Monday, February 8, 2010

ဘာသာရေး ပြဿနာ (၂)

( ဘဒ္ဒန္တ ၀ါယမသာရ ဖြေသည် )

(မေး) (ဥပုသ်မစောင့်မီ နံ့သာ သနပ်ခါး လိမ်းခြင်း)
အရှင်ဘုရား၊ ဥပုသ်သီတင်းသည်များ ကျောင်းသို့လာရာတွင် နံ့သာသနပ်ခါးများ လိမ်းလာကြပါသည်။ သီလဆောက်တည်ပြီးသောအခါ ယင်းနံ့သာသနပ်ခါးများကြောင့် သီလပျက်နိုင်-မပျက်နိုင် သိလိုပါသည်ဘုရား။
(ရှင်ဝိစိနန္တ-မော်ကျွန်း)

(ဖြေ)
သီတင်းသီလ မဆောက်တည်မီ၊ နံ့သာသနပ်ခါးများ လိမ်းကျံခြင်းကြောင့် သီလဆောက်တည်ပြီးသောအခါ သီလမပျက်နိုင်ပါ။
သုတ်မဟာဝါ ပဒါနသုတ် အဋ္ဌကထာလာ မယ်တော်မာယာ ဥပုသ်စောင့်ခန်း၌ ဘုရားလောင်း ပဋိသန္ဓေယူအံ့သောနေ့၌ အလုံးစုံသော တန်ဆာတို့ဖြင့် တန်ဆာဆင်လျက် နံ့သာရေချိုး၍ မယ်တော်မာယာ ဥပုသ်စောင့်သုံးကြောင်း-လာ၏။

ဝိဓူရဇာတ် အဋ္ဌကထာ၌-လည်၌ ပတ္တမြား တန်ဆာဆင်လျက် ၀ရုဏနဂါးမင်း ဥပုသ်စောင့်သုံးကြောင်း-လာ၏။
ဓမ္မပဒ အဋ္ဌကထာ ဆဗ္ဗီသတိမ၀ဂ်၌ -ဇောတိက သူဌေးသည် လက်ဆယ်ချောင်း၌ လက်စွပ်အကွင်း ၂၀-၀တ်၍ တန်ဆာဆင်လျက် ဥပုသ်စောင့်သုံးကြောင်း-လာ၏။
သုတ်မဟာဝါ သုဒဿနသုတ် အဋ္ဌကထာ၌လည်း-စကြာရောက်အံ့သောနေ့၌ နံ့သာရေ ၁၆-လုံးချိုး၍ မဟာသုဒဿန စကြာမင်း ဥပုသ်စောင့်သုံးကြောင်း -လာရှိသောကြောင့် ယခုကာလမှာလည်း မင်း၊ မိဖုရား၊ ကြွယ်ဝသောသူများကဲ့သို့ ဆင်မြဲ၊ လိမ်းမြဲသော အ၀တ်တန်ဆာ ဆီမွှေး စသည်ကို ဥပုသ်မဆောက်တည်မီ ၀တ်ဆင်လိမ်းကျံ၍ ဥပုသ်ခံယူကျင့်သုံးသော်လည်း ဥပုသ်မကျိုးမပျက်ဟု သိအပ်၏-ဟု (မိုင်းခိုင်ဆရာတော်၏ ၀ိကာလဘောဇနင်္ဂါဒိ ၀ိနိစ္ဆယကျမ်း) တွင် ဆုံးဖြတ်ထားသည့်အတိုင်း ဖော်ပြပါသည်။
********************************************************************************

(မေး) (မိခင်နို့ရည်)
အရှင်ဘုရား၊ လူ့ခန္ဓာကိုယ်အတွင်း လှည့်ပတ်နေသော သွေးသည် အမျိုးသမီး မိခင်များ၌ မိခင်မေတ္တာအဟုန်ကြောင့် အနီရောင်မှ အဖြူရောင်နို့ရည်အဖြစ် ပြောင်းလဲလာကြောင်း ရေးသားပြောဆိုသည်တို့ကို ဖတ်ရပါသည်။ ယင်းကိစ္စနှင့်ပတ်သက်၍ ဘုရားဟော ရှိ-မရှိနှင့် ရှိပါက မည်သည့်သုတ်တော်၌ ဟောကြားတော်မူကြောင်း ရှင်းလင်းဖြေကြားပေးတော်မူပါဘုရား။
(ဦးလှမြင့်-ရန်ကုန်)

(ဖြေ)
သွေးမှ နို့ရည်ဖြစ်ရသည်ဟူသော စကားကို ဘုရားဟောပိဋကတ် မူလပဏ္ဏာသ ပါဠိတော် မဟာတဏှာသင်္ခယ စာမျက်နှာ ၃၃၃-တွင် မာတာ န၀န္နံ ၀ါ ဒသန္နံ ၀ါ မာသာနံ အစ္စယေန ၀ိဇာယတိ။ မဟတာ သံသယေန ဂရုဘာရံ၊ တမေနံ ဇာတံ သမာနံ သကေန လောဟိတေန ပေါသေတိ၊ လောဟိတဥှေတံ ဘိက္ခဝေ အရိယဿ ၀ိနယေ၊ ယဒိဒံ မာတထညံ-ဟူ၍ ပါရှိသည်။
အနက်မှာ-အမိသည် ကိုးလဖြစ်စေ၊ ဆယ်လဖြစ်စေ လွန်သောအခါ၌ မိခင်ရော ကလေးပါ အသက်ရှင်မှ ရှင်ပါ့မလားဟု ကြီးစွာသော ယုံမှားသံသယဖြင့် လေးလံသော ကိုယ်ဝန်ကို ဖွားမြင်၏။ မွေးဖွားပြီးသော ထိုသူငယ်ကို မိမိသွေးဖြင့် မွေးမြူ၏။ ရဟန်းတို့ ဤအမိနို့ရည်သည် မြတ်စွာဘုရား၏ သာသနာတော်၌ သွေးမည်၏-ဟု ပါရှိသည်။

ထို့ပြင် ၄င်းအဋ္ဌကထာ ဒု-အုပ် နှာ ၂၁၀-၌လည်း လောဟိတဥှေတံ ဘိက္ခဝေ တဒါ ကိရ မာတုလောဟိတံ တံ ဌာနံ သမ္ပတ္တံ ပုတ္တသိနေဟေန ပဏ္ဍရံ ဟောတိ-ဟု ပါရှိသည်။
(သားသမီး၌ ချစ်ခြင်းမေတ္တာကြောင့် နို့အုံသို့ရောက်လာသော မိခင်၏ သွေးသည် ဖွေးဖွေးဖြူသော နို့ရည်အဖြစ်သို့ ရောက်ရသည်ဟုလည်း ပိဋကတ်တော်၌ အခိုင်အမာ ပါရှိပါသည်။
********************************************************************************

(မေး) (စာမေးပွဲ ခိုးချမှု)
အရှင်ဘုရား၊ စာမေးပွဲတွင် မသမာ (ခိုးချ) မှုဖြင့် ဖြေဆိုသော ရဟန်းအား ထိုစာမေးပွဲအောင်မြင်၍ ကပ်လှူသောဝတ္ထုငွေနှင့် အောင်လက်မှတ်ကို ခံယူပါက ပါရာဇိက ကျ-မကျ သိလိုပါသည်ဘုရား။ ထိုဝတ္ထုငွေ တန်ဖိုးမှာ ယခုကာလအားဖြင့် ထောင့်ခြောက်ရာမှ တသောင်းကျော်ထိ ဖြစ်ပါသည်။
(သောတုဇနများ-ပုသိမ်မြို့)
ကျောင်းသားတွေ စာမေးပွဲမှာ စားခိုးချတာ ဘာသာရေး ရှုထောင့်က ကြည့်လျှင် အပြစ်ရှိပါသလား၊ အချို့က သူတပါးပစ္စည်းခိုးတာ မဟုတ်လို့ အပြစ်မရှိဟု ဆိုကြပါတယ်။ ခိုးချဖို့ စာတွေ ရောင်းချသူတွေကော အပြစ်ရှိပါသလားဘုရား။
(ဆရာလင်း-ယော)

(ဖြေ)
စာမေးပွဲ ခိုးဖြေခြင်းနှင့် ပတ်သက်၍ ရဟန်းတော်များ ပါရာဇိက ကျ-မကျ ဆုံးဖြတ်ရာဝယ် စာအောင်ဆု တန်ဖိုးဖြင့် နှိုင်းယှဉ်ကြရာ တမတ် တမတ်ထိုက်သော တန်ဖိုးကို ခိုးယူလျှင် ပါရာဇိက ကျပေသည်။ ထိုတမတ်သည် ယခုခေတ်တမတ်ကို မယူရ။ ရွှေစင်တမတ်=ရွှေကဟာပဏ ရွှေငွေကြေးသုံးမျိုး ရောသော မိဿက ကဟာပဏကို ယူရမည်ဟု ၀ိနည်းအဋ္ဌကထာ၊ ဋီကာတို့၌ မိန့်ဆိုကြကုန်၏။

ဝိမတိဋီကာ၌ ရွှေစင်တမတ်ကို ယူ၍ ၀ိနစ္ဆယဋီကာနှင့် ရှေးသီဟိုဠ် (သီရိလင်္ကာ) ဆရာကြီးများက မိဿက ကဟာပဏကို ယူသည်။ ဤနှစ်မျိုးကိုသာ ရှေးကာလ၌ အယူများကြ၏။ ရွှေစင်တမတ်နှင့် မိဿက ကဟာပဏ တမတ်တန် ဆုငွေ၊ ၀တ္ထုပစ္စည်းကို အလှူခံလျှင် ပါရာဇိက ကျပေရာ၏။ ယခုခေတ် ရွှေတကျပ်သားသည် ၁-သိန်း ၈-သောင်းခန့် တန်ကြေးရှိရာ ရွှေတမတ်သားသည် ၄-သောင်းခွဲခန့် တန်ပေ၏။ သို့သော် တန်ဖိုးဆိုသည် အချိန်ကာလလိုက်၍ ပြောင်းလဲတတ်ပေရာ ဒုဗ္ဘိက္ခကာလ၌ -ဒုဗ္ဘိက္ခေ အာပဏိကဿ တိလမုဋ္ဌိ ထေယျစိတ္တော အ၀ဟရိ အာပတ္တိ တွံ ဘိက္ခု အာပန္နော ပါရာဇိက,န္တိ-အစရှိသော ၀ိနီတ၀တ္ထု (၀ိ-၁၊ ၈၁) ၌ ငတ်မွတ်ခေါင်းပါးချိန်၌ နှမ်းတဆုပ်သည်ပင် နီလကဟာပဏ တမတ်၊ ရွှေငါးရွေးမတန်ဟု မဆိုင်နိုင်ပေ။ အထူးဆင်ခြင်သင့်လှပေ၏။

ဤနေရာ၌ စာမေးပွဲဖြေဆိုခြင်းသည် လှူဖွယ်ဆု ရရှိခြင်းကို အဓိက မထားဘဲ ဂုဏ်လိုချင်မှု၊ ထင်ပေါ်ကျော်စောလိုမှုလောက်သာ ရည်မှန်း၍ ခိုးခြင်းဖြစ်လျှင် ခိုးခြင်းအင်္ဂါများနှင့် ထေယျစိတ္တပါ-မပါ ဆိုသည်ကိုကား ကာယကံရှင်များသာ သိနိုင်ပေလိမ့်မည်။

သို့သော် ရဟန်းတော်များသည် မိမိ၌ တကယ်မရှိသော ပရိယတ်ဂုဏ်များကို တကယ်ရှိသယောင် ဟန်ဆောင်ခြင်းမှာ သာဌေယျ=ကောက်ကျစ်မှု တမျိုးဖြစ်၍ ဥဇုကဂုဏ်၊ ဥဇုပ္ပဋိပန္နဂုဏ် ပျက်ယွင်းသောကြောင့် သူတော်ကောင်းရဟန်းကား မဖြစ်နိုင်။

လူပုဂ္ဂိုလ်များမှာလည်း ကာယုဇုကတာ၊ စိတ္တုဇုကတာ-ဟု ကိုယ်ရောစိတ်ပါ။
မာယာ+သာဌေယျ=မနှော ဖြောင့်မတ်ရမည်ဟု ဆိုပါသည်။
သို့မှသာ သောဘန=တင့်တယ်သော လူမွန်လူမြတ် ဖြစ်ပေမည်။
မရှိသော အရည်အချင်းဖြင့် ရှိဟန်ဆောင်ကာ ကြွားဝါဂုဏ်ယူခြင်းသည် ကောက်ကျစ်မှု=သာဌေယျသဘော ဖြစ်၍ သူတော်ကောင်း ပုဂ္ဂိုလ်ကား မဖြစ်နိုင်။

ထို့ပြင် အမှန်တကယ် အတတ်မသိသော ပညာဘွဲ့ ဒီဂရီများဖြင့် မိမိအကျိုး၊ အများအကျိုး၊ သာသနာအကျိုးကို ဆောင်ရွက်နိုင်လိမ့်မည်မဟုတ်သည့် အပြင် သိသင့်သိထိုက်သော အခြေခံသင်ရိုးများ မကျေညက် မသိရှိသည့်အတွက် အထက်အထက် စာပေပညာများကို ဆင်လက်သင်ကြားရန် နားမလည်တော့ပေ။ မိမိ၏ ပညာရေးခရီးနှင့် အရာရာ တိုးတက်မှုကို မိမိကိုယ်တိုင်ပင် ဖျက်ဆီးရာရောက်ပေ၏။ ထို့ကြောင့် ရဟန်းသူတော်ကောင်း၊ လူသူတော်ကောင်းတို့၏ အပြုအမူလည်း မဟုတ်။ မိမိ၏ ပညာရေးခရီးကို ချိုးဖဲ့ဖျက်ဆီးရာလည်း ရောက်သော စာမေးပွဲ ခိုးချဖြေဆိုခြင်းကို ရဟန်းပုဂ္ဂိုလ် လူပုဂ္ဂိုလ်များ အထူးရှောင်ရှား သင့်ကြပေသည်။

ခိုးစာ (ခိုးကူးဖို့ရန် စာ) ရောင်းသူများသည် လှပမွှေးကြိုင်ပြီး တန်ဖိုးရှိစွာ ပွင့်လန်းလာမည့် ကျောင်းသူ-ကျောင်းသားများ၊ ရှင်ရဟန်းများ၏ မြင့်မြတ်သန့်စင်သော ဘ၀ပန်းကလေးများကို ဖျက်ဆီးသူအဖြစ်လည်းကောင်း၊ တိုင်းပြည်နှင့် အမျိုးဘာသာ၊ သာသနာကို ဖျက်ဆီးသူအဖြစ်လည်းကောင်း၊ လောကကို အကျည်းတန် အရုပ်ဆိုးအောင်၊ လောကကို ပျက်စီးအောင်လုပ်သူများ အဖြစ်လည်းကောင် ပြုရာကျသည်။ သံသရာတွင် အပြစ်ကြီးလေးလှပေသည်။
*********************************************************************************

(မေး) (ဟောတု-ဟောမိနှင့် သောတာပန်အကြောင်း)
အရှင်ဘုရား၊ တပည့်တော်သည် သံဃာတော်များအား ဆွမ်းလောင်းသည့်အခါ နိဗ္ဗာနဿ ပစ္စယော ဟောတု-ဟု ဆိုရမည်လား။ နိဗ္ဗာနဿ ပစ္စယော ဟောမိ-ဟု ဆိုရမည်လားဘုရား။
သောတာပတ္တိမဂ် ရောက်သောပုဂ္ဂိုလ်သည် လူ့ပြည်၊ နတ်ပြည်၌ အလွန်ဆုံး ခုနစ်ဘ၀သာ နေပြီး ပရိနိဗ္ဗာန်ပြုသည်ဟု ဆိုပါသည်။ အကယ်၍ လူ့ပြည်မှာ လူပြန်ဖြစ်လျှင် ဤပုဂ္ဂိုလ်သည် သောတာပန်ဖြစ်ပြီး သဖြင့် မွေးစဉ်ကတည်းက သောတာပန်ဖြစ်နေသည်ဟု ယူဆရပါမည်ဘုရား။ မှန်-မမှန် ဖြေကြားပေးပါရန် ရိုသေစွာ လျှောက်ထားပါသည်။
(ဦးဖိုးလှဝင်း-ရန်ကုန်)

(ဖြေ)
သံဃာတော်များအား ဆွမ်းလောင်းသည့်အခါ နိဗ္ဗာနဿ ပစ္စယော ဟောတု-ဟုဆိုရပါမည်။ နိဗ္ဗာနဿ ပစ္စယော ဟောမိ-ဟု မဆိုရပါ။
ပါဠိသဒ္ဒါတွင် အာဏတ္တျာသိဋ္ဌေ ဒုတ္တကာလေ ပဉ္စမီ-ဟူသော သုတ်ဖြင့် တု-၀ိဘတ်သည် အာဏာပေးခြင်း၊ တောင့်တခြင်း၊ ခွင့်ပြုခြင်း အနက်တို့ကို ဟော၍ နိဗ္ဗာန်ကို တောင့်တသောအရာ၌ ပဉ္စမီ တု-၀ိဘတ်ဖြင့် ဆိုရပါမည်။ ပစ္စုပ္ပန် ၀တ္တမာန် မိ-၀ိဘတ်ဖြင့် မဆိုရပါ။

လူ့ပြည်မှာ မွေးကတည်းက သောတာပန်ဖြစ်နေသောပုဂ္ဂိုလ်ကို ပြဆိုရာ၌ အင်္ဂုတ္တရအဋ္ဌကထာ၊ ပဉ္စကနိပါတ်၊ သုမနသုတ္တန်တွင် ကဿပဘုရားရှင်လက်ထက် သာရဏီယ၀တ် ဖြည့်ကျင့်သော ရဟန်းနှင့် မဖြည့်ကျင့်သော ရဟန်း ၂-ပါးတို့ သောတာပန်ဖြစ်ကြသည်။ ထို့နောက် ဂေါတမမြတ်စွာဘုရားရှင် လက်ထက်မှာ သာရဏီယ၀တ် ဖြည့်ကျင့်သောရဟန်းက ကောသလမင်းကြီး၏ သားတော် လာဖြစ်ပြီး တပါးက အထိန်းတော်၏သား လာဖြစ်ကြသည်။

ထိုနှစ်ဦးကို သောတာပန်အဖြစ် မွေးလာသည်ဟု ဘုရားရှင်ဟောတော်မူသော ဧ၀ံ ဒဿနသမ္ပန္နော၊ သမ္မာသမ္ဗုဒ္ဓသာဝကော-ကို အဋ္ဌကထာဆရာက ဒဿန သမ္ပန္နောတိ-သောတာပန္နော-ဟု ဖွင့်ဆိုသည်ကို ထောက်၍ သိရသည်။

သိကြားမင်းကြီးသည် သက္ကပဥှသုတ်အဆိုအရ လူ့ပြည်တွင် ပဋိသန္ဓေတည်ရဦးမည်ဟု ဆိုသဖြင့် သောတာပန်ဖြစ်သော သိကြားမင်းကြီးလည်း လူ့ပြည်တွင် သောတာပန်အဖြစ်ဖြင့် မွေးဖွားပါလိမ့်ဦးမည်။

(ပညာဝီမံသန ကထာကို မှီး၍ တည်တောဆရာတော်ကြီး ဖြေဆိုထားသည်ကို ကောက်နုတ်တင်ပြခြင်း ဖြစ်ပါသည်။ အကျယ်ကို ၄င်းကျမ်းများတွင် ကြည့်ပါလေ။

( မြတ်မင်္ဂလာ ၂၀၀၃-ခု အောက်တိုဘာလ)

No comments: