Thursday, February 11, 2010

အငြိုးကြီးသူ

မုဒုံမြို့နယ်အတွင်းရှိ ကျေးရွာလေးတရွာတွင် ကိုစံလှဆိုသူ ရှိသည်။ သူသည် ဒေါသ အလွန်ကြီး၏။ တရွာလုံးတွင် သူနှင့် ရန်မဖြစ်ဘူးသူဟူ၍ မရှိသလောက်ပင် ရှားသည်။ စကားပြောရာတွင် အမြဲတမ်း ကျယ်လောင်ငေါက်ငမ်း၍ ပြောဆိုတတ်သည်။ သူရောက်လေရာ အရပ်တွင် ဆူညံပွက်လောရိုက်သွားတတ်လေသည်။

တနေ့တွင် ဒေါ်ကြီးညို အိမ်ဆိုင်သို့ ကိုစံလှ ဈေးဝယ်လာရာ ဆိုင်အောက်တွင် သားကျထားသောခွေးမကြီး၏ အမြီးဖျားကို တက်နင်းမိသည်။ ခွေးမကြီး လန့်ကာ ကိုစံလှကို ထွက်၍ကိုက်လေတော့သည်။
ကိုစံလှလည်း ခွေးကိုက်ခံရသော ဒဏ်ရာမှ နာကျင်မှုကို ခံစားရသည့်အပြင် လူအများ၏-ခွေးကိုက်ခံရတာတောင် နည်းတောင် နည်းသေးတယ်။ လူတွေနဲ့ ရန်ဖြစ်တာ အားမရလို့ ခွေးနဲ့တောင် ရန်ဖြစ်တဲ့လူပဲ-ဟု ဝိုင်းဝန်းပြောဆိုခြင်းကို ခံရသည်။ ကိုစံလှ ပိုမို အရှက်ရကာ ခွေးမကိုသတ်ရန် ကြံသည်။ ဒေါ်ကြီးညို ခင်ဗျားတို့ ခွေးမကို ကျုပ်ပေး၊ ကျုပ်ကိုကိုက်ထားတာ၊ တော်ကြာ သူရူးရင် ကျုပ်ပါ လိုက်ရူးနေဦးမယ်-ဟုပြောဆို၍ တောင်းသည်။

ဒေါ်ကြီးညိုတို့ မိသားစုက-ကိုစံလှ ခွေးကိုက်လို့ ဆေးကုသခ ကုန်ကျငွေကို ကျွန်မတို့ခံပါ့မယ်။ ခွေးမကြီးက သားကျထားလို့ ခွေးကလေးတွေ သနားပါတယ်။ ခွေးမကြီးကို မသတ်ပါနဲ့-ဟု ဝိုင်းဝန်းတောင်းပန် ချော့မော့ပြောဆိုပြီး ခွေးမကြီးကို သတ်ခွင့်မပြုပေ။

ကိုစံလှ စိတ်ထဲမှ -နင် နေနှင့်ဦးပေါ့၊ ငါ့ကို ကိုက်ထားတဲ့ ပါးစပ် တွေ့မယ်-ဟု စိတ်ထဲ ကြုံးဝါးကာ အငြိုးထားလိုက်သည်။ ထိုသို့ဖြင့် လအတော်ကြာခဲ့သည်။ တနေ့တွင် ထိုခွေးမကြီးသည် ကိုစံလှတို့ အိမ်ဘက်သို့ ရောက်သွားသည်။ အငြိုးကြီးသူ ကိုစံလှ-က ခရမ်းသီးကို မီးဖုတ်ပြီး ခွေးမကြီးကို ချော့ခေါ်၍ အစာကျွေးသယောင်ဖြင့် ခရမ်းသီးမီးဖုတ်ကို လှမ်းပစ်ပေးလိုက်လေသည်။

ခွေးမကြီးသည် အစာအမှတ်ဖြင့် လှမ်းဟပ်လိုက်ရာ ခရမ်းသီးထဲတွင် သွားတို့မြှုပ်ဝင်ပြီး ပူလောင်လွန်းသော ခရမ်းသီးကြောင့် ပါးစပ်သွားဖုံး တခုလုံး ပူလောင်သောဝေဒနာကို ခံစားရသည်။ ခွေးမကြီးခမျာ မချိမဆံ့ လူးလှိမ့်ခံစားနေရတော့သည်။

ထိုအချင်းအရာကို ကိုစံလှတယောက် လက်ညှိုးထိုးကာ ရယ်ပြီး-ဘယ်လိုလဲ ငါကိုကိုက်ထားတဲ့ခွေးမ၊ ဘဲနယ်ရှိစ-ဟု ဝမ်းသာအားရ ရယ်မောလျက် ပြောသည်။ ထို့နောက်ပိုင်းတွင် ခွေးမကြီးသည် သွားဖုံးအပူလောင်သော ဝေဒနာကြောင့် သွားတို့ပြုတ်ထွက်ကာ ပါးစပ်ရောင်ကိုင်း၍ နာကျင်မှုဖြင့် အစာမစားနိုင်၊ မသောက်နိုင် ဖြစ်သွားတော့သည်။ ထို့နောက် ခွေးမကြီးသည် တပိန်ပိန် တလိမ်လိမ်ဖြင့် အစာရေစာပြတ်ပြီး သေဆုံးသွားလေတော့သည်။

ထိုသို့ဖြစ်ပြီး လအနည်းငယ်အကြာတွင် ကိုစံလှ၏ ပါးစပ်တခုလုံး ရေစီးကမ်းပြို အနာများကဲ့သို့ ဖြစ်ကာ သွားဖုံးများ ရောင်ရမ်းလာသည်။ သွားနာသည့်အပြင် သွားကိုက်ခြင်း စသည်တို့ဖြစ်ကာ အစာကောင်းစွာ မစားနိုင်တော့ပေ။ တဖန် အစားအစာကို မျိုချရာတွင်လည်း လည်ချောင်းသည် အလွန်နာကျင်ကာ နစ်နေတတ်လေသည်။ ထိုသို့ဖြင့် ကိုစံလှတယောက် ရောဂါဝေဒနာတို့ ခံစားရပြီး အစာစားချင်လျက် မစားရ၊ အရည်သောက်ချင်လျက် မသောက်ရနှင့် ဖြစ်နေသည်။ ထို့နောက် အစာရေစာ ငတ်ပြတ်မှုဒုက္ခတို့ကို ခံစားရလျက် ရောဂါဝေဒနာ ဖိစီးမှုတို့ကြောင့် သေဆုံးသွားလေတော့သည်။

ဒေါသအမျက်ကြီးကာ အငြိုးအတေးဖွဲ့ပြီး ရက်စက်စွာ လက်တုံ့ပြန်ခဲ့သော ကိုစံလှတယောက် သေလွန်ပြီးနောက် မည်သို့ဖြစ်မည်ကိုကား အတတ်မပြောနိုင်။ ယခုဘဝမှာမူ ဝဋ်ကြီးစွာဆင်းရဲခံရပြီး သေဆုံးသွားသည်မှာကား အထင်အရှားပင် ဖြစ်လေသည်။

( ဆူးဝန်းနီ)
( မြတ်မင်္ဂလာ ၂ဝဝ၃-ခု နိုဝင်ဘာလ)

No comments: