Sunday, February 14, 2010

ဟင်းလေးအိုးကြီး တည်နိုင်သူ

ကျွန်တော်သည် ၄-၇-၇၃ မှ ၁၃-၈-၈၀ နေ့အထိ အရာတော်မြို့နယ် မလဲသာကျေးရွာ အ-လ-က တွင် တာဝန်ထမ်းခဲ့ပါသည်။ မလဲသာကျေးရွာအုပ်စုတွင် မလဲသာရွာမ၏ အရှေ့ဘက်၌ ညောင်ပင်သာရွာ၊ ရွာမ၏ အနောက်ဘက်တွင် ကံရင်းရွာဟူ၍ ရွာနှစ်ရွာသည် တမိုင်အကွာစီတွင် တန်းလျက်တည်ရှိပါသည်။

ကျွန်တော်သည် ကံရင်းရွာမှ မလဲသာ (အ-လ-က) သို့ ခြေကျင်ကျောင်းတက်ခဲ့သူ ဖြစ်သည်။ ကံရင်းရွာလူကြီး ဦးချစ်ပွင့်က ကျွန်တော့်ကို သူ့ထန်းရွက်မိုးတဲလေးတွင် နေစေခဲ့ပါသည်။ မိသားစုမပါ၍ တဲလေး၌ တယောက်တည်း ချက်ပြုတ်စားသောက်ရသည့် ဒုက္ခမှာ မသေးလှ။ ကန်ရေခတ်ရသော ဒုက္ခမှာလည်း မလွယ်။

တနေ့တွင် ဦးလေးချစ်ပွင့်နှင့် ရွာ၌သြဇာရှိသော ဗိန္ဓောဆရာကြီး ဆရာအေးတို့ ကျွန်တော့်တဲ ရောက်လာကြ သည်။ ဆရာအေးက-ဆရာ ဒီရွာက ရွာသူရွာသားတွေဟာ ညမှာ ဗိုင်းငင်၊ နေ့မှာ တောင်ယာခွင် လုပ်နေကြရတဲ့ တောသူ တောသားများ ဖြစ်ပါတယ်။ သူတို့ရဲ့ ကလေးငယ်များ ပညာရေးမှာ မနိမ့်ကျအောင် ညဘက်မှာ ဆရာက ကျောင်းသားလူငယ်များကို ဂရုစိုက် လေ့ကျင့်၊ ရှင်းပြ၊ သင်ကြားပေးပါဦး-ဟု အကူအညီ တောင်းခဲ့သည်။

ကျွန်တော်လည်း ည၌ အားလပ်နေသဖြင့် လက်ခံခဲ့သည်။ အတန်းစုံမှ ကျောင်းသား ၃၀-ခန့်သည် မီးခွက်လေးများဖြင့် လာရောက်သင်ယူ လေ့ကျင့်ကြပါသည်။ ကျွန်တော်ကလည်း စေတနာထားပြီး ငွေကြေးလုံးဝမယူဘဲ ရှင်းပြ သင်ပြပေးခဲ့သည်။

မြန်မာ့ကျေးလက် တောသူတောသားများကား ကျေးဇူးရှင်ကို ကျေးဇူးဆပ်လေ့ရှိကြပါသည်။ နံနက်ရော ညနေပါ မိဘများသည် သားသမီးများအား ဟင်းတခွက်စီကို အမြတ်တနိုး ဆရာ့ထံ ပို့စေသည်။ ကျွန်တော်က သူတို့ပေးလာသော ဟင်းများကို ကျွန်တော်စားသောက်စရာ ပိုလျှံနေ၍ အိုးလုံးကြီးထဲ ထည့်ပြီး ဟင်းလေးအိုးကြီး တည်နိုင်ခဲ့ပါသည်။ ထင်းမှအစ ရေခပ်သည်အထိ ကျောင်းသားများက ကူညီခဲ့ကြ၍ ကျွန်တော့်ဘ၀သည် အားလုံးအဆင်ပြေပြီး စိတ်ချမ်းသာလှပါသည်။ စေတနာအကျိုးပင် ဖြစ်ပါသည်။

( သန်းရွှေဦး-ကလေး)

(မြတ်မင်္ဂလာ ၂၀၀၃-ခု ဒီဇင်ဘာလ)

No comments: