Tuesday, January 12, 2010

ဘာသာရေး ပြဿနာ ( ၁၀၀ )

( ဘဒ္ဒန္တတိလောကသာရ ဖြေသည် )

(မေး) (အိပ်မက်မက်ခြင်း)
အရှင်ဘုရား၊ တချို့ သေဆုံးသွားသူများသည် ကျန်ရစ်သူများအား အိပ်မက်ပေး၍ ပြောတတ်ကြပါသည်။ ၄င်းပုဂ္ဂိုလ်များမှာ မည်သည့်ဘုံမှ မည်သို့သော ပုဂ္ဂိုလ်များအဖြစ် သတ်မှတ်ရမည်ကို သိလိုပါ၍ ဖြေကြားပေးတော်မူပါအရှင်ဘုရား။
(မဇာလီအောင်-ပုဇွန်တောင်၊ ရန်ကုန်မြို့)

(ဖြေ)
လူတဦးတယောက် အိပ်မက်မှုမှာ ဓာတ်ချောက်ချား၍ မက်ခြင်း။ နတ်တို့လှည့်စား၍ မက်ခြင်း စသည် အကြောင်းများရှိရာ ကွယ်လွန်သေဆုံးသွားသူများက အိပ်မက်ပေး၍ မက်ခြင်းမှာလည်း နတ်တို့လှည့်စား (ဖန်တီး)၍ မက်ခြင်း အမျိုးအစား၌ ထည့်သွင်းရပါမည်။ နတ်ဆိုသော်လည်း တန်ခိုးကြီးသော အထက်နတ်မျိုး မဟုတ်ဘဲ စတုမဟာရာဇ်နတ်မျိုး အ၀င်အပါ ဝေမာနိကပေတ ဟူသော ပရလောကသားများကိုလည်း တန်ခိုးနည်းသော နတ်မျိုး၌ ထည့်သွင်း၍ ၄င်းတို့က ကိုယ်ထင်ရှားပြနိုင်ခြင်း၊ အနံ့ပေးခြင်းနှင့် အိပ်မက် ပေးနိုင်ခြင်းတို့ကို ပြုနိုင်ကြောင်း ပေတ၀တ္ထုများတွင် တွေ့ရပါသည်။
********************************************************************************

(မေး) (မြင်းမိုရ်တောင်)
အရှင်ဘုရား၊ လူတိုင်း လူတိုင်းဟာ များသောအားဖြင့် မြင်းမိုရ်တောင်ကို ယူဇနာ ရှစ်သောင်းလေးထောင် ရှိ၏ဟု ပြောကြပါသည်။ သဒ္ဒါကြီး ပုဒ်စစ်စုံကျမ်း(၁၃၄)၌ ပြထားတာကတော့ ဂီရိရာဇာ-မြင်းမိုရ်တောင်မင်းသည် အဋ္ဌသဋ္ဌိသတသုဗ္ဗေဓော-ယူဇနာ တသိန်းခြောက်သောင်းအစောက်ရှိ၏-ဟု ပြဆိုထားရာ အထက်ပါစကားနှင့် ဆန့်ကျင်နေပါသဖြင့် ဘုရားတပည့်တော်အား ဖြေကြားပေးတော်မူပါဘုရား။
(အရှင်စန္ဒောဒယ-ခေတ္တ ကချင်ပြည်နယ်)

(ဖြေ)
မြင်းမိုရ်တောင်သည် သမုဒ္ဒရာ၏ အထက်တွင် အမြင့်ရှိသလိုပင် သမုဒ္ဒရာအောက် ရေထုအတွင်းတွင်လည်း ရှိသည်ဆိုပါသည်။ သမုဒ္ဒရာ၏ အထက်အောက်ယူဇနာ အတူတူပင် ဖြစ်ရာ သမုဒ္ဒရာအထက် ရေအပြင်မှ တာဝတိံသာနတ်ပြည်အထိ ယူဇနာ ရှစ်သောင်းလေးထောင် ရှိသကဲ့သို့ သမုဒ္ဒရာအတွင်း၌လည်း ရှစ်သောင်းလေးထောင်ပင် ဖြစ်သည်။
ရေပေါ်တွင် ယူဇနာ ရှစ်သောင်းလေးထောင် ရှိသကဲ့သို့ ရေအောက်တွင်လည်း ရှစ်သောင်းလေးထောင်ရှိရာ နှစ်ရပ်ပေါင်း ယူဇနာ တသိန်းခြောက်သောင်း ဖြစ်ပါသည်။
ရှစ်သောင်းလေးထောင် နှစ်ပြန်ဆောင်သော တောင်မင်းမြင်းမိုရ်ဟု အဆိုရှိပါသည်။ ထို့ကြောင့် စကားနှစ်ရပ် မဆန့်ကျင်ပါ။ သော စတုရာသီတိ ယောဇနသဟဿာနိ မဟာသမုဒ္ဒံ သြဂါဟိတွာ အနုပ၀ိသိတွာ ဌိတောတတ္တကမေ၀ ဥဂ္ဂတော န ကေ၀လံ စေတ္ထဥဗ္ဗေဓော စ။ (ဇိနာလင်္ကာရ)
********************************************************************************

(မေး) (မိန်းမဘ၀)
အရှင်ဘုရား၊ မိန်းမဘ၀၌ ဖြစ်ရခြင်းသည် အကုသိုလ်ကြောင့်ဖြစ်ရသည်။ ကုသိုလ်မလုပ်၊ ဆုမတောင်းလျှင် မိန်းမဘ၀ ဆက်တိုက်နေရတတ်သည်ဟု ပြောဆိုကြပါသည်။ ဟုတ်ပါသလား။ တပည့်တော်တို့ မိန်းမဘ၀ဆိုတာ အကုသိုလ်ကြောင့် ရတာ မှန်ပါသလား။ ဖြေကြားပေးတော်မူပါဘုရား။
(မမီးမီး(ခ) အပုလေး၊ ဗိုလ်တထောင်မြို့နယ်)

(ဖြေ)
မိန်းမဘ၀၌ ဖြစ်ရခြင်းသည် အကုသိုလ်ကြောင့် ဖြစ်ရသည်ဆိုသော စကားမှာ အချို့မှန်သော်လည်း အချို့ မမှန်ပါ။ ယောက်ျားတယောက်သည် ကာမေသု မိစ္ဆာစာရကံ-ကိုလွန်ကျူးမိသော် ထိုကံကြောင့် ငရဲ၌ ကြာမြင့်စွာ ခံရ၏။ ငရဲမှလွတ်သောအခါ နွားစသော တိရစ္ဆာန်ဘ၀မျိုး၌ ဖြစ်၏။ အသင်းခံရခြင်းမျိုး ဘ၀များစွာ ဖြစ်ရသေးသည်။ ထို့နောက် လူဖြစ်သောအခါ နပုန်းပဏ္ဍုက် ဥဘတောဗျည်းစသော ဘ၀ဆိုးမျိုး၌ အဖန်ဖန်ဖြစ်၍ ယင်းကံကြွင်းအရ မိန်းမဘ၀သို့ ရောက်ရပြန်သည်။ မိန်းမဆိုသော်လည်း အဆင့်အတန်းမီ ဘ၀မျိုးမဟုတ်၊ အစော်ကားခံ အတန်းအစား၊ ပြည့်တန်ဆာဘ၀များနှင့် ကုသိုလ်ကံပေး၍ မိန်းမကောင်းဖြစ်ရသော်လည်း အိမ်ထောင်ရေး အတည်မကျ လင်ပစ်ဘ၀မျိုး၌ ဖြစ်ရလေသည်။ ဤသို့ ဘ၀တရာမျှ ဖြစ်ရသည်ဆို၏။

အရှင်အာနန္ဒာမထေရ်အလောင်း ၀တ္ထု၊ ဣသိဒါသီထေရီအလောင်း ၀တ္ထုတို့၌ ယင်းအကြောင်း ထင်ရှား၏။ ယင်းကဲ့သို့သော မိန်းမဘ၀မျိုးသည်သာ အကုသိုလ်ကြောင့်ဖြစ်ရသော ဘ၀မျိုးများ ဖြစ်ပါသည်။ မယ်တော်မာယာ၊ မိထွေးတော် ဂေါတမီ၊ ယသော်ဓရာ၊ ၀ိသာခါတို့ကဲ့သို့သော မိန်းမဘ၀မျိုးကား အကုသိုလ်ကြောင့် ဖြစ်ရသည်မဟုတ်၊ ယင်းဘ၀မျိုးရရန် ကုသိုလ်အထူးပြုကာ ဆုတောင်း၍ပင် ရယူရပေသေးသည်။
*********************************************************************************

(မေး) (လူသုံးယောက် နွားသတ်ကြ)
အရှင်ဘုရား၊ လူသုံးယောက်သည် နွားတကောင်ကို ၀ိုင်းဝန်းချည်နှောင်၍ နှစ်ယောက်က ကိုင်ပေးပြီး တယောက်က လည်လှီး၍ သတ်ရာ၌ သတ်သူသာ ပါဏာတိပါတကံ ထိုက်ပါသလော။ သုံးယောက်လုံးပင် ကံထိုက်ပါသလော ဆုံးဖြတ်ဖြေရှင်းတော်မူပါဘုရား။
(မောင်ဝ-မလှိုင်မြို့)

(ဖြေ) ပါဏာတိပါတကံအရာ၌ ကိုယ်တိုင်သတ်သည်ဖြစ်စေ၊ မသတ်သည်ဖြစ်စေ သေစေရန် ဦးတည်ပြုလုပ်၍ သတ္တ၀ါသေလျှင် သတ်သူရော ပူးတွဲလုပ်ကိုင်သူများရော ကံထိက်ပါသည်။
လူတစုသည် လာသောသတ္တ၀ါများ ကျ၍သေရန် တွင်းတတွင်းကို အတူတူထားကြသည်။ ထိုတွင်း၌ သတ္တ၀ါတကောင်ကောင် ကျ၍သေဆုံးလျှင် ထိုလူတစု အတူတူ ပါဏာတိပါတကံ ထိုက်ပေသည်။

ထို့အတူ ဟင်းစားသတ္တ၀ါတို့ကို မွေးမြူ၍ ရောင်းချခြင်း၊ သောက်၍ သေစေရန် အဆိပ်ကို ရောင်းချခြင်း၊ လူသတ်လက်နက်များကို ရောင်းချခြင်းတို့၌လည်း ၀ဓကစေတနာဟူသော သေစေလိုသောစေတနာ၊ သေမည်ဟုသိလျက် ရောင်းဝယ်ဖောက်ကားသော စေတနာတို့ကြောင့် ပါဏာတိပါတကံ မလွတ်နိုင်ကြောင်း သဘောပေါက်ရာ၏။
*********************************************************************************

(မေး) ( ဧဟိဘိက္ခု ရဟန်း)
အရှင်ဘုရား၊ တပည့်တော်သည် ဤဘုရားသာသနာတော်၌ ရဟန္တာဖြစ်လိုစိတ် ရှိပါသည်။ သို့သော် ဧဟိဘိက္ခု ရဟန္တာ ဖြစ်လိုပါသည်။ ဤဘုရားသာသနာတော်၌ မဖြစ်နိုင်ဟုလည်း သိရပါသည်။ ဧဟိ ဘိက္ခု ရဟန္တာ အကြောင်း ပြည့်ပြည့်စုံစုံ ဖြေကြားပေးစေလိုပါသည်ဘုရား။
(ဦးပြုံးမောင်-သာကေတ)

(ဖြေ)
ဧဟိဘိက္ခု ရဟန်းဟူသည် ဤဘ၀၌ ရဟန္တာဖြစ်မည့် ပစ္ဆိမဘ၀ိက ပုဂ္ဂိုလ်တဦးဦးသည် မြတ်စွာဘုရားအထံ၌ ရဟန်းအဖြစ်ကို အခွင့်တောင်းလျှင် မြတ်စွာဘုရားက ဤပုဂ္ဂိုလ်သည် ရှေးရှေးဘ၀တို့၌ ရဟန်းသံဃာအား ပရိက္ခရာတို့ဖြင့် ချီးမြှောက်လှူဒါန်းခဲ့ဖူးခြင်း ရှိသည်ကို မြင်တော်မူလျှင် သင်္ကန်းတော်အတွင်းမှ လက်ယာ လက်တော်ကို ထုတ်တော်မူ၍ ဧဟိ ဘိက္ခု သွာက္ခာတော ဓမ္မော စရ ဗြဟ္မစရိယံ သမ္မာ ဒုက္ခဿ အန္တကိရိယာယ-ရဟန်း လာလှည့်၊ ငါသည် တရားတော်ကို ကောင်းစွာဟောအပ်ပြီ။ ၀ဋ်ဆင်းရဲ၏ အဆုံးကို ပြုခြင်းငှါ မြတ်သောအကျင့်ကို ကျင့်လှည့်လော့-ဟု ခေါ်တော်မူလေ၏။

ထိုအခါ ထိုပုဂ္ဂိုလ်သည် ဆံမုတ်ဆိတ်များဖြင့် လူ့အသွင်ရှိသော်လည်း ဆံမုတ်ဆိတ်ရိတ်ပယ်ပြီး တန်ခိုးဖြင့်ပြီးသော သပိတ်သင်္ကန်းကို ဆင်ယင်ပြီးဖြစ်ကာ ၀ါတော် ၆၀-ရ ရဟန်းတော်တဦး၏ ဣနြေ္ဒဖြင့် ဘုရားရှေ့တော်တွင် ရဟန်းဖြစ်သွားလေသည်။ ဤသို့ တန်ခိုးဖြင့်ပြီးသော သင်္ကန်းပရိက္ခရာကို ရရှိနိုင်သည့် ဧဟိ ဘိက္ခု ရဟန်းဖြစ်ရန်မှာ-
(၁) ဘုရားရှင်နှင့် တွေ့ဆုံရခြင်း။
(၂) ဤဘ၀၌ ရဟန္တာဖြစ်မည့် ပစ္ဆိမဘ၀ိကဖြစ်ခြင်း။
(၃) ရှေးရှေးဘ၀တို့က ရဟန်းသံဃာအား သင်္ကန်းပရိက္ခရာ လှူခဲ့ဖူးခြင်း နှင့်
(၄) ယောက်ျားစင်စစ် ဖြစ်ခြင်းတို့ကို လိုအပ်၏။

မိန်းမတို့ကား ဧဟိ ဘိက္ခု ရဟန္တာမ-ဟူ၍ မရှိသဖြင့် မိန်းမဘ၀ဖြင့် ဧဟိ ဘိက္ခု ဖြစ်ခွင့် မရှိပေ။ ရှေးရှေးဘ၀တို့က သင်္ကန်းပရ်ိက္ခရာ လှူခဲ့ဖူးသော အမျိုးသမီးတို့သည် အကြီးအကျယ် အလွန်မြတ်ဆုံး အကျိုးပေးလျှင် ၀ိသာခါ ကျောင်းအမကြီးတို့ကဲ့သို့ အမျိုးသမီးတိုင်း မ၀တ်ဆင်ရသော မဟလ္လတာ ပသာဓန တန်ဆာကို ၀တ်ဆင်နိုင်သော အကျိုးကို ရလေ၏ ဘုရာလက်ထက်က ဤမဟလ္လတာ ပသာဓနတန်ဆာကို ၀တ်ဆင်ရသူ အမျိုးသမီး သုံးယောက်ရှိခဲ့ဖူးလေသည်။
(အမျိုးသမီးတို့အနေဖြင့် သင်္ကန်းစသော ပရိက္ခရာများကို လှူဒါန်းသောအခါတွင် ဤကောင်းမှုကြောင့် ယောက်ျားကောင်းစင်စစ် ဆက်တိုင်းဖြစ်၍ နောင် ဘုရားလက်ထက်၌ ဧဟိဘိက္ခု ရဟန်းအဖြစ်ဖြင့် နိဗ္ဗာန် ၀င်ရပါလို၏-ဟု ဆုတောင်းရန် သင့်လှပေသည်။)
*********************************************************************************

(မေး) (ထီးလှူရသောအကျိုး)
အရှင်ဘုရား၊ တပည့်တော်သည် တပည့်တော်တို့မြို့ ဘုံကထိန်ပွဲကြီးတွင် နှစ်စဉ် ရဟန်းတော်ဆောင်း ထီးများ လှူဒါန်းလေ့ရှိပါသည်။ ဤသို့ ထီးလှူဒါန်းရန် ၀ါသနာရှိ၍လည်း နှစ်စဉ် လှူဒါန်းခဲ့ရပါသည်။ ထိုထီးလှူရသော အကျိုးတရားကို အမြဲဆောင်ထား မှတ်သားပါရန် လင်္ကာဆောင်ပုဒ်တခု ရေးသားချီးမြှင့်တော်မူပါဘုရား။
(မောင်ငြိမ်းချမ်း-စစ်တွေမြို့)

(ဖြေ)
ထီးလှူရသောအကျိုးကို ကျမ်းဂန်များတွင် (ဆုမတောင်းဘဲရသော အကျိုးအဖြစ်ဖြင့်)
(၁) အချမ်းမရှိသည်။
(၂) အပူမရှိသည်။
(၃) အညစ်အကြေးကင်းသည်။
(၄) ဘေးရန်မရှိသည်။
(၅) စိုးရိမ်ကြောင့်ကြစိတ် မရှိသည်။
(၆) သူခပ်သိမ်းတို့ ရိုသေသည်။
(၇) နူးညံ့သောကိုယ်ရှိသည်။
(၈) နူးညံ့သောစိတ် ရှိသည်-ဟူ၍ လောကီကျိုး ၈-မျိုး ပြပါသည်။

ယင်းကိုဤသို့ မှတ်သားနိုင်ပါသည်။
ချမ်း-ပူ ကင်းဝေး၊ ညစ်ကြေး-ဘေးရန်၊ ကင်းသည်မှန်လှ၊ စိုးကြောင့်ကြငြိမ်း၊ ခပ်သိမ်းရိုသေ၊ ကိုယ်-စိတ်နေတို့၊ နှစ်ထွေမှန်စွာ၊ နူးညံ့လာသည်၊ ရှစ်ဖြာထီးလှူ အကျိုးတည်း။

၎င်းမှာ ဆုမတောင်းဘဲရသော လောကီအကျိုးဖြစ်၍ လောကုတ္တရာအကျိုးအတွက် ဤထီးလှူရသော ကောင်းမှုကြောင့် အရဟတ္တဖိုလ် ထီးဖြူတော်ကြီးကို ဆောင်းနိုင်ရပါလို၏-ဟု သီးခြားဆုတောင်းသင့်ပါသည်။

(မြတ်မင်္ဂလာ ၂၀၀၃-ခု ဧပြီလ)

No comments: