Wednesday, March 17, 2010

ဣဿာအကျိုး

၂၀၀၂-ခုနှစ် နိုဝင်ဘာလ ကောက်စောစပါး ရိတ်သိမ်းရာသီတွင် ဖြစ်သည်။ စပါးရိတ်သိမ်းပြီးလျှင် သီးထပ်အနေဖြင့် ပဲမျိုးစုံကို စိုက်ပျိုးကြမည်ဖြစ်ရာ စပါးခင်းများကို သူ့ထက်ငါ အပြိုင်အဆိုင် ရိတ်သိမ်းနေကြ သည်။ ကောက်ရိတ်သူ ရှားပါးသော ကျွန်တော်တို့ရွာတွင် အခြားရွာမှ လယ်လုပ်သားများကို ခေါ်ယူငှါးရမ်း ထားကြရသည်။ လယ်သမားတဦးလျှင် အလုပ်သမား ၅-ယောက်မှ ၁၀-ယောက်ခန့်အထိ ငှါးရမ်းထားရသည်။ ဦးလှအောင်နှင့် ကျွန်တော်သည် လယ်ထဲမှစပါးများကို ရိတ်သိမ်းရန် သင့်-မသင့်ကြည့်၍ အိမ်သို့ပြန်ခဲ့ကြသည်။ လမ်းတွင် ဦးလှအောင်-က ဒီနှစ် ချစ်တင်လယ်တွေ ရိတ်ဖို့ကောင်းနေတာ မရိတ်သေးပါလားကွ။

ဦးလေး ဦးချစ်တင် ခြေထောက်မှာ မွေးကျွတ်နာ ပေါက်နေလို့ မထနိုင်ဘူး ဘကြီးရဲ့။
အေး-ဒါကြောင့်ကိုး၊ ဒီကောင်က စပါးဆိုလဲ ထိပ်သီးရအောင်လုပ်၊ မတ်ပဲဆိုလဲ ထိပ်သီးရအောင်လုပ်ပြီး ဘ၀င်မြင့်နေတာ။ ဒီနှစ်တော့ ကောက်ရိတ်နောက်ကျလို့ မတ်ပဲပါ နောက်ကျပြီး ရမှာ မဟုတ်တော့ဘူး။ ချစ်တင် ချစ်တင် ဒီနှစ်တော့ မင်း ငါ့လောက် မတ်ပဲ ရမှာမဟုတ်တော့ဘူး၊ ဟား ဟား ဟား။

ဘကြီး ဦးလှအောင်သည် သူ့စိတ်ကူးကို ဖွင့်ပြောရင်း အတော့်ကို သဘောကျသွားသည်။ တကယ်တော့ ဦးလှအောင်နှင့် ဦးချစ်တင်မှာ ညီအကိုအရင်းခေါက်ခေါက် ဖြစ်သည်။ အကိုဖြစ်သူ ဦးလှအောင်၏ ဇနီးက အ၀တ်အစားမှစ၍ လုပ်ငန်းအထိ ပြိုင်ဆိုင်ရာမှ ညီအကိုတွေပါ မသင့်မမြတ်ကြခြင်း ဖြစ်သည်။

တဦးက အိမ်သွပ်မိုးလျှင် တဦးကလည်း သွပ်မိုးသည်။ တဦးက တီဗွီဝယ်လျှင် တဦးကလည်း ၀ယ်ပြန်သည်။ သို့သော် ညီဖြစ်သူ ဦးချစ်တင်က အသီးအနှံတွေ ပိုရပြီး စီးပွားပိုဖြစ်သည်။ ထို့ကြောင့်လည်း ဦးလှအောင်က ဒီနှစ်တော့ သူကသာ ပိုပြီးရအောင် ကြုံးဝါးနေခြင်း ဖြစ်သည်။

ဦးချစ်တင်မှာ အနာညှော်မိ၍ ငန်းဝင်သောကြောင့် လယ်များကို မရိတ်သိမ်းနိုင်သေးပေ။ တရွာလုံး လယ်သမားများမှာ အနည်းနှင့်အများဆိုသလို ရိတ်သိမ်းကြပြီး ဖြစ်သည်။
ဦးလှအောင်ကတော့ သူ့လယ်ဧက ၂၀-ကို ရိတ်သိမ်း၍ ပြီးဆုံးသောနေ့၌ ကောက်ရိတ်သားတွေကို ဤသို့ပြော၏။

ဒီနေ့ ငါ့လယ်ရိတ်လို့ ပြီးဆုံးတဲ့နေ့မှာ ကောက်ရိတ်ခ တိုးပြီးပေးမယ်။ ကွင်းပေါက်ဈေး ၅၀၀-ကျပ်ရှိပေမယ့် ဒီနေ့ ငါက တစ်ကြိုးကို ၇၀၀-ကျပ် ပေးမယ်ကွာ။ တပင်မှ မရိတ်ရသေးတဲ့ ချစ်တင်လယ်ကျရင်တော့ တစ်ကြိုးကို ၁၀၀၀-ကျပ် ဈေးတောင်းကြပေတော့။ (အလျား အလံ ၂၀၊ အနံ အလံ ၁၀ တကွက်ကို တစ်ကြိုးခေါ်ပါသည်)

အမှန်တော့ အလုပ်သမားများကို စေတနာရှိ၍မဟုတ်ပါ။ ဦးချစ်တင် ဈေးကြီးမိ၍ ဒုက္ခရောက်စေလိုသော ဆန္ဒနှင့် ကောက်ရိတ်ဈေး တိုးပေးခြင်းဖြစ်သည်။ ထိုစဉ် မမျှော်လင့်ဘဲ အချိန်အခါမဟုတ် မိုးက ရွာတော့သည်။ နိုဝင်ဘာ ၁၆-ရက်နေ့မှစ၍ ရွာသောမိုးသည် ၂၃-ရက်နေ့အထိ ၈-ရက်တိတိ ရွာနေ၏။ ရိတ်ပြီးသော ကောက်လှိုင်းများ ရေမြှုပ်ကုန်၏။ စပါးများမှာလည်း အစို့ပေါက်တာပေါက်၊ ပုပ်တာပုပ် ဖြစ်ကုန်၏။

ရေထဲမှ စပါးများကို ကန်သင်းပေါ်ဆွဲတင်ကြရာ အလုပ်သမားရှားပါးသောကြောင့် ခရီးမတွင်လှပေ။ စပါးများ လေလွင့်ကြသည်။ ဧက ၂၀-ကျော် ရိတ်ထားသော ဦးလှအောင်၏ လယ်မှာ အဆိုးဆုံးဖြစ်သည်။ သူတပါးကို ဒုက္ခရောက်စေလိုသောကြောင့် လယ်တစ်ကြိုး ၇၀၀-ကျပ်နှင့် ဈေးတိုးပေးခဲ့သော ဦးလှအောင်တယောက် ယနေ့တော့ အလုပ်သမားများကို တနေ့ ၇၀၀-ကျပ်နှင့် ငှါးနေရသည်။ ကိုယ်မြှောက်သည့်ခဲ ကိုယ့်အပေါ် ပြန်ကျခြင်း ဖြစ်သည်။

ဦးချစ်တင်မှာတော့ စပါးများ မရိတ်ရသေးသောကြောင့် အပျက်အစီးမရှိပေ။ ငါတည်းဟူသော မာန်မာနထားပြီး သူတပါးအပေါ် မနာလိုဝန်တိုမှု ဣဿာများနှင့် လုပ်ဆောင်ခဲ့သော အလုပ်၏ ရလာဒ်မှာကား ဆုံးရှုံးမှုပင်တည်း။

( အင်ပင်-သန်းဌေးအောင်)
( မြတ်မင်္ဂလာ ၂၀၀၄-ခု နိုဝင်ဘာလ)

No comments: