Sunday, January 17, 2010

အမြဲ ကောင်းမြတ်သောအရာ

အခါတပါး၌ ဗုဒ္ဓမြတ်စွာဘုရားသည် သာဝတ္ထိပြည် ဇေတ၀န်ကျောင်းတော်တွင် သီတင်းသုံးနေတော်မူ၏။
ထိုအခါ နတ်သားတယောက်သည် ညဥ့်တညဥ့်၏ သန်းခေါင်ယံအချိန်လောက်၌ မြတ်စွာဘုရားထံသို့ ချဉ်းကပ်ပြီးလျှင် မြတ်စွာဘုရားကို မေးလျှောက်၏။

မြတ်စွာဘုရား လူတို့အတွက်
(၁) အိုမင်းရင့်ရော်သည့်အချိန်တိုင်အောင် တင့်တယ်လှပစေသောအရာသည်ကား အဘယ်ပါနည်းဘုရား။
(၂) အဘယ်အရာသည် မိမိသန္တာန်၌ မြဲမြံခိုင်ခံ့စွာ တည်တံ့ပါလျှင် ကောင်းမြတ်ပါသနည်းဘုရား။
(၃) သုံးဆဲ့တဘုံ၌ ကျင်လည်ကြရသော သတ္တ၀ါတို့တွင် ရောက်လေရာရာဘ၀တို့၌ ကောင်းမြတ်၍ နှစ်သက်စေတတ်သော ရတနာသည်ကား အဘယ်ပါနည်းဘုရား။
(၄) သူခိုး ဓားပြ စသော လူဆိုးတို့က မလုယူ၊ မတိုက်ခိုက်နိုင်သော ဥစ္စာသည်ကား အဘယ်ပါနည်းဘုရား-ဟု မေးလျှောက်သည်။

မြတ်စွာဘုရားက အို-နတ်သား လူတို့အတွက်-
(၁) အိုမင်းရင့်ရော်သည့်အချိန်တိုင်အောင် တင့်တယ်လှပစေသော အရာသည်ကား သီလ (ကိုယ်ကျင့်) တန်ဆာ ဖြစ်သည်။
(၂) ဘုရား တရား သံဃာ ဟူသော ရတနာသုံးပါး၊ ကံ ကံ၏အကျိုးကို ကောင်းစွာယုံကြည်၍ မဂ်ဖိုလ်တရားတို့ကို တကယ်ယုံကြည်မှု သဒ္ဓါတရားသည် မိမိသန္တာန်၌ မြဲမြံခိုင်ခံ့စွာ တည်တံပါလျှင် အကောင်းဆုံးဖြစ်သည်။
(၃) အရာရာ၌ ကောင်းစွာခွဲခြမ်းပြီး သိစွမ်းနိုင်သောပညာသည် သုံးဆဲ့တဘုံဝယ် ကျင်လည်ကြရသော သတ္တ၀ါတို့တွင် ရောက်လေရာရာဘ၀တို့၌ ကျင်လည်ရသမျှ ကာလပတ်လုံး ကောင်းမြတ်၍ နှစ်သက်စေတတ်သော ရတနာဖြစ်သည်။
(၄) သူခိုး ဓားပြ စသော လူဆိုးတို့က မတိုက်ခိုက် မလုယူနိုင်သော ဥစ္စာသည်ကား သဒ္ဓါအရင်းခံ၍ ပင်ကိုဉာဏ်ဖြင့် နေ့စဉ်မှန်မှန် ပြုလုပ်သော ကောင်းမှုကုသိုလ်ပင် ဖြစ်သည်-ဟု ဟောတော်မူသည်။

မှတ်ချက်။ ။
(၁)
(က) သီလဟူသည် လူတို့အတွက် ငါးပါး၊ ရှစ်ပါး၊ ကိုးပါး စသော ကိုယ်ကျင့်သီလ ဖြစ်သည်။
(ခ) ရဟန်းတို့အတွက် စောင့်ရှောက်သောသူကို အပါယ်စသော ဆင်းရဲတို့မှ လွတ်မြောက်စေတတ်သော ၂၂၇-သွယ်သော သိက္ခာပုဒ်တို့သည် ပါတိမောက္ခသံဝရသီလ ဖြစ်သည်။

မျက်စိ, နား, နှာခေါင်း, လျှာ, ကိုယ်, စိတ် ဟူသော ဣနြေ္ဒတို့ကို စောင့်ထိန်းခြင်းဟူသော ဣန္ဒြိယသံဝရ သီလ ဖြစ်သည်။

အသက်မွေးခြင်းနှင့် ပတ်သက်၍ ၀ိနည်းဒေသနာတော်တွင် မြတ်စွာဘုရား ပညတ်တော်မူသော သိက္ခာပုဒ်တို့ကို မလိုက်နာဘဲဖြစ်စေ၊ မတရားသောနည်း၊ ယုတ်မာသောနည်းတို့ဖြင့် ဖြစ်စေ အလှူခံ၍ရသော ပစ္စည်းတို့ကို မသုံးစွဲဘဲ စင်ကြယ်စွာ အသက်မွေးခြင်း-ဟူသော အာဇီဝပါရိသုဒ္ဓိသီလ ဖြစ်သည်။

သင်္ကန်း, ဆွမ်း, ကျောင်း, ဆေး ဟူသော ပစ္စည်းလေးပါးတို့ကို သုံးဆောင်ရာ၌ လောဘ၊ ဒေါသ၊ မောဟ စသော အကုသိုလ်တရားများ မ၀င်နိုင်အောင် ဆင်ခြင်၍ သုံးဆောင်ခြင်းဟူသော ပစ္စယသန္နိဿိတသီလတို့ ဖြစ်သည်။

(၂) သဒ္ဓါ-ဟူသည် ဘုရား တရား သံဃာ ဟူသော ရတနာသုံးပါး၊ ကံ ကံ၏အကျိုးကို ကောင်းစွာယုံကြည်ခြင်း မဂ်ဖိုလ်တရားတို့ကို တကယ်ယုံကြည်ခြင်း ဖြစ်သည်။

၃။ ပညာ-ဟူသည် အရာရာ၌ ကောင်းစွာခွဲခြမ်းပြီး အမှန်ကို သိနိုင်သော ပညာ ဖြစ်သည်။

( သဂါထာဝဂ္ဂသံယုတ်၊ ဒေ၀တာသံယုတ် ဇရာဝဂ် ဇရာသုတ် )

( ဦးငွေအောင်မွန် )

No comments: