Wednesday, April 28, 2010

လောက၌ ရနိုင်ခဲသော ရတနာ ၅-ပါး

အခါတပါး၌ မြတ်စွာဘုရားသည် ဝေသာလီပြည် မဟာဝန်တော ပြာသာဒ်ကျောင်း၌ သီတင်းသုံးနေတော်မူ၏။ ထိုအခါ သာရန္ဒဒစေတီ၌ စုဝေးနေကြသော လိစ္ဆ၀ီမင်းသား ငါးရာတို့သည် ဤသို့ပြောဆိုနေကြ၏။

အချင်းတို့ လောက၌-
(၁) ဆင်ရတနာ
(၂) မြင်းရတနာ
(၃) ပတ္တမြားရတနာ
(၄) မိန်းမရတနာ
(၅) သူကြွယ်ရတနာ ဟူသော ရတနာ ၅-ပါးတို့သည် ရနိုင်ခဲ၏-ဟု ပြောဆိုနေကြ၏။

ထိုအခိုက် မြတ်စွာဘုရားရှင် ဆွမ်းခံကြွလာသည်ကိုမြင်၍ လိစ္ဆ၀ီမင်းသားတို့သည် မြတ်စွာဘုရားကို သာရန္ဒဒစေတီသို့ ကြွပါရန် ပင့်ဆောင်ကြကုန်၏။

ြုမတ်စွာဘုရားက လိစ္ဆ၀ီမင်းသားတို့၊ အဘယ်စကားဖြင့် စည်းဝေးနေကြသနည်း-ဟု မေးတော်မူသည်။ လိစ္ဆ၀ီမင်းသားတို့က ရနိုင်ခဲသော ရတနာ ၅-ပါးအကြောင်းကို ပြောဆိုနေကြပါသည်ဘုရား-ဟု လျှောက်ထား ကြကုန်၏။ ထိုအခါ မြတ်စွာဘုရားက-

မင်းသားတို့၊ ကာမဂုဏ်၌ စိတ်ဝင်စားသောသူတို့သည် ကာမဂုဏ်အကြောင်းကိုသာလျှင် ပြောတတ်ကြကုန်၏။
လောက၌-
(၁) သိမြင်ဖွယ်မှန်သမျှကို ကိုယ်တိုင်မှန်စွာ သိမြင်နိုင်သော မြတ်စွာဘုရားရှင် ပွင့်ရန် ခက်ခဲ၏။
(၂) မြတ်စွာဘုရား ဟောကြားသော တရားတော်ကို တဆင့်ပြန်၍ ဟောကြားတတ်သူ ပုဂ္ဂိုလ်ကို ရခဲ၏။
(၃) မြတ်စွာဘုရား၏ တရားကို သိမြင်နားလည်သူ ရခဲ၏။
(၄) မြတ်စွာဘုရား၏ တရားတော်ကို သိသော်လည်း ကျင့်ကြံအားထုတ်သူ ရခဲ၏။
(၅) သူတပါး၏ ကျေးဇူးကို သိတတ်၊ ထိုထက် ပေးဆပ်တတ်သူ ရခဲ၏။

မင်းသားတို့ ဤပုဂ္ဂိုလ် ၅-မျိုးတို့သည်သာ ရနိုင်ခဲသော ဖြစ်ပေါ်ရန် ခက်ခဲသော ရတနာ ၅-ပါးမည်၏-ဟု ဟောတော်မူသည်။
ကျမ်းကိုး။ ။ အင်္ဂုတ္တရ၊ ပဉ္စကနိပါတ်၊ သာရန္ဒဒသုတ်။

ဦးငွေအောင်မွန်
( မြတ်မင်္ဂလာ ၂၀၀၇-ခု ဇွန်လ)

No comments: