Friday, February 12, 2010

( ၂၈ ) ဆုံးမလွယ်ခြင်း

ဆုံးမလွယ်ခြင်းသည် မင်္ဂလာတပါး ဖြစ်သည်။
တနည်းအားဖြင့်-ကြီးပွားချမ်းသာခြင်း၏ အကြောင်းတရပ် ဖြစ်သည်။
အောက်ပါဇာတ်တော်ကို သာဓကအဖြစ် တင်ပြအပ်ပါသည်။

တခါသော် ဗြဟ္မဒတ်မင်းသည် ဒီဃီတိကောသလမင်းကို စစ်တိုက်ရန် မိမိ၏နိုင်ငံမှ ရဲမက်များကို ဦးဆောင်ချီတက်လာသည်။ ဒီဃီတိမင်းမှာ အင်အားခြင်းမမျှသဖြင့် မိဖုရားကိုခေါ်ကာ တိုင်းပြည်မှ ထွက်ပြေးသွားရသည်။ မြို့စွန်တနေရာရှိ အိုးထိန်းသည်၏ နေအိမ်၌ ရုပ်ဖျောက်၍ မထင်မရှား နေထိုင်သည်။

မကြာမီ မိဖုရားကြီးသည် သားတော်တပါး ဖွားမြင်သည်။ ဒီဃာဝု မင်းသားဟု အမည်ပေးသည်။ ဒီဃီတိကောသလမင်းက - ငါတို့ရုပ်ဖျောက်နေထိုင်သည်ကို တနေ့နေ့တွင် ဗြဟ္မဒတ်မင်း သိနိုင်သည်။ ထိုအခါ ငါတို့ကို ဖမ်း၍ သတ်လျှင် သားတော်ပါ အသတ်ခံရလိမ့်မည်-ဟူ၍ ဆင်ခြင်ကာ မင်းသားကို အခြားလုံခြုံသော တနေရာသို့ ပို့ထားသည်။ အတတ်ပညာ သင်စေသည်။

မင်းကြီး ကြိုတင်မှန်းဆသည့်အတိုင်း တနေ့တွင် ဗြဟ္မဒတ်မင်းကြီးသည် ဒီဃီတိကောသလမင်းနှင့် မိဖုရားကို တွေ့ရှိသွားသည်။ ချက်ချင်းပင် ဖမ်းဆီးသည်။ သတ်ရန် သူသတ်ကုန်းသို့ ခေါ်ဆောင်သွားလေသည်။
ဒီဃာဝု မင်းသားသည် အတတ်ပညာများ တတ်မြောက်သဖြင့် မိဘနှစ်ပါးကို ခေတ္တတွေ့ရန် ပြန်လာသည်။ ထိုအခါ သူသတ်ကုန်းသို့ ဆောင်ယူသွားသော မိဘနှစ်ပါးကို တွေ့ရသည်။ လမ်းဘေးဝဲယာမှ လူအများသည် မင်း-မိဖုရား နှစ်ပါးကို ကြည့်နေကြသည်။ ဒီဃာဝုမင်းသားသည် ထိုသူများအကြားမှနေ၍ မိဘနှစ်ပါးကို လှမ်းကြည့်ရှာသည်။

ဒီဃီတိကောသလမင်းသည် လူအုပ်ထဲတွင် သားတော်ကို မြင်သောအခါ ဆုံးမစကားကို တကိုယ်တည်း ပြောကြားသွားသည်။
(ရန်တို့မည်သည်မှာ ရန်တုံ့မူခြင်းဖြင့် မငြိမ်းအေးကုန်။ ရန်တုံ့မမူသဖြင့်သာ ငြိမ်းအေးကုန်၏။)

ထိုစကားကို ဘေးမှလူများ နားမလည်ကြ။ ဤမင်းသည် ရူးသွပ်သွားသဖြင့် တကိုယ်တည်း ထင်ရာ ရောင်ရမ်း မြည်တမ်းနေသည်-ဟု ဆိုကြ၏။
မင်းကြီးက-အမောင်တို့၊ ရူးသွပ်သဖြင့် ငါရောင်ရမ်းမြည်တမ်းခြင်း မဟုတ်၊ ငါ့စကားကို ပညာရှိတို့ သိကြလိမ့်မည်-ဟူ၍ ပြန်ပြော၏။

သူသတ်ကုန်းသို့ရောက်သောအခါ သူသတ်တို့လည်း မင်း-မိဖုရားနှစ်ပါးကို အဆုံးစီရင်လိုက်ကြလေသည်။ ဒီဃာဝုမင်းသားသည် အစောင့်တို့အား အရက်မူးအောင်တိုက်သည်။ မူး၍ လဲကျသော် အမိ အဖတို့၏ အလောင်းကို ကောင်းစွာမီးသင်္ဂြိုဟ်သည်။ အားရအောင် ငိုမြည်တမ်းသည်။ ထို့နောက် မျက်ရည်များကို သုတ်ပြီးလျှင် ဗြဟ္မဒတ်မင်း၏ ဆင်ဆရာထံသွား၍ တပည့်ခံကာ နေထိုင်သည်။

နံနက်တိုင်း စောင်းတီးလျက် သီချင်းဆိုသည်။ မင်းကြီးကြားလျှင် နှစ်သက်သဖြင့် မိမိထံ ခေါ်ထားသည်။ စောင်းတီး၍ ဖျေဖြော်သည်။ ဒီဃာဝုမင်းသားလည်း အမှုကိစ္စတို့ကို ကျွမ်းကျင်လိမ္မာစွာ ဆောင်ရွက်ပေးသည်။ မင်းကြီး ပိုမိုနှစ်သက်သဖြင့် အတွင်းတော်၌ ခစား ထမ်းရွက်စေသည်။

တနေ့သ၌ မင်းကြီးသည် ဒီဃာဝုမင်းသားကို ရထားမောင်းစေလျက် ဥယျာဉ်တော်သို့ ထွက်တော်မူသည်။ ဥယျာဉ်သို့ရောက်သောအခါ ဒီဃာဝုမင်းသားသည် မင်းကြီးအား မင်းချင်းများနှင့် ဝေးရာအရပ်သို့ ပရိယာယ်ဖြင့် ခေါ်ဆောင်သွားသည်။ မင်းကြီးလည်း ပင်ပန်းသဖြင့် သစ်ရိပ်အောက်သို့သွားသည်။ ဒီဃာဝုမင်းသား၏ ပေါင်ကို ခေါင်းအုံးလျက် စက်တော်ခေါ်သည်။

မင်းကြီးအိပ်ပျော်သွားသောအခါ မင်းသားက-အခွင့်ရပြီ၊ ငါ့ အမိ-အဖတို့ကို သတ်သူကို ယခုပြန်သတ်နိုင်ပြီ-ဟု ကြံလျက် သန်လျက်ကို ဆွဲထုတ်သည်။ ထိုစဉ် သူသတ်ကုန်းသို့ ဖခင်အသွားတွင် ပြောဆိုဆုံးမသွားသော စကားတို့ကို သတိရသွားသည်။ မင်းကြီးကို မသတ်ဘဲ သန်လျက်ကို ချထားလိုက်သည်။ ထို့နောက် သတ်မည် ပြုပြန်သည်။ အဖ စကားကို သတိရကာ မသတ်ဖြစ်ပြန်။ ၃-ကြိမ်တိုင် ချီတုံချတုံ ဖြစ်ခဲ့သည်။

ထိုစဉ် မင်းကြီး နိုးလာသည်။ ဒီဃာဝုမင်းသားသည် လက်ဝဲလက်ဖြင့် မင်း၏ဦးသျှောင်ကို ဆွဲလျက် လယ်ယာလက်ဖြင့် သန်လျက်ကိုကိုင်ကာ မိမိသည် ကောသလမင်း၏သား ဖြစ်ကြောင်းမှစ၍ အကြောင်းစုံ ပြောပြသည်။ အရှင်မင်းကြီးသည် ကျွန်ုပ်၏လက်မှ လွတ်နိုင်ပါမည်လော-ဟု ဆို၏။

ဗြဟ္မဒတ်မင်းလည်း -အမောင်၊ သင့်လက်မှ ငါ မလွတ်နိုင်တော့ပါ-ဟု ဆိုကာ တောင်းပန်စကား ပြောကြားသည်။ ဒီဃာဝုမင်းသားက ဖခင် ပြောကြားသွားသော ဆုံးမစကားကို ပြန်လည်ပြောပြသည်။ ထိုအဆုံးအမ အတိုင်း ကျွန်ုပ် သင့်ကို ရန်မပြုတော့ပါ။ အကယ်၍ သင် ရန်ပြုလိုပါမူ ကျွန်ုပ်ကို သတ်နိုင်ပါသည်-ဟု ဆိုကာ သန်လျက်ကို ပေး၏။

မင်းကြီးကလည်း-အမောင်၊ ငါလည်း သင့်ကို ရန်မပြုပါ-ဟုဆိုကာ နန်းတော်သို့ ပြန်ခေါ်သွားသည်။ မိမိ၏ သမီးတော်နှင့် ထိန်းမြားပေးစားသည်။ ဒီဃီတိကောသလမင်း၏ ထီးနန်းကို ဒီဃာဝု မင်းသားအား ပြန်လည် နှင်းအပ်သည်။
ထိုအခါမှစ၍ မင်းနှစ်ပါးတို့သည် ညီညွတ် ငြိမ်းချမ်းစွာဖြင့် မိမိနိုင်ငံကို မိမိကိုယ်စီ မင်းပြုကြလေသည်။
အကိုး။ ။ ၅၅ဝ-ဒီဃီတိကောသလဇာတ်။

( မင်းယုဝေ)
(မြတ်မင်္ဂလာ ၂ဝဝ၃-ခု နိုဝင်ဘာလ)

No comments: