Thursday, March 18, 2010

တင်ပါး အကြောညှပ်သော် ခံရမခက်လော

အင်္ဂလိပ်ဘာသာတွင် Static ဆိုသော ဝေါဟာရနှင့် Dynamic ဆိုသော ဝေါဟာရ ရှိပါသည်။ Static ဆိုသော ဝေါဟာရကို တည်ငြိမ်၍ လှုပ်ရှားမှုမရှိသော ကိစ္စရပ်များနှင့် ပတ်သက်သည့် အကြောင်းအရာများတွင် သုံးစွဲပြီး Dynamic ပညာကိုမူ လှုပ်ရှားနေသော ပစ္စည်းများ၊ အကြောင်းအရာများကို လေ့လာရာတွင် သုံးစွဲတတ်ကြ ပါသည်။ အချို့ကိစ္စရပ်များကို Static တခုတည်း လေ့လာလျှင် ပြီးပြည်စုံသော်လည်း အချို့ကိစ္စများကို လေ့လာရာတွင် Dynamic ပညာကို ထည့်သွင်းစဉ်းစားပါမှ ပိုမို သက်ဝင်ထိရောက်တတ်ပါသည်။

ဥပမာအားဖြင့် မြန်မာနိုင်ငံ၏ စီးပွားရေးကို ပြန်ပြောင်းလေ့လာလျှင် ဆိုရှယ်လစ် စီးပွားရေး စီမံကိန်းကာလအတွင်း အရေအတွက် တိုးတက်ရေးကိုသာ အာရုံစိုက်ခဲ့သဖြင့် အရေအတွက် တိုးတက်ခဲ့သော်လည်း ကမ္ဘာတ၀န်း တိုးတက်မှု နိမ့်ကျခြင်း၊ အရည်အသွေးမမီဖြင်း၊ တိုးတက်လာသူ လူဦးရေကို ထည့်သွင်းမစဉ်းစားခြင်း၊ ခေတ်အခြေအနေအရ လိုအပ်သော အရည်အသွေးပုံစံများ မရှိခြင်းတို့မှာ ရွေ့လျားနေသော ပတ်ဝန်းကျင် ထည့်သွင်းတွက်ချက်မှု အားနည်းချက် ဖြစ်ပါသည်။

စီးပွားရေးလောကသာမက အားကစားလောကကို လေ့လာလျှင် ယခင်ပင်ကို အရည်အသွေးနှင့် အင်အားကို အခြေခံသည့်ခေတ်မှ Dynamic ကို အခြေခံလေ့လာပြီး အရည်အသွေးအင်အား၊ လေ့ကျင့်မှုနှင့် နည်းပညာကို ပေါင်းစပ်နိုင်ခဲ့သဖြင့် စံချိန်စံညွှန်းများ တိုးတက်လာကြောင်း မျက်မြင်ထင်ရှား တွေ့ရှိနေကြရပါသည်။

ဆေးပညာ အစိတ်အပိုင်း တရပ်ဖြစ်သည့် အကြောပြင် (အနှိပ်ပညာ) ကို လေ့လာကြည့်လျှင် အကြောဝေဒနာ ဖြစ်ရခြင်းအကြောင်းရင်းများတွင် ထိခိုက်ဒဏ်ရာကြောင့်သော်၎င်း၊ ပတ်ဝန်းကျင် ရာသီဥတုကြောင့်သော်၎င်း၊ အစားအသောက် အနေအထိုင်ကြောင့်သော်၎င်း၊ ခန္ဓာကိုယ်၏ အစိတ်အပိုင်း တနေရာရာတွင် သွေးလည်ပတ်မှု နှေးကွေးလာသည်နှင့်အမျှ တင်းမာမှု၊ လေးလံမှု၊ ကိုက်ခဲမှုနှင့် နာကျင်မှုများ ဖြစ်ပေါ်စေတတ်ပါသည်။ ယင်းဝေဒနာရှင်များအား ပုံမှန်သွေးလည်ပတ်စေရန် ပြုပြင်ပေးလိုက်သည်နှင့် တပြိုင်နက် ဝေဒနာမှာလည်း ချက်ချင်းဖယ်ရှားပေးလိုက်သလို လျင်မြန်စွာ ပျောက်ကင်းစေနိုင်ပါသည်။

ဤသို့ ပြုပြင်ဖယ်ရှားရာတွင် လက်ရှိ သမားရိုးကျ အကြောပြင် (နှိပ်ကွက်) များမှာ တနေရာတည်းကို ဖိနှပ်သည့် Static Method ကို အသုံးပြုကြသဖြင့် မလိုလားအပ်သော နာကျင်မှုဝေဒနာများ လူနာတွင် ခံစားရတတ် ပါသည်။ တချို့ရောဂါများအနေဖြင့် ယင်းသို့ဖိနှပ်ခြင်းကြောင့် ထိရောက်မှုနည်းပါးပြီး တကြိမ်တည်းနဲ့ မသက်သာဘဲ နောက်ထပ်လူနာအား ချိန်းဆိုရသဖြင့် ဝေဒနာရှင်အတွက် ငွေကုန်၊ အချိန်ကုန်၊ လူပင်ပန်းစေသည့် မလိုလားအပ်သော နောက်ဆက်တွဲအကျိုးဆက်များ ခံစားရတတ်ပါသည်။

ယခုတင်ပြမည့် အကြောညပ်ခြင်း၊ အခုခေါ်တွင်သမုတ်သည့် ပေါင်အပြင်ကြောတင်း ဝေဒနာမျိုးမှာလည်း Static နည်းဖြင့် ဖိနှိပ်ပါက တကြိမ်တည်းဖြင့် သက်သာနိုင်မည်မဟုတ်ပါ။

(ပေါင်အကြောညပ် (ပေါင်အပြင်ကြောတင်း) ခြင်း တင်းတယ်ဆိုတာ ဘယ်လိုလဲ)
ထိုင်ရာမှ ထလျှင်သော်၎င်း၊ လမ်းလျှောက်လျှင်သော်၎င်း၊ အိပ်ရာထဲ လဲလျောင်းရာ၌ ဟိုဘက်သည်ဘက် စောင်းအိပ်သည့်အခါမျိုးတွင် တင်ပါးဆုံမှ ဒူးဆစ်အထိ အချို့သောသူများတွင် ခြေသလုံးအထိ ပေါင်အပြင်မှ အကြောတင်းနေသည့်အတွက် လှုပ်ရှားရန် အခက်အခဲ တွေ့နေတတ်ပါသည်။ ယင်းဝေဒနာမျိုးကို လိမ်းဆေးများ လိမ်းသည့်တိုင် သက်သာရန် ခက်ခဲပါသည်။ တခါတရံ တနှစ်ကျော်၊ နှစ်နှစ်အထိ ကြာမြင့်တတ်ပါသည်။

( ဘာဖြစ်လို့ ဖြစ်တာလဲ )
အောက်ပိုင်း အအေးပတ်သည့်လုပ်ငန်းကို လုပ်ကိုင်သူများ၊ Aircon ဖွင့်အိပ်သူများနှင့် လေတိုက်တွင် ကြာမြင့်စွာ နေထိုင်သူများအနေဖြင့် ခြေထောက်အောက်ပိုင်း အပူဓာတ်လုံလောက်စွာ မရရှိသဖြင့် အအေးပတ်ရာမှ စတင်၍ ဝေဒနာခံစားရတတ်ပါသည်။

(ဝေဒနာမဖြစ်အောင် ဘယ်လို ကာကွယ်မည်နည်း)
ခြေထောက် အအေးမမိစေရန် နွေးနွေးထွေးထွေး နေပါ။ သွေးပူစေရန် ခြေထောက်လေ့ကျင့်ခန်းများ ပြုလုပ်ပါ။ လိုအပ်လျှင် ခြေထောက်ကို မီးလှုံပါ။ လိုအပ်ပါက ခြေဖ၀ါးမှ ပေါင်အထိ ကြပ်ထုပ်ထိုးပေးပါ။

( ဘယ်လိုကုလျှင် ပျောက်မလဲ )
ယင်းဝေဒနာရှင်များဟာ လိမ်းဆေးလူးခြင်းဖြင့် ပျောက်ကင်းရန် မလွယ်ကူသည့်အပြင် တင်းနေသော အကြောကို နှိပ်ရုံမျှဖြင့်လည်း လျင်လျင်မြန်မြန် ပျောက်ကင်းမည်မဟုတ်ပါ။ တင်ပါးဆုံမှ တင်းနေသောအကြောကို လက်မနှင့် ဖိထောက်ထားပြီး ဒူးကို အထက်သို့ ကွေးလိုက် ဆန့်လိုက် (၅)ကြိမ် ပြုလုပ်ပေးပါက ချက်ချင်းသိသာ သက်သာလာပါမည်။ သို့ရာတွင် တကြိမ်တည်း လုပ်ရုံဖြင့် ပျောက်ကင်းနိုင်မည်မဟုတ်ပါ။ တင်းလာတိုင်း အနည်းဆုံး တနေ့ (၄-၅) ကြိမ် ပြုလုပ်မှ (-၂)ရက် (၃)ရက်အတွင်း ပျောက်ကင်းမည် ဖြစ်ပါသည်။

(ဆရာ ဦးအေးထွန်း)
( ဂမ္ဘီရ ၂၀၀၉-ခု ဇူလိုင်လ)

No comments: