Sunday, February 21, 2010

အသက်ကယ်သော ဓာရဏပရိတ်တော်

လွိုင်ကော်မြို့နယ် ချိကယ်ကျေးရွာ၌ နေထိုင်သော ဦးတူးရယ်နှင့် ဒေါ်မိုးမြာတို့ ဇနီးမောင်နှံတွင် သားသမီး ၇-ယောက်ရှိ၏။ သူတို့မိသားစုသည် ပစ္စည်းဥစ္စာ မချမ်းသာသော်လည်း မီးသွေးဖုတ်သည့်လုပ်ငန်းဖြင့် နေထိုင်စားသောက်နိုင်ကြ၍ ကိုယ်ကျန်းမာ စိတ်ချမ်းသာရှိကြပါသည်။

ဦးတူးရယ်သည် ဘုရားတရား အလွန်ကြည်ညိုသူဖြစ်၏။ နေ့စဉ်နေ့တိုင်း ဓာရဏပရိတ်တော်ကို ရွတ်ဆို ပူဇော်လေ့ရှိသည်။ အိပ်ချိန်မှလွဲ၍ အလုပ်လုပ်ကိုင်နေသော အချိန်များ၌ပင်လျှင် ဓာရဏပရိတ်တော်ကို ရွတ်ဆိုနေတတ်ပါသည်။

၂၀၀၂-ခုနှစ် အောက်တိုဘာလတွင် ဖြစ်ပါသည်။ မီးသွေးတင်ဆောင်ထားသော လှည်းများ အိမ်သို့ အသီးသီး ပြန်သွားကြပြီဖြစ်၏။ ဦးတူးရယ်မှာ မပြန်နိုင်သေးဘဲ အဖော်ဖြစ်သူ ဦးကားရ်လိုနှင့်အတူ မီးသွေးဖိုတွင် သန့်ရှင်းရေးပြုလုပ်ရင်း ကျန်နေရစ်ခဲ့ကြသည်။ ထိုသို့ သန့်ရှင်းရေးလုပ်ရင်း ဦးတူးရယ်သည် ဓာရဏပရိတ် တော်ကို နှုတ်မှရွတ်ဆိုနေသည်။

ဦးတူးရယ်တို့သည် အတန်ကြာသည်အထိ မီးသွေးဖိုအတွင်း၌ သန်းရှင်းရေးလုပ်ငန်း ပြုလုပ်နေသည်။ ပြီးဆုံးသောအခါ နှစ်ယောက်သား မီးသွေးဖိုအခန်းထဲမှ အပြင်သို့ ထွက်လာကြသည်။ မီးသွေးဖို အပြင်ဘက်သို့ ရောက်သည်နှင့် ၀ုန်း-ဟူသော အသံနှင့်အတူ မီးသွေးပြာမှုန့်များ လွင့်ပျံ့ထွက်လာပါသည်။ ထိုဖြစ်ရပ်ကြောင့် ဦးတူးရယ်တို့ နှစ်ဦးစလုံး အံ့သြတုန်လှုပ်သွားခဲ့ကြသည်။ အဘယ့်ကြောင့်ဆိုသော် မိမိတို့နှစ်ဦး သန့်ရှင်းရေုး ပြုလုပ်ခဲ့သည့် မီးသွေးဖိုသည် အပေါ်မှ မြေသားများ အိကျလာကာ ပြိုကျသွားခြင်းပင်ဖြစ်သည်။ မိနစ်အနည်းငယ်မျှ နောက်ကျလျှင် ဦးတူးရယ်တို့နှစ်ဦးအဖို့ မတွေးရဲစရာပင်။

ဟာ-ကျွန်တော်တို့ သိပ်ကံကောင်းတယ် ဦးတူးရယ်ရေ။ တကယ်လို့ မိနစ်အနည်းငယ်လောက် နောက်ကျမယ်ဆိုရင် မီးသွေးဖိုအတွင်း ပိတ်မိပြီး မြေဖို့ပြီးသား ဖြစ်နေလောက်ပြီ-ဟူ၍ ဦးကားရ်လိုက တုန်လှုပ်ချောက်ချားစွာ ပြောလာပါသည်။

မည်သို့ပင်ဖြစ်စေ ဦးတူးရယ်၏စိတ်ထဲတွင် ဘုရားတရားကြည်ညိုပြီး နေ့စဉ်ရွတ်ဆို ပူဇော်ခဲ့သော ဓာရဏပရိတ်တော်၏ ဂုဏ်ကျေးဇူးကြောင့်သာ အသက်ဘေးအန္တရာယ်မှ လွတ်မြောက်ခဲ့ရသည်ဟု တထစ်ချ ယုံကြည်ယူဆမိပါသည်။( တကယ့်ဖြစ်ရပ်မှန် ဖြစ်ပါသည်)။

(မောင်ချစ်ကြည်-ကန္ဒရ၀တီ)
( မြတ်မင်္ဂလာ ၂၀၀၄-ဇူလိုင်လ)

No comments: