လွန်ခဲ့သော ၅၈-နှစ်ခန့် ဒုတိယကမ္ဘာစစ်ကြီးအတွင်းက ဖြစ်သည်။ မြန်မာနိုင်ငံကို ဂျပန်စစ်တပ်များ ၀င်ရောက်သိမ်းပိုက်ပြီးစ အချိန်လည်း ဖြစ်သည်။ ကျွန်မ၏ ဖခင်မှာ သစ်တောအရေးပိုင်အဖြစ် အင်္ဂလိပ်အစိုးရ လက်အောက်တွင် အမှုထမ်းခဲ့သူဖြစ်သည်။ ထိုအချိန်က ကျွန်မတို့မှာ မော်လိုက်မြို့တွင် ရှိသည်။ အင်္ဂလိပ်များ ဆုတ်ခွါသွားသဖြင့် ဖခင်အပါအ၀င် အမှုထမ်းများသည် မော်လိုက်မြို့မှ မိမိတို့ နေရပ်ဌာနများသို့ ပြန်ခဲ့ကြသည်။ ထိုအချိန်၌ သင်္ဘောများ မရှိတော့သဖြင့် လှေကြီးများဖြင့်လည်းကောင်း၊ ၀ါးဖောင်များဖြင့်လည်းကောင်း မိသားစုများကို တင်ဆောင်ကာ ချင်းတွင်းမြစ်တလျှောက် စုန်ဆင်းလာခဲ့ကြသည်။
ဤသို့ စုန်ဆင်းလာရာမှ လမ်းခရီး၌ ကလေးဝမြို့နားအရောက်တွင် ကျွန်မတို့ စီးနင်းလာသော လှေကြီးပေါ်သို့ အရိပ်မည်းကြီးတခု ထိုးကျလာသည်။ တဆက်တည်းပင် လေယာဉ်ပျံသံများ ဆူညံစွာ ပေါ်ထွက်လာသည်။ ထိုလေယာဉ်ပျံများမှာ အင်္ဂလိပ်လေတပ်မှ ဖြစ်သည်။ သူတို့သည် ကလေးဝဆိပ်ကမ်းရှိ ဂျပန်စစ်တပ်များနှင့် ချင်းတွင်းမြစ်ရိုးတလျှောက် စုန်ဆင်းလာသော လှေကြီးများကို စက်သေနတ်များဖြင့် မရပ်မနား ပစ်ခတ်ပါလေတော့သည်။
ကျွန်မတို့ မိသားစု စီးလာသော လှေကြီးမှာ မြစ်လယ်ရေလယ်ခေါင်တွင် ရောက်ရှိနေပြီး စက်သေနတ်ပစ်ကွင်းထဲ ရောက်နေသလို ဖြစ်နေသည်။ ကျွန်မတို့မိသားစုနှင့် လှေသမားများမှာ ဘာမှမတတ်နိုင်။ ဘုရားကိုသာ အာရုံပြု၍ ၀ပ်နေကြရပါသည်။
ထိုအခါ လှေကြီးမှာ ရေစီးတွင် မျောချင်ရာ မျောနေပါတော့သည်။ ၁-နာရီခန့်ကြာ၍ စက်သေနတ်သံများ လေယာဉ်ပျံသံများ တိတ်ဆိတ်သွားတော့မှ ကျွန်မတို့သည် တယောက်ကိုတယောက် ခေါ်ကြ၊ အော်ကြနှင့် ရှိကြပါသည်။
ကျွန်မသည် နာရီကြည့်လိုက်ရာ ညနေ ၃-နာရီထိုးနေပါပြီ။ အဖေ့ကိုမတွေ့၍ ရှာကြည့် ခေါ်ကြည့်လိုက်မှ လှေဦးမှာထိုင်လျက် တည်ငြိမ်စွာဖြင့် ဘုရားရှိခိုးနေသည်ကို တွေ့ရပါသည်။ ကျွန်မတို့ စီးလာသော လှေကြီးမှာလည်း မျောချင်ရာ မျောနေခဲ့ရာမှ ချင်းတွင်းမြစ်ထဲသို့ စီးဝင်နေသော ချောင်းငယ်လေးတခုထဲသို့ ထိုးဝင်ပြီး သောင်ပြင်ပေါ်တွင် တင်နေသည်ကို တွေ့ရသည်။ ထိုနေရာသို့ လှေရောက်ရှိနေသဖြင့် ဘေးနှစ်ဘက်က တောင်ပါးယံကြီးနှစ်ခုက ကာထားသလိုလည်း ထူးခြားစွာ တွေ့ရပါသည်။
နောက်မှသိရသည်မှာ ဖခင်သည် ကျွန်မတို့ကဲ့သို့ ကြောက်လန့်တကြား ပုန်းအောင်းဝပ်နေသည် မဟုတ်။ လေဦးတွင် တည်ငြိမ်စွာထိုင်လျက် ဘုရားရှိခိုးခြင်း၊ ဂုဏ်တော်၊ ပရိတ်တော်များကို ရွတ်ဆိုခြင်း ပြုနေသည့်အပြင် ထူးခြားသော နမော တေ ဂါထာတော်ကို အကြိမ်ကြိမ်ရွတ်ဆိုနေကြောင်း သိရပါသည်။ ထို့ကြောင့် လှေကြီးမှာ ချောင်းငယ်ထဲသို့ ထူးဆန်းစွာ ရောက်ရှိနေပြီး လှေပေါ်ပါ လူအားလုံး စက်သေနတ် ဘေးရန်မှ ကင်းလွတ်ခဲ့ရခြင်း ဖြစ်ပါသည်။
ဖခင်က နမော တေ ဂါထာကို အကျဉ်းအကျပ် အခက်အခဲ ကြုံတွေ့ရလျှင် ယုံကြည်စွာဖြင့် ရွတ်ဆိုပါက ထိုအခက်အခဲမှ လွတ်မြောက်နိုင်ကြောင်း ယခု ကိုယ်တွေ့ပင်ဖြစ်ကြောင်း ပြောပြပါသည်။ ကျွန်မလည်း ထိုအချိန်မှစ၍ ဖခင်ထံမှ နမော တေ ဂါထာကို သင်ယူပြီး နေ့စဉ် ပွားများရွတ်ဆိုခဲ့သည်မှာ ယနေ့တိုင် ဖြစ်ပါသည်။ ထိုအကျိုးကြောင့် ကိုယ်တွေ့အရ အခက်အခဲ အကျဉ်းအကျပ်ပေါင်းများစွာ ကြုံတွေ့ခဲ့ရသည်( မှလည်း လွတ်မြောက်ခဲ့ပါသည်။ နမော တေ ဂါထာမှာ အောက်ပါအတိုင်း ဖြစ်ပါသည်။
နမော တေ ဗုဒ္ဓ ၀ီရတ္ထု၊ ၀ိပ္ပမုတ္တော,သိ သဗ္ဗဓိ။
သမ္ဗာဓပ္ပဋိပန္နော,သ္မိ၊ တဿ မေ သရဏံ ဘ၀။
( အနက် အကျဉ်းချုပ်။)
ကြီးမြတ်သော လုံ့လ၀ီရိယရှိတော်မူသော ရှင်တော်မြတ်ဘုရားအား ရှိခိုးပါ၏။
ရှင်တော်မြတ်ဘုရားသည် ကိလေသာစသော ဒုက္ခအနှောင်အဖွဲ့အားလုံးတို့မှ အပြီးတိုင် လွတ်မြောက်တော်မူပေသည်။
ဘုရားတပည့်တော်သည် အကျဉ်းအကျပ်သို့ ရောက်၍ နေရသည် ဖြစ်ပါ၏။
ရှင်တော်မြတ်ဘုရားသည် အကျဉ်းအကျပ်သို့ရောက်၍နေသော ဘုရားတပည့်တော်၏ ကိုးကွယ်လဲလျောင်း ပုန်းအောင်း မှီခိုရာ ဖြစ်တော်မူပါဘုရား။
(ဒေါ်တင်ရွှေ-အနောက်ရန်ကင်း)
( မြတ်မင်္ဂလာ ၂၀၀၃-ခု သြဂုတ်လ)
Subscribe to:
Post Comments (Atom)
No comments:
Post a Comment