ကြေးမုံပြင်တွင် ထင်ဟပ်လာသော မိမိမျက်နှာကို စိတ်ပျက်အားငယ်စွာ ကြည့်မိသည်။ ညာဘက်မျက်လုံးအောက်တွင် လက်ညှိုးတချောင်းခန့်ရှိသော အမာရွတ်တခု ၊ မျက်နှာတွင်သာမက မိမိ၏ နှလုံးသားထဲတွင်ပါ ဘယ်တော့မှ မပျောက်နိုင်သော အမာရွတ်၊ ထိုအမာရွတ်ကိုမြင်တိုင်း ငယ်စဉ်က ဖြစ်ရပ်ကို သတိရမိသည်။
ကျွန်မ ၅-နှစ်သမီးအရွယ်က ဖြစ်သည်။ ကျွန်မတို့ အိမ်နောက်ဖေး မီးဖိုချောင်အနီးတွင် အုန်းပင်တပင် ရှိသည်။ တနေ့တွင် ကျွန်မ၏ မိဘများက အိမ်ရှေ့၌ စကားပြောနေကြသည်။ ကျွန်မ၏ အမအကြီးဆုံးက ထမင်းအိုး တည်နေသည်။ ကျွန်မက ခြံထဲတွင် ကစားနေသည်။
ကစားရင်း မီးဖိုချောင်အနီးရှိ အုန်းပင်နားသို့ ရောက်သွားသည်။ အုန်းပင်ခြေရင်းတွင် ပုရွက်ဆိတ်အနီကောင်များ အုံဖွဲ့နေသည်။ ကျွန်မ၏ အသက်ငယ်သော်လည်း ပုရွက်ဆိတ် ကိုက်တတ်သည်ကိုတော့ ကျွန်မ သိသည်။ ကျွန်မ၏အမကြီးဆုံး ထမင်းအိုးငဲ့နေစဉ် ကျွန်မသည် မီးဖိုထဲမှ မီးစွဲနေသော ထင်းစတချောင်းကို ယူလာခဲ့သည်။ ကျွန်မ၏ အကြံမှာ ပုရွက်ဆိတ်အုံပေါ်တွင် မီးစကိုတင်၍ ပုရွက်ဆိတ်များကို သတ်ရန် ဖြစ်သည်။
အရွယ်ငယ်ငယ်နှင့် သူတပါး၏ အသက်ကို သေစေရန် လုံ့လအားထုတ်မှု ပြုခဲ့သော ကျွန်မ၏ အကုသိုလ်ကံသည် နောင်ဘ၀ထိအောင် မနေပါ။ မီးဖိုချောင်မှ အောက်သို့အဆင်း ခြေချော်၍လဲကာ ယူလာသည့်မီးစသည် ကျွန်မမျက်နှာတွင် ကပ်နေသည်။ အမနှင့် မိဘနှစ်ပါး အပြေးလာ၍သာ မျက်စိ မကွယ်ခဲ့ခြင်း ဖြစ်ပါသည်။
အနာရှိန်နှင့် ၂-ရက် ၃-ရက်ခန့် ဖျားခဲ့ပါသည်။ တပတ်မှ နှစ်ပတ်ခန့်ကြာသောအခါ အနာကျက်သွားသော်လည်း အမာရွတ်က ထင်ကျန်ခဲ့ပါသည်။ ကျွန်မအတွက် သေသည်အထိ နောင်ကြဉ်သွာစေမည့် အမှတ်အသားတခု ဖြစ်ပါသည်။
( ချိုသက်ထား)
(မြတ်မင်္ဂလာ ၂၀၀၃-ခု ဇူလိုင်လ)
Subscribe to:
Post Comments (Atom)
No comments:
Post a Comment