Thursday, February 11, 2010

ဘာသာရေး ပြဿနာ ( ၃ )

( ဘဒ္ဒန္တ ဝါယမသာရ ဖြေသည် )

(မေး) ( အသညသတ်ဘုံနှင့် ရပ်ပြစ်ရှစ်ပါး)
အရှင်ဘုရား၊ (၁) ရူပ ၁၆-ဘုံတွင် အသညသတ်ဘုံသည် ရပ်ပြစ်ရှစ်ပါးတွင် ပါဝင်သည်ဟူ၍၄င်း၊ အသညသတ်ဗြဟ္မာများသည် အဟိတ်ပုဂ္ဂိုလ်များ ဖြစ်သည်ဟူ၍၄င်း၊ ဆိုကြသည်ကို မှတ်သားရဖူးပါသည်။
ဗြဟ္မာ့ဘုံများသည် ဘုံစဉ်အရ နတ်ပြည်ခြောက်ထပ်ထက်ပင် အထက်တန်းကျ မြင့်မြတ်သည်ဟု တပည့်တော်များ ယူဆထားမိပါသည်။ သို့ဆိုလျှင် ဗြဟ္မာ့ဘုံတဘုံဖြစ်သော အသညသတ်ဘုံမှာ ရပ်ပြစ်ရှစ်ပါးတွင် ပါဝင်ပြီး ပုဂ္ဂိုလ်မှာလည်း အဟိတ်ပုဂ္ဂိုလ်များ ဖြစ်ရသည်ကို ရှင်းလင်းဖြေကြားပေးတော်မူပါဘုရား။

(၂) ဘဝဂ်ဟူသည်မှာ မည်သည့်ဘုံကိုခေါ်ဆိုပါသနည်း။ အဘယ့်ကြောင့် ဘဝဂ်ဟု ခေါ်ဆိုရကြောင်းကိုပါ ဖြေကြားပေးတော်မူပါဘုရား။
( ဦးအောင်သန်း-ဒဂုံမြို့သစ်တောင်ပိုင်း)

(ဖြေ)
အသညသတ်ဘုံသည် ဘုရားဖူးခြင်း၊ တရားနာခြင်း စသော အခွင့်များ ဆုံးရှုံးရသော ရုပ်ချည်းသက်သက်ရှိသော ဘုံဌာနဖြစ်၍ ရပ်ပြစ် ၈-ပါးတွင် ထည့်ထားခြင်း ဖြစ်ပါသည်။

အဟိတ်ပုဂ္ဂိုလ်ဖြစ်ရခြင်းမှာ လောဘ၊ ဒေါသ၊ မောဟ၊ အလောဘ၊ အဒေါသ၊ အမောဟ ဟိတ်များနှင့် မယှဉ်သည့်အတွက် အဟိတ်ပုဂ္ဂိုလ်ဟု ခေါ်ထားခြင်း ဖြစ်ပါသည်။ အဟိတ်ပဋိသန္ဓေနှင့် ယှဉ်သောကြောင့် အဟိတ်ပုဂ္ဂိုလ်ဟု ခေါ်ခြင်းမဟုတ်ပါ။

ဘဝဂ်ဟူသည် ဘဝဂ္ဂ=ဘဝ+အဂ္ဂ=ဘုံတို့၏ ထိပ်ဆုံး ၃-ဘုံကိုခေါ်ဆိုခြင်းဖြစ်ပါသည်။
၃၁-ဘုံတွင် ဗြဟ္မာ့ပြည် ၂ဝ-ရှိရာ အရူပလေးဘုံ၌ နေဝသညာ နာသညာယတနဘုံသည် ထိပ်ဆုံးဖြစ်၍ အရူပလေးဘုံတို့၏ ဘဝဂ်ဘုံဖြစ်သည်။ ထို့ပြင် နေဝသညာ နာသညာယတနဘုံသည် ၃၁-ဘုံ တို့၏ ထိပ်ဆုံးဘဝဂ်ဘုံလည်း ဖြစ်ပါသည်။

သဒ္ဓါဝါသ ၅-ဘုံတွင် အကနိဋ္ဌဘုံသည် သုဒ္ဓါဝါသ ၅-ဘုံတို့၏ ထိပ်ဆုံးဘဝဂ်ဘုံ ဖြစ်ပါသည်။ (အရိယာတို့၏ ဘဝဂ်ဘုံဟုလည်း ခေါ်ပါသည်)။ ကြွင်းသော ဗြဟ္မာ ၁ဝ-ဘုံတွင် ဝေဟပ္ဖိုလ်ဘုံသည် ထိပ်ဆုံးဖြစ်၍ ကြွင်းသော ဗြဟ္မာ ၁ဝ-ဘုံတို့၏ ဘဝဂ်ဘုံဖြစ်သည်။ ဝေဟပ္ဖိုလ်ဘုံကို ပုထုဇဉ်ပုဂ္ဂိုလ်တို့၏ ဘဝဂ်ဟုလည်း ဆို၏။ ဝေဟပ္ဖိုလ်၏ အထက် သုဒ္ဓါဝါသဘုံများသည် အရိယာများသာ ရှိကြသဖြင့် ဝေဟပ္ဖိုလ်ဘုံကို ပုထုဇဉ်တို့၏ ဘဝဂ်ဟု ခေါ်ခြင်း ဖြစ်သည်။
*********************************************************************************

(မေး) (ရဟန်းသံဃာများ ရေကပ်လှူခြင်းနှင့် အကပ်လှူခံရသော ပစ္စည်းများ)
အရှင်ဘုရား၊ (၁) မြတ်စွာဘုရားအား သောက်တော်ရေ၊ မျက်နှာသစ်တော်ရေ ကပ်လှူရာတွင် ဆွမ်းတော်ကပ်သကဲ့သို့ လက်ဖြင့်မ၍ ကပ်ရပါသလား၊ လှူသူ အကျိုးရှိအောင် ကပ်လှူပုံ မှန်ကန်အောင် ညွှန်ပြပါဘုရား။
(၂) ရဟန်းသံဃာများ လှူဖွယ်ပစ္စည်းကို လက်ဖြင့်ထိ၍ အကပ်ခံရာတွင် အကပ်ခံသည့်နေ့တွင်သာ သုံးစွဲကောင်း၍ မွန်းလွဲ နေ့ကူးအထိ မထားကောင်းဟု မှတ်သားဖူးပါသည်။ ဖြေကြားရှင်းလင်းပေးပါဘုရား။
(ဗိုလ်တင့်-ပုလဲမြို့)

(ဖြေ)
(၁) ဝိနည်းတွင် ဒန္တပေါဏ သိက္ခာပုဒ်၌ ရေနှင့်ဒန်ပူ (သွားတိုက်တံ) တို့ကို လူ+သာမဏေတို့ ကပ်ဖွယ်မလိုဘဲ သုံးဆောင်နိုင်ပါသည်။ သို့သော် သက္ကစ္စဂါရဝ မြောက်အောင် ကပ်လှူခြင်းဖြင့် ဆွမ်းတော်ကပ်သကဲ့သို့ မ၍ ကပ်လှူခြင်းသည် ကောင်းပါသည်။
(၂) ရဟန်းသံဃာများ လှူဖွယ်ပစ္စည်းများကို အကပ်ခံခြင်းနှင့် ပတ်သက်၍ ကာလိက ၄-မျိုး ခွဲခြားသိမှသာ ရှင်းပါမည်။
(၁) ယာဝကာလိက=စပါးမျိုးအားလုံး၊ ပဲမျိုး၊ ထန်း၊ အုန်း၊ ပိန္နဲ၊ ဘူး၊ ဖရုံ၊ သခွား၊ သစ်သီးကြီး ၉-ပါး၊ ဆာလောင်မှုကို ဖျောက်သဖြင့် အာဟာရကိစ္စကို ပြီးစေသော သစ်ရွက်၊သစ်သီး၊ မုန့်မျိုးစုံ တို့သည် ယာဝကာလိကခေါ်၏။
ယနေ့နံက် အကပ်ခံပြီး မွန်းမတည့်မီအထိ သုံးဆောင်နိုင်၏။ နောက်နေ့များ မသုံးဆောင်နိုင်တော့ပေ။

(၂) ယာမကာလိက=အဖတ်မပါသော ဖျော်ရည်အမျိုးမျိုးတို့သည် ဆာလောင် မွတ်သိပ်ခြင်းတည်းဟူသော အကြောင်းကြောင့် ယနေ့အကပ်ခံပြီး နောက်နေ့ အရုဏ်တက်သည့်တိုင်အောင် သုံးဆောင်နိုင်၏။ အရုဏ်တက်သည်မှ နောက် မသုံးဆောင်ကောင်းတော့ပေ။

(၃) သတ္တာဟကာလိက=ထောပတ်၊ ဆီဥ၊ ဆီ၊ ပျား၊ တင်လဲ တို့သည် ကျန်းမာရေးအတွက် ယနေ့အကပ်ခံပြီး ၇-ရက်အတွင်း သုံးဆောင်နိုင်သည်။ ၇-ရက်လွန်က မသုံးဆောင်ကောင်းတော့ပေ။

(၄) ယာဝဇီဝိက=အာဟာရကိစ္စကို မပြီးစေသော ဆီးဖြူ၊ သျှိသျှား၊ ဖန်ခါး၊ ပိတ်ချင်း၊ ချင်း၊ ငရုတ်၊ လေးညှင်း၊ ဇာတိပ္ဖိုလ်၊ စမုန်နက်၊ ကြက်သွန်၊ကွန်း၊ ဆေး၊ အစရှိသော သစ်မြစ်၊ သစ်ပွင့်၊ သစ်သီးကြီးငယ်တို့ကို ဆေးဝါးအဖြစ် ကျန်းမာရေးအတွက် ယနေ့အကပ်ခံပြီး တသက်တာလုံးပင် စားနိုင်၏။
*********************************************************************************

(မေး) ( မေတ္တာအရာ၌ အမြတ်ဆုံးဧတဒဂ်)
အရှင်ဘုရား၊ မေတ္တာအရာ၌ အသာဆုံး အမြတ်ဆုံး ဧတဒဂ်ဘွဲ့ကို ရရှိချင်ပါသည်ဘုရား၊ ပါရမီ မည်မျှဖြည့်ကျင့်ရပါမည်နည်း။ ယခုဘဝတွင် မည်သည့်ပုဂ္ဂိုလ်များ၊ မည်သည့်အရိယာသူတော်စင်များထံတွင် ဆုတောင်းရပါမည်နည်း၊ ယခုဘဝမှစ၍ မည်သည့် ကျင့်စဉ်များကို စတင်၍ ကျင့်ရပါမည်နည်း။ ဖြေကြားပေးတော်မူပါဘုရား။
(မအိအိမွန်ကျော်-ဟင်္သာတ)

(ဖြေ)
မေတ္တအရာ၌ အသာဆုံး အမြတ်ဆုံးဘွဲ့ကို မအိအိမွန်ကျော် သိထားသည့်အတိုင်း ဂေါတမဘုရားရှင်လက်ထက်တွင် သာမာဝတီမိဖုရားကို ချီးမြှင့်ခဲ့ပါသည်။ သာမာဝတီမိဖုရားသည် ပဒုမုတ္တရ ဘုရားရှင်လက်ထက် ဟံသာဝတီ မင်းနေပြည်တော်၌ အမျိုးကောင်းသမီးဖြစ်ပြီး ဘုရားရှင်၏တရားကို ကြားနာရ၍ မေတ္တာဝိဟာရီ-မေတ္တာဖြင့် နေလေ့ရှိသော ဥပါသိကာမတဦးကို အားကျမိသည်။

ထို့နောက် ထိုဆုမျိူးကို နှလုံးသွင်းတောင့်တသော အဓိကာရကောင်းမှုကိုပြုပြီး မေတ္တာဝိဟာရီ-ဧတဒဂ်ဆုကို ပတ္ထနာပြု ဆုတောင်းပါသည်။ ပဒုမုတ္တရဘုရားရှင်ကလည်း ရရှိနိုင်မည့်အကြောင်း ဗျာဒိတ်စကား မိန့်ကြားခဲ့ပါသည်။

ပဒုမုတ္တရဘုရားရှင်နှင့် ဂေါတမဘုရားရှင်တို့၏ ကြားကာလမှာ ဘုရားရှင် ၁၄-ဆူ ခြားပါသည်။ ပါရမီဖြည့်ရမည့် နှစ်များလည်း မရေမတွက်နိုင်အောင် များလှပါသည်။
ဧတဒဂ်ရ ပုဂ္ဂိုလ်များအကြောင်းကို ဖတ်ကြည့်သောအခါ ဘုရားတဆူဆူထံမှာ ကောင်းမှုပြု၍ ဆုတောင်းပြီး ဗျာဒိတ်ရရှိကြောင်း တွေ့ရပါသည်။ ဘုရားရှင်ထံမှာ ကောင်းမှုပြု ဆုတောင်း၍ ဗျာဒိတ်ရခြင်းသည် ရင့်ကျက်သော ဧတဒဂ်လောင်းလျာများ ဖြစ်ပါသည်။

ဘုရားရှင်တဆူထံတွင် မေတ္တာဧတဒဂ်ကိုအားကျပြီး ကုသိုလ်ပြုဆုတောင်း၍ ဗျာဒိတ်ရသော အခြေအနေသို့ ရောက်ရခြင်းမှာလည်း ဘဝများစွာက မေတ္တာဘာဝနာ အထုံပါရမီ ပါခဲ့၍သာ အားကျခြင်း ဖြစ်ပါသည်။ မအိအိမွန်ကျော်သည် ဘုရားတဆူဆူထံမှာ အားကျကုသိုလ်ပြု ဆုတောင်း၍ ဗျာဒိတ်ရနိုင်ရန် ယခုကပင် ဘုရားရုပ်ပွားတော်ရှေ့၌ ဖြစ်စေ၊ သံဃာတော်များထံ၌ဖြစ်စေ၊ လေးစားထိုက်သော ပုဂ္ဂိုလ်များထံ၌ဖြစ်စေ၊ ကောင်းမှုကုသိုလ်ပြုတိုင်း မေတ္တာဧတဒဂ် ရလိုကြောင်း ဆုပန်၍ ဝိသုဒ္ဓိမဂ်ကျမ်းလာ အတိုင်း မေတ္တာဘာဝနာကို များများပွားဖို့ လိုပါမည်။
*********************************************************************************

(မေး) (ဓာတ်ကြီးလေးပါး ဆွမ်းတော်ကပ်အလှူ)
အရှင်ဘုရား၊ ယခုအခါ ဓာတ်ကြီးလေးပါး ဆွမ်းတော်ကပ်လှူကြသည်မှာ အလွန်များလှပါသည်။ ဓာတ်ကြီးလေးပါး ဆွမ်းတော်ကပ်နည်းများကိုလည်း စာအုပ်ငယ်များ ထုတ်ဝေ၍ ဘုရားစာအုပ်ဆိုင်တိုင်းမှာ တွေ့ရပါသည်။ ၄င်းဆွမ်းတော်ကပ်နည်းမှာ ဘုရားဟော ဟုတ်-မဟုတ်၊ လောကီ-လောကုတ္တရာ မည်သို့ အကျိုးရှိပုံများကို သိလိုပါ၍ လျှောက်ထားအပ်ပါသည်ဘုရား။
(ဒေါ်တင်ရွှေ-ရန်ကင်း)

(ဖြေ)
ဓာတ်ကြီးလေးပါး ဆွမ်းတော်ကပ်နည်းမှာ ဘုရားဟော မဟုတ်ပါ။ ဓာတ်ကြီးလေးပါး ဆွမ်းတော်ကပ်ခြင်း၏ အဓိက ရည်ရွယ်ချက်ကို မေးကြည့်ရာ မိမိခန္ဓာ၌ ရှိသော ဓာတ်ကြီးလေးပါး ကျန်းမာစေရန် ရည်ရွယ်ချက်ဖြင့် ကပ်လှူခြင်း ဖြစ်ပါသည်။ ထိုကပ်လှူခြင်းမှာ-
ပထဝီဓာတ် ၂ဝ-ရှိ၍ အသီးမျိုးစုံ၊ မုန့်မျိုးစုံ ၂ဝ။
အာပေါဓာတ် ၁၂-ရှိ၍ သောက်တော်ရေနှင့် ဖျော်ရည်မျိုးစုံ ၁၂-ခွက်။
ဝါယောဓာတ် ၆-မျိုးရှိ၍ ယပ်အမျိုးမျိုး ၆-ချောင်း။
တေဇောဓာတ် ၄-ပါးရှိ၍ အလင်းတိုင် ၄-မျိုးစသည်ဖြင့် လှူဒါန်းကြသည်ဆို၏။

ရဟန္တာအရှင်မြတ်များကိုလည်း ရွေးချယ်၍ လှူရသည်ဟု ဆိုပါသည်။ လောကီဂိုဏ်းဆရာများ၏ ကြံဆ၍ ယူသော အယူအဆများသာ ဖြစ်ပါသည်။ သို့သော် ဘုရားရှင်နှင့် ရဟန္တာအရှင်မြတ်များအား ရည်မှန်းလှူဒါန်းခြင်းဖြစ်၍ စေတနာဓာတ်အား ပါလျှင် ပါသလောက် ဒါနအကျိုး ရရှိနိုင်ပါသည်။

သို့သော် ကျန်းမာရေး ကောင်းလိုလျှင် မြတ်စွာဘုရားရှင် ဟောကြားထားသည့် အတိုင်း ဆေးဝါးဓာတ်စာအမျိုးမျိူးနှင့် ဂိလာနပုဂ္ဂိုလ်တို့၏ လိုအပ်ရာရာ အသုံးအဆောင်ပစ္စည်းများကို လှူဒါန်းလျှင် အသက်ကိုရှည်စေ၍ ကျန်းမာရေးလည်း ကောင်းမွန်ပါမည်။
သီဟိုဠ် (သီရိလင်္ကာ) နိုင်ငံတွင် ဝသဘမင်းကြီးကို ရဟန္တာအရှင်မြတ်များက ရေစစ်၊ ကျောင်း၊ ဂိလာနပုဂ္ဂိုလ်အတွက် လိုအပ်သော ဆေးဝါးဓာတ်စာ အသုံးအဆောင်အမျိုးမျိုး၊ ယိုယွင်းပျက်စီးနေသော ဘုရား၊ ကျောင်းကန်၊ ဇရပ်၊ တန်ဆောင်းများ ပြုပြင်ခြင်းနှင့် ငါးပါးသီလ၊ ရှစ်ပါးသီလများကို ဆောက်တည်ပါက အသက်ရှည် ကျန်းမာကြောင်းကို ဟောကြားပါသည်။ ထို့နောက် လိုက်နာကျင့်သုံးရာ နန်းစံသက် ၁၂-နှစ်သာ စံရမည်ဟု ဗေဒင်ဆရာများက ဟောထားသော်လည်း နန်းစံသက် ၄၄-နှစ်ထိ အသက်ရှည်၍ ကျန်းမာစွာ နေခဲ့ရသည်။ ကျန်းမာသက်ရှည်လိုပါက ဘုရားဟော ရှိသည့်အတိုင်းသာ ကျင့်ကြပါလေကုန်။
********************************************************************************

(မေး) (သံဃိက အုန်းသီး)
အရှင်ဘုရား၊ သံဃိကအုန်းသီး စသည်ကို မသိအောင်စားသော ရဟန်းတို့အား အဘယ်အပြစ်သင့်ကြောင်း ဖြေကြားပေးတော်မူပါဘုရား။ နောက်ပြီး သံဃာ-အရ သာမဏေများပါ ပါဝင်-မပါဝင်ကိုလည်း မေတ္တာရှေ့ထား ဖြေကြားတော်မူပါ အရှင်ဘုရား။
( သောတုဇနဘိက္ခု-ကျောက်ပန်းတောင်း)

(ဖြေ)
သံဃိက အုန်းသီးစသည်ကို မသိအောင်စားရာ၌ ဝိနယပိဋက ပါရာဇိကပါဠိတော် နှာ-၈၂ တွင် အာဂန္တုကာ ဘိက္ခူ သံဃဿ အမ္ဗံ (ဇမ္ဗုဇံ၊ လဗုဇံ၊ ပနသံ၊ တာလပက္ကံ) ။ပ။ ကိံ စိတ္တာ တုမှေ ဘိက္ခဝေတိ။ ပရိဘောဂတ္ထာယ မယံ ဘဂဝါတိ။ အနာပတ္တိ ဘိက္ခဝေ ပရိဘောဂတ္ထာယာတိ။ ဟုဆိုသဖြင့် အာဂန္တု ရဟန်းတို့သည် သံဃိက သရက်သီး၊ ပိန္နဲသီး၊ ထန်းသီး၊ အုန်းသီး စသည်တို့ကို စားသုံးဖို့ထားသော အသီးတွေပဲ-ဟူသော အမှတ်စိတ်ထားဖြင့် ခွဲဝေစားသုံးခြင်းအတွက် အပြစ်မသင့်ဟု ဆိုပါသည်။

ဤနေရာ၌ သံဃာများနှင့် ခွဲဝေစားသုံးခြင်းသာ အပြစ်မရှိခြင်းဖြစ်ပြီး တပါး နှစ်ပါးစသည်ြဖင့် ကျန်သောရဟန်းသံဃာများ မစားရအောင် မထေရ်ကြီးများ မသိအောင် ခိုးကြောင်ခိုးဝှက် စိတ်ထားဖြင့် စားသုံးလျှင်ကား ဝဋ္ဋဘေဒက ဒုကဋ်အာပတ်များ သင့်ရောက်နိုင်ပါသည်။

ထိုသံဃိက သရက်သီး၊ ပိန္နဲသီး၊ ထန်းသီး၊ အုန်းသီးများကို ရောင်းချလဲလှယ်၍ ဆွမ်း၊ သင်္ကန်း၊ ကျောင်း၊ ဆေး ပစ္စည်းလေးပါးအတွက် ရည်ရွယ်သတ်မှတ်ထားလျှင် ဤအသီးများကို ခိုးလိုစိတ်ဖြင့် စားသုံးမိပါက တန်ဖိုးအလိုက် ဒုက္ကဋ်၊ ထုလ္လစ္စည်း၊ ပါရာဇိကအာပတ်များ သင့်ရောက်ပါမည်။ စားသုံးဖို့ရာ ပစ္စည်းအနေဖြင့် စားသုံးမိလျှင်လည်း တန်ဖိုးအတိုင်း ပြန်လျော်ပေးသော်လည်း လျော်ပေးရမည်။ ထုလ္လစ္စည်းအာပတ်သော်လည်း သင့်ရောက်မည်-ဟု ပါရာဇိက အဋ္ဌကထာ ပ-အုပ် နှာ ၃၄ဝ-၌ ဆိုပါသည်။

သံဃောပုဒ်တွင် သာမဏေများ ပါ-မပါ ဆိုရာ၌ သုဏာတု မေ ဘန္တေ သံဃော-စသော ဉတ်ကမ္မဝါစာဖြင့် ရဟန်းခံ၊ သိမ်သမုတ်၊ ကထိန်ခင်းခြင်း စသော ကံကြီး ကံငယ် ဆောင်ခြင်းကိစ္စတို့၌ လာသည့် ကမ္မဝါစာ၌ ပါသော သံဃော-အရ သာမဏေများ မပါဝင်နိုင်ပါ။
သံဃိက ပစ္စည်းများကို ခွဲခြမ်းဝေဖန်သုံးစွဲရာ၌ သံဃော-အရ သာမဏေများ ပါဝင်နိုင်ပါသည်။

(မြတ်မင်္ဂလာ ၂ဝဝ၃-ခု နိုဝင်ဘာလ)

No comments: