Friday, January 8, 2010

ဘာသာရေး ပြဿနာ ( ၉၉ )

( ဘဒ္ဒန္တတိလောကသာရ ဖြေသည်)

(မေး) (သီလလေးပါးနှင့် နှစ်ရာ့နှစ်ဆယ့်ခုနစ်)
အရှင်ဘုရား၊ ရဟန်းတို့ သိက္ခာပုဒ်မှာ နှစ်ရာ့နှစ်ဆယ် ခုနစ်သွယ်-ဟုဆိုပါလျက် သီလလေးပါးဟု ဆိုထားပြန်ရာ ဘယ်ကဲ့သို့ ထူးခြားပါသနည်း ဘုရား။
(ဦးဝကြီး-အင်းလေးဒေသ)

(ဖြေ)
ရဟန်းတို့ သိက္ခာပုဒ် နှစ်ရာ့နှစ်ဆယ် ခုနစ်သွယ်-ဆိုသည်မှာ ပါတိမောက်လာ သိက္ခာပုဒ်အပြားကို ဆိုပါသည်။ ၄င်းမှာ-ပါရာဇိက ၄-ပါး၊ သံဃာဒိသေသ် ၁၃-ပါး၊ နိဿဂ္ဂိယပါစိတ် ၃၀-ပါး၊ သုဒ္ဓပါစိတ် ၉၂-ပါး၊ ပါဋိဒေသနီ ၈-ပါး၊ သေခိယ ၇၅-ပါး၊ အဓိကရဏသမထ ၇-ပါး၊ ပေါင်း ၂၂၇-ပါးဖြစ်၍ ၄င်းမှာ ပါတိမောက္ခသံဝရ သီလတွင် ပါဝင်ပါသည်။

သီလလေးပါး အမည်မှာ-
(၁) ပါတိမောက္ခသံဝရသီလ ၂၂၇-သွယ် သိက္ခာပုဒ်များလာ အာပတ် ၇-မျိုးကို မသင့်ရအောင် လုံခြုံစွာ စောင့်ရှောက်ခြင်း။
(၂) ဣန္ဒြိယသံဝရသီလ-ရူပါရုံစသော အာရုံခြောက်ပါးကို လုံခြုံစွာ စောင့်ရှောက်ထိန်းသိမ်းခြင်း။
(၃) ပစ္စယသန္နိဿိတသီလ-ဆွမ်း-သင်္ကန်း-ကျောင်း-ဆေး ဤပစ္စည်းလေးပါးကို ပစ္စဝေက္ခဏာဆင်ခြင်၍ သုံးဆောင်ခြင်း။
(၄) အာဇီဝပါရိသုဒ္ဓိသီလ-ကုလဒူသက-အနေသန ကင်း၍ တရားနှင့်လျော်စွာရသော ပစ္စည်းကို သုံးဆောင်ခြင်းအားဖြင့် လေးပါးဖြစ်ပါသည်။
********************************************************************************

(မေး) (ဒိဗ္ဗစက္ခု)
အရှင်ဘုရား၊ နတ်မျက်စိဟုဆိုအပ်သော ဒိဗ္ဗစက္ခုနှင့် ဘုရား ရဟန္တာတို့ရရှိသော ဒိဗ္ဗစက္ခုတို့ မည်သို့ထူးခြားပါသနည်း၊ အထူးသိလိုသဖြင့် မေးပါသည်။ ကျမ်းဂန်ကိုဖော်ပြ၍ ဖြေဆိုပေးပါရန် တောင်းပန်ပါသည်ဘုရား။
(ဦးပညာဗလ-တောင်ကြီး)

(ဖြေ)
နတ်မျက်စိ ဒိဗ္ဗစက္ခုဟူသည် နတ်တို့အား ကောင်းစွာကျင့်အပ်သော ကံကြောင့်ဖြစ်သော သည်းခြေ၊ သလိပ်၊ သွေး အစရှိသည်တို့ဖြင့် မလိမ်းကျံသော ညစ်ညူးခြင်းမှ လွတ်သည်အဖြစ်ကြောင့် အဝေး၌ဖြစ်သော အာရုံကိုလည်း ခံခြင်း၊ မြင်ခြင်းငှါ စွမ်းနိုင်သော ဒိဗ္ဗစက္ခု၊ ပသာဒစက္ခု ဖြစ်ပါသည်။

ဘုရား ရဟန္တာတို့၌ကား ၀ီရိယဘာဝနာ၏ အစွမ်းကြောင့်ဖြစ်သော အဘိညာဉ်သည်လည်း နတ်ပြည်၌ဖြစ်သော ဒိဗ္ဗစက္ခု နတ်တို့၏ မြင်ခြင်းနှင့်အတူ မြင်တော်မူကုန်သည်။ နတ်တို့မှာ မံသစက္ခုဖြင့် မြင်သည်။ ဘုရား ရဟန္တာတို့မှာ အဘိညာဉ်ဖြင့် မြင်တော်မူကုန်သည်။

ဒေ၀တာနံ ဟိ သုစရိတကမ္မံ နိဗ္ဗတ္တံ-ပ-ဣဒဉ္စာပိ ၀ီရိယဘာဝနာ ဖလနိဗ္ဗတ္တံ ဉာဏစက္ခု တာဒိသမေ၀။
(ပါရာဇိကဏ် အဋ္ဌကထာ ၀ိ-ဋ္ဌ ၁၊ ၁၃၂)
********************************************************************************

(မေး) ( သာသနာအလံ)
အရှင်ဘုရား၊ တပည့်တော်တို့ လက်ရှိလွင့်ထူနေတဲ့ သာသနာ့အလံသည် ဘုရားရှင်လက်ထက်တော် ကတည်းကလား၊ ဗုဒ္ဓဘာသာနိုင်ငံတိုင်း လွှင့်ထူတဲ့အလံလား၊ မြန်မာဗုဒ္ဓဘာသာ သာသနာ့အလံ သက်သက်လား၊ သာသနာ့အလံ အရောင်တို့၏ အဓိပ္ပါယ်ကို သိချင်ပါသည်ဘုရား။
(မောင်သန်းဇော်ဦး-ရွှေပြည်သာမြို့နယ်)

(ဖြေ)
သာသနာ့အလံတော်ကို အမေရိကန်နိုင်ငံ နယူးယောက်မြို့သား ဟင်နရီအော်လကော့သည် ၁၈၈၀-ပြည့်နှစ်တွင် စစ်ဗိုလ်ဘ၀မှ အငြိမ်းစားယူ၍ ဗုဒ္ဓဘာသာကို လေ့လာရန် သီရိလင်္ကာနိုင်ငံ (သီဟိုဠ်ကျွန်း) သို့ ရောက်ခဲ့သည်။ ထို့နောက် ဗုဒ္ဓဘာသာအဖြစ် ခံယူကာ ၁၈၈၅-ခုနှစ် ကဆုန်လပြည့်နေ့တွင် ၄င်းဦးဆောင် တောင်းဆိုခဲ့၍ ဗုဒ္ဓနေ့ ဖြစ်ပေါ်ခဲ့သည်။ ၄င်းဗုဒ္ဓနေ့ဆိုင်ရာ သာသနာ့အလံတခု ကြံစည်ခဲ့ရာတွင် ဟင်နရီအောလကော့ကပင် မြတ်စွာဘုရား၏ ရောင်ခြည်တော်ခြောက်သွယ်ကို အထိမ်းအမှတ်ပြု၍ အရောင် ၆-မျိုးပါသော သာသနာ့ အလံတော်ကို ပြုလုပ်ခဲ့သည်ဟု ဆိုပါသည်။ အရောင် ၆-မျိုးမှာ မြတ်စွာဘုရား၏ ရောင်ခြည်တော်အတိုင်းပင်
နီလ-အညို(ပြာ)ရောင်။
ပီတ-အ၀ါရောင်။
လောဟိတ-အနီရောင်။
သြဒါတ-အဖြူရောင်။
မဉ္ဇိဋ္ဌ-အမောင်း(ပန်း)ရောင်။ နှင့်
ပဘဿရ-အရောင်ခြောက်မျိုးရောသည့် (ပြိုးပြက်) အရောင်တို့ ဖြစ်ပါသည်။

၁၈၈၅-ခု ကဆုန်လပြည့် ဗုဒ္ဓနေ့တွင် ၄င်းအလံတော်ကို စတင်လွှင့်ထူသည်။ တကမ္ဘာလုံး ဗုဒ္ဓဘာသာ အခမ်းအနားတိုင်းတွင်လည်း လွှင့်ထူကြရန် ဆုံးဖြတ်ကြသည်။ ၄င်းနောက် မြန်မာနိုင်ငံအပါအ၀င် ဗုဒ္ဓဘာသာနိုင်ငံတိုင်း အသုံးပြုကြပါသည်။
********************************************************************************

(မေး) (သမ္ဖပ္ပလာပ၀ါစာ)
အရှင်ဘုရား၊ ပါဏာတိပါတကံနှင့်ပတ်သက်၍ အင်္ဂါငါးပါးနှင့် ပြည့်စုံမှ ပါဏာတိပါတဖြစ်သည်ဟု တွေ့ရပါသည်။ သမ္ဖပ္ပလာပ၀ါစာနှင့် ပတ်သက်၍ အင်္ဂါဘယ်မျှရှိပါသနည်း။ သမ္ဖပ္ပလာပ မဖြစ်အောင် မည်သို့ကျင့်ရပါမည်နည်း။ လက်တွေ့ မည်သို့ကျင့်ဆောင် ပြောဆိုရပါမည်နည်း။ တပည့်တော်သည် လူငယ်ဖြစ်သည့်အားလျော်စွာ ဘောလုံးပွဲအကြောင်း၊ မိန်းကလေးအကြောင်း၊ ရယ်ရွှင်ဖွယ်ဖြစ်စေသော အကြောင်းများကို ပြောဆိုမိပါသည်။ ထို့ကြောင့် ရှောင်ကြဉ်နိုင်ရန် သမ္ဖပ္ပလာပ၀ါစာအကြောင်း သိလိုပါသည်ဘုရား။
(ကိုကြည်အေးအောင်-မြို့သစ်၊ မန္တလေး)

(ဖြေ)
သံသုခံ-ချမ်းသာကို၎င်း၊ ဟိတဉ္စ-အစီးအပွားကို၎င်း၊ ဖလတိ-၀ိနာသေတိ-ဖျက်ဆီးတတ်၏။ ဣတိ-တသ္မာ-ထို့ကြောင့်၊ သမ္ဖံ-သမ္ဖမည်၏။
ဧတေန-ဤစေတနာဖြင့်၊ သမ္ဖံ-ချမ်းသာစီးပွားကို ဖျက်ဆီးတတ်သော စကားကို၊ ပလပတိ-ပြောဆိုတတ်၏၊ ဣတိတသ္မာ-ထိုသို့ ပြောဆိုကြောင်းဖြစ်သော သတ္တိကြောင့်၊ သော သဘာဝေါ-ထိုစေတနာသဘောသည်။ သမ္ဖပ္ပလာပေါ-သမ္ဖပ္ပလာပမည်၏-ဟု ၀ိဂြိုဟ်ရှိပါသည်။

ထိုဝြိ၈ိုဟ်အရ အစီးအပွားမဲ့ အကျိုးမရှိ အချိန်ကုန်စေသော -ဟိုရှေးရှေးတုန်းက သီတာမိဖုရားကို ဒသဂီရိ ခိုးသွားရော့တဲ့-စသည့် ပုံပြင်များ၊ မဟုတ်က ဟုတ်က လုပ်ကြံပြောဆိုမှုမျိုးများကို သမ္ဖပ္ပလာပဟု ဆိုသည်။ ပြောသူလည်း အကျိုးမရှိ၊ နားထောင်သူလည်း အချိန်ကုန်ရုံသာဖြစ်သော စကားမျိုးကို ပြိန်ဖျင်းသောစကားကို ပြောခြင်းဟု ဆိုသည်။

အင်္ဂါအားဖြင့် အကျိုးမရှိသော စကားကို ရှေးရှုသည်၏အဖြစ်နှင့်
ထိုအကျိုးမရှိသောစကားကို ပြောဆိုခြင်း-ဟူသော အချက်နှစ်ချက် ဖြစ်သည်။

ပုံပြောခြင်း၊ အချိန်ဖြုန်းခြင်းသည် တိုက်ရိုက် သမ္ဖပ္ပလာပ ဖြစ်သည်။ ဘောလုံးပွဲအကြောင်း၊ ပွဲလမ်းသဘင်အကြောင်းများလည်း သွယ်ဝိုက်၍ သမ္ဖပ္ပလာပ ဖြစ်နိုင်ပါသေးသည်။ ကျမ်းဂန်တို့တွင်
ရာဇကထံ-မင်းနှင့်စပ်သောစကား၊
စောရကထံ-ခိုးသူနှင့်စပ်သောစကား၊
စသည်ဖြင့် တိရစ္ဆာနကထာ သုံးဆဲ့နှစ်ပါးကို ပြောခြင်းကိုလည်း (မဟုတ်သောအကြောင်း နားထောင်သူ ယုံကြည်လျှင်လည်း) သမ္ဖပ္ပလာဖြစ်နိုင်ကြောင်း ဆိုပါသေးသည်။
**********************************************************************************

(မေး) (မဟာသမယ ၇-သုတ်)
အရှင်ဘုရား၊ မဟာသမယသုတ်တော်မှာ သုတ္တန် ၇-ခုရှိသည်ဟု ကြားဖူးပါသည်။ တပည့်တော်သိသော မဟာသမယသုတ်တော်၏ အစမှာ သတေဟိ ပဉ္စမတ္တေဟိ-မှ စပါသည်။ ပြည့်စုံမှု ရှိ-မရှိ သိလိုပါသည်ဘုရား။ ပြည့်စုံမှု မရှိလျှင် ဘယ်တရားစာအုပ်အမျိုးအစားမှာ ပြည့်စုံစွာရှိနိုင်သည်ကို ညွှန်ပြမိန့်ကြားတော်မူပါဘုရား။
(မသိင်္ဂီဝင်း-ကျုံပျော်မြို့)

(ဖြေ)
မဟာသမယသုတ်မှာ ပြဿနာရှင်ဖော်ပြသော သတေဟိ ပဉ္စမတ္တေဟိ-စသောသုတ်ပင် ဖြစ်ပါသည်။ မဟာသမယသုတ်နှင့်အတူ တွဲ၍ ဟောကြားသော သမ္မာပရိဗ္ဗာဇနီယ စသော ခြောက်သုတ်လည်း ရှိသဖြင့် မဟာသမယ ၇-သုတ်ဟု ပြောဆိုကြပါသည်။

သတေဟိ ပဉ္စမတ္တေဟိ-စသော မဟာသမယတသုတ်ကို ရွတ်ဆိုလျှင်ပင် မဟာသမယသုတ် ရွတ်ဆိုခြင်း ပြည့်စုံပါပြီ။ ၇-သုတ်လုံးရွတ်ဆိုလျှင်မူ ပိုမို၍ကောင်းပါသည်။ ၄င်း ၇-သုတ် အနက်အဓိပ္ပါယ် အပြည့်အစုံကို သိလိုလျှင် ရန်ကုန်၊ ရေကျော်ရပ် ပညာအလင်းပြ ပုံနှိပ်တိုက်က ရိုက်နှိပ်ထားသော စာအုပ် ရှိပါသည်။
********************************************************************************

(မေး) (အိမ်နှင့် သံဃာသုံးပစ္စည်း)
မိမိတို့အိမ်တွင် သံဃာတော်များ သုံးဆောင်သော ပစ္စည်း မထားရဟု ကြားသိရပါသည်။ ရှင်းပြပေးတော်မူပါဘုရား။ ဘုရားတပည့်တော်တို့မှာလည်း ရဟန်းဒကာ၊ ရဟန်းအမတွေ ဖြစ်သည့်အတွက်ကြောင့် ရှင်းပြတော်မူပါဘုရား။
(မေတ္တာမွန်-မိသားစု၊ ညောင်ဦါ်မြို့)

(ဖြေ)
မိမိတို့ သုံးစွဲရန်မဟုတ်၊ သံဃာတော်များက အပ်နှံထား၍ စောင့်ရှောက်ထိမ်းသိမ်းထားခြင်း၊ လှူဒါန်းရန် အသင့်ထားရှိခြင်း စသည်ဖြင့် သံဃာသုံးပစ္စည်း (သင်္ကန်း၊ သပိတ်၊ စာအုပ်) များ ခေတ္တထားရှိခြင်းအတွက် အပြစ်မရှိပါ။ ရိုသေစွာ ထိန်းသိမ်းစောင့်ရှောက်ပေးမှုအတွက် ကုသိုလ်ပင် ဖြစ်ပွားဖွယ်ရာ ရှိပါသည်။ ၀ိနည်းတော်တွင် တောရဆောက်တည်သော ရဟန်းတော်များ မိမိ၏ ဒုကုဋ်သင်္ကန်းကြီးကို လုံခြုံမှုရှိစေရန် ရင်းနှီးသော ဒါယကာအိမ်တွင် အပ်နှံထားရခြင်းမျိုးပင် ရှိပါသည်။
********************************************************************************

(မေး) ( တိရစ္ဆာန်နှင့် မာဂဓဘာသာ)
အရှင်ဘုရား၊ တိရစ္ဆာန်များအား မာဂဓဘာသာ (ပါဠိဘာသာ) ဖြင့် ပြောဆိုခေါ်ဝေါ်လျှင် နားလည်ကြောင်း ပြောကြပါသည်။ သည်လိုဆိုလျှင် ပါဠိစကား တတ်ကျွမ်းသော ဆရာတော်များ တိရစ္ဆာန်များနှင့် စကားပြောဆိုနိုင်ကြပါလိမ့်မည်။ ဤသို့ ပြောဆိုသည်ဟုလည်း မကြားဘူးပါ။ တိရစ္ဆာန်တို့ ပါဠိစကားကို ဘယ်လိုနားလည်နိုင်ပါသလဲ။
(ခေမာ-ကသာ)

(ဖြေ)
တိရစ္ဆာန်များ ပါဠိစကား နားလည်သည်ဟု မဆိုနိုင်ပါ။ နားလည်ကြောင်း မည်သည့်ကျမ်းဂန်မှာမှ အဆိုမရှိပါ။ သို့သော် တစွန်းတစ ခေါ်ဝေါ်မှုကို နားလည်ကြောင်းကား မှတ်သားရဘူးပါသည်။ (ကြောင်-မိန်၊ ၀က်-လေ့၊ သိသာရွေ့၊ စေ့ခေါ်ဆင်မှာ ဘယ့်ကြောင့်နည်း)-ဟူသော စွယ်စုံကျော်ထင် အဖြေတွင်-
ကြောင်ကို မိန်မိန် (မြီမြီ) ဟု ခေါ်ခြင်းသည် မီနသဒ္ဒါ ငါးကို ဆိုသဖြင့် ငါးငါး-ဟု အသံပေးခြင်းဖြစ်ကြောင်း ဆိုပါသည်။
ဝက်ကို လေ့လေ့-ဟု ခေါ်ခြင်းသည် ယာဂုကဲ့သို့သော လျက်ဖွယ်ကို လျက်၍စားသော သတ္တ၀ါဖြစ်၍ လေယျလေယျ လျက်လှည့် လျက်လှည့်-ဟု ခေါ်ခြင်းဖြစ်ကြောင်း။
ဆင်ကို စေ့စေ့-ဟု ခေါ်ခြင်းမှာ စေ့ဝု စေ့ဝု ဆန်ဆန်-ဟု အသံပြုခေါ်ဝေါ်ခြင်း ဖြစ်ကြောင်းဆိုပါသည်။
ခွေးကို အို့အို့-ဟု ခေါ်ခြင်းမှာလည်း အ၀ဟရ၊ အ၀ဟရ မျိုလှည့် မျိုလှည့်-ဟု ခေါ်ခြင်းဖြစ်ကြောင်း။
ကြက်ကို တီတီ-ဟု ခေါ်ခြင်းသည် ပိုမွှားတိရစ္ဆာန်ကို စားတတ်သော သတ္တ၀ါဖြစ်ခြင်းကြောင့် တီတီ ပိုးမွှား ပိုမွှား-ဟု အသံပြု ခေါ်ဝေါ်ခြင်းဖြစ်ကြောင်း ဆိုပါသည်။
ကျီးကို အန်း အန်း-ဟု အသံပြုခြင်းသည်လည်း အန္န အန္န-ထမင်း ထမင်း-ဟု အသံပြုခေါ်ဝေါ်ခြင်းဖြစ်ကြောင်း ဖြေဆိုထားပါသည်။

ဤသို့ ကြောင်၊ ၀က်၊ ဆင်၊ ခွေး၊ ကြက်၊ ကျီးတို့အား ခေါ်ဝေါ်သော ဝေါဟာရတို့မှာ မာဂဓပါဠိစကားသက်များ ဖြစ်၍ တိရစ္ဆာန်တို့ ပါဠိနားလည်သည်ဟု ဆိုခြင်းဖြစ်ဟန် တူပေသည်။

( မြတ်မင်္ဂလာ ၂၀၀၃-ခု မတ်လ )

No comments: