Monday, March 22, 2010

မိဘကျေးဇူးသိသော တိပိဋကဓရ မင်းကွန်းဆရာတော်ကြီး

တိပိဋကဓရ ဓမ္မဘဏ္ဍာဂါရိက မင်းကွန်းဆရာတော်ကြီးသည် မွေးမိခင်အား ကျေးဇူးဆပ်ပြုစုခဲ့သော အရှင်မြတ် ဖြစ်သည်။ တခါတရံ ဆရာတော်ကြီးသည် ရန်ကုန်သို့ကြွရောက်လျှင် မိခင်ကြီးအတွက် ခါးဝတ်ထမီနှစ်ထည်၊ အင်္ကျီ နှစ်ထည်ဝယ်ပြီး ပေးလှူလေ့ရှိသည်။ ထိုအခါ မိခင်ကြီးက ၀မ်းသာမဆုံး၊ ကြည်နူးမဆုံး ဖြစ်ခဲ့သည်။

တခါတွင် ဆရာတော်ကြီးသည် မိခင်ကြီး မိမိသမီးအိမ်မှာ ကပ်မှီနေရခြင်းမျိုး မဖြစ်စေလို၍ မိခင်အတွက် သစ်သားအိမ်တလုံး သီးသန့်ဆောက်ပေးလေသည်။ ထိုအချိန်က အိမ်၏ ကုန်ကျစရိတ်မှာ ၁၃၂၅-ကျပ် ဖြစ်၏။ အမနှင့် ယောက်ဖကိုလည်း ကုသိုလ်မပါရ မဖြစ်ရလေအောင် ထည့်ဝင်ချင်လျှင် ၂၅-ကျပ် အမတို့ကို ထည့်ဝင်ဖို့ ပြော၏။

ညီအရင်း ဦးဘသင်ကိုလည်း အိမ်ဆောက်ပြီးသည့်အခါ တတ်နိုင်သလောက် ထည့်ဝင်ချင်လျှင် ထည့်နိုင်ကြောင်း ပြောပြသည်။ သုံးရက်ကြာမှ ဦးဘသင်က အမေအလိုရှိတဲ့အခါ သုံးစွဲဖို့ ငွေတရာ ပို့လိုက်ရင် မကောင်းဘူးလား -ဟု ဆရာတော်အား ပြန်လျှောက်သည်။ ဦဘသင်သည် ပဲခူးမြို့ က၀နယ် သပြေကန်ရွာ၌ လယ်ဧက ၅၀- ပိုင်သည့် မြေပိုင်ရှင်ဖြစ်သည်။

ဆရာတော်ကြီး၏ မိခင်သည် အသက် ၇၄-နှစ်မှာ ကွယ်လွန်အနိစ္စရောက်သည်။ မိခင်၏ ဈာပနကိစ္စ သဂြိုဟ်ရန် ညီအကိုမောင်နှမသုံးယောက် တွေ့ဆုံကြပြီး အကောင်းဆုံးဖြစ်အောင် ဆောင်ရွက်ခဲ့သည်။ မိခင်ဈာပနကိစ္စအတွင်း ညီဖြစ်သူ ဦးဘသင်မှာ အဆက်မပြတ် ငိုပါတော့သည်။ မနက်ငို၊ နေ့လယ်ငို၊ ညနေငိုလျက် ဖြစ်နေ၏။

ထိုအခါ ဆရာတော်ကြီးက ငိုရမှာပေါ့ကွာ၊ ငါတော့ တသက်လုံး မငိုရအောင် လုပ်ခဲ့တယ်။ ငါကတော့ မငိုပါဘူး။ ငါ့မိခင်အပေါ် လိုသည်ထက် ပိုပြီး ပြုစုထားတာဖြစ်လို့ ငါ ငိုဖို့ မလိုပါဘူးကွာ။ မင်းတော့ ငိုပေတော့ ငိုပေတော့။ မင်းက န၀ကမ္မငွေ ၁၀၀-ဆိုပြီး ငွေတရာသာ ထောက်ပံ့သူဆိုတော့ ငိုပေါ့ကွာ-ဟု ပြောခဲ့သည်။ ထိုအကြောင်းကို လူအများ သံဝေဂရစေရန် အလို့ငှါ ပြန်လည်တရားဟောကြားခဲ့သည်။

(အရှင်နန္ဒာစာရ-တောကျောင်း)
အကိုး။ ။ ၁၃၅၇-ခုနှစ် ဓမ္မဃောသက ဦးမောင်မောင်၏အိမ်၌ ဆရာတော်ကြီး ဟောသည့် မာတာပိတုသုတ္တန် တရားမှ။


(မြတ်မင်္ဂလာ ၂၀၀၇-ခု ဧပြီလ)

No comments: