Thursday, April 8, 2010

ကျွန်တော်နဲ့ အသည်းကင်ဆာရောဂါ

၂၀၀၆-ခုနှစ် အောက်တိုဘာလထုတ် မြတ်မင်္ဂလာစာစောင် အတွဲ-၂၂၊ အမှတ်-၄-တွင် ဆောင်းပါးရှင် ကျော်လှသန်းဦး-ကင်ဆာဝေဒနာရှင်၏ စေတနာ ခေါင်းစဉ်ဖြင့် အင်္ဂလန်နိုင်ငံ လိ(ဒ်စ်)ရော့ဝဲမြို့မှ မစ္စစ် ဂျိန်းတွင်လင်ဆန်း (Jane Tom Linson) ဆိုသူ အမျိုးသမီးအကြောင်း ဖတ်ရသည်။

ဂျိန်းသည် အံ့ချီးဖွယ်အမျိုးသမီးဖြစ်သည်။ လွန်ခဲ့သော ၆-နှစ်ကျော်က ရင်သားကင်ဆာရောဂါ ပြင်းထန်စွာ ဖြစ်ပွားသဖြင့် ဆရာဝန်ကြီးများက ၆-လသာ အသက်ရှင်နိုင်သည်ဟု မှတ်ချက်ပြုထားသည်။ သို့ရာတွင် သူမ စိတ်ဓာတ်မကျ။ ခွဲစိတ်မှု ခံယူဆဲကာလမှာပင် ပရဟိတလုပ်ငန်းများအတွက် ရန်ပုံငွေ ရှာဖွေရေးအဖွဲ့တွင် ပါဝင်သည်။ သူမ၏ ကောင်းမှု စိတ်ဓာတ်အားမာန်၊ ဆရာဝန်ကြီးများ၏ ကုသပေးမှု ဆေးစွမ်းအားကြောင့် ယခုတိုင် အသက်ရှင်နေ၏။ အာဖရိကတလွှား မိုင် ၄၂၀၀-စက်ဘီးစီး ရန်ပုံငွေရှာရေး ခရီးဆက်မည်ဖြစ်သည်။ ရောဂါဖြစ်၍ ကုသဆဲကာလမှာပင် မိုင် ၂၅၀၀-စက်ဘီစီးပြိုင်ပွဲ ၀င်ရောက်ယှဉ်ပြိုင်ခဲ့၏။ သူမ၏ စေတနာနှင့် ဇွဲသတ္တိကို ဂုဏ်ပြုသောအားဖြင့် ဗြိတိန်ဘုရင်မကြီးက ၂၀၀၃-ခုနှစ်တွင် (BME) ဘွဲ့ ချီးမြှင့်ခဲ့သည်။ အိုလံပစ် အထူးချွန်ဆုံးဆုကိုလည်း ပူးတွဲရခဲ့ကြောင်းများပါ ဖတ်ရှုခဲ့ရသည်။

ယင်းဆောင်းပါးဖတ်ပြီး မိမိစာရေးသူ တင်ပြလိုသည်မှာ မိမိကိုယ်တိုင် အသည်းကင်ဆာရောဂါ ဖြစ်ပွားခဲ့သည်။ နိုင်ငံခြားသွားရောက် ကုသရန် ငွေမရှိပါ။ မြန်မာနိုင်ငံမှာပင် မြန်မာဆရာဝန်ကြီးများ ကုသပေးမှုကို ခံယူ၍ အသက်ရှင်နေပါသည်။ ဤဆောင်းပါးဖြင့် ဆရာဝန်ကြီးများ၏ ကျေးဇူးကိုလည်း ဆပ်လို၍ တင်ပြပါသည်။ အသည်း၊ အဆုတ်၊ ရင်သား စသည့် ကင်ဆာရောဂါနှင့် အခြားသောရောဂါများ ဖြစ်ပွား၍ အဆိုးလောကဓံ တရားနှင့် ရင်ဆိုင်ရပြီဆိုလျှင် ကြံ့ကြံ့ခိုင် စိတ်ထားဖြင့် အချည်းနှီးသေရခြင်းမျိုး မဖြစ်ရလေအောင် ပြုဖွယ်ကိစ္စမှန်သမျှ ပြုလုပ်ပါ။ စနစ်တကျ ကုသမှု ခံယူကြပါ။ သေမင်းနှင့် ရင်ဆိုင် အနိုင်တိုက်ခိုက်နိုင်ရေး အတွက် သမထဘာဝနာ-မှ ၀ိပဿနာဘာဝနာ-သို့ တက်လှမ်း၍ တရားအားထုတ်ကြပါ။ မဟာကုသိုလ်ထူး မဟာသရဏဂုံတော်ကြီးကိုလည်း ပူဇော်ကြပါဟူ၍ တိုက်တွန်းလိုပါသည်။ ကျွန်တော်၏ ဖြစ်ရပ်မှန်ကိုလည်း တင်ပြအပ်ပါသည်။

ကျွန်တော်သည် ၆-၉-၉၆ နေ့မှစ၍ လယ်တီမဟာသရဏဂုံတော်ကြီး ပါဠိရွတ်ဆိုမှုကို တနေ့တကြိမ် မှန်မှန်ပူဇော်ခဲ့သည်။ ပါဠိစာပေများ၏ အနက်အဓိပ္ပါယ်များကိုလည်း နားလည်အောင် ဖတ်ရှုဆင်ခြင်ခဲ့သည်။ ၃-နှစ်အကြာ ၁၃-၄-၉၉ နေ့တွင် အပြင်းအထန် လေအောင့်သည်။ ရန်ကုန်ဆေးရုံကြီးသို့ တက်သည်။ ပါမောက္ခ ဒေါက်တာဦးကြည်စိုး စစ်ဆေးရာ အသည်းအနာဖြစ်နေသည်။ ခွဲစိတ်မှုမပြုလျှင် ၆-လသာ အသက်ရှင်နိုင်ကြောင်း သိရသည်။

၃-၅-၉၉ နေ့တွင် ရန်ကုန်ဆေးရုံကြီးမှာပင် ပါမောက္ခ ဒေါက်တာဦးရဲဖြင့်၊ ဒေါက်တာ ဦးမင်းသူ၊ ဒေါက်တာ ဒေါ်သီတာအောင်နှင့် ဒေါက်တာ ဒေါ်အိန္ဒြာကျော်တို့အဖွဲ့က အသည်းကို သုံးပုံတပုံ ဖြတ်တောက်ကုသသည်။ ဓာတ်ခွဲခန်းအဖြေအရ အသည်းကင်ဆာ ဖြစ်နေသည်။ ၁၂-၅-၉၉ နေ့တွင် ကင်ဆာဓာတ်ရောင်ခြည်ဌာန၊ တွဲဘက်ပါမောက္ခ ဒေါက်တာဦးစိုးအောင်နှင့်ပြပြီး ကင်ဆာဌာန လူနာမှတ်ပုံတင် ၉၄၄/၉၉ ဖြင့် ဆက်လက်ကုသည်သည်။ ဆေးရုံတွင် ကင်ဆာဆေးသွင်း၊ အိမ်တွင်လည်း ဒေါက်တာ ဦးသန်းဝင်းညွန့်နှင့် ဒေါက်တာ ဦးသောင်းဝင်းတို့ ဆေးသွင်းသည်။ ကင်ဆာဆေးများကို ၁၉၉၉-နှစ်ကုန်အထိ စားသည်။ သံဃာ့ဆေးရုံအုပ် ဒေါက်တာ ဦးခင်မောင်အေး၊ ဒေါက်တာ ဦးစောကျော်အောင်၊ ဒေါက်တာ ဦးတင့်ဇော်တို့ (UI-trasound) အကြိမ်ကြိမ်ရိုက်၍ စစ်ဆေးသည်။ ဒေါက်တာ ဦးစိုးအောင်ထံ အကြိမ်ကြိမ်ပြ၍ ကုသမှုခံယူခဲ့ပါသည်။ ကျွန်တော်သည် မြန်မာပြည်က ဆရာဝန်ကြီးများ ညွှန်ကြားသည့်အတိုင်း လိုက်နာ၍ စနစ်တကျ ကုသမှုခံယူရင်း လယ်တီမဟာသရဏဂုံတော်ကြီးကို ယုံကြည်စွာ ရွတ်ဆိုခဲ့ပါသည်။

ကုသမှုခံယူနေစဉ်ကာလတွင် ကျွန်တော်သည်-
သေမင်းနှင့် အကြိမ်ကြိမ် စစ်ခင်းခဲ့ရ၏။ နေ့စဉ်ပူဇော်မြဲ မဟာသရဏဂုံတော်ကြီး မပျက်မကွက် ပူဇော်နှလုံးသွင်းနေခဲ့၏။ ယခုအခါ ပူဇော်ခြင်း ၁၀-နှစ်ပြည့်ခဲ့ပြီ။ ကံ-စိတ်-ဥတု-အာဟာရ မျှတအောင် နေထိုင်ခဲ့သည်။
၂၀၀၂-ခုနှစ်မှစ၍ နံနက်တိုင်း ၁-နာရီခန့် မှန်မှန် လမ်းလျှောက်နေသည်။ ဓုတင်ဆောင်မထေရ်ကြီး နဘူးကင်းတောရ ဆရာတော်ဘုရားကြီးရေးသည့် ကျမ်းစာများကို ၉-ကြိမ်၊ ဆေးရုံတက်စဉ် အိမ်မှာ ဆေးကုသခံယူနေစဉ် ဇွဲမလျှော့ဆက်တိုက် ရိုက်နှိပ်ထုတ်ဝေ ကံသစ်ထူ ကုသိုလ်ယူ ဦးဆောင်ခဲ့ပါသည်။

မဟာသရဏဂုံ ဆေးတော်ကြီးသည် ကင်ဆာရောဂါမျှသာမဟုတ် ရောဂါမှန်သမျှနှင့် ဘေးဆိုးကြီးများပါ ပျောက်ကင်းချမ်းသာစေပါသည်။
၂၀၀၆-ခုနှစ်အထိ ရောဂါရှင် ကျွန်တော်သည် ၈-နှစ်ကြာ အသက်ရှင်ဆဲပင်။ မဟာသရဏဂုံကို နေ့စဉ်ပူဇော်၍ နဘူးကျင်းတောရဆရာတော် ဘုရားကြီး၏ နှစ် ၄၀-ကျော် ဓုတင်ဆောင် ခရီးမှတ်တမ်းကြီးကို ရေးသားလျက် ရှိနေပါသည်။

လယ်တီမဟာသရဏဂုံတော်ကြီး ပါဠိရွတ်ဖတ် ပူဇော်လိုကြကုန်သော သူတော်ကောင်းများအနေဖြင့် အသံထွက်မှန်ကန်စေရေန် အသံသွင်းထားသော တိပ်ခွေနှင့် မိမိပြုစုထားသော မဟာသရဏဂုံတော်ကြီး ပူဇော်ခြင်း မြန်မာပြန်အနှစ်ချုပ်-စာစုကို စာပေစိစစ်ရေးဌာနမှ ပုံနှိပ်ခွင့်ရပြီး ဖြစ်ပါ၍ ထုတ်ဝေရန် စီစဉ်နေပါသည်။ ထိုကာလအတွင်း ကူးယူလိုပါက ကျွန်တော့ထံမှ ကူးယူနိုင်ပါကြောင်းကိုလည်း အသိပေးတင်ပြအပ်ပါသည်။

သိမ်းဆောင် (ရမည်းသင်း)
ကင်ဆာဌာန လူနာမှတ်ပုံတင်အမှတ် ၉၄၄/၉၉

(မြတ်မင်္ဂလာ ၂၀၀၇-ဧပြီလ)

No comments: