Monday, February 15, 2010

ပဋ္ဌာန်းတန်ခိုး

ကျွန်မသည် ပဋ္ဌာန်းပစ္စယနိဒ္ဒေသပါဠိကို နံနက်တိုင်း ၀တ်စဉ်တခုအနေနှင့် ယုံယုံကြည်ကြည် ရွတ်ဖတ်ပူဇော် ခဲ့သည်။ ထိုသို့ပူဇော်ခဲ့သည်မှာ ၄-နှစ်ကျော် သက်တမ်းသို့ ရောက်ရှိခဲ့ပြီဖြစ်သည်။ ဤကဲ့သို့ ပဋ္ဌာန်းပစ္စယ နိဒ္ဒေသကို ရွတ်ဖတ်ပူဇော်လာခဲ့သည့် သက်တမ်းအတွင်းမှာ ကျွန်မအတွက် ထူးခြားစွာ အကျိုးပေးမှုကလေးများ အမှတ်မထင် ရှိလာရာမှ သိသိသာသာ အမှတ်ထင်ထင်ရှိလာသည်ကို တွေ့လာရပါသည်။

ကျွန်မ၏ မိဘများမှာ စစ်ကိုင်းတိုင်း ဆားလင်းကြီးမြို့နယ် ကျားတက်ကျေးရွာမှ အထက်တန်းပြ ဆရာကြီး ဦးစိန်ရံနှင့် ဒေါ်ကြီး ဖြစ်ပါသည်။ ကျွန်မ၏ ဖခင်မှာ ကွယ်လွန်သွားပြီဖြစ်သည်။ ကျွန်မသည် သမီးအကြီးဆုံး ဖြစ်သည်။ ဘ၀ပေးအခြေအနေအရ မိဘများနှင့် နီးနီးကပ်ကပ် နေခွင့်မရပါ။ ကလေးမြို့ အထက (၁) တွင် အထက်တန်းပြ ဆရာမအဖြစ် အမှုထမ်းနေရသူဖြစ်ပါသည်။

တနေ့ ၁၉၉၉-ခုနှစ် ဇူလိုင်လ ၂၈-ရက်နေ့တွင် ညီမများထံမှ မိခင်ကြီး အ်ိမ်သာမှအဆင်း မူးလဲ၍ သတိလစ်သွားကြောင်း၊ ဘယ်တခြမ်း လေဖြတ်သွားကြောင်း ဒေါက်တာကလည်း အဝေးရောက် သား-သမီးများကို လှမ်းအကြောင်းကြားရန် ပြောကြောင်း စသည်ဖြင့် တယ်လီဖုန်း လာပါသည်။

သို့ဖြစ်၍ ၃၀-၇-၉၉ နေ့တွင် ကျွန်မသည် ခင်ပွန်းဖြစ်သူနှင့်အတူ ကလေးမြို့မှ မန္တလေးသို့ လေယာဉ်ဖြင့် ထွက်ခွာခဲ့ကြပါသည်။ မန္တလေးမှ မုံရွာသို့ ကားဖြင့် ဆက်ထွက်ခဲ့ကြသည်။ တဖန် ချင်းတွင်းမြစ်ကို စက်လှေဖြင့် ဖြတ်ကာ ကားငှါးပြီး ကျားတက်ကို နေ့ချင်းအရောက် သွားပါသည်။

ကျွန်မသည် ရောက်လျှင်ရောက်ချင်း ကားပေါ်မှဆင်းကာ မိခင်ရှိရာ အိမ်ထဲသို့ အပြေးတပိုင်း ၀င်ခဲ့ပါသည်။ ညီမဖြစ်သူများက ကျွန်မ စိတ်မပူစေရန်အတွက် မိခင်သက်သာလာပြီ ဖြစ်ကြောင်း ဖေးမပြောဆိုပြီး မိခင်ရှိရာသို့ တွဲခေါ်သွားကြပါသည်။

ကျွန်မ၏မိခင်မှာ သတိရလာပြီဖြစ်သည်။ သို့သော်လည်း ဆီးပိုက်၊ နှာခေါင်းပိုက်များ တန်းလန်းဖြင့် ပက်လက်အနေအထားမှာ ရှိနေပါသည်။ ကျွန်မတို့ပြောဆိုတာကို သိသော်လည်း စကားလုံးဝ မပြောနိုင်ပါ။ ဘယ်ဘက်တခြမ်းမှာ မလှုပ်နိုင်ပါ။

မိခင်ကြီးကို မောင်ညီမတတွေ ၀ိုင်းဝန်းပြုစုသည့်ကြားမှ မိခင်ကြီးမှာ သက်သာလာသည် မရှိပါ။ ၀မ်းက မကြာမကြာ ဖောက်လာတတ်ပါသည်။ တခါတရံ ဆီးပိုက်မှလည်း သွေးများပါလာတတ်ပါသည်။ ဆရာဝန်ကို အကြိမ်ကြိမ်သွားခေါ်ရပါသည်။ ဤသို့ဖြင့် မိခင်ဖြစ်သူသည် ၀မ်းကဖောက်လိုက်၊ ဆီးကဖောက်လိုက် ဖြစ်နေ၍ ကျွန်မတို့တတွေမှာ အလွန်အားငယ်ပြီး မျက်ရည်စက်လက်ဖြင့် ကုသနေကြရပါသည်။

ကျွန်မသည် ရောက်သည့်နေ့မှစ၍ နံနက် ၄-နာရီထိုးပြီးတိုင်း မိခင်အနီးတွင် မိမိရွတ်ဖတ်နေကျဖြစ်သော ပဋ္ဌာန်းပစ္စယနိဒ္ဒေသကို နာရီဝက်ခန့် ရွတ်ဖတ်ပူဇော်ပါသည်။ ပဋ္ဌာန်းရွတ်ဖတ်ပူဇော်ပြီးတိုင်း-ကျွန်ုပ်သည် မြတ်စွာဘုရားအား ပဋ္ဌာန်းဖြင့် နေ့စဉ်ဝတ်မပျက် ရွတ်ဖတ်ပူဇော်လျက် ရှိပါသည်။ ဤမှန်ကန်သော သစ္စာစကားကြောင့် ကျွန်ုပ်၏ မိခင်ကြီးတွင် စွဲကပ်နေသော ရောဂါဝေဒနာများသည် ပိန်းကြာဖက်တွင် ရေမတင်သကဲ့သို့ ကင်းစင်လွင့်ပျောက်ပါစေသတည်း-ဟု အမြဲ သစ္စာဆိုပါသည်။

ဤသို့ဖြင့် မိခင်ကြီး၏ ရောဂါအခြေအနေမှာ တိုးလည်းမတိုး၊ လျော့လည်းမလျော့ဖြင့် တန့်နေပါသည်။ ရောဂါက တန့်နေသော်လည်း-နေ့လား ညလား-ဟူသော သံသယစိတ်ဖြင့် ပူပင်သောက ဗျာပါဒတွေ များနေရဆဲပင် ဖြစ်ပါသည်။ သို့သော် ရက်ကြာလာပြီဖြစ်၍ ၀န်ထမ်းဖြစ်နေသော ကျွန်မမှာ မိခင်ကြီးအနားတွင် ကြာကြာ မနေနိုင်ပါ။ ကျွန်မခွင့်ရက်စေ့ပြီဖြစ်၍ မောင်ညီမများနှင့် ညှိနှိုင်းရပါတော့သည်။ ပြည်မြို့မှာ အထက်တန်းပြ အဖြစ် တာဝန်ကျနေသော ညီမဖြစ်သူ မသန်းဆွေက လစာမဲ့ခွင့်ယူပြီး ကျန် မောင်ညီမများနှင့် ပြုစုနေရစ်ပါမည် ပြော၍ ကျွန်မ ကလေးမြို့သို့ ပြန်ရန် ဆုံးဖြတ်ချက် ချနိုင်ခဲ့ပါသည်။

သို့အတွက် ကျွန်မမှာ မိခင်ကြီးကို စိတ်မချတချဖြင့် ကလေးမြို့သို့ ပြန်လာခဲ့ရပါသည်။ ကျွန်မသည် ကျောင်းတက်နေရသော်လည်း စိတ် ပျော်ရွှင်မှု မရှိပါ။ မိခင်အတွက် သောကမီး တောက်လောင်နေပါသည်။
နံနက်တိုင်း သစ္စာပြု၍ ပဋ္ဌာန်းကို မပြတ်ရွတ်ဖတ်ပူဇော်ပါသည်။ ဤသို့ဖြင့် မိခင်၏ သတင်းကို ရင်တထိတ်ထိတ် စောင့်စားရင်း နေလာရာမှ တနေ့တွင် သတင်းထူး သတင်းကောင်း ကြားရပါသည်။ မိခင်ဖြစ်သူသည် နှာခေါင်းပိုက်နှင့် ဆီးပိုက်များ ဖြုတ်ပြီး စကားပြောနိုင် လမ်းလျှောက်လာနိုင်ပြီဖြစ်ကြောင်း ၀မ်းသာစရာသတင်း ကြားသိလာရပါသည်။ မောင်ညီမများ ခြံရံ၍ ကထိန်သင်္ကန်းကပ်လှူနေသော မိခင်ကြီး၏ ဓာတ်ပုံကိုလည်း ကျွန်မထံ ပေးပို့လိုက်ကြပါသည်။

ကျွန်မကတော့ ဤကဲ့သို့ သေလုမျောပါးဖြစ်သွားသော မိခင်ကြီး အသက်ရှင် ကျန်းမာသွားသည်မှာ ကျွန်မ နေ့စဉ် ရွတ်ဖတ်ပူဇော်လျက်ရှိသော ပဋ္ဌာန်း၏ တန်ခိုးနှင့် သစ္စာတန်ခိုးဟု ယုံကြည်ယူဆမိပါသည်။

(ဒေါ်ခင်ဆွေ-အ-ထ-က၊ ကလေးမြို့)
(မြတ်မင်္ဂလာ ၂၀၀၂-ခု ဇွန်လ)

No comments: