Monday, March 22, 2010

မိဘကန်တော့ခြင်း၏ လက်တွေ့အကျိုး

အသက် ၈၇-နှစ်ရှိပြီဖြစ်သော မိခင်ကြီး ဒေါ်ခင်ညွန့်သည် ကလေးမြို့ အောင်မင်္ဂလာရပ်ကွက်မှ ပင်လုံနယ်မြေ ၁၆-ရှိ ကျွန်တော့အိမ်သို့ သီတင်းမကျွတ်ခင်လေးတွင် တခါရောက်၏။ ကျွန်တော်က ငွေ ၂၀၀၀-ကျပ်နှင့် စားဖွယ်ရာများ ကန်တော့၏။ ထို့နောက် သီတင်းကျွတ်တော့ ငွေ ၃၀၀၀-ကျပ်နှင့် စားဖွယ်ရာများ ကန်တော့၏။

ထို့နောက် မိခင်ကြီးသည် ဤနှစ်ဘက်မှာ ကျွန်တော့်အိမ်သို့ မကြာမကြာလာ၏။ လာတိုင်းပင် ကျွန်တော်နှင့် တကွ မိသားစုတို့က သဒ္ဓါတရား ထက်သန်စွာဖြင့် တတ်နိုင်သမျှ ကန်တော့၍ ထမင်းကျွေးပြီးမှ အိမ်သို့ ပြန်စေ၏။ ၈-၁၁-၂၀၀၆- နေ့ ယခုတခေါက်တော့ ကျွန်တော်က မြတ်မင်္ဂလာ၊ မင်္ဂလာမောင်မယ်၊ မြတ်ပန်းရဂုံ စာအုပ်များ၊ စာဖတ်သူများထံ လိုက်ပို့မည်ပြုစဉ် မိခင်ကြီး ရောက်လာ၏။ မိခင်ကြီးအား ငွေကျပ် ၅၀၀-နှင့် စားစရာမုန့်ထုပ် တထုပ်ကို ကန်တော့၏။ မိသားစုနှင့် အလ္လာပ သလ္လာပစကား ပြောစေခဲ့၏။ ထို့နောက် ကျွန်တော် စာအုပ်ပို့ထွက်ခဲ့သည်။

ကျွန်တော်သည် အငြိမ်းစားကျောင်းဆရာတဦး ဖြစ်သည်။ စာအုပ်လိုက်ပို့နေရင်း တပည့်ရင်းများနှင့် တွေ့ခဲ့သည်။ ဆရာမလေး ဒေါ်ကြင်မြအေး၊ အ-မ-က (၁) က မုန့်ထုပ် ၂-ထုပ်၊ ဆရာမလေး ဒေါ်အေးသီတာ (ကျီးကုန်း အ-မ-က) က ငွေ ၅၀၀-ကျပ်၊ ခြေမဦးခိုက် ကန်တော့သည်။ တဖန် ဆောက်လုပ်ရေးပစ္စည်း ရောင်းနေသူ တပည့်မလေး မအေးအေးမြင့်မူ-ကလည်း ငွေ ၁၀၀၀-တရိုတသေ ကန်တော့ခြင်းကို ခံရသည်။

ဪ-ငါကိုယ်တိုင်က မိခင်ကြီးကို ရိုသေစွာ ကန်တော့ပြီး အိမ်မှထွက်ခဲ့တာကြောင့် ကံ ကံ၏အကျိုးဆိုတာ ဒါပဲထင်ပါရဲ့-ဟု အပြန်လမ်းတွင် တွေးမိ၏။
အိမ်ပြန်ရောက်၍ နားနေစဉ် ကျောင်သားဟောင်း ကိုဘိုမင်းက ဆရာကြီး၊ ဆရာကြီး ဖိတ်စာပါခင်ဗျား၊ ကျောင်းသားဟောင်းများက ၁၂-၁၁-၂၀၀၈-နေ့၊ နေ့လည် ၁-နာရီမှာ ကန်တော့ပွဲ ကျင်းပမှာပါ။ ဆရာကြီးအနေနဲ့ ကျန်းမာရေးကြောင့် မသွားနိုင် မလာနိုင်ဆိုရင်လည်း ကားနဲ့ အကြို အပို့ လုပ်ပေးမှာပါခင်ဗျာ-ဟု ကျွန်တော့်အား ပြောကြားပြီး ဖိတ်စာတစောင် ပေးခဲ့သည်။

ဤကန်တော့ပွဲမှ ကျွန်တော် တခါဖူးမျှ မကြုံမရခဲ့ဘူးသော ငွေကျပ် ၇၀၀၀၀-ကျပ်နှင့် တဘက်စောင်တထည်၊ စပယ်ဖြူဆေးဆိုင်က ဘားပလက် ၁၀၀-၀င် တဘူး၊ ဖိုးလမင်းမုန့်ဆိုင်က အီလန်ဆပ်ပြာမွှေးကြီး တခဲ၊ ကိတ်မုန့်တလုံး ရခဲ့ပါသည်။ မိခင်ကို သဒ္ဓါတရား ထက်သန်စွာဖြင့် ကန်တော့ခဲ့ခြင်း၏ အကျိုးသက်ရောက်မှု ဖြစ်ပါသည်။

(သန်းရွှေဦး-ကလေး)
(မြတ်မင်္ဂလာ ၂၀၀၇-ခု ဧပြီလ)

No comments: