Monday, January 18, 2010

သရဏဂုံ ညစ်ညူးကြောင်းတရား (၂)

( ယခင်လမှ အဆက်)

ပရိသတ်အပေါင်း သူတော်ကောင်းတို့-
ဘုရား တရား သံဃာကို အာရုံပြုမိ၍ ဖြစ်ပေါ်လာသော သဒ္ဓါအရှင်းခံရှိသော သမ္မာဒိဋ္ဌိ-ကောင်းသောအယူသည်။ သရဏံ-သရဏမည်ပါပေ၏။ ထို ဘုရား တရား သံဃာကို ယုံကြည်သိမှတ် ဆည်းကပ်တဲ့ သဒ္ဓါကို အရင်းခံလို့ ဖြစ်ပေါ်လာသော သမ္မာဒိဋ္ဌိကို ဖြောင့်မှန်သော အယူလို့ခေါ်တယ်။

ပုညကိရိယာဝတ္ထု ၁၀-ပါးမှာ ဒါန၊ သီလ၊ ဘာဝနာ၊ အပစာယန၊ ဝေယျာဝစ္စ၊ ပတ္တိဒါန၊ ပတ္တာနုမောဒန၊ ဓမ္မဿဝန၊ ဓမ္မဒေသနာ၊ ဒိဋ္ဌိဇုကမ္မ-လို့ ခေါ်တယ်။
ဒီ ၁၀-ခုကို ပုညကိရိယာဝတ္ထု ၁၀-ပါးလို့ ခေါ်တယ်။ ကောင်းမှုပြုခြင်းရဲ့ အရင်းခံ ၁၀-ခု။ နောက်ဆုံးမှာ ဒိဋ္ဌိဇုကမ္မ-အယူဖြောင့်မှန်ခြင်း။ အယူဖြောင့်မှန်ခြင်းဆိုတာ ဘာလဲလို့မေးရင် ဒီနေရာမှာ ဘုန်းကြီးတို့ ပြောချင်တာက အယူဖြောင့်မှန်မှုဆိုတာက ရတနတ္တယသမ္မာဒိဋ္ဌိ လို့မှတ်ပါ။

ကုသိုလ်ကောင်းမှုပြုတဲ့နေရာ၊ ဒါနမှုပြုတဲ့ နေရာမှာတော့ ဘုန်းကြီးတို့ပရိသတ်ဟာ သမ္မဿကတာ သမ္မာဒိဋ္ဌိလို့ ဘုန်းကြီးတို့ ပြောခဲ့ပါတယ်။ ကိုးကွယ်ရေးနဲ့ ပတ်သက်လာရင်၊ ကိုးကွယ်မှုနဲ့ ပတ်သက်လာရင် ရတနတ္တယ သမ္မာဒိဋ္ဌိဖြစ်တယ်။ အဲဒါကို ဒိဋ္ဌိဇုကမ္မ-လို့ ခေါ်တယ်။ ဒိဋ္ဌိ-အယူ။ ဥဇုကမ္မ-ဖြောင့်မှန်တဲ့အလုပ်။ အယူဖြောင့်မှန်တဲ့အလုပ် ဆိုတာ ဘယ်ကစလုပ်ရမလဲ။ ဘုရား တရား သံဃာကို အားကိုးရာအစစ်အဖြစ်နဲ့ ယုံကြည် သိမှတ် ဆည်းကပ်တာက စတယ်။

ကုသိုလ်ကောင်းမှု ၁၀-ခုမှာ ထိပ်ဆုံးက ဒိဋ္ဌိဇုကမ္မကို ထားတယ်။ အယူဖြောင့်မှန်မှုသာ မရှိရင် အလှူပေးကော ဖြောင့်ဦးမလား။ သီလဆောက်တည်မှုကော မှန်ပါဦးမလား။ မဖြောင့်ပါဘူး။ ဘာဝနာကော ဖြောင့်ဦးမလား။ မဖြောင့်ပါဘူး။ အယူမဖြောင်တဲ့ပုဂ္ဂိုလ်တွေ ဝေယျာဝစ္စလုပ်တော့ရော မှန်ပါဦးမလား။ မမှန်နိုင်ပါ။ တသီကြီး သွားတယ်။ ဘယ်ဟာမှမဖြောင့်တော့ဘူး။ ဒိဋ္ဌိဇုကမ္မ ဖယ်လိုက်ရင် ရှေ့ကလုပ်ငန်း ၉-ခုဟာ တခုမှ ဖြောင့်တာ မရှိတော့ဘူး။

ဒါနလဲပဲ ရတနတ္တယ သမ္မဒိဋ္ဌိမပါရင် ဒီဒါနလဲ မဖြောင့်မှန်နိုင်ဘူး။ ဒါန၊ သီလ၊ ဘာဝနာ၊ အပစာယန၊ ဝေယျာဝစ္စ၊ ပတ္တိဒါန၊ ပတ္တာနုမောဒန၊ ဓမ္မဿဝန၊ ဓမ္မဒေသနာ ဆိုတဲ့ ရှေးကကောင်းမှု ၉-ပါးလုံး အယူဖြောင့်မှန်မှုကို အခြေမခံကြရင်တော့ (ဘုန်းကြီးတို့ပရိသတ် ဒီအချက်ကို အလေးအနက် သတိထားပါ)။ ဒိဋ္ဌိဇုကမ္မ-အယူဖြောင့်မှန်မှုသာ အခြေမခံကြရင် အလှူပေးလဲ မဖြောင့်ဘူး။ သီလဆောက်တည်လဲ မဖြောင်ဘူး။ ဘာဝနာအားထုတ်လဲ မဖြောင့်ဘူး။ အပစာယန-ရိုသေတယ်၊ ရိုသေတယ်ပြောပေမဲ့ အယူမဖြောင့်မှန်တဲ့ လူတွေရဲ့ ရိုသေခြင်းဟာ လောက၀တ်လောက်ပဲ ရှိတယ်။ ဘုန်းကြီးကိုတွေ့လို့ ရိုသေပေမဲ့ အယူမဖြောင့်သူတို့ရဲ့ ရိုသေခြင်းသည် လောက၀တ်ပဲ၊ ဓမ္မ၀တ် မဟုတ်ဘူး။

ဝေယျာဝစ္စတွေကို ဆောင်ရွက်နေကြတယ်။ စာပြန်ပွဲကြီး ဆင်နွှဲဆောင်ရွက်နေကြတယ်။ ဘုရား တရား သံဃာကို မယုံဘဲနဲ့ ဒီဝေယျာဝစ္စ လုပ်တာဟာ လောက၀တ်လောက်ပဲ ရှိတယ်။ ဖြောင့်မှန်သော ဝေယျာဝစ္စ မဟုတ်ဘူး။ သာဓု သာဓု ခေါ်တယ်။ ပတ္တာနုမောဒန ဖြစ်တယ်။ အယူမှ မဖြောင့်ဘဲနဲ့ သာဓုခေါ်တာကော ဖြောင့်ပါဦးမလား။ မဖြောင့်နိုင်ပါဘူး။ ဓမ္မဒေသနာ-တရားတော့ ဟောတော့ဟောသားပဲ။ အယူမဖြောင့်ဘဲနဲ့ ဟောတော့ ဒီတရားကော ဖြောင့်မလား။ မဖြောင့်ပါဘူး။ တရားနာတယ်။ ဓမ္မဿဝန-ဖြစ်တယ်။ အယူမဖြောင့်သူရဲ့ တရားနာခြင်းသည် ဖြောင့်မှန်သော တရားနာခြင်း ဖြစ်ဦးမလား။ မဖြစ်နိုင်ပါဘူး။ ဒိဋ္ဌိဇုကမ္မ-ဒီတလုံး ဖြုတ်လိုက်ရင် ရှေ့ကလုပ်ငန်း ၉-ခုလဲ မဖြောင့်မှန်တော့ဘူး။ သဘောကျအောင် မှတ်ထား။

ရတနတ္တယ သမ္မာဒိဋ္ဌိသည် ကုသိုလ်ကောင်းမှု ၁၀-မျိုးတို့မှာ အခြေခံအကျဆုံးပဲဆိုတာ မှတ်မိပါစေ။ အဲဒါကြောင့် သဒ္ဓါအရင်းခံသော သမ္မာဒိဋ္ဌိသည် ဗုဒ္ဓဘာသာ သူတော်စင်တို့ရဲ့ ဘာသာရေးလုပ်ငန်း ၁၀-မျိုးတို့တွင် အယူဖြောင့်မတ်ခြင်း ဒိဋ္ဌိဇုကမ္မလို့ မုချကျိန်းသေ ဆိုအပ်ပါပေသတည်း။

ယခု ပရိသတ်အပေါင်း သူတော်ကောင်းတို့ သဘောပေါက်ကြတာက ရတနတ္တယသမ္မာဒိဋ္ဌိတဲ့။ ဘုရား တရား သံဃာ ရတနာသုံးပါးနဲ့ ပတ်သက်တဲ့ သဒ္ဓါရယ်၊ သမ္မာဒိဋ္ဌိဉာဏ်ရယ်၊ ဒီတရားနှစ်လုံး။ ရတနာ ၃-ပါးကို ယုံကြည်တဲ့ သဒ္ဓါ၊ မှန်ကန်သော အယူအဆဆိုတဲ့ သမ္မာဒိဋ္ဌိ၊ ဒီ သဒ္ဓါနဲ့ သမ္မာဒိဋ္ဌိ ၂-ပါး ရတနာသုံးပါးအပေါ်မှာ ပျက်ခဲ့ပြီဆိုရင် သရဏဂုံလဲ ပျက်ပြီပေါ့။ သဒ္ဓါတရားတွေ နည်းနည်းတော့ မပျက်သေးဘူး။ ဒါပေမဲ့ ဟိုက ဒီက အစွန်းအထင်း အညစ်အထေးလေးတွေ ၀င်လာတယ်ဆိုရင် သရဏဂုံ ညစ်နွမ်းတယ်လို့ ဆိုနိုင်တယ်။ ရတနတ္တယ သမ္မာဒိဋ္ဌိ-ညစ်နွမ်းပြီဆိုရင် သရဏဂုံလဲ ညစ်နွမ်းတာပဲ။ သဒ္ဓါနဲ့ သမ္မာဒိဋ္ဌိ ညစ်နွမ်းရင် သရဏဂုံ ညစ်နွမ်းတယ်။ ဒီသဒ္ဓါနဲ့ သမ္မာဒိဋ္ဌိ ပျက်ပြီဆိုရင် သရဏဂုံ ပျက်စီးတယ်။ သရဏဂုံ ညစ်ညူးကြောင်း၊ သရဏဂုံ ပျက်စီးကြောင်းကို ဘုန်းကြီးတို့ပရိသတ် ဒီနေရာမှာ သိဖို့လိုအပ်လာပြန်တယ်။ အကြောင်းအကျိုးက ဆက်မိသွားပြီ။

ဗုဒ္ဓံ သရဏံ ဂစ္ဆာမိ-ဆိုတာ တရားကိုယ်ကလဲ သဒ္ဓါအရင်းခံသော သမ္မာဒိဋ္ဌိ ဖြစ်တယ်။ မှတ်မိပါစေ။ ဓမ္မံ သရဏံ ဂစ္ဆာမိ-ဆိုတာ၊ သံဃံ သရဏံ ဂစ္ဆာမိ ဆိုတာ သဒ္ဓါအရင်းခံသော သမ္မာဒိဋ္ဌိပဲ။ ပုညကိရိယာဝတ္ထု ၁၀-ပါးတွင် သူ့ကို ဒိဋ္ဌိဇုကမ္မလို့ ခေါ်တယ်။ မြန်မာလိုပြောတော့ အယူဖြောင့်တယ်ဆိုတာ ဒီယုံကြည်မှုဆိုတဲ့ သဒ္ဓါ၊ မှန်ကန်တဲ့ ကောင်းမွန်တဲ့ အယူဆိုတဲ့ သမ္မာဒိဋ္ဌိ ရှိမှ အယူဖြောင့်တယ်။

သရဏဂုံ ပျက်စီးခြင်းဆိုတာ အပြစ်ရှိသော ပျက်စီးခြင်း၊ အပြစ်မရှိသော ပျက်စီးခြင်း ဆိုပြီး နှစ်မျိုးနှစ်စား ရှိတယ်။ လောကီသရဏဂုံ ပျက်စီးခြင်းသည် သ၀ိဇ္ဇာဗေဒ၊ အန၀ိဇ္ဇာဗေဒ။ အပြစ်ရှိသော ပျက်ခြင်း၊ အပြစ်ကင်းသော ပျက်ခြင်းဟူ၍ နှစ်မျိုးရှိတယ်။ အပြစ်ကင်းသော ပျက်စီးခြင်းဆိုသည်ကတော့ သေတဲ့အခါကျတော့ ပျက်တဲ့သရဏဂုံကို အန၀ိဇ္ဇာဗေဒေါ-အပြစ်ကင်းသော ပျက်စီးခြင်းဟု ဆိုအပ်ပေတယ်။

ဗုဒ္ဓံ သရဏံ ဂစ္ဆာမိ-လို့ ဆိုထားတဲ့ပုဂ္ဂိုလ်သည် သောတာပန်သာ မဖြစ်သေးရင် ပုထုဇဉ်အနေနဲ့ ဆောက်တည်ထားတဲ့ သရဏဂုံကို လောကီသရဏဂုံလို့ ခေါ်တယ်။ အဲဒီပုထုဇဉ်တို့၏ လောကီသရဏဂုံဟာ သေတဲ့အခါကျတော့ ပျက်တယ်။ နောက်ဘ၀ကို ကူးမလိုက်ဘူး။ သောတာပန်ပုဂ္ဂိုလ်တို့ရဲ့ သရဏဂုံကတော့ ဗုဒ္ဓံ သရဏံ ဂစ္ဆာမိ-ဆိုဆို မဆိုဆို နောက်ဘ၀ကို ကူးပြီးတော့ လိုက်တယ်။ သေလဲ မပျက်ဘူး။

ဒီကနေ့ ဗုဒ္ဓဘာသာသူတော်စင်တို့ သောတာပတ္တိမဂ်ဖိုလ် မရကြသေးခင် ဗုဒ္ဓံ သရဏံ ဂစ္ဆာမိ-ဆိုတဲ့ သရဏဂုံဟာ တကယ်ပဲ စွဲစွဲမြဲမြဲ ယုံကြည်ရတယ်ထား။ ဘယ်အထိ စိတ်ချရသလဲဆိုတော့ သေခါနီးအထိ စိတ်ချရတယ်။ သေပြီးရင် ဒီသရဏဂုံက ဟိုဘက်မလိုက်တော့ဘူး။ ဟိုဘက်ဘ၀ သရဏဂုံ မလိုက်တော့ ပုထုဇဉ်တို့သည် ဟိုဘက်ဘ၀မှာ ဘုရား တရား သံဃာတွေနဲ့ တွေ့ဦးမယ်ဆိုရင် ဒီသရဏဂုံကို ထပ်ပြီး ဆောက်တည်ဖို့ပဲ ရှိတယ်။ မတွေ့ဘူးဆိုရင်တော့ ဘယ်လိုဆောက်တည်ရမှန်းကို မသိတော့ဘူး။

ဒီတော့ ပုထုဇဉ်တို့ရဲ့ လောကီသရဏဂုံ ဘယ်ခါပျက်၊ သေတဲ့အခါပျက်တယ်။ သေတဲ့အခါပျက်တဲ့ သရဏဂုံသည် အပြစ်သင့်သော ပျက်စီးခြင်းလား-အပြစ်ကင်းသော ပျက်စီးခြင်းလားဆိုရင် အပြစ်ကင်းသော ပျက်စီးခြင်း ဖြစ်တယ်။ မသေခင် သရဏဂုံပျက်ရင်တော့ အပြစ်ရှိတယ်။ မသေခင် သရဏဂုံပျက်လို့ အပြစ်ရှိတာက ဘယ်လိုတုန်းဆိုရင် ညစ်နွမ်းတဲ့ဘက်ကစပြီး စဉ်းစားပါ။ ဘုရား တရား သံဃာ ရတနာ ၃-ပါးတို့ရဲ့ အပေါ်မှာ မသိမှုတွေ ဖြစ်လာခဲ့တယ်။ ရတနာ ၃-ပါးအကြောင်း မသိဘူးဆိုတာ အညာဏ၊ ဘုရား တရား သံဃာအပေါ်မှာ ယုံမှားမှုတွေ ဖြစ်လာတယ် သံသယ။ မှားယွင်းတဲ့ အယူအဆတွေ ပေါ်ပေါက်လာတယ် မိစ္ဆာဉာဏ။

အသက်ရှင်စဉ် ဘုရား တရား သံဃာကို ယုံကြည်ဆည်းကပ် ကိုးကွယ်ပါ၏ဆိုတဲ့ သူတော်ကောင်းတို့သည် ရတနာ ၃-ပါးတို့ရဲ့ ဂုဏ်သတ္တိတွေကို မသိရှိဘူး။ နားမလည်ဘူးဆိုရင် သရဏဂုံ မပျက်သေးပေမဲ့ ညစ်နွမ်းတတ်တယ်။ ဘုရားအကြောင်း တရားအကြောင်း သံဃာအကြောင်း။ တနည်း-ဘုရားဂုဏ် တရားဂုဏ် သံဃာဂုဏ် အဲဒီလောက်ကို ဘုန်းကြီးတို့ ပရိသတ်များ မသိကြဘူးဆိုရင် သရဏဂုံ မပျက်တောင်မှ ဒီသရဏဂုံဟာ ညစ်နွမ်းစရာအကြောင်း ရှိသတဲ့။ မသိလို့ရှိရင် ယုံကြည်ချက်က မပြင်းထန်ဘူးမဟုတ်လား။ ယုံကြည်ချက် မပြင်းထန်တော့ သဒ္ဓါ အားပျော့သွားတယ်။ သဒ္ဓါအားပျော့သွားရင် သမ္မာဒိဋ္ဌိလဲ အားပျော့ သွားတယ်။

အဲဒါကြောင့် ဘုရားအကြောင်း သိအောင် ကြိုးစားကြရမယ်။ အညာဏမှ လွတ်အောင် တရားနဲ့သံဃာတို့ရဲ့ အကြောင်းကိုလဲ သိအောင် ပို၍ ကြိုးစားပေးရမယ်။ ဘာအတွက် ဒီလို တိုက်တွန်းစကား ပြောရသတုံးဆိုတော့ သရဏဂုံ ညစ်နွမ်းမှာစိုးလို့။
(၁) ဘုရား တရား သံဃာတို့ရဲ့ ဂုဏ်ကို မသိရှိကြဘူးဆိုရင် မသိနားမလည်တဲ့ အညာဏကြောင့် ကိုးကွယ်မှုများ ညစ်နွမ်းတတ်တယ်။
(၂) သိတော့ သိသားပဲ၊ အတွေးချော်သွားလို့ စဉ်းစားတာတွေ၊ ဝေဖန်တာတွေ လွန်သွားတဲ့အတွက်ကြောင့်မို့ သံသယဖြစ်တယ်။ သံသယက ဘယ်လိုသူတွေ အားကြီးဖြစ်သတုံးဆိုရင် မသိတဲ့ပုဂ္ဂိုလ်လဲ သံသယဖြစ်တယ်။ အသိ သိပ်လွန်တဲ့ပုဂ္ဂိုလ်တွေလဲ သံသယဖြစ်တယ်။ ဒီကနေ့ အများအားဖြင့် ဖြစ်ကြတာကတော့ အသိသိပ်လွန်တဲ့သူတွေ ဘုရား တရား သံဃာအပေါ်မှာ သံသယဖြစ်တာ များတယ်ထင်တယ်။

သဒ္ဓါနဲ့ ဉာဏ်။ သဒ္ဓါနဲပြီးတော့ ဉာဏ်လွန်ကဲသူတွေဟာ သံသယ၀င်တတ်တယ်။ နောက်တမျိုးပြောမယ်။
ယုံကြည်ချက်က နည်း၊ ဝေဖန်စိစစ်မှု လွန်ကဲရင် သံသယတွေ ၀င်လာနိုင်တယ်။ ဒီလိုသံသယ၀င်ရင်လဲ သရဏဂုံ ညစ်နွမ်းတယ်။

(၃) မိစ္ဆာဉာဏ်တဲ့။ သိတော့ သိပါတယ်။ အမှားကြီး။ ဘုရားအကြောင်း သိတော့ သိသားပဲ အမှန်မသိဘူး။ အမှားကို သိနေတာ။ တရားတော်အကြောင်းကို သိတော့ သိတယ်။ အမှန်မသိဘူး။ အမှားကို သိနေတယ်။ သံဃာတော်အကြောင်း သိတော့ သိတယ်။ အမှန်ကို မသိဘူး။ အမှားကို သိနေကြတယ်။ အမှားသိနေရင်လဲ ဒီသရဏဂုံ ညစ်နွမ်းတယ်။

သရဏဂုံ ညစ်နွမ်းခြင်းရဲ့ အကြောင်း ၃-ပါး။
အညာဏ-မသိမှု။ သံသယ-ယုံမှားမှု။ မိစ္ဆာဉာဏ်-အသိမှားမှု။
ရတနာ ၃-ပါး အကြောင်း မသိမှုရယ်။ သံသယ၀င်မှုရယ်၊ အသိမှားမှုရယ် ဒီ ၃-မျိုးကြောင့် လောကီပုထုဇဉ်တို့ရဲ့ သရဏဂုံသည် ညစ်နွမ်းလိမ့်မယ်ဟူ၍ ဘုန်းတော် ၆-ပါးသခင် ဘုရားရှင်သည် ကောင်းစွာမသွေ ဟောကြား တော်မူခဲ့ပါပေသတည်း။

( သီတဂူ ဆရာတော် )

(မြတ်မင်္ဂလာ ၂၀၀၃-ခု မေလ )

No comments: