Friday, January 15, 2010

ထူးခြားသော အလှူနှင့်အကျိုးထူး

ဧရာဝတီတိုင်း လပွတ္တာမြို့နယ် ကနစိုချောင်းကျေးရွာတွင် ဦးယောဟန်နှင့် ဇနီးဒေါ်ပုလဲတို့ နေထိုင်ကြသည်။ သူတို့တွင် မဖြူစင်-ဟုခေါ်သော သမီးလေးတယောက် ရှိသည်။ ဦးယောဟန်သည် လယ်ယာလုပ်ငန်းကို သူကိုယ်တိုင် ဦးစီး၍ သူရင်းငှါးများဖြင့် လုပ်ကိုင်သည်။ လယ်လုပ်ငန်းချိန်ပြီးစီးပါက သူပိုင် မော်တော်ဖြင့် စပါးများဝယ်၍ ကြိတ်ခွဲရောင်းချသည်။ ဇနီး ဒေါ်ပုလဲကလည်း အိမ်တွင်းမှုလုပ်ငန်းများကို မလစ်ဟင်းအောင် ဂရုစိုက်၍ သမီးငယ်လေးအား ကောင်းစွာပြုစု စောင့်ရှောက်သည်။

ဦးယောဟန်းတို့ မိသားစုသည် အလှူအတန်းများ ပြုလုပ်ရသည်ကို လွန်စွာဝါသနာပါသည်။ ရပ်ရွာ သာရေး၊ နာရေးများတွင်လည်း အားတက်သရော ပါဝင်ဆောင်ရွက်ကြသည်။ သူတို့မိသားစုသည် -နီကျား-ဟုမှည့်ခေါ် ထားသော ခွေးပုလေးတကောင်ကို မွေးမြူထားသည်။ နီကျား-မှာ သမီး ဖြူစင်-လေး၏ အချစ်တော်ပင် ဖြစ်သည်။ ဦးယောဟန် ခရီးထွက်၍ ဒေါ်ပုလဲနှင့် သမီးလေးတို့ လမ်းလျှောက်ထွက်ကြသည့် အခါတိုင်း နီကျားလေးက အိမ်စောင့်ပေးတတ်သည်။ သမီးလေး ဖြူစင် မွေးကင်းစအရွယ်မှစ၍ နီကျားကို မွေးမြူထားခဲ့ရာ ခွေးကလေးမှာ အလွန်လိမ္မာသည်။

တနေ့ ဦးယောဟန်တို့ မိသားစု လယ်တောမှ အိမ်သို့အပြန်တွင် နီကျားကို မတွေ့ရသဖြင့် စိုးရိမ်သွားကြသည်။ တအီအီနှင့် အော်သံကြားသဖြင့် အပေါ်သို့မော့ကြည့်လိုက်ရာ အိမ်အမိုးပေါ်တွင် ရောက်နေသည်ကို တွေ့လိုက် ရသည်။ နီကျားမှာ လင်းမြွေကိုလိုက်ရင်း အမိုးပေါ်သို့ ရောက်သွားသည်ဟု ဘေးအိမ်က ပြောသဖြင့် သိရသည်။

ခွေး အိမ်ခေါင်ပေါ်တက်လျှင် စီးပွားလျှောကျ၍ အသက်အန္တရာယ်ပင် ထိခိုက်တတ်သည်ဟု လူကြီးများက ပြောကြသည်။ ဦးယောဟန် လွန်စွာတုန်လှုပ်သွားသည်။ စီးပွားပျက်၊ ဘ၀ပျက်မှာကို အလွန်ပင် ကြောက်ရွံ့ မိသည်။ ထို့ကြောင့် အားကိုးတကြီးဖြင့် ရွာဦးကျောင်းဆရာတော်ထံသို့ ပြေးရပါတော့သည်။

ဆရာတော်က-ဘာမှ စိုးရိမ်ကြောင့်ကြ ဖြစ်နေစရာ မလိုပါဘူး။ အိမ်ခေါင်မိုးပေါ်မှာ ခြင်္သေ့ကြီးရောက်နေတယ်လို့ မှတ်ပါ။ ပြီးရင် မင်္ဂလာရှိလိုက်တာ။ ကျက်သရေတိုးတော့မယ်လို့ ပြောရမယ်။ နေ့ကောင်းရက်သာရွေးပြီး အခုအိမ်မှာ ဘုရားနှင့်တကွ သံဃာတော်တွေကို အမှူးထားပြီး အလှူလုပ်ပါ-ဟု ပြောလိုက်သည်။

ဦးယောဟန်လည်း အိမ်သို့အမြန်ပြန်လာပြီး-ခြင်္သေ့ကြီး အိမ်အမိုးပေါ်ရောက်နေတယ်-ဟု ဆရာတော် သင်လိုက်သည့်အတိုင်း ပြောဆိုကာ နီကျား-ကိုချော့ခေါ်လိုက်ရသည်။ နောက်တနေ့တွင် သံဃာတော်များကို အရုဏ်ဆွမ်းကပ်လှူကာ လူပရိသတ်များအား မုန့်ဟင်းခါးကျွေး၍ အလှူပြုလုပ်သည်။ ထိုအလှူ၌ တရားပွဲ ကျင်းပသည်။ တရားပွဲအပြီးတွင် ဒေါ်ပုလဲက ဆန်ပေါက်ပေါက်တို့နှင့် ငွေစက္ကူများ အကြွေစေ့များ ကြဲစွန့်ရာ နီးရာလူကြီးများနှင့် ကလေးများ ရရှိကြသည်။

ဆရာတော်ကြီးသည် စွန့်ကြဲရာတွင် ရရှိသည့် အလှူငွေများကို ပြန်လည်အလျူခံပြီး ဦးယောဟန်နှင့် ဒေါ်ပုလဲတို့အား ပြန်လည်စွန့်ကာ-ထီထိုးပါ-ဟု ပြောကြားပါသည်။ ဦးယောဟန်သည် ရရှိသည့် အလှူငွေအပြင် နောက်ထပ်ငွေထပ်စိုက်၍ ထီးထိုးခဲ့ပါသည်။

ထီဖွင့်ရန် ၂-ရက်အလိုတွင် ဒေါ်ပုလဲသည် အိမ်တွင် ကိုးကွယ်ထားသော ဗုဒ္ဓမြတ်စွာဘုရားမှ ရောင်ခြည်တော် များ ကွန့်မြူးသည်ကို ဖူးတွေ့ရသည်ဟု အိပ်မက်မြင်မက်ခဲ့သည်။ ထီဖွင့်သောရက် နောက်ဆုံးနေ့၌ မြို့မှ လိုင်းသင်္ဘောဖြင့် စာတစောင်ရောက်ရှိလာသည်။ ထိုက်သူပန် ထီဆိုင်မှ (ဋ-၃၆၆၀၇၁) နံပါတ်ဖြင့် ၁-သိန်းဆု ပေါက်ကြောင်း ဆုငွေလာရောက်ထုတ်ယူရန် အကြောင်းကြားစာပင် ဖြစ်ပါသည်။

ဦးယောဟန်+ဒေါ်ပုလဲ မိသားစုမှာ ၀မ်းသာမဆုံး ဖြစ်ကြသည်။ အလှူပြုလုပ်စဉ်က စေတနာသုံးတန် ပြဋ္ဌာန်း၍ လှူခဲ့သည်မှာ ငွေ ၇-သောင်း ကုန်ကျခဲ့သည်။ ယခု ထီပေါက်သည်မှာ ၁-သိန်းရသည့်အတွက် ငွေ ၃-သောင်း တိုးပွားလာသည်ဟု ဆိုရမည်။ အလှူ၏ လက်တွေ့အကျိူးထူးရရှိခြင်းပင် ဖြစ်သည်ဟု နားလည်လိုက်မိပါသည်။
( ဖြစ်ရပ်မှန်)

( ရွှေမိုးပြာ-မော်ကျွန်း)

( မြတ်မင်္ဂလာ ၂၀၀၃-ခု ဧပြီလ)

No comments: