Wednesday, March 17, 2010

စေတနာအကျိုး

အလယ်စုရွာ၏ တောင်ဘက်တွင် ဦးဖိုးဝ အိမ်ရှိသည်။ သူ၏အိမ်ဘေးတွင် ကြီးမားသော ကုက္ကိုပင်ကြီးများ ရှိသည်။ ထိုအပင်ကြီးများပေါ်သို့ မိုးဦးကျအချိန်တွင် ဗျိုင်းများ လာရောက်အသိုက်ဖွဲ့ကြသည်။ ဦးဖိုးဝ၏ သားများက ဗျိုင်းများကို ပစ်ခတ်ဖမ်းဆီး စားသောက်ကသဖြင့် ဗျိုင်းများ ထွက်ပြေးသွားကြသည်။ နောင်တွင် မလာဝံ့တော့ပေ။

နောက်လေးငါးရက်ခန့်အကြာတွင် ရွာမြောက်ဘက် ဦးချမ်းအေးတို့ အိမ်ဘေးရှိ မန်ကျဉ်းပင်ကြီးများဆီသို့ ဗျိုင်းများ လာကြပြန်သည်။ ဦးချမ်းအေးသည် ဘာသာရေးကိုင်းရှိုင်း၍ စိတ်သဘောထားကောင်းသူ ဖြစ်သည်။ သူ၏သားများအား တို့အိမ်ကို အိမ်သာလို့ ဧည့်သည်တွေလာကြတာကွ၊ တို့အရိပ်ခိုဖို့ လာကြတာကွ။ သူတို့ရဲ့ အသိုက်အမြုံကို မဖျက်ကြနဲ့။ ချမ်းချမ်းသာသာနေကြပါစေ။ စောင့်ရှောက်ကြ-ဟုမှာကြားထား၏။ သူ၏သားများကလည်း ဖခင်၏စကားကို လိုက်နာကြ၏။

နောင်အခါ ဗျိုင်းများသာမက အခြားငှက်ငယ်များလည်း လာရောက်ခိုနားကြ၏။ မကြာမီ သူတို့၏ အသိုက်အမြုံများတွင် ငှက်ကလေးများ ပေါက်ဖွားလာကြ၏။ ထိုငှက်ကလေးများအား ငှက်မကြီးများက အနီးအနားရှိ အင်းအိုင်များမှ ငါးများကို ချီယူလာကြ၍ ခွံ့ကျွေးကြ၏။

အချို့ငါးလေးများသည် ပါးစပ်အတွင်းသို့ မရောက်ဘဲ အပင်အောက်သို့ ပြုတ်ကျသည်။
ထိုသို့ ကျလာသောငါးလေးများသည် ဦးချမ်းအေးတို့ မိသားစုအတွက် ဟင်းစားရသည်။ နေ့စဉ်နှင့်အမျှ ရနေ၍ ငါးဟင်းဝယ်စားရန် မလိုတော့ပေ။ စားမကုန် ပိုလျှံသောငါးများကို ငါးပိ၊ ငါးခြောက်ပင်လုပ်၍ စားနိုင်သည်။

ဦးချမ်းအေး၏ စိတ်စေတနာ ကောင်းမှုတို့ကြောင့် လက်ငင်းအကျိုး ခံစားခွင့် ရရှိပါတော့သည်။

(ဆရာအေး-ကျုံပျော်)
(မြတ်မင်္ဂလာ ၂၀၀၄-နိုဝင်ဘာလ)

No comments: