Wednesday, February 10, 2010

ကျေးဇူးရှင်ကို ပြစ်မှားလျှင်

ကျွန်မကြုံတွေ့ရသော လွန်ခဲ့သော နှစ်ပေါင်း ၆၀-ကျော်က ဖြစ်ရပ်မှန်ဖြစ်သည်။ ထိုစဉ်က ကျွန်မသည် ဘီအေဘွဲ့ ရပြီးနောက် အလုပ်လျှောက်လိုက်ရာ အထက်တန်းပြဆရာမ အလုပ်ရာထူးကို ရပါသည်။ ထို့နောက် ပြည်နယ်ဒေသရှိ မြို့တမြို့သို့ ပြောင်းရပါသည်။ ထိုမြို့သို့ ကျွန်မ၏ ဖခင်က လိုက်ပို့သည်။

ကံအားလျော်စွာ ထိုကျောင်း၏ ကျောင်းအုပ်ဆရာကြီးမှာ ကျွန်မဖခင်၏ တူတော်သူ ဖြစ်နေသည်။ ဖခင်က တူဖြစ်သူအား ကျွန်မကို အပ်နှံကာ မောင်နှမနှစ်ယောက် တိုင်တိုင်ပင်ပင်နေကြရန် ပြောခဲ့သည်။

ထိုကျောင်းတွင် ငွေကိုင်စာရေးတယောက်ရှိ၏။ ထိုစာရေးသည် ပထမတွင် ရိုးသားသော်လည်း အပေါင်းအသင်း ဖျက်ဆီးမှုကြောင့် သောက်စားရုံမျှမက အကစားပင် ဖက်လာပါတော့သည်။ ကျွန်မလည်း ထိုသတင်းကို ကြားလျှင် အကိုတော်သူ ကျောင်းအုပ်ဆရာကြီးကို သတိပေးလိုက်သည်။ ဤတွင် ဆရာကြီးက ရုတ်တရက် ငွေစာရင်းကို စစ်လိုက်ရာ ငွေများ လျော့နေသည်ကို တွေ့ရသည်။

ငွေစာရင်းစစ်သည့်နေ့၏ နောက်နေ့တွင် စာရေးက ခွင့်စာတင်၍ ရန်ကုန်သို့ ထွက်ပြေးသွားသည်။
ထိုအခါ ဆရာကြီးက ရဲဌာနသို့ တိုင်မည်၊ ထိုစာရေးအား လက်ထိပ်ခတ်၍ ရန်ကုန်မှ ခေါ်လာခိုင်းမည်ဟု ပြောသည်။ ဆရာကြီးက သူ့ကို မလေးမစား ပြုသွားသဖြင့် လွန်စွာ စိတ်ဆိုးဒေါသထွက်နေသည်။

ဤတွင် ကျွန်မက အကိုဖြစ်သူအား ဤသို့မပြုပါရန် မေတ္တာရပ်ခံပါသည်။ ထိုစာရေးမှာ အိမ်ထောင်ရှိ၍ သားသမီးနှစ်ယောက် ရှိကြောင်း၊ ဤသိြု့ပုပါက သူ၏ အိမ်ထောင်လည်း ဒုက္ခရောက်၍ သူကိုယ်တိုင်လည်း အလုပ်ပြုတ်၊ ထောင်ကျမည်ဖြစ်ကြောင်း၊ သို့အတွက် သူ၏ မိသားစုကို ငဲ့ညှာသင့်ကြောင်း၊ ထို့ပြင် ရဲဌာနသို့ တိုင်လိုက်လျှင် လူအများသိသွားကာ ကျောင်းလည်း နာမည်ပျက်၊ ဆရာကြီးလည်း နာမည်ပျက်မည်ဖြစ်ကြောင်း၊ လျော့နေသည့်ငွေကို စာရေးအား ပြန်ဆပ်ခိုင်း၍ ယခုပြုလုပ်သည်မှာ ပထမအကြိမ် ဖြစ်သဖြင့် သက်ညှာလိုက် ကြောင်း၊ နောက်ထပ်ဖြစ်ခဲ့သော် အရေးယူမည်ဖြစ်ကြောင်း သတိပေးပြောကြားရန် အကြံဉာဏ်ပေးလိုက် ပါသည်။

ဆရာကြီးလည်း ကျွန်မအကြံကို လက်ခံကာ စာရေး၏ ဇနီးကို ခေါ်ယူစေသည်။ ကျွန်မအကြံပေးထားသည့်အတိုင်း စာရေး၏ ဇနီးဖြစ်သူကို ပြောပြသည်။ စာရေးအား ပြန်ခေါ်ခဲ့ရန် ပြောပြလိုက်သည်။ သူ၏ဇနီးက ဆရာကြီး၏စကားကို နားထောင်၍ စာရေးကို ပြန်ခေါ်ခဲ့သည်။ စာရေးလည်း လျော့နေသည့်ငွေများကို ချေးငှါးကာ လျော်ပေးခဲ့သည်။ ကျွန်မလည်း စာရေးကို ကယ်တင်လိုက်ရသဖြင့် မြွေမသေ တုတ်မကျိုးဘဲ အဆင်ပြေသွားသည်။ ထိုအတွက် များစွာ ၀မ်းမြောက်ခဲ့ရပါသည်။

ထို့နောက် ဆရာကြီးသည် ထိုစာရေး၏အထက်တွင် ငွေကိုင်တယောက် ခန့်ထားခဲ့သည်။ ထိုငွေကိုင်က ငွေထုတ်ပေးပြီး စာရေးက လစာများ ဝေပေးရသည်။
တလရှိသွားသဖြင့် လကုန်ရက်တွင် လစာထုတ်ရန် ငွေစာရင်းဌာနသို့ ကျွန်မ သွားခဲ့သည်။ ထိုအခါ ထိုစာရေးက ကျွန်မကျေးဇူးပြုခဲ့သည်ကို မထောက်ထားဘဲ ကျွန်မကို ပညာပြပါတော့သည်။ အတိုင်ပင်ခံကြီး ကြွပါ-ဟု ထေ့ငေါ့ပြောဆိုသည်။ ကျွန်မလည်း သူ့ရှေ့ကုလားထိုင်တွင် ထိုင်စောင့်နေသည်။ သူက ငွေကိုင်ထုတ်ပေးသည့် ကျွန်မလစာကို ချက်ချင်းမပေးပါ။ ကျွန်မကို ပမာမခန့်ပြုလျက် သူ၏ လုပ်ဖော်ကိုင်ဖက်များနှင့် အတင်းအဖျင်း ပြောကာ၊ ရယ်ကာမောကာနှင့် လက်ဖက်ရည် မှာသောက်လိုက် မုန့်မှာစားလိုက် ပြုလုပ်နေပါသည်။

ကျွန်မလည်း သည်းခံကာ သူ၏ မျက်နှာကို စိုက်ကြည့်ပြီးလျှင် မေတ္တာပို့နေခဲ့ပါသည်။ အချိန်တနာရီကျော်ကျော် ကြာသည့်တိုင် လစာကို ထုတ်မပေးသေးပါ။ ကံအားလျော်စွာ ဆရာကြီးက သူ၏ အခန်းမှထွက်လာကာ ငွေစာရင်းဌာနသို့ လာကြည့်သည်။ ကျွန်မကို-လစာလာထုတ်တာလား၊ ရပြီလား-ဟုမေးသည်။
ကျွန်မက-ငွေစာရင်း စာရေး မအားသေး၍ မရသေးပါ-ဟု ပြန်ပြောလိုက်သည်။

ဆရာကြီးက-လစာထုတ်ပေးလိုက်လေ-ဟု စာရေးအား ပြောကာ ထွက်သွားပါသည်။ ထိုအခါမှ ကျွန်မ လစာရပါတော့သည်။ ထိုသို့ဖြစ်ပြီး မကြာမီပင် ထိုစာရေး၏ သားနှင့်သမီး ရှေ့ဆင့်နောက်ဆင့် သေဆုံးသွားကြောင်း ကြားလိုက်ရသည်။ သားကလေးက ပထမဆုံးရှာသည်။ ထိုကလေးရက်လည်နေ့တွင် သမီးကလေးက ထပ်မံဆုံးရှာပြန်သည်။ ကျွန်မလည်း အာဃာတမထားဘဲ ကြင်နာစွာဖြင့် တတ်နိုင်သရွေ့ ကူညီလိုက်ပါသည်။

မကြာမီ တခြားမြို့သို့ ကျွန်မရာထူးတိုး၍ ပြောင်းရပါသည်။ နောက်ပိုင်းတွင် အကို ဆရာကြီးထံမှ သတင်းကြားရ သည်မှာ ထိုစာရေးသည် ကားတစီးပေါ်တွင် သေဆုံးနေသည်ကို တွေ့ရကြောင်း ၊ ကားဆရာက အနီးအနားက လူများကို သက်သေထားကာ ရဲဌာနသို့သွားပို့ကြောင်း၊ ရဲက ဆေးရုံသို့ပို့ရာ ဆေးရုံက စစ်ဆေးသောအခါ အဆိပ်မိ၍ သေဆုံးကြောင်း-ဟု သိရပါသည်။

သူတထူး ကျေးဇူး၊ ထိမ်ဖူးသောသူ၊ မီးလိုပူ၏-ဟု ဆိုရိုးရှိသည့်အတိုင်း မကောင်းကျိုးကို ခံစားသွားရပါသည်။ ကျေးဇူးရှင်ကို ကျေးဇူးမဆပ်လိုက ရှိပါစေ၊ သို့သော် ကျေးဇူးမကန်းပါနဲ့၊ ကျေးမစွပ်ပါနဲ့-ဟု သတိပြုစေလို၍ ဤအကြောင်းကို ပြန်လည်ဖော်ထုတ်ရေးသားခြင်း ဖြစ်ပါသည်။

(တက္ကသိုလ်ခေမာ-ကျိုက်လတ်)
(မြတ်မင်္ဂလာ ၂၀၀၃-ခု အောက်တိုဘာလ)

No comments: