Saturday, January 9, 2010

အံ့ဖွယ် ဒါနအကျိုး

ကျွန်တော်သည် မြ၀တီမြို့မှ ဘာအံ့မြို့သို့ မောင်းနှင်သော မှန်လုံကားပေါ်တွင် ပတ်ဝန်းကျင် ရှုခင်းများကို ငေးမောကြည့်ရှုရင်း စီးနင်းလိုက်ပါလာခဲ့ပါသည်။ မှတ်မှတ်ရရ ကျွန်တော် ခရီးထွက်လာသောနေ့က ၂၀၀၁-ခု ဒီဇင်္ဘာလ ၅-ရက်နေ့ဖြစ်၏။ ကျွန်တော် စီးနင်းလိုက်ပါလာသော မှန်လုံကားသည် အလယ်ဗိုလ်တဲ-စခန်း မရောက်ခင်၌ စက်ချို့ယွင်းသွားသဖြင့် ဒရိုင်ဘာနှင့် စပယ်ယာတို့က ကားကိုပြင်ဆင်ကြပါသည်။

ထိုအချိန်တွင် ရဟန်းတပါးသည် နေကိုမော့ကြည့်နေသည်ကို အမှတ်မထင် ကျွန်တော်တွေ့လိုက်ရ၏။ အဆိုပါ ရဟန်းသည် ကျွန်တော်၏ကားနှင့်အတူ ပါလာခဲ့သည့် ခရီးသွားရဟန်း ဖြစ်ပါသည်။ သို့နှင့် ကျွန်တော်သည် ကားပြင်နေသော ကားဆရာတို့အား ဆရာတို့ ကြာဦးမလား-ဟုမေးလိုက်ရာ ကားဆရာတို့က နောက်ထပ် နာရီဝက်လောက်ဆိုရင် ရပါပြီ-ဟု ပြောသည်။ ၄င်းအချိန် ကားပြင်ပြီးခဲ့လျှင် မွန်းတည့် ၁၂-နာရီ ကျော်သွားပေရော့မည်။ ထို့ကြောင့် ကျွန်တော့်တွင်ပါလာသော ထမင်းထုပ်ကို ကားအတူစီးခဲ့သူ ခရီးသွား ရဟန်းတော်အား ဆွမ်းကပ်လှူလိုက်ပါသည်။

ခဏအကြာတွင် ရဟန်းတော်က ဆွမ်းဘုဉ်းပေးပြီးသွားသဖြင့် ပါရှိလာသော သောက်ရေဘူးကိုပါ ကပ်လှူလိုက်ရာ ရဟန်းတော်က ကျွန်တော့်အား ဆုများပေးပါသည်။

ကျွန်တော်ကတော့ ရန်ကုန်သို့ ခရီးဆက်ရန် ရှိနေသည်။ ည ၆-နာရီခွဲထွက်သော ဘာအံ့-ရန်ကုန် မှန်လုံကားကြီးဂိတ်သို့ လက်မှတ်သွားရောက်ဝယ်ယူသည်။ လက်မှတ်အားလုံး ကုန်နေပြီဖြစ်သဖြင့် စိတ်ညစ်နေချိန်တွင် ကားဂိတ်ရှေ့သို့ ဆိုက်ကားတစီး ဆိုက်ရောက်လာသည်။ ဆိုက်ကားပေါ်မှ ဆင်းလာသူက ဒီနေ့ ရန်ကုန်သွားမလို့ လက်မှတ်ဝယ်ထားတာ အဲဒါ မသွားဖြစ်တော့ဘူး-ဟုပြောသည်။

ဟာ-ဒါဆိုအတော်ပဲ၊ ခင်ဗျား မသွားဖြစ်ရင် ခင်ဗျားလက်မှတ် ကျွန်တော့်ကို ပြန်ရောင်းဗျာ-ဟုပြောလိုက်၏။ ထိုအခါ ၄င်းလူက-မရောင်းပါဘူးဗျာ၊ ခင်ဗျားကို မေတ္တာနဲ့ အလကား ပေးလိုက်ပါ့မယ်-ဟုပြောပြီးလျှင် လက်မှတ်ကို ပေးပါသည်။ ဘာအံ့-ရန်ကုန် ကားခသည် ၁၀၀၀-ကျပ် ဖြစ်သဖြင့် ကျွန်တော့မှာ လက်မှတ်ဖိုးငွေ ၁၀၀၀-ကျပ် သက်သာသွားသည့်အပြင် နေရာကောင်းကောင်းပါ ရလိုက်ပါသည်။
( ၂၀၀၁-ခု ဒီဇင်္ဘာ ၅-ရက်နေ့က ခရီးသွားခဲ့စဉ် ကိုယ်တွေ့ဖြစ်ရပ်မှန် ဖြစ်ပါသည်။)

(သက်ဦးနိုင်-မြ၀တီ)
( မြတ်မင်္ဂလာ ၂၀၀၃-ခု မတ်လ)

No comments: