူးမြော်လေ့လာခဲ့ရသော နေရာဒေသများမှာ-
၁။ ဗိမ္ဗိသာရမင်း လှူဒါန်းသော ဝေဠုဝန်ကျောင်းတော်ရာ။
၂။ မြတ်စွာဘုရား သီတင်းသုံးရာ ဂိဇ္ဈကုဋ်တောင်ထိပ် ကျောင်းတော်ရာ။
၃။ သမားတော် ဇီဝက သရက်ဥယျာဉ်။
၎။ ပထမသင်္ဂါယနာတင်ရာ ဝေဘာရတောင်ပေါ်ရှိ သတ္တပဏ္ဏိဂူ။
၅။ ဗိမ္ဗိသာရမင်းကြီး၏ ဘဏ္ဍာတိုက်။
၆။ ဗိမ္ဗိသာရမင်းကြီး အကျဉ်းချထားရာ အကျဉ်းထောင်နေရာ။
၇။ အဇာတသတ်မင်း ဓာတ်တော်မြှုပ်နှံရာ နေရာ။
၈။ နာဠာဂီရိ ဆင်ရိုင်းကြီးအား ချွတ်တော်မူသော နေရာတို့ ဖြစ်သည်။


( ၈ ) ပါဋလိပုတ် မြို့တော် (ပတ္တနားမြို့)
မြတ်စွာဘုရားရှင် လက်ထက်တော်အခါက အဇာတသတ်မင်း တည်ဆောက်ခဲ့သော ခံတပ်မြို့ဖြစ်သည်။ မြို့တည်စဉ်က ဘုရားရှင်ကိုယ်တော်တိုင် အခမ်းအနားဖွင့်ပွဲတွင် ဆွမ်းအနုမောဒနာတရား ဟောကြားခဲ့သည်။ ရှေးအခါက မဂဓတိုင်း၊ ပါဋလိပုတ်ပြည်ဟု ခေါ်တွင်သည်။ မဂဓတိုင်းကြီးသခင် အသောကမင်းကြီး၏ နေပြည်တော်ဖြစ်ခဲ့သည်။

သာသနာနှစ် ၂၃၅-ခုနှစ်တွင် ပါဋလိပုတ်မြို့တော်၌ အသောကမင်းကြီး ဆောက်လုပ်သော အသောကာရုံ ကျောင်းတော်ကြီးတွင် ရဟန္တာတထောင်တို့ တတိယသင်္ဂါယနာတင်ပွဲ ကျင်းပခဲ့သည်။ ပါဋလိပုတ်သည် ယခု ဗီဟာပြည်နယ် (ယခင် မဂဓတိုင်း) ၏ မြို့တော် ပတ္တနားဟု ခေါ်တွင် ထင်ရှားနေလေသည်။ ၄င်းဒေသတွင် စာရေးသူ ကြည့်ရှုလေ့လာခဲ့ရသော နေရာများမှာ-
၁။ တတိယသင်္ဂါယနာတင်ခဲ့သော အသောကာရုံကျောင်း။
၂။ အသောကမင်းကြီး လှူဒါန်းခဲ့သော ရေတွင်း။
၃။ ကျောက်စာဌာန ပြတိုက်။
၎။ ရိက္ခာသိုလှောင်ရုံ ဂိုဒေါင်ကြီး။
၅။ ပါဋလိပုတ် မြို့တော်ဟောင်းနေရာတို့ ဖြစ်ပါသည်။

( သန်းဝင်းရှိန် )

No comments: