Saturday, February 6, 2010

မှန်ရိပ်ပမာ သူ့ကြမ္မာ

နေ့တနေ့၏ ညနေခင်းမှာပါ။ စာရေးသူ ဤအရှင်သည် ရေမိုးချိုး ကိုယ်လက်သန့်စင်ပြီးသကာလ ကိုယ်စိတ်နှစ်ပါး ပေါ့ပါးရွှင်လန်းစွာဖြင့် မိမိသတင်းသုံးရာ ရွှေတွင်းအိုင်ကျောင်းတိုက်မှသည် မိမိမွေးရပ်ဇာတိ လယ်တော်ရွာလေး ဆီသို့ ခြေညောင်းလက်ဆန့် ဆိုသလိုပင် မုံရွာ-အမြင့် ကားလမ်းပေါ်မှ လမ်းလျှောက်ရင်း ထွက်ခဲ့ပါသည်။

လမ်းလျှောက်ရင်းပင် မျက်စိအာရုံက လယ်တော်ရွာ၏ အနောက်ဘက်ရှိ ထန်းပင်များ ၀ိုင်းရံလျက်ရှိသော ရေအိုင်ငယ်လေးဆီသို့ ရောက်သွားသည်။
အလို-ဘာလုပ်နေကြပါလိမ့်။ ငါးဖမ်းနေကြတာလား။ စာရေးသူ ဤအရှင်က စူးစမ်းမိသည်။ မဟုတ်ပါချေ။ လယ်တော်ရွာမှ မောင်သောင်းနှင့် လှတင်အမည်ရှိ လူရွယ်လေး နှစ်ယောက်သည် တစုံတရာကို ရေအိုင်ထဲသို့ နှစ်မြှုပ်လိုက် ပြန်ဖော်လိုက် လုပ်ကိုင်နေကြသည်။ ခွေးတကောင်ကို ရေနှစ်သတ်နေကြခြင်း ဖြစ်သည်။

ဒါဆိုရင် ဒီခွေး သေလောက်ပါပြီ။ မောင်သောင်းရ၊ လာ သွားကြစို့။ ခွေးသားချက်စားရင် ငှက်ဖျားရောဂါ ပျောက်တယ်လို့ ပြောကြတာပဲ။ မင်းနဲ့ငါ အရက်နဲ့ မြည်းကြမယ်။ လူငယ်လေးနှစ်ယောက်၏ ပြောစကားကို စာရေးသူက အတိုင်းသား ကြားသိနေရသည်။ ခွေးသေကိုဆွဲကာ ကားလမ်းဆီသို့ ဦးတည်လာကြသည်။

လက်စသတ်တော့ ငါ့ကျောင်းက ခွေးမလေးကို ရေနှစ်သတ်ပြီး ခွေးသားချက်စားမှာကိုး၊ မိုက်လိုက်တဲ့ ကလေးတွေ။
အထက်ပါ မထင်မရှား အဖြစ်အပျက်လေး ဖြစ်ပွားပြီးနောက် မှတ်မှတ်ရရ ဆိုရသော် ၁၃၆၂-ခုနှစ် တော်သလင်းလဆန်း ၁၀-ရက်နေ့မှာပါ။ လယ်တော်ရွာမှ မောင်သောင်း၏ မိခင် ဒေါ်တင်ဦး တယောက် ဆွမ်းချိုင့်တချိုင့်နှင့် စာရေးသူ၏ကျောင်းသို့ ရောက်လာပါသည်။ ဒေါ်တင်ဦးသည် မျက်စိမျက်နှာ ညှိုးငယ်စွာနှင့် ရောက်မဆိုက်ပင် ဘုရားရှင်ကို ၀တ်ဖြည့်ရှိခိုးပြီးမှ စာရေးသူကို ရှိခိုးပါသည်။

ဘယ်အတွက် ရည်စူးပြီး ပို့တဲ့ဆွမ်းလဲ ဒကာမကြီး။
တင်ပါ့ဘုရား၊ တပည့်တော်ရဲ့သား မောင်သောင်းအတွက် ရည်စူးပြီး သက်ပျောက်ဆွမ်း ပို့တာပါဘုရား။
ဗျာ၊ မောင်သောင်း သေလို့ ဟုတ်လား ဒကာမကြီး။ ကလေးမြို့ကို အုတ်ဖုတ်သွားတာဆို။
မှန်ပါ့ဘုရား။ အုတ်ဖုတ်ရင်းပဲ ကလေးမြို့က ဆင်ခြေဖုံးရပ်ကွက် ရေကန်တခုမှာ ရေနစ်ပြီး ပျက်စီးသေဆုံးတာပါဘုရား။ အိမ်ကလူတွေတော့ လိုက်သွားကြတယ်။ ဟိုမှာပဲ သင်္ဂြိုဟ်ခဲ့ရတယ်ဘုရား။ ဒေါ်တင်ဦးသည် စကားပြောရင်းပင် ငိုချလိုက်ပါသည်။

ကိုင်း၊ ကိုင်း၊ ဒကာမကြီး တိတ်ပါ၊ တိတ်ပါ၊ ၀မ်းနည်းပြီး ငိုမနေပါနဲ့။ ဗုဒ္ဓဘုရားရှင်တော်မြတ်က ဟောတော်မူသလိုပေါ့ဗျာ။ စေတနာဟံ ဘိက္ခ၀ ကမ္မံ ၀ဒါမိ။ တူသောအကျိုး ပေးတတ်သတဲ့။
မောင်သောင်းလဲပဲ .......စာရေးသူက ဆက်လက် မပြောတော့ဘဲ နှုတ် ပိတ်နေလိုက်သည်။

တပည့်တော် နားမလည်ဘူးဘုရား။ ဘယ်လိုတူသော အကျိုးပေးတာလဲ။ ရှင်းလင်းပြောပြ အမိန့်ရှိပါဘုရား။
အင်း-ဒီအကြောင်းကို ဦးပဉ္ဇင်း မပြောတော့ဘူးလို့ ရေငုံနှုတ်ပိတ်နေခဲ့တာ။ အကြောင်းတိုက်ဆိုင်လာမှတော့ ပြောရဦးမှာပေါ့။ လွန်ခဲ့တဲ့ ခြောက်လလောက်က ဒကာမကြီးရဲ့ သား မောင်သောင်း-ဟာ ဦးပဉ္ဇင်းရဲ့ ကျောင်းက ခွေးမလေးတကောင်ကို ဖမ်းဆီးခိုးယူပြီး လယ်တော်ရွာအနောက်ဘက်က ရေအိုင်မှာ မသေမချင်း ရေနှစ်သတ်ဖူးတယ်ဗျ။ ခွေးသားချက်စားဖို့တဲ့လေ။

ဘုရား၊ ဘုရား၊ မကြားဝံ့ မနာသာ ရှိလိုက်တာဘုရား၊ အဲဒီတုန်းက ဦးပဉ္ဇင်းက တပည့်တော်တို့ မပြောဘဲကိုး။
အင်း-ကျုပ်လဲ အစက ဒကာမကြီးတို့ကို ပြောဆိုအသိပေးဖို့ စိတ်ကူးပါသေးတယ်။ ဒါပေမဲ့ လက်လွန်ခြေလွန် ဖြစ်ပြီးမှတော့ စိတ်မကောင်းကြမှာ စိုးလို့ မပြောတော့တာပါ။ ဒီလိုပဲပေါ့ ဒကာမကြီးရယ်။ မကောင်းမှု ဖြစ်စေ၊ ကောင်းမှုဖြစ်စေ မှန်ရိပ်ပမာ လိုက်တတ်တယ်။ သို့သော်လည်း အကျိုးပေးတရားက အနှေးနဲ့အမြန် ကွာခြားမှုတော့ ရှိတာပေါ့။ ဓမ္မလမ်းစဉ်ဟာ အယုတ် အလတ် အမြတ် မရွေးဘူး။ မျက်နှာမလိုက်ဘူး ဒကာမကြီး။ ကိုင်း ကိုင်း ငိုမနေနဲ့။ မောင်သောင်းအတွက် လားရာဂတိ ကောင်းအောင် အာရုံပြုပြီး ကောင်းမှုကုသိုလ်တွေသာ ဒကာမကြီး တတ်နိုင်သမျှ မကြာခဏ ပြုပေးပါ။
မှန်ပါဘုရား။

( အရှင်ဝေပုလ္လ-ရွှေတွင်းအိုင်)
(မြတ်မင်္ဂလာ ၂၀၀၃-ခု သြဂုတ်လ)

No comments: