Wednesday, February 10, 2010

ခရုသင်း မြည်သံ

အသိအလိမ္မာ၊ စာပေပညာနှင့် တကွ ယဉ်ကျေးမှုအမျိုးမျိုး ထွန်းကားရာဒေသ၌ သွားလာကျက်စားခဲ့သော ခရုသင်းမှုတ်သမားတယောက်သည် အကြောင်းကိစ္စတခုဖြင့် နယ်စွန်နယ်ဖျား အရပ်ဒေသသို့ ရောက်လာခဲ့၏။ နယ်စွန်နယ်ဖျားရှိ ရွာကလေးတရွာသို့ ၀င်ရောက်ပြီးလျှင် ရွာလယ်ကောင် အရိပ်ကောင်းကောင်းတခုတွင် ရပ်နားကာ၊ အသင့်ပါလာသော ခရုသင်းကို အိတ်ထဲက ထုတ်၍ သုံးကြိမ်သုံးခါ မှုတ်လိုက်လေသည်။

ခရုသင်းသံသည် သာယာလှ၏။ နာပျော်ဖွယ်ရှိလှ၏။ ဆွဲဆောင်အား ကောင်းလှ၏။ အသံသာသာကို နားထောင်ရင်း ယစ်မူးမတတ် ဖြစ်ကြရ၏။ ရွာသူရွာသားများတို့သည် ခရုသင်းမှုတ်နေတုန်းမှာတော့ သတိမမူမိခဲ့ကြ။ ခရုသင်းမှုတ်ပြီးသွားခါမှ ကြားလိုက်ရသော အသံကို အကြောင်းပြုကာ ရွာလယ်သစ်ပင်ရိပ်သို့ စုဝေးလာကြ၍ ခရုသင်းမှုတ်သူထံ ချဉ်းကပ်ပြီးလျှင်

အဆွေ-ခုနတုန်းက ကြားလိုက်ရတဲ့အသံဟာ အင်မတန် သာယာလှပါတယ်။ အဲဒါ ဘယ်က ထွက်လာတဲ့အသံပါလဲ-ဟု မေးမြန်းကြ၏။ ခရုသင်းမှုတ်သူက ရှေ့မှာ အသင့်ချထားသည့် ခရုသင်းကို ညွှန်ပြကာ-
အဆွေတို့-ဒါ ခရုသင်းလို့ ခေါ်တယ်။ စောစောက ကြားခဲ့ရတဲ့ အသံက ဒီခရုသင်းက ထွက်ပေါ်လာတာပေါ့။
ဟာ-တယ်ဟုတ်ပလား
ခရုသင်းကို လုံးဝမမြင်ဖူးကြသော ရွာသူရွာသားတို့သည် ခရုသင်းနားသို့ သူ့ထက်ငါ ၀ိုင်းအုံလာကြ၏။ ပတ်ပတ်လည်မှ တအံ့တသြ ကြည့်ရှု့ကြ၏။ ဤလိုပစ္စည်းမှ ဤမျှလျောက် သာယာသည့်အသံ ထွက်ပေါ်လာသည်ကို တအံ့တသြ ဖြစ်နေကြ၏။ ထိုမှတဆင့် စောစောက ကြားခဲ့ရသောအသံမျိုးကို ထပ်မံ၍ ကြားလိုလာကြ၏။

ထို့ကြောင့် သူတို့အထဲက ခြေသွက်၊ လက်သွက် လူတယောက်သည် ခရုသင်းကို မရဲတရဲ ကိုင်ကာ ပက်လက်အနေအထားဖြင့် ထားပြီးလျှင်-
ခရုသင်းကြီးရေ စောစောတုန်းကလို မြည်ပြလိုက်စမ်းပါ။ မြည်ပြလိုက်စမ်းပါ-ဟု တောင်းဆို၏။ အခြားသူတို့ကလည်း သူ့နည်းတူ ၀ိုင်းအုံ၍ တောင်းဆိုကြ၏။ ပက်လက်အနေအထားဖြင့် တောင်းဆို၍ မရသောအခါ ခရုသင်းကို မှောက်လျက် ထား၍ တောင်းဆိုကြည့်ပြန်၏။ မှောက်လျက်ကလည်း ဘာသံမျှ မထွက်လာသဖြင့် ဘေးစောင်းချထားကြည့်ပြန်၏။ တခါ နောက်တဖက်သို့ ပြောင်းထားကြည့်ပြန်၏။

ဟိုဘက် သည်ဘက် လှည့်ထားကြည့်၍လည်း အကြောင်းထူးမလာသည့်အတွက် ခရုသင်းကို မတ်တတ်ထောင်ကြည့်ကြ၏။ ထိုမှတဖန် ဇောက်ထိုးထားကြည့်ကြပြန်၏။ ခရုသင်းကတော့ ဘယ်လိုထားထား ဒီအတိုင်းသာ နေ၏။ အသံဟူ၍ လုံးဝ ထွက်မလာချေ။

ဤတွင် ရွာသူရွာသားတို့သည် စိတ်တိုလာကာ ခရုသင်းကို လက်နှင့်ပုတ်ကြ၏။ တချို့က အနားမှာ အသင့်တွေ့နေသော မြေစိုင်ခဲဖြင့် ထုကြ၏။ တချို့က တုတ်နှင့် ရိုက်ကြ၏။ ဤသို့ စသည်ဖြင့် အမျိုးမျိုးအဖုံဖုံ ကြိုးစားရင်း-ခရုသင်းကြီးရေ မြည်ပြလိုက်စမ်းပါ၊ မြည်ပြလိုက်စမ်းပါ-ဟု တစာစာတောင်းဆိုနေကြ၏။

ဤတွင်မှ ခရုသင်းမှုတ်သမားသည်-ဤလောကတွင် ဤမျှလျောက် မိုက်မဲသူတွေ ရှိနေပါသေးကလား-ဟု သဘောပေါက်ကာ ပျက်စီးလုဆဲဆဲ ရှိနေသော ခရုသင်းကို အချိ်န်မီ ကောက်ယူလိုက်၏။ ရွာသူရွာသားတို့၏ ရှေ့မှောက်မှာပင် သုံးကြိမ်တိုင်တိုင် သာယာနာပျော်ဖွယ် မှုတ်ပြလိုက်၏။

ဤတွင်မှ ရွာသူရွာသားတို့ သဘောပေါက်သွားကြလေတော့သည်။ ဪ-ခရုသင်းဆိုတာ ချည်းသက်သက် အသံမထွက်တတ်ပါကလား။ မှုတ်တတ်တဲ့သူလဲ ရှိပါမှ၊ အားအင် စိုက်ထုတ်ပြီး မှုတ်လဲ ပေးပါမှ၊ မှုတ်စရာလေလဲ ရှိပါမှ အသံမြည်တတ်ပေတာကိုး။
ရွာထဲက ထွက်သွားသည့်ခရုသင်းမှုတ်သူကို ငေးကြည့်ရင်း အချင်းချင်း ပြောဆို၍ နေရစ်ခဲ့ကြပေသည်။


( သက်ရှင်လှုပ်ရှား ခံစားမှု အဖုံဖုံ)
ဒီဃနိကာယ်၊ မဟာဝဂ် ပါယာသိသုတ် ပါဠိတော်တွင် ၀ိစိတ္တဓမ္မကထိက ဧတဒဂ်ဂုဏ်ထူးဆောင် အရှင်ကုမာရကဿပ-က ပါယာသိမြို့စားအား ထုတ်ဆောင်ဟောပြခဲ့သည့် ဥပမာ ပုံဝတ္ထုတခု ဖြစ်ပါသည်။
ပါယာသိမြို့စားသည် နတ္ထိကဒိဋ္ဌိ အယူအစွဲ ရှိသူဖြစ်၍ မျက်မြင်ကိုယ်တွေ့ ဤလောကမှတပါး အခြားလောက (ပရလောက) ကို လက်မခံပါ။

ဘ၀သစ်မှာ ပဋိသန္ဓေတည်နေသည့် သတ္တ၀ါများ ရှိသည်ဟုလည်း မယုံကြည်ပါ။ ကုသိုလ်ကံ အကုသိုလ်ကံတို့၏ ကောင်းကျိုး ဆိုးပြစ်ကိုလည်း လက်မခံပါ။ ဤသို့သော အယူအစွဲများ ဖြစ်ပေါ်လာရခြင်း၏ အကြောင်းရင်းမှာ ဘ၀သံသရာ ကျင်လည်ရခြင်းကို သဘောမပေါက်၍ပင် ဖြစ်ပေသည်။

ဘ၀သံသရာကျင်လည်ရခြင်းကို ပြတ်ပြတ်သားသား မငြင်းပယ်နိုင်တုန်းက ပါယာသိမြို့စားသည် ဘ၀သံသရာကျင်လည်ရခြင်း တကယ်ရှိ-မရှိကို သိနိုင်ရေးအတွက် အလွန်ရက်စက်သည့် စမ်းသပ်မှုအမျိုးမျိုးကို ပြုလုပ်ခဲ့၏။ ထိုအထဲက တမျိုးမှာ ဤသို့ဖြစ်၏။

ပြစ်မှုကျူးလွန်သည်ကို သက်သေများနှင့်တကွ လက်ပူးလက်ကြပ် ဖမ်းမိထားသောရာဇ၀တ်သားတယောက်ကို အမှုထမ်းများက ပါယာသိမြို့စား၏ ရှေ့မှောက်သို့ ပို့ဆောင်ကြ၏။ ဤတွင် ပါယာသိမြို့စားက ထိုသူကျူးလွန်ထားသည့် ပြစ်မှုအလျောက် ရိုက်သင့်သည့် အပြစ်ဒဏ်ပေးရုံမကတော့ဘဲ အလွန်ရက်စက်သည့် စမ်းသပ်မှုများကိုပါ ပြုလုပ်ခဲ့၏။

သူက ရာဇ၀တ်သားကို အရေပါး၊ အရေထူ၊ အသား၊ အရိုးနှင့် ရိုးတွင်းခြင်ဆီတို့ကို မထိခိုက်စေသော နည်းဖြင့် သတ်စေ၏။ ဤသို့သောနည်းဖြင့် သတ်ပုတ်ညှဉ်းဆဲ၍ ရာဇ၀တ်သား သေလုသေခင် အသက်ငင်နေစဉ်တွင် ပက်လက်လှန်ထားစေပြီးလျှင် အနီးကပ်၍ သေသေချာချာ ကြည့်ရှု၏။ သို့ရာတွင် ခန္ဓာကိုယ်ထဲက ထွက်သွားသည့် အသက်ကို မတွေ့ရသေးသဖြင့် ကိုယ်ကောင်ကို မှောက်ထားစေ၏။ ထိုအနေအထားဖြင့်လည်း ဘာမျှမထူးခြားသေးသဖြင့် တစောင်းထား ကြည့်၏။ ထိုမှတဖန် နောက်တဖက်စောင်းကြည့်ပြန်၏။ တုံးလုံးအနေအထားအမျိုးမျိုးဖြင့် အကြောင်းမထူးလာသည်တွင် ကိုယ်ကောင်ကို မတ်တတ်ထောင်ထား၍ ကြည့်ရှု၏။ ထို့နောက် ဇောက်ထိုးမိုးမျှော် ထားစေပြန်၏။

ဤသို့ အနေအထားအမျိုးမျိုးဖြင့် စမ်းသပ်၍ အကြောင်းမထူးလာသောအခါ ကိုယ်ကောင်ကို လက်နှင့်ရိုက်ပုတ်စေ၏။ ဆက်လက်၍ တုတ်နှင့်ရိုက်ခြင်း ဓားနှင့်ခုတ်ခြင်း စသဖြင့် အမျိုးမျိုး စမ်းသပ်ကြည့်ပါသော်ငြားလည်း ထွက်ခွာသွားသည့်အသက်ကို မတွေ့လိုက်ရပေ။

ဤအကြောင်းကို သက်သေထား၍ ပါယာသိမြို့စားက လျှောက်ထားရာတွင် အရှင်ကုမာရကဿပ-က အထက်ပါ ဥပမာကို ထုတ်ဆောင်ပြီးလျှင်-
မြို့စားမင်း၊ ခရုသင်းမှုတ်သောသူ အားအင်စိုက်ထုတ်၍ မှုတ်ခြင်း၊ လေရရှိခြင်းအားဖြင့် ဤအကြောင်းသုံးမျိုး ပြည့်စုံသည့်အခါ ခရုသင်းသည် အသံမြည်သကဲ့သို့ပင် ဤကိုယ်ခန္ဓာသည် ရုပ်ဇီဝိတ၊ နာမ်ဇီဝိတဟူသော အသက်၊ ကမ္မဇတေဇောဓာတ်၊ ၀ိညာဉ် အစဉ်အားဖြင့် ဤအကြောင်းသုံးမျိုးတို့ ပြည့်စုံသည့်အခါတွင် ရှေ့သို့သွားနိုင်၏။ နောက်သို့ ဆုတ်နိုင်၏။ ရပ်ခြင်း၊ ထိုင်ခြင်း၊ လျောင်းခြင်းတို့ကို ပြုလုပ်နိုင်၏။

စက္ခု၊ သောတ၊ စသော ဒွါရခြောက်ပေါက်တို့၏ အာရုံခံစားမှုများ ပြုလုပ်နိုင်၏။ မြို့စားမင်း၊ ခရုသင်း မှုတ်သောသူ၊ အားအင်စိုက်ထုတ်၍ မှုတ်ခြင်း၊ လေရရှိခြင်းအားဖြင့် ဤအကြောင်းသုံးမျိုးတို့ မပြည့်တော့သည့်အခါတွင် ခရုသင်းသည် အသံမမြည်သကဲ့သို့ ဤခန္ဓာကိုယ်သည် ရုပ်ဇီဝိတ၊ နာမ်ဇီဝိတ ဟူသော အသက်၊ ကမ္မဇတေဇောဓာတ်၊ ၀ိညာဉ် အစဉ်အားဖြင့် ဤအကြောင်းသုံးမျိုးတို့ မပြည့်စုံတော့သည့်အခါတွင် သွားလာလှုပ်ရှားမှု၊ အာရုံခံစားမှုများ မပြုလုပ်နိုင်တော့ပေ။
ဤသို့ ဖြေရှင်းဟောပြလိုက်ပေသည်။

( ၀ဏ္ဏသီရိ )

No comments: