Sunday, March 14, 2010

ဘာသာရေး ပြဿနာ ( ၆ )

(မေး) (လျူဒါန်းချိန် သင့်-မသင့်)
တပည့်တော် နေ့စဉ်နံနက် ၄း၃၀ အချိန်တွင် မြတ်စွာဘုရားကို
(၁) ဆီမီး၊
(၂) မျက်နှာသစ်တော်ရေနှင့် မျက်နှာသုပ်ပ၀ါ၊
(၃) သောက်တော်ရေ၊
(၄) မုန့်ဆွမ်း ဆက်ကပ် လှူဒါန်းပါသည်။ ထိုသို့ ပြုခြင်းသည် သင့်-မသင့်၊ ဘုရားရှင် သက်တော်ထင်ရှားရှိစဉ်က
ကျိန်းစက်ရာမှ ထ-မထ ဖြေကြားပေးတော်မူပါဘုရား။
( ကိုကျော်ဝင်း-စမ်းချောင်း)

(ဖြေ)
ဘုရားရှင် သက်တော်ထင်ရှားရှိတော်မူစဉ်က ဗုဒ္ဓကိစ္စငါးပါးတွင် နောက်ဆုံးကိစ္စဖြစ်သော ပစ္ဆိမယာမ်
(နံက် ၂-နာရီမှ ၆-နာရီအထိ) ကို သုံးပုံပုံ၍ ပထမအချိန် (နံနက် ၂-နာရီမှ ၃-နာရီ မိနစ် ၂၀-ထိ) အချိန်ကို တနေ့တညတာ ခန္ဓာကိုယ်၏ ညောင်းညာမှုတို့ကို ပယ်ဖျောက်ရန် စင်္ကြံလျှောက်တော်မူပါသည်။
ဒုတိယအချိန် (၃-နာရီ ၂၀-မိနစ်မှ ၄-နာရီ ၄၀-မိနစ်ထိ) ခန္ဓာကိုယ် ပင်ပန်းမှု ပြေပျောက်စေရန် ကျိန်းစက်တော်မူပါသည်။
တတိယအချိန် (၄-နာရီ ၄၀-မိနစ်မှ ၆-နာရီအထိ) ကျွတ်ထိုက်သော သတ္တ၀ါဝေနေယျများကို ကြည့်ရှုတော်မူပါသည်။
ထို့ကြောင့် ၄-နာရီ ၄၀-မိနစ်အချိန်လောက်မှာ ဘုရားရှင် ကျိန်းစက်ရာမှ ထတော်မူပါသည်။

ဆီမီး၊ မျက်နှာသစ်တော်ရေနှင့် မျက်နှာသုတ်ပ၀ါ၊ သောက်တော်ရေတို့ကို ကျိန်းစက်ရာမှ ထချိန် အချိန်ကိုက် လှူဒါန်းလိုလျှင် ၄-နာရီ မိနစ် ၄၀-တွင် လှူဒါန်းနိုင်ပါသည်။
မုန့်ဆွမ်းတို့ကိုတော့ ကျိန်းစက်ရာမှ ထချိန်ကို အဓိကမထားဘဲ အရုဏ်တက်ချိန်ဇယားအတိုင်း လှူဒါန်းခြင်းက ပို၍ သဘာဝကျပါသည်။
********************************************************************************

(မေး) (ပဋ္ဌာန်းရွတ်ဆိုပုံ မှန်-မမှန်)
တပည့်တော် နေ့စဉ်အိမ်မှထွက်တိုင်း လမ်းသွားရင်း နမော တဿ ဘဂ၀တော အရဟတော သမ္မာသမ္ဗုဒ္ဓဿ၊ ပဋ္ဌာန်း ၂၄-ပစ္စည်း၊ သမ္ဗုဒ္ဓေ ဂါထာတော်တို့ကို အခေါက်ရေ (၉၀) စီ ရွတ်ဆိုပူဇော်ပါသည်။ ပဋ္ဌာန်း ၂၄-ပစ္စည်းကို ၉-ခေါက်ထက်ပိုမရွတ်သင့်ဟု ပြောကြရာ မှန်-မမှန် ဖြေကြားပေးတော်မူပါဘုရား။
( ကိုကျော်ဝင်း-စမ်းချောင်း)

(ဖြေ) ဂုဏ်တော်များ၊ ပရိတ်၊ ပဋ္ဌာန်းတရားတော်များသည် များများပူဇော်နိုင်လေ ပို၍ အာနိသင်ထက်လေ ဖြစ်ပါသည်။
********************************************************************************

(မေး) (ဦးဦးဖျားဖျား ဟင်းမြည်းခြင်း)
ဘုရားနှင့် သံဃာတော်များအား ဆွမ်းဆက်ကပ်လှူဒါန်းရန် ချက်ပြုတ်ကြရာ၌ ဇွန်းဖျားဖြင့် ခပ်ပြီး စားဦးစားဖျားကို မြည်းကြည့်ခြင်းသည် အပြစ် ရှိ-မရှိ ဖြေကြားပေးတော်မူပါဘုရား။
(ကိုကျော်ဝင်း-စမ်းချောင်း)

(ဖြေ) ချက်ပြုတ်စဉ် အရသာကောင်း မကောင်း၊ အပေါ့ အငန် သိရုံမြည်းခြင်းမှာ အပြစ်မရှိပါ။ ချက်ပြုတ်ပြီးမှ စားချင်စိတ်ဖြင့် မြည်းဟန်ဆောင်ပြီး စားခြင်းငှါ မသင့်ပါ။
********************************************************************************

(မေး) (စိတ်)
စိတ်ကြောင့် လူ-နတ်-ဗြဟ္မာ-ငရဲ-တိရစ္ဆာန်-ပြိတ္တာ အမျိုးမျိုးဖြစ်ရသည် ဆိုသည်မှာ မှန်ပါသလား။ ဗုဒ္ဓဘာသာတွင် စိတ်ကို မည်ကဲ့သို့ ထိန်းသိမ်းရမည်ကို ဖြေကြားပေးတော်မူပါဘုရား။
(ညီညီစိုး-ညောင်လေးပင်)

(ဖြေ)
သက်ရှိသက်မဲ့ လောကကြီးတခုလုံးကို စိတ်က ဦးဆောင်ပါသည်။ စိတ်ကြောင့်ပင် ကမ္ဘာလောကကြီး ဖြစ်ရပျက်ရသည်။ သတ္တ၀ါတို့သန္တာန်၌ လောဘ၊ ဒေါသ၊ မောဟ အကုသိုလ်တရားတို့ များလာသောကြောင့် ကမ္ဘာကြီးပျက်စီးရသည်။ သတ္တ၀ါတို့သန္တာန်၌ ကမ္ဘာလောကကြီးအသစ် ပြန်ဖြစ်စေလိုသော စိတ်ကြောင့်ပင် ကမ္ဘာသစ်ကြီး ပြန်လာရ၏။

မိမိ၏စိတ်က ငရဲ-တိရစ္ဆာန်-ပြိတ္တာ-ဘုံတို့ကို ကြိုက်နှစ်သက်သောစိတ်ကြောင့်ပင် ငရဲ-တိရစ္ဆာန်-ပြိတ္တာ-ဖြစ်ရ၏။ လူ-နတ်-ဗြဟ္မာ-အဖြစ်ကို ကြိုက်နှစ်သက်သော စိတ်ကြောင့်ပင် လူ-နတ်-ဗြဟ္မာ အမျိုးမျိုးတို့ ဖြစ်ရ၏။

ဤစကားရပ်၌ စောဒကတက်ဖွယ် ရှိပြန်သည်မှာ ငရဲ-တိရစ္ဆာန်-ပြိတ္တာ ဖြစ်ချင်သောစိတ်ကား လူတိုင်းတွင် မရှိသော်လည်း အဘယ်ကြောင့် ငရဲ-တိရစ္ဆာန်-ပြိတ္တာ-ဖြစ်ရပါသနည်း ဆိုသော် ငရဲ-တိရစ္ဆာန်-ပြိတ္တာကို ဖြစ်စေတတ်သော အကုသိုလ်ကံတို့ကို ပြုချင်စိတ်ရှိကြသောကြောင့်ပင် ငရဲ-တိရစ္ဆာန်-ပြိတ္တာ ဘုံသို့ရောက်စေတတ်သော အကုသိုလ်ကံတို့ကို ပြုဖြစ်ကြ၏။ ထိုသို့ပြုဖြစ်ခြင်းသည်ပင် ငရဲ-တိရစ္ဆာန်-ပြိတ္တာဘုံကို ကြိုက်နှစ်သက်သော စိတ်ဆန္ဒကြောင့် ဖြစ်ပါသည်။

ငရဲ-တိရစ္ဆာန်-ပြိတ္တာဘုံကို မကြိုက်မနှစ်သက်သောသူသည် ငရဲ-စသောဘုံသို့ ရောက်စေတတ်သော အကုသိုလ်ကံတို့ကို ပြုချင်စိတ်ရှိမည် မဟုတ်ပါ။
လောကကြီးတွင် (စိတ်) အမျိုးမျိုး ဆန်းကြယ်၍ လိုချင်မှု (တဏှာ) အမျိုးမျိုး ဆန်းကြယ်လာ၏။
လိုချင်မှု တဏှာအမျိုးမျိုး ဆန်းကြယ်၍ ကုသိုလ်-အကုသိုလ်(ကံ) အမျိုးမျိုး ဆန်းကြယ်လာ၏။
ထို (ကံ) အမျိုးမျိုး ဆန်းကြယ်၍ လူ-နတ်-ဗြဟ္မာ-ငရဲ-တိရစ္ဆာန်-ပြိတ္တာ (သတ္တ၀ါ) အမျိုးမျိုး၊
သက်ရှိသက်မဲ့ လောကကြီး အမျိုးမျိုး အဆန်းတကြယ် ဖြစ်လာရ၏။
တလောကလုံး ဆန်းကြယ်သမျှ စိတ်က ပြုလုပ်ခြင်း ဖြစ်ပါ၏။

ထို့ကြောင့် ဘုရားရှင်က စိတ္တံ ဒန္တံ သုခါဝဟံ-စိတ်ကို ကောင်းကောင်းထိန်းသိမ်း၍ (ဆုံးမ၍) အသုံးချသွားနိုင်လျှင် ချမ်းသာမှာ မလွဲဧကန် ဖြစ်ပါ၏။ စိတ်ကို ထိန်းသိမ်းရန် နည်းများမှာ သီလအကျင့် အမျိုးမျိုး၊ မေတ္တာဘာဝနာစသော သမထဘာဝနာ အမျိုးမျိုး၊ ၀ိပဿနာ ဘာဝနာ အမျိုးမျိုးတို့ကို ပွားများကျင့်ကြံသောအားဖြင့် ထိန်းသိမ်းရပါမည်။
********************************************************************************

(မေး) (သက်သတ်လွတ်နဲ့ သီလ)
အရှင်ဘုရား၊ သက်သတ်လွတ်စားခြင်းထက် ဥပုသ်သီလ ဆောက်တည်ခြင်းက ပို၍ အကျိုးရှိသည်ဟု တပည့်တော်မ ယူဆပါသည်။ မှန်-မမှန် ဖြေကြားပေးတော်မူပါ အရှင်ဘုရား။
(ခွါညို-စစ်ကိုင်းမြို့)

(ဖြေ)
မှန်ပါသည်။ သက်သတ်လွတ် စားခြင်းနှင့်ပတ်သက်၍ ဘုရားရှင် သက်တော်ထင်ရှားရှိစဉ်ကပင် ဒေ၀ဒတ်က- သံဃာတော်များကို ရာသက်ပန် သက်သတ်လွတ် ဘုဉ်းပေးသုံးဆောင်ဖို့ ပညတ်ပေးရန်-တောင်းဆိုခဲ့ဖူးပါသည်။ မြတ်စွာဘုရားရှင်က လက်မခံခဲ့ပါ။

မိမိအတွက် သီးသန့်ရည်ရွယ်၍ သတ်သည်ကို မြင်သော်၎င်း၊ ကြားသော်၎င်း၊ မိမိယုံမှားသံသယ ၀င်မိလောက်အောင် အခြေအနေမျိုးရှိနေလျှင်သော်၎င်း ထိုသားငါးဟင်းကို မစားကောင်းပါ။

မြင်ခြင်း၊ ကြားခြင်း၊ ယုံမှားသံသယဖြစ်ခြင်း၊ အလျဉ်းမရှိပါက ထိုသားငါးဟင်းကို စားကောင်းပါသည်။
သို့သော်-သက်သတ်လွတ်စားခြင်း၏ အကျိုးတရားများလည်း ရှိပါသည်။ ဆရာတော်အချို့ ကျန်းမာရေးအတွက်၊ သွားနာသက်သာရန်အတွက်၊ အသီးအနှံများသာ စားကြပါသည်။ အသက်ရလာသည်နှင့်အမျှ အဆီဓာတ်များပြားလာရာ အသီးအနှံများသာ စားခြင်းဖြင့် အဆီဓာတ်ကို လျော့ချနိုင်ပြီး သွေးတိုး-နှလုံး-လေငန်း စသော ရောဂါအမျိုးမျိုးကို ကင်းဝေးစေနိုင်ပါသည်။
လယ်တီဆရာတော်ဘုရားကြီးက နွားသားကို ကျေးဇူးရှင်ဖြစ်၍ မိဘ၏အသားကို စားသည်နှင့်တူသောကြောင့် မစားသင့်ကြောင်း နွားမေတ္တာစာ ရေးသားတော်မူခဲ့၏။
မင်းကွန်းတိပိဋက ဆရာတော်ဘုရားကြီးကလည်း ကိုယ်တိုင်ပင် အသီးအနှံများသာ စားပြီး နွားသားကို ကျေးဇူးရှင်ဖြစ်၍ မစားရန်နှင့် ၀က်သားကို လေငန်းရောဂါ၊ သွေးကြောပိတ်ရောဂါ အမျိုးမျိုးဖြစ်စေတတ်၍ မစားရန် တပည့်များကို မိန့်ကြားတော်မူသည်။

ထို့ထက် သတ္တ၀ါအားလုံး၏ အသားကို မစားဘဲ ရှောင်ကြဉ်နိုင်ခြင်းသည် ကောင်းပါသည်။ မစားဘဲ ရှောင်ကြဉ် နိုင်သူများလျှင် သတ္တ၀ါအများစု အသက်သေရမှု နည်းပါးသွားသဖြင့် သတ္တ၀ါတို့အပေါ် ကရုဏာထားရာ ရောက်ပါသည်။
သက်သတ်လွတ်စားခြင်း၊ မစားခြင်းကို အငြင်းအခုံပြုစရာ မဟုတ်ပါ။ အပြစ်လွတ်သောနည်းဖြင့် သားငါးဟင်းကို စားနိုင်ပါသည်။ မေတ္တာဓာတ်၊ ကျန်းမာရေး အသိစိတ်ဓာတ်ဖြင့် သက်သတ်လွတ်စားခြင်းသည်လည်း ကောင်းပါသည်။

ဥပုသ်စောင့်ခြင်းကား သီလအကျိုးတရား ဖြစ်ပါသည်။ ပို၍ အကျိုးကြီးသည်မှာ မှန်ပါသည်။
********************************************************************************

(မေး) (အိမ်ဘုရားဆောင်တွင် ဆည်းလည်းဆွဲလို့ ရ-မရ)
အိမ်ဘုရားဆောင်တွင် ဆည်းလည်း လှူဒါန်းလိုပါ၍ ရ-မရ သိချင်ပါသည် ဘုရား။
(မရွှေစင်မိုးဦး-သန်လျင်)

(ဖြေ)
ဆည်းလည်းကို ဘယ်နေရာမှာ လှူဒါန်းရမည်၊ ဘယ်နေရာမှာ မလှူဒါန်းကောင်း စသည်ဖြင့် သတ်မှတ်ချက် မရှိပါ။ လှူလိုသော နေရာတွင် လှူဒါန်းကောင်းပါသည်။
********************************************************************************

(မေး) (ကျန်းမာသူနှင့် မကျန်းမာသူ)
လောက၌ အချို့သူများ ဒေါင်ဒေါင်မြည် ကျန်းမာကြပါသည်။ အချို့မှာ တရှောင်ရှောင်နှင့် လူမမာ ဖြစ်နေရပါသည်။ အဘယ့်ကြောင့် ကွဲပြားခြားနားနေရပါသနည်း။ ဖြေကြားပေးတော်မူပါဘုရား။
(မရှင်မင်း၊ မရှင်နှင်း၊ မဂြူးဂြူး-ကန္တာရ၀တီ)

(ဖြေ)
ဘ၀အဆက်ဆက် သူတပါးအသက်ကို သတ်ဖြတ်ညှဉ်းဆဲခြင်း မပြုဘဲ ရှောင်ရှားခဲ့သူ၊ အသက်ရှည်ကြောင်း ဆွမ်း-ဆေး-ကျောင်း-ကောင်းမှုအမျိုးမျိုး ပြုခဲ့သူများ အသက်ရှည် ကျန်းမာကြပြီး
ပါဏာတိပါတ တည်းဟူသော သူတပါးအသက်ကို သတ်ဖြတ်ညှဉ်းဆဲခဲ့သူများ အသက်တိုကြပါသည်။

ယခုဘ၀မှာပင် အသက်ရှည်ကြောင်း ကျန်းမာကြောင်း ကောင်းမှုအမျိုးမျိုး ပြုလုပ်နိုင်ပါသည်။
အရှင်အနုရုဒ္ဓါ၏ ညီမတော် (ရောဟိနီ) မင်းသမီးကလေးသည် ရောဂါဝေဒနာ နှိပ်စက်ခံရသောအခါ အနုရုဒ္ဓါ မထေရ်က ဇရပ်တဆောင်ဆောက်၍ တံမြက်လှည်းခြင်း၊ ကြမ်းတိုက်ခြင်း၊ သောက်ရေ၊ သုံးရေ အမျိုးမျိုးထည့်ခြင်း၊ သံဃာ့ဝေယျာဝစ္စ၊ ဘုရားဝေယျာဝစ္စ အမျိုးမျိုး ပြုလုပ်ခြင်းဖြင့် ယခုဘ၀မှာပင် ရောဂါပျောက်ကင်းခြင်း အကျိုးများ ရရှိပါသည်။

သီဟိုဠ် (သီရိလင်္ကာ) ဘုရင် ၀သဘမင်းကြီးသည်လည်း ရေစစ်၊ ဆေးဝါးများ လှူဒါန်းခြင်း၊ စေတီဟောင်း၊ ကျောင်းဟောင်းများ ပြုပြင်ခြင်း၊ သီလများ စောင့်ထိန်းခြင်းကြောင့် ပုဏ္ဏားပညာရှင်များက နန်စံသက် ၁၂-နှစ်မျှသာ အသက်ရှည်မည်ဟု ဟောထားသော်လည်း နန်းစံသက် ၄၄-နှစ်ထိ ယခုဘ၀မှာပင် ရှည်ခဲ့ကြောင်း သိရှိရပါသည်။

အတိတ်က ကံကောင်းခဲ့သည်-မကောင်းခဲ့သည်ကို မသိနိုင်သော်လည်း ပစ္စုပ္ပန်မှာပင် အသက်ရှည်ကြောင်း ကောင်းမှုအမျိုးမျိုး ပြုလုပ်နိုင်ပါသည်။

( မြတ်မင်္ဂလာ ၂၀၀၄-ခု သြဂုတ်လ)

No comments: