Sunday, January 17, 2010

စေတနာရောင်ပြန်

လွိုင်ကော်မြို့တွင် အ၀တ်လျှော်ဖွပ်အလုပ်ဖြင့် အသက်မွေးဝမ်းကျောင်းပြုနေသော မစန်းခင်-ဟူသည့် အမျိုးသမီးတဦး ရှိသည်။ သူ၏ခင်ပွန်းမှာ လွန်ခဲ့သောနှစ်အတန်ကြာက ဆုံးပါးသွားခဲ့သည်။ သူ့တွင် မောင်သက်အောင်-ဟူသော ၉-နှစ်အရွယ် လူမမည် သားကလေးတဦး ကျန်ရှိခဲ့ပေသည်။

သားငယ်လေးမှာလည်း လိမ္မာရေးခြားရှိလှသည်။ စတုတ္ထတန်းတွင် ပညာသင်ယူနေသော ကျောင်းသား တဦးလည်း ဖြစ်၏။ ဆရာမိဘ ဆိုဆုံးမစကားကို မြေ၀ယ်မကျ နားထောင်တတ်သောကြောင့် လူကြီးမိဘများ၏ ချစ်ခင်ခြင်းကို ခံရသူဖြစ်သည်။

မစန်းခင် အ၀တ်လျှော်သော ရေချိုးဆိပ်မှာ နှစ်ဆိပ်ရှိ၏။ တဆိပ်မှာ သူတို့အိမ်နှင့် မလှမ်းမကမ်းတွင်ရှိသည်။ အခြားတဆိပ်မှာ တလမ်းကျော်တွင် ရှိသည်။ မောင်သက်အောင်သည် ညနေကျောင်းဆင်းတိုင်း မိခင်အ၀တ်လျှော်ရာ ရေဆိပ်သို့ လာရောက်၍ မိခင်ကို ကူညီလုပ်ကိုင်ပေးလေ့ရှိသည်။ မိခင်က တားမြစ်သော်လည်း မရပေ။ ရေဆိပ်တဆိပ်တွင် မတွေ့လျှင် တဆိပ်သို့ လာရောက်မြဲဖြစ်၏။

တနေ့သ၌ မစန်းခင်သည် ဘီလူးချောင်းရှိ ရေဆိပ်တွင် အ၀တ်များ လျှော်ဖွပ်နေလေသည်။ ထိုစဉ် ရေကိုကျွမ်းကျင်စွာ မကူးတတ်သော ၁၀-နှစ်အရွယ်ခန့် ကလေးမလေးတဦးသည် ချောင်းထဲသို့ ရေဆင်းချိုးရာမှ ရေနစ်လေ၏။ အနီးအနားတ၀ိုက်တွင် မစန်းခင် တဦးတည်းသာ ရှိ၏။ သူသည် ရေထဲသို့ လျင်မြန်စွာ ကူးခပ်၍ ထိုမိန်းကလေးကို သက်စွန့်ဆံဖျား ဆယ်ယူလေသည်။

ထိုကလေးမလေးမှာ ကုန်းပေါ်သို့ ပြန်လည်ရောက်ရှိသော်လည်း သတိမေ့နေသဖြင့် မစန်းခင်သည် သတိပြန်ရလာအောင် ပြုစုပေးလေသည်။ မိန်းကလေးမှာ မစန်းခင်၏ ပြုစုပေးမှုကြောင့် မကြာမီ သတိပြန်လည်လာလေသည်။ ခဏအကြာ သူ၏မိဘများရောက်ရှိလာပြီး မစန်းခင်အား ကျေးဇူးများစွာ တင်ရှိကြောင်း ပြောဆိုကာ ပြန်သွားလေသည်။

မစိန်းခင်လည်း မိမိ၏လုပ်ရပ်အတွက် ၀မ်းသာပီတိဖြစ်နေမိသည်။ ထိုအခိုက်တွင် လူတဦးရောက်လာ၍-ခင်ဗျားသား ရေနစ်လို့ လူတဦးက ဆယ်ထားပေးတယ်။ အခု သတိမေ့နေတယ်-ဟု ပြောလေသည်။
မစန်းခင်လည်း သားဇောဖြင့် အ၀တ်လျှော်ခြင်းကိစ္စကိုမေ့ကာ ထိုသူ့နောက်သို့ လျင်မြန်စွာ လိုက်သွားလေသည်။ ထိုနေရာသို့ ရောက်သောအခါ သူ၏သားမှာ ကောင်းစွာသတိရနေပြီ ဖြစ်သည်။

မစန်းခင်သည် မကြာသေးသော အချိန်ကာလကပင် သူတပါး၏ သမီးငယ်လေးကို ရေနစ်နေရာမှ ကယ်ဆယ်ခဲ့၏။ ထိုစဉ် ထူးဆန်းတိုက်ဆိုင်စွာပင် သူ၏သားမှာ ရေနစ်သော်လည်း အသက်ဘေးမှ ကယ်ဆယ်ပေးနိုင်သော လူတဦးပေါ်လာ၏။ ထို အသက်ကယ်သူကို ကျေးဇူးတင်မဆုံး ဖြစ်မိသည်။ မစန်းခင်သည် ကံ ကံ၏အကျိုးကို ကိုယ်တွေ့ယုံကြည်သွားပေပြီ။

( စိုးညွန့်ဝေ-လွိုင်ကော်)
( မြတ်မင်္ဂလာ ၂၀၀၃-ခု မေလ )

No comments: