Saturday, February 13, 2010

ဘာသာရေး ပြဿနာ ( ၄ )

( ဘဒ္ဒန္တ ဝါယမသာရ ဖြေသည် )

(မေး) (အရူပဗြဟ္မာနှင့် အသညသတ်ဗြဟ္မာ)
အရှင်ဘုရား၊ (၁) ရပ်ပြစ်ရှစ်ပါးထဲတွင် အရူပဗြဟ္မာ ပါဝင်သည်ဟု တထစ်ချမှတ်သားရန် သင့်-မသင့် ဖြေကြားပေးတော်မူပါဘုရား။( ကိုဟန်ဝင်း-အင်းစိန်မြို့နယ်)
(၂) အရူပဗြဟ္မာများသည် ရုပ်မရှိသော်လည်း နာမ်ရှိသောကြောင့် ဘုရားနှင့် သံဃာတော်များကို မမြင်ရသဖြင့် တရားဓမ္မ နာနိုင်-မနာနိုင်၊ မဂ်ဖိုလ် ရနိုင်-မရနိုင် ဖြေကြားပေးတော်မူပါဘုရား။( ဦးတင်ဦး-တောင်ငူ)

(ဖြေ)
ရပ်ပြစ်ရှစ်ပါးခေါ် အပြစ်သင့်နေသော (အခွင့်အရေးဆုံးရှုံးနေသော) အက္ခဏ ၈-မျိုး ရှိသည်။ ယင်းတို့မှာ-
၁။ ငရဲဘုံ၌ ဖြစ်သောသူ။
၂။ တိရစ္ဆာန်ဘုံ၌ ဖြစ်သောသူ။
၃။ ပြိတ္တာဘုံ၌ ဖြစ်သောသူ။
၎။ အသညသတ်ဘုံ (အရူပဘုံတို့၌ ဖြစ်သောသူ)
၅။ ပစ္စန္တရစ်ခေါ် သာသနာမရှိသောအရပ်၌ ဖြစ်သောသူ။
၆။ မိစ္ဆာဒိဋ္ဌိဖြစ်နေသူ။
၇။ သုဂတိအဟိတ် ပဋိသန္ဓေ နေခဲ့သူ။ (သို့) လူစဉ်မမီသူ။
၈။ တိဟိတ်ပဋိသန္ဓေဖြင့် ဘုရားရှင်တို့ မပွင့်ပေါ်သော ကမ္ဘာ၌ ဖြစ်သောသူတို့ ဖြစ်ပါသည်။

၎င်း ၈-မျိုးအနက် နံပါတ် ၄-တွင် အင်္ဂုတ္တရနိကာယ် အသညသတ်နှင့် အရူပဗြဟ္မာ ၂-မျိုးလုံးကို ယူပါသည်။ အရူပဘုံသား အားလုံး မျက်စိ၊ နား မရှိ၍ ဘုရားဖူး၊ တရားနာခြင်း မပြုနိုင်ပါ။

အရူပဘုံ၌ဖြစ်သော တိဟိတ်ပုထုဇဉ်သည် အရူပဘုံ၌ မဂ်ဖိုလ်ရနိုင်ရန် အခွင့်မရှိ။ ရုပ်လုံးဝ မရှိ၍ မျက်စိ နား မရှိ၊ တရား မနာနိုင်၊ ဘုရား မဖူးနိုင်ပါ။ တခြားဘုံမှ မဂ်ဖိုလ်ရပြီး၍ အရူပဘုံသို့ ရောာက်လာကြသော သောတာပန်၊ သကဒါဂါမ်၊ အနာဂါမ် ပုဂ္ဂိုလ်များမှာမူ မိမိတို့ ရရှိပြီးသော တရားများကို ဆင်ခြင်ပွားများ၍ အထက်မဂ်ဖိုလ်နိဗ္ဗာန်များသို့ ရောက်ရှိနိုင်ပါသည်။ အရူပဘုံ၌ဖြစ်သော တိဟိတ်ပုထုဇဉ်မှာကား ရပ်ပြစ်ရှစ်ပါးထဲတွင် ပါဝင်သောကြောင့် မဂ်ဖိုလ်နိဗ္ဗာန် မရနိုင်ပါ။ (ဒီ-ဋ္ဌ ၂၂၉)။
*********************************************************************************

(မေး) (ရဟန်းမိန်းမ)
အရှင်ဘုရား၊ ဘုရားလက်ထက်တော်တွင် မိန်းမရဟန်းများ ရှိခဲ့ပြီး ယခုခေတ်တွင် မိန်းမရဟန်း မရှိတော့ပါ။ သီလရှင်တွေသာ ရှိနေပါသည်။ ဘာကြောင့် ဆိုသည်ကို ရှင်းပြတော်မူပါဘုရား။
(ဦးအုံးသောင်-ဇေယျဝတီမြို့)

(ဖြေ)
ဘိက္ခုနီ သာသနာ ကွယ်ရခြင်းမှာ အောက်ပါတို့ကြောင့် ဖြစ်ပါသည်။
၁။ သိက္ခာပုဒ်များ ကျပ်တည်းခြင်း (များပြားခြင်း)။ ဘိက္ခုက ၂၂၇-သာရှိပြီး ဘိက္ခုနီက ၃၃၁-ရှိ၍ စောင့်ထိန်းဖို့ ခဲယဉ်းခြင်း၊ ဘိက္ခုနီအဖြစ်မှ လျှောကျဖို့ လွယ်ကူခြင်း၊ ဂရုဓမ် ၈-ပါးဖြင့် စည်းကမ်း တင်းတင်းကြပ်ကြပ် သတ်မှတ်ထားခြင်း။
၂။ ဘိက္ခုနီသံဃာ၌ တကြိမ်၊ ဘိက္ခုသံဃာ၌ တကြိမ်၊ နှစ်ကြိမ်တိုင်တိုင် ရဟန်းခံမှ ရဟန်းမ အဖြစ်သို့ ရောက်နိုင်ခြင်း။
၃။ ဘိက္ခုနီလုပ်လိုသူများ ရဟန်းမခံမီ ၂-နှစ် ကြိုတင်၍ တရား ၆-မျိုးကို ကျင့်ရခြင်း။
၎။ ဘိက္ခုသံဃာနှင့် ဒကာ ဒကာမအပေါင်းတို့၏ အားပေးချီးမြှောက်မှု နည်းခြင်း။
၅။ ခေတ်ဆိုး အကြိမ်ကြိမ် ကြုံရခြင်း။ သီဟိုဠ်ခေတ်တွင် ကျေးကုလားတို့နှင့်၎င်း၊ စဏ္ဍာလတိဿ၊ ဗြဟ္မဏတိဿ၊ သူပုန်တို့နှင့်၎င်း၊ သီဟိုဠ်ဘုရင်တို့ အကြိမ်ကြိမ် စစ်ခင်းကြရခြင်း၊ ရောဂါဘယကပ်ဘေး အကြိမ်ကြိမ်ကြုံရခြင်း၊ မိုးခေါင်ရေရှား အစာရှားပါးခြင်းတို့ကြောင့် ရဟန်းတော်များပင် ပြေးလွှား ပုန်းရှောင်ကာ နေရခြင်း၊ ရဟန်းတော်များ အစာမစားရဘဲ ဝမ်းဗိုက်ပေါ် သဲများတင်၍ ပိဋကတ်တော်များ မပျောက်ရအောင် ခဲယဉ်းစွာ အသက်ရှင်၍ စောင့်ရှောက်ခဲ့ရခြင်းတို့ကြောင့် ရဟန်းများပင် ရပ်တည်ရေး မလွယ်ဘဲ ရှိခဲ့သည်။

သိမ်မွေ့ကျပ်တည်းလှသော ရဟန်းမများမှာ ဆက်လက်ရပ်တည်ရန် မလွယ်တော့ပါ။သီဟိုဠ်သာသနာ နောက်ပိုင်း သာသနာနှစ် ၅ဝဝ-ကျော်အချိန်တွင် ပျောက်ကွယ်ခဲ့ရသည်။ ထိုအကြောင်းကို ဘဒ္ဒန္တတိလောကသာရ ဆရာတော်ကြီးရေးသည့် ဘိက္ခုနီသာသနာနှင့် သီလရှင်သမိုင်း တွင် အကျယ်တဝင့် ဖော်ပြထားပါသည်။ အကျယ်ကိုသိလိုပါက ၄င်းစာအုပ်ကို လေ့လာရန် ဖြစ်သည်။

ထို့ကြောင့် ယခုအခါတွင် ၈-ပါးသီလ၊ ၁ဝ-ပါးသီလဖြင့် ထိန်းသိမ်းကြသော သီလရှင်များကိုသာ ကြည်ညိုခွင့်ရကြ ပါသည်။
*********************************************************************************

(မေး) (ထီးဖြူ ထားသင့်-မထားသင့်)
အရှင်ဘုရား၊ ဘုရားတပည့်တော်၏ နေအိမ်ရှိ ဘုရားခန်းတွင် ဘုရားမျိုးစုံ ၂၅-ဆူကျော် ရှိပါသည်။ ကိုးကွယ်ထားပါသည်။ နေ့စဉ် ဆွမ်းဟင်းခွက်မျိုးစုံ ၉-ပွဲ၊ အချို့မုန့်၊ လက်ဖက်ရည်များဖြင့် ဆက်ကပ်ပူဇော်ပါသည်။
လွန်ခဲ့သော ၂-နှစ်ခန့်က မန္တလေးမှ ဆရာကြီးတယောက် ရောက်လာပြီး အိမ်မှာ ထီးဖြူမထားရ စသည်ဖြင့် ပြောဆို တားမြစ်ပါသည်။ သင့်-မသင့် ဖြေကြားတော်မူပါဘုရား။
(ဦးမျိုး-စမ်းချောင်း)

(ဖြေ)
ပူဇော်ရာတွင် ခမ်းခမ်းနားနား တင့်တင့်တယ်တယ် ပူဇော်နိုင်လေလေ အကျိုးကြီးလေလေ ဖြစ်ပါသည်။ ကျောက်ဆင်းတု ရုပ်ပွားတော်ကို အိမ်မှာ မကိုးကွယ်ရ၊ ထီးဖြူမထားရ စသော အယူအဆများမှာ ပိဋကတ်တော်လာ ဓမ္မရေးရာ အယူအဆများ မဟုတ်ပါ။ မိမိတို့သန်ရာ အမျိုးမျိုး ပြောဆိုကြခြင်းသာ ဖြစ်သည်။ ယင်းတို့ကို အဆိုအရ မဟုတ်ဘဲ ဘုရားပူဇော်ရာ၌ တင့်တယ်၊ ခမ်းနား၊ သပ္ပါယ်ဖွယ်ရာ ဖြစ်လေ၊ ပို၍ ကြည်ညို သဒ္ဓါပွားနိုင်စရာ၊ ကုသိုလ်တိုးပွားနိုင်စရာ ဖြစ်လေ ဖြစ်ပါသည်။ စိတ်ချယုံကြည်စွာ အစွမ်းရှိသလောက် ပူဇော်ကြရန် ဖြစ်ပါသည်။
*********************************************************************************

(မေး) (ရှိခိုးသင့် ရှိမခိုးသင့်)
အရှင်ဘုရား၊ (၁) တပည့်တော်သည် ငယ်ရွယ်သူ တူ-တူမများ၊ တပည့်တပန်းများက မေးသော်လည်း တပည့်တော် မဖြေနိုင်သောကိစ္စတခု ရှိနေပါသည်။
လူပုဂ္ဂိုလ်သည် မိမိထက် အသက်ငယ်ရွယ်သူ သီလရှင်များကို ရှိခိုးဦးချနိုင်-ဦးမချနိုင်၊ သီလရှင်သည် မိမိထက် အသက်ကြီးသော လူပုဂ္ဂိုလ် (ဥပမာ-မိဘ၊ ဦးကြီး၊ ဘကြီး၊ ဆရာသမား) ကို ရှိခိုး ဦးချနိုင်-ဦးမချနိုင် ဖြစ်ပါသည်။ ဆရာတော်ဘုရားက မေတ္တာရှေ့ထား၍ ဖြေကြားပေးတော်မူပါ။

(၂) နောက်တခု တပည့်တော် သိလိုသောအချက်တချက်မှာ-ရသေ့၊ ရသေ့မတို့သည် ရှစ်ပါးသီလ မထိန်းသိမ်းဘဲ ငါးပါးသီလအဆင့်ဖြင့် နေနိုင်-မနေနိုင်ကိုလည်း ဖြေကြားပေးတော်မူပါ။
(ဦးမောင်ဦး-မီးရထားဆေးပေးခန်း တောင်ငူ)

(ဖြေ)
သီလရှင်များကို ရှိခိုးသင့်-မသင့်ကို ၂ဝဝ၃-ခု စကတ်ငဘာလထုတ်တွင် ဖြေဆိုပြီးဖြစ်ပါသည်။
ရသေ့-ရသေ့မ (ပရိဗိုဇ်မ) များသည် လူနှင့်မတူသော ဖန်ရည်စွန်းသော အဝတ်ကိုဝတ်သော ပုဂ္ဂိုလ်များဖြစ်၍ လူတို့၏ ဂရုဓမ္မနိစ္စသီလ ဖြစ်သော ၅-ပါးသီလနှင့် မတူသော သမဏ ပဗ္ဗဇ္ဇ သီလမျိုးဖြစ်သော ၁ဝ-ပါးသီလကို စောင့်ထိန်းကြမှသာ အသွင်ထူးသလို သီလအကျင့်လည်း ထူးခြားပါမည်။ ၁ဝ-ပါးသီလ ဆောက်တည်ကြကြောင်းကို ဒီပဝံသပါဠိ ၈၁-ဂါထာ၌ ဖော်ပြထားကြောင်း သိရသည်။

၁ဝ-ပါးသီလ မစောင့်ထိန်းနိုင်ပါက အနည်းဆုံး ၈-ပါးသီလမျှကို စောင့်ထိန်းမှသာ အသွင်တော်နှင့် အကျင့် သင့်လျော်ညီညွတ်ပါလိမ့်မည်။
********************************************************************************

(မေး) ( ဗုဒ္ဓကိစ္စငါးမျိုး)
အရှင်ဘုရား၊ သဗ္ဗညုတဉာဏ်တော်သခင် မြတ်စွာဘုရားရှင် ကိုယ်တော်မြတ်ကြီးသည် ၄၅-ဝါပတ်လုံး ကမ္ဘာသူကမ္ဘာသား သတ္တဝါများအတွက် တနေ့တာတွင် မည်မျှလောက် အပင်ပန်းခံတော်မူခဲ့ပါသနည်း။
နောက်တခုမှာ တပည့်တော်တို့ အထက်အညာမြေမှာ ဘုန်းကြီးဖြစ်စေ၊ သဗ္ဗညုတဉာဏ်တော်သခင် မြတ်စွာဘုရားရှင်ကို ဖြစ်စေ၊ ရှိခိုးကန်တော့မည်ဆိုလျှင် တဘက် (ပဝါ) စသည်တို့ ပခုံးပေါ်တင်၍ ရှိခိုးကြပါသည်။ ထိုကဲ့သို့ ရှိခိုးခြင်းသည် အဘယ်အကျိုးရှိပါသနည်း။ သိလိုလှပါသည်ဘုရား။
(ရှင်ဥတ္တမ-ပျော်ဘွယ်)

(ဖြေ)
ဘုရားရှင်သည် နေ့စဉ် ဗုဒ္ဓကိစ္စကြီး ၅-မျိုးကို မနားမနေ ကြိုးပမ်းတော်မူပါသည်။ ကိစ္စ ၅-မျိုးကို ပိုင်းခြားသော်-
(၁) ပုရေဘတ္တကိစ္စ-(ဆွမ်းမစားမီကိစ္စ)=နံနက်စောစော မျက်နှာသစ်၊ ကိုယ်လက်သန့်စင်ပြီး ခေတ္တ တိတ်ဆိတ်ငြိမ်သက်သော နေရာမှာနေ၏။ ထို့နောက် သင်္ကန်း သပိတ်ပြင်ကာ ရံခါတပါးတည်း၊ ရံခါ သံဃာအများနှင့်၊ ရံခါ တန်ခိုးပြာဋိဟာ အမျိုးမျိုးပြ၍ ရံခါတန်ခိုးဖြင့် မကြွဘဲ ရိုးရိုးကြွတော်မူပါသည်။ ဆွမ်းခံတော်မူခြင်းဖြင့် ဆွမ်းလောင်းလှူသူများအား သရဏဂုံတည်သူ၊ ငါးပါးသီလတည်သူများနှင့် သောတာပန်၊ သကဒါဂါမ်၊ အနာဂါမ်၊ ရဟန္တာအရိယာ ပုဂ္ဂိုလ်များအဖြစ်သို့ ရောက်စေပါသည်။

(၂) ပစ္ဆာဘတ္တကိစ္စ-(ဆွမ်းစားပြီးကိစ္စ)=ဆွမ်းစားအပြီး ဂန္ဓကုဋိသို့ အဝင် ခြေဆေးခုံ၌ ရပ်၍ ရဟန်းတို့အား နေ့စဉ် ဒုလ္လဘတရား ၅-ပါးကို ဟောပြီး ကမ္မဋ္ဌာန်းအမျိုးမျိုး ပေးတော်မူသည်။ ထို့နောက် ဂန္ဓကုဋိသို့ ဝင်၍ ခေတ္တအနားယူသည်။ အနားယူပြီး လောကကြီးကို ကြည့်ရှုတော်မူကာ ကျွတ်ထိုက်မည့် ပုဂ္ဂိုလ်များကို သွာရောက် ချေချွတ်တော်မူခြင်း၊ ရွာနိဂုံး၊ မြို့၊ တိုင်းအသီးသီးတို့ ကြွရောက်တရားဟောတော်မူခြင်း ကိစ္စတို့ကို တနေ့လုံး ဆောင်ရွက်တော်မူပါသည်။

(၃) ပုရိမယာမကိစ္စ-(ညဥ့်ဦးယံကိစ္စ)=၆-နာရီမှ ၁ဝ-နာရီ ညဥ့်ဦးယံတွင် ရေချိုးပြီး ကျောင်းတော်သို့ ရောက်လာကြသော ရဟန်းအပေါင်းတို့အား တရားဟောခြင်း၊ ကမ္မဋ္ဌာန်းပေးခြင်း၊ မေးသမျှ ပုစ္ဆာအပေါင်းတို့ကို ဖြေဆိုတော်မူခြင်းဖြင့် ညဥ့်ဦးယံကို ကုန်ဆုံးစေပါသည်။

(၄) မဇ္ဈိမယာမကိစ္စ-(ညဥ့်လယ်ယံကိစ္စ)=၁ဝ-နာရီမှ ၂-နာရီ ညဥ့်လယ်ယံတွင် စကြာဝဠာတိုက်တသောင်းမှ ရောက်ရှိလာကြကုန်သော နတ်ဗြဟ္မာအပေါင်းတို့အား တရားဟောခြင်း၊ မေးသမျှပုစ္ဆာတို့ကို ဖြေကြားခြင်း ပြုတော်မူပါသည်။

(၅) ပစ္ဆိမယာမကိစ္စ-(မိုးသောက်ယံကိစ္စ)=နံက် ၂-နာရီမှ ၆-နာရီ မိုးသောက်ယံကို ဘုရားရှင်သည် သုံးပုံ-ပုံ၍ ပထမတပုံတွင် တနေ့တညတာ ခန္ဓာကိုယ်၏ ညောင်းညာမှုကို ပယ်ဖျောက်နိုင်ရန် စင်္ကြံ ကြွတော်မူသည်။
ဒုတိယတပုံတွင် (တနာရီကျော်ကျော်မျှ) အနားယူ ကျိန်းစက်တော်မူသည်။
တတိယ နောက်ဆုံးတပုံတွင် တနေ့တာ ကယ်ချွတ်တော်မူရည့် သတ္တဝါတို့ကို ကြည့်ရှုတော်မူသည်။
ထို့နောက် နောက်တရက်တာ ပုရေဘတ္တကိစ္စသို့ ပြန်ရောက်ကာ သတ္တဝါများအတွက် မနားမနေ ကြိုးပမ်းတော်မူပါသည်။ နေ့စဉ် ဘုရားရှင်၏ အိပ်ချိန်မှာ (၁) နာရီ ကျော်ကျော်မျှသာ ရှိပါသည်။

ဘုရားရှင်လက်ထက်၌ ရဟန်းတော်များသည် ဘုရားရှင်ကို၎င်း၊ မထေရ်ကြီးများကို၎င်း ရှိခိုးပူဇော်ရာတွင် လက်ဝဲတဖက် ပုခုံးထက်၌ သင်္ကန်းကိုတင်၍ (လက်ဝဲပုခုံးနှင့် လက်ဝဲလက်ကို သင်္ကန်းဖြင့် ဖုံးလွှမ်း၍) ရှိခိုးပူဇော်ကြကြောင်း ပိဋကတ်စာပေတွင် ပါရှိသည်။

လူပုဂ္ဂိုလ်တို့ ဘုရားရှင်ကို ရှိခိုးပူဇော်ရာ၌ ဗြဟ္မာယုပုဏ္ဏားကြီးသည် ဘုရားရှင်ကို ရှိခိုးပူဇော်ရာတွင် ရဟန်းတော်များနည်းတူ လက်ဝဲတဖက် ပခုံးထက်၌ အဝတ်ပဝါတင်၍ ရှိခိုးပူဇော်ကြောင်း လာရှိပါသည်။ (ဗုဒ္ဓဘာသာဝင် အဆက်ဆက်တို့သည်) ဘုရားလက်ထက်က ဗြဟ္မာယုပုဏ္ဏားတို့ ကဲ့သို့ လိုက်နာကျင့်သုံးခဲ့ဟန် တူကြောင်း ယူဆရပါသည်။

တဘက် (ပဝါ) တင်၍ ရှိခိုးခြင်းဖြင့် ရှိခိုးပူဇော်ရခြင်း အကျိုးအပြင်၊ သက္ကစ္စ၊ ဂရုဂါရဝ တရားကို ပို၍ ပီပြင်ထင်ရှားစွာ ဖော်ပြရာ ရောက်ပါသည်။

( မြတ်မင်္ဂလာ ၂ဝဝ၃-ခု ဒီဇင်္ဘာလ)

No comments: