Saturday, February 6, 2010

ဘာသာရေး ပြဿနာ (၁)

(ဘဒ္ဒန္တ ၀ါယမသာရ ဖြေသည်)

(မေး) (သီလရှင်ကို ရှိခိုးထိုက်-ရှိမခိုးထိုက်)
အရှင်ဘုရား၊ လူပုဂ္ဂိုလ်သည် မိမိထက် အသက်ငယ်သော သီလရှင်ကို ရှိခိုးထိုက်-မရှိခိုးထိုက် သိလိုပါသည်ဘုရား။ ထို့ပြင် သီလရှင်ကလည်း မိမိထက်အသက်ကြီးသော လူပုဂ္ဂိုလ်ကို ရှိခိုးထိုက်-မရှိခိုးထိုက် သိလိုပါသည်ဘုရား။
(ဦးမောင်ဦး-တောင်ငူမြို့)

(ဖြေ)
လူပုဂ္ဂိုလ်များသည် မိမိထက် အသက်ငယ်သော သီလရှင်ကို ဦးချရှိခိုးနိုင်သည်။
သီလရှင်များသည် မိမိထက် အသက်ကြီးသောလူကို ရှိခိုးခြင်း မပြုရပါ။
အကြောင်းမှာ-သီလရှင်များသည် သာသနာနွယ်ဝင် (ဘိက္ခုနီနွယ်ဝင်) ဘိက္ခုနီ အသွင်ကို ဆောင်သော ပုဂ္ဂိုလ်များ ဖြစ်ပါသည်။
သီလရှိသည်ဖြစ်စေ မရှိသည်ဖြစ်စေ၊ အသက်ငယ်သည်ဖြစ်စေ ကြီးသည်ဖြစ်စေ၊ ဘိက္ခုနီအသွင်ကို ဆောင်ထားခြင်းသည်ပင် သာသနာတည်ခြင်း၏ အဓိကအကြောင်းဖြစ်၍ ရှိခိုးဦးခိုက် ပူဇော်ထိုက်လှပါသည်။

(မိလိန္ဒပဥှာ-ပါဠိ နှာ ၁၃၆-တွင် သာသနာကွယ်ခြင်းကို ဆိုရာ၌-
(၁) မဂ်ဖိုလ်နိဗ္ဗာန် ကွယ်၍ အကျင့်ပဋိပတ် ကွယ်၏။
(၂) အကျင့်ပဋိပတ် ကွယ်၍ သိက္ခာပုဒ်ပညတ်ခြင်းလည်း ကွယ်၏။
(၃) သိက္ခာပုဒ်ပညတ်များ ကွယ်လျှင် အသွင်အပြင်သာ ကျန်တော့၏။
အသွင်အပြင်သည် သာသနာကို ထိန်းထားသေး၏။ အသွင်အပြင်ကို ကြည့်၍ သံဃာဟူသောအမှတ်၊ ဘိက္ခု၊ ဘိက္ခုနီ ဟူသောအမှတ်ဖြင့် လှူဒါန်းပူဇော်ကြလျှင် မရေမတွက်နိုင်သော သံဃိက ကောင်းကျိုးများကို ရနိုင်သေး၏။

အသွင်အပြင်ပါ ကွယ်ပျောက်သွားလျှင်ကား သာသနာအစဉ်အဆက်လည်း ပြတ်တော့သည်။ ထို့ကြောင့် အသွင်အပြင်သည် သာသနာကွယ်ခြင်းကို ထိန်းထားသောအကြောင်းရင်းတရပ် ဖြစ်၏။ ပူဇော်ရှိခိုးထိုက်ပါ၏။

လူပုဂ္ဂိုလ်သည် အသက်ကြီးရုံတင်မက၊ အနာဂါမ်ကြီး ဖြစ်စေကာမူ ယနေ့ ပြုသစ်စ သာမဏေလေးကို ရှိခိုးထိုက်၏ အသွင်တော်၏ အရေးကြီးပုံ ဖြစ်၏။ မိလိန္ဒ-ပါ ၁၆၃-၄။ သုတ္တ။
ယခုခေတ်ကဲ့သို့ ပီပြင်သော၊ ထင်ရှားသော အသွင်တော်များကို မဆိုထားဘိ၊ သာသနာကွယ်ခါနီးတွင် နားရွက်၊ လည်ပင်း၌ သင်္ကန်းစကလေး ချည်ထားသော ပုဂ္ဂိုလ်ကိုပင် ရဟန်းသံဃာအမှတ် လှူဒါန်းလျှင် သံဃိက အကျိုးတရားများ ရနိုင်ပါသေး၏။ ထိုက်ထိုက်တန်တန် ရှိခိုးပူဇော်ကြရန် ဖြစ်ပါသည်။
********************************************************************************

(မေး) (တရားစီရင်မှု)
အရှင်ဘုရား၊ တပည့်တော်သည် တရားသူကြီးအလုပ်ကို ၀ါသနာပါပါသည်။ တရားဥပဒေအရ တရားစီရင်ခြင်းကို ဘာသာရေးရှုထောင့်က ကြည့်လျှင် အပြစ်လွတ်-မလွတ် သိချင်ပါသည်ဘုရား။
(မီမီပြုံး-ရန်ကုန်)

(ဖြေ)
တရားသူကြီးအလုပ်သည် တရားမျှတအောင်လုပ်ဖို့ အလွန်အရေးကြီးပါသည်။
ဆန္ဒာဂတိ=ချစ်ခင် ကျွမ်းဝင် ရင်းနှီး၍ မမှန်မကန် အဂတိလိုက်မိခြင်း။
ဒေါသာဂတိ=မုန်း၍ မကျေမနပ် မနှစ်သက်၍ မမှန်မကန် အဂတိလိုက်မိခြင်း။
မောဟာဂတိ=အမှုသွား အမှုလာ သေချကျန မဆန်းစစ် မသိရှိဘဲ အမှားကို အမှန်ထင်၊ အမှန်ကို အမှားထင်ကာ မမှန်မကန် အဂတိလိုက်မိတတ်ခြင်း။
ဘယာဂတိ=စည်းစိမ်အား၊ ဓနအား၊ ရာထူးဌာနန္တရအား၊ အာဏာအား၊ အမျိုးမျိုးတို့ကို အကြောင်းပြု၍ အမှားကိုအမှန်၊ အမှန်ကို အမှားအဖြစ် အဂတိလိုက်မိခြင်း။ ထိုသို့ဆုံးဖြတ်ခဲ့လျှင် ကြီးလေးသောအပြစ်များ ဖြစ်နိုင်ပါသည်။

သို့သော် ပိဋကတ်စာပေများတွင် အဂတိ ၄-ပါး မလိုက်စားဘဲ တရားသဖြင့် ဆုံးဖြတ်၍ သတ္တ၀ါအများကို ချမ်းသာအောင် စောင့်ရှောက်ခဲ့သော မင်း၊ အမတ်၊ ပုဏ္ဏား၊ ပရိဗိုဇ်တို့ အများအပြားပင် ရှိပါသည်။
မဟာဗောဓိ ပရိဗိုဇ်၊ မဟာဗန္ဓုလစစ်သူကြီးတို့မှာ အဂတိတရား မလိုက်စားဘဲ တရားဆုံးဖြတ်ကြသဖြင့် တိုင်းသူပြည်သားတို့ ဘေးကင်းကွာ ချမ်းသာ၍ ချစ်ခင်ကြည်ညိုလေးစား ခံခဲ့ရသည်။
********************************************************************************

(မေး) (သရဏဂုံ ညစ်နွမ်းမှု)
အရှင်ဘုရား၊ သရဏဂုံတည်သော ဗုဒ္ဓဘာသာဝင်တို့သည် အကြောင်းအမျိုးမျိုးကြောင့် ကျေးဇူးရှိဖူးသော ကျေးဇူးရှင်များ ဖြစ်သော အခြားဘာသာခြားများကို ဂါရ၀ပြု၍ ရှိခိုးပါက ရှိခိုးသူ၊ ရှိခိုးခံသူတို့ အပြစ်ရှိ-မရှိ။ ရှိခိုးသော ဗုဒ္ဓဘာသာဝင်အဖို့ သရဏဂုံညစ်နွမ်းမှု ရှိ-မရှိ။ ရှိခိုးသင့်-မသင့် သိလိုပါသည်ဘုရား။
(မောင်သန်းဇော်ဦး-အုတ်ကျင်း)

(ဖြေ)
သရဏဂုံယူပြီး၊ ရပြီး၊ တည်ပြီးသော အမျိုးကောင်းသား အမျိုးကောင်းသမီး ဥပါသကာ ဥပါသိကာမတို့သည် ကျေးဇူးရှင်ဖြစ်ဖူးသော ဘာသာခြားတို့အား ရှိခိုး (ဂါရ၀ပြု) သော်လည်း သရဏဂုံ ညှိုးနွမ်းမှု၊ ပျက်ယွင်းမှု မရှိပါ။

၎င်းကို သီလက္ခန္ဓ၀ဂ္ဂ၊ ဒီဃနိကာယ်၊ သာမညဖလသုတ်၊ အဋ္ဌကထာ သရဏဂမနကထာ စာမျက်နှာ ၂၀၇-တွင် ပါရှိသည်။ ဤတွင် ဧ၀ံ ဂဟတိသရဏဿ စ ဥပါသကာ ၀ါ ဥပါသိကာယ ၀ါ အညတိတ္ထိယေသု၊ ပဗ္ဗဇိတမ္ပိ ဉာတိံ ဉာတကော မေ အယ,န္တိ ၀န္ဒတော သရဏဂမနံ န ဘိဇ္ဇတိ၊ ပဂေ၀၊ အပဗ္ဗဇိတံ။ တထာ ရာဇာနံ ဘယ၀သေန ၀န္ဒတော။ သောဟိ ရဋ္ဌပူဇိ တတ္တာ အ၀န္ဒိယမာနော အနတ္ထမ္ပိ ကရေယျာတိ။ တထာ ယံကိဉ္စိ သိပ္ပံ သိက္ခာပကံ တိတ္တိယမ္ပိ-အာစရိ ယော မေ အယ,န္တိ ၀န္ဒတောပိ န ဘိဇ္ဇတိ-ဟူ၍ ဖော်ပြထားသည်။

အကျဉ်းချုပ် မြန်မာပြန်ရလျှင် -သရဏဂုံ ယူပြီးသော ဥပါသကာ ဥပါသိကာမတို့သည် တိတ္တ္ထိတို့ထံ၌ ရဟန်းပြုပြီးသော ဆွေမျိုးကို ဆွေမျိုးအမှတ်ဖြင့် ရှိခိုးသော်လည်း သရဏဂုံ မပျက်ပါ။ တိတ္ထိရဟန်းမဟုတ်သောသူကို ရှိခိုးလျှင် ပို၍ မပျက်ပါ။ မင်းကို ကြောက်၍လည်းကောင်း၊ ရှိမခိုးလျှင် အကျိုးမဲ့ပြုမည်ကို ကြောက်၍လည်းကောင်း၊ ရှိခိုးသော်လည်း သရဏဂုံ မပျက်ပါ။ အတတ်သင်ပေးသော၊ ကျေးဇူးရှိသော တိတ္ထိ အယူရှိသူများကိုလည်း ဆရာဟူသောအမှတ်၊ ကျေးဇူးရှင်ဟူသောအမှတ်ဖြင့် ရှိခိုးသော်လည်း သရဏဂုံ မပျက်ပါ။
********************************************************************************

(မေး) (သေခြင်းတရား ဆင်ခြင်မှုနှင့် လက္ခဏာရေးသုံးပါး ဆင်ခြင်မှု)
အရှင်ဘုရား၊ သေခြင်းတရားကို နေ့စဉ်နှင့်အမျှ ဆင်ခြင်သောသူအား နိဗ္ဗာန်၏ အထောက်အပံ့ ဖြစ်ပါသလားဘုရား။
(၂) အနိစ္စ၊ ဒုက္ခ၊ အနတ္တ အမြဲမရှိ်ဟု လက္ခဏာရေးသုံးပါးကို အမြဲဆင်ခြင်သောသူအား နိဗ္ဗာန်၏ အထောက်အပံ့ ဖြစ်ပါသလားဘုရား။
(အောင်အေးမင်းထိုက်၊ ဆိပ်သာရွာ၊ ဟင်္သာတမြို့နယ်)

(ဖြေ)
သေခြင်းတရားကို ဆင်ခြင်သောသူအား နိဗ္ဗာန်၏ အထောက်အပံ့ ဖြစ်ပါသည်။ အင်္ဂုတ္တိုရ် ပါဠိတော် ဒု-အုပ် နှာ-၆၅၊ အဘိဏှပစ္စဝေက္ခိတဗ္ဗဃာနသုတ်၌ သဗ္ဗေ သတ္တာ မရဏဓမ္မာ၊ မရဏံ အနတီတာတိ တဿ တံ ဌာနံ အဘိဏှံ ပစ္စဝေက္ခတော မဂ္ဂေါ သဉ္ဇာယတိ သော တံ မဂ္ဂံ အာသေ၀တိ၊ ဘာဝေတိ၊ ဗဟုလီကရောတိ။ တဿ တံ မဂ္ဂံ အာသေ၀တော ဘာဝယတော ဗဟုလီကရောတော သံယောဇနာနိ သဗ္ဗသော ပဟီယန္တိ အနုသယာ ဗျန္တီ ဟောန္တိ-ဟူ၍ ပါရှိသည်။

ထိုသေခြင်းအကြောင်းကို မပြတ်ဆင်ခြင်သော ထိုသူအား မဂ်သည် ကောင်းစွာဖြစ်ပေါ်လာ၏။ ထိုမဂ်ကို မှီဝဲ၏။ ပွားများ၏။ ကြိမ်ဖန်များစွာ ပြု၏။ ထိုမဂ်ကို မှီဝဲပွားများ ကြိမ်ဖန်များစွာပြုသော ထိုသူအား သံယောဇဉ်တို့သည် အချင်းခပ်သိမ်း ပျောက်ငြိမ်းကုန်၏။ အစဉ်ကိန်းနေသော အနုသယတို့သည် ကင်းပြတ်ကုန်၏-ဟူ၍ ဆိုလိုသည်။

ဝိသုဒ္ဓ်မဂ်မှာလည်း မရဏဿတိ ပွားသူသည်-
(၁) မေ့လျော့ခြင်း ကင်း၏။
(၂) ဘုံသုံးပါးမှ ထွက်လိုသော သညာ ရလွယ်၏။
(၃) အသက်ခန္ဓာ တွယ်တာခြင်း ကင်း၏။
(၄) မကောင်းမှုကို ကဲ့ရဲ့နိုင်၏။
(၅) ပစ္စည်းမသို။
(၆) ကျောင်းသင်္ကန်းစသော ပရိက္ခရာ၌ ၀န်မတို။
(၇) အနိစ္စသညာ အလေ့အလာရ၏။
(၈) ဒုက္ခ ထင်လွယ်၏။
(၉) အနတ္တ မြင်လွယ်၏။
(၁၀) မကြောက်မရွံ့ မတွေမဝေ ကောင်းသောနိမိတ်ထင်၍ အသေလှ၏။
(၁၁) မျက်မှောက်ဘ၀တွင် အသေကင်းသော နိဗ္ဗာန်ကို ရနိုင်၏။
(၁၂) မရလျှင် သုဂတိသာ လားရာရှိ၏။ ဟူ၍ ဆိုထားပါသည်။

အနိစ္စ၊ ဒုက္ခ၊ အနတ္တ လက္ခဏာရေး ၃-ပါး ဆင်ခြင်နိုင်လျှင် ၀ိပဿနာ သမ္မာဒိဋ္ဌိဉာဏ် အမြင်ရ၍ နိဗ္ဗာန်၏ အထောက်အပံ့ ဖြစ်ပါသည်။
********************************************************************************

(မေး) (ဆုတောင်းခြင်း)
အရှင်ဘုရား၊ တပည့်တော်သည် နောင်ဘ၀၌ လူဖြစ်ခြင်း၊ ယောက်ျားဖြစ်ခြင်း၊ ဘုန်းတန်ခိုးကြီးခြင်း၊ အသံသာယာခြင်း၊ အဆင်းလှခြင်း၊ မည်သူနှင့်မှ မတူ ထူးချွန်ကျော်ကြားခြင်း၊ ကျန်းမာချမ်းသာခြင်း၊ နောင်အခါ ပွင့်တော်မူမည့် မြတ်စွာဘုရားအား ဖူးမြော်ကန်တော့ရပါလို၏။ အလှူရေစက် လက်နှင့်မကွာ လှူဒါန်းရပါ လို၏-ဟု ဆုတောင်းပါသည်ဘုရား။
ဆုတောင်း ပြည့်-မပြည့်၊ ဆုတောင်းပြည့်အောင် မည်သို့များပြုလုပ်ရပါမည်ကို အရှင်ဘုရား ဖြေကြားပေးတော်မူပါဘုရား။
(အောင်ဇော်မင်း-ကျိုက်ထိုမြို့)

(ဖြေ)
မောင်အောင်ဇော်မင်း၏ မေးခွန်းကို ခြုံငုံ၍ ဖြေလိုက်ပါမည်။ ဆုတောင်းရုံသက်သက်ဖြင့် ဆုတောင်းမပြည့်နိုင်ပါ။

ယဿ ပဉ္စဓမ္မာ အတ္ထိ၊ န ပတ္ထနာ၊ တဿ ဂတိ အနိဗဒ္ဓါ၊ ယဿ ပတ္ထနာ အတ္ထိ၊ န ပဉ္စ ဓမ္မာ တဿာပိ ဂတိ အနိဗဒ္ဓါ၊ ယေသံ ဥဘယံ အတ္ထိ၊ တေသံ ဂတိ နိဗဒ္ဓါ။(ဥပရိပဏ္ဏာသ အဋ္ဌကထာ)

သဒ္ဓါ၊ သီလ၊ သုတ၊ စာဂ။ ပညာ တရား ၅-မျိုး ပြည့်စုံမှ ဆုလည်းတောင်းမှ ရောက်လို ဖြစ်လိုသည့် ဂတိ မြဲကြောင်း ဆိုပါသည်။
နိဓိကဏ္ဍသုတ္တန်တွင်လည်း - ဧသ ဒေ၀မနုဿာနံ၊ သဗ္ဗကာမ ဒဒေါ နိဓိ။
ယံ ယဒေ၀ါဘိပတ္ထေန္တိ၊ သဗ္ဗမေတေန လဗ္ဘတိ။
သုဝဏ္ဏတာ သုသရတာ၊ သုသဏ္ဌာနာ သုရုပတာ။
အာဓိပစ္စ ပရိဝါရော၊ သဗ္ဗမေတေန လဗ္ဘတိ။ ဟု ဆိုထားသည်။

သဒ္ဓါ၊ သီလ၊ သမာဓိ၊ ပညာ တရားများနှင့်ပြည့်စုံလျှင် တောင့်တသမျှ အလိုရှိတိုင်း ပြည့်စုံသည့်အပြင် အဆင်းလှခြင်း၊ အသံကောင်းခြင်း၊ ပုံပန်းသဏ္ဌာန် တင့်တယ်ခြင်း၊ ကြွင်းသော ကိုယ်ရေတင့်တယ်လှပခြင်း၊ အစိုးရခြင်း၊ အခြံအရံများခြင်း အမျိုးမျိုး ရရှိနိုင်ပါသည်။

(မြတ်မင်္ဂလာ ၂၀၀၃-ခု စက်တင်ဘာလ)

No comments: