Thursday, April 22, 2010

မှန်သောသစ္စာ

မိမိအား ခေတ္တရာမြို့သစ် ၄-လမ်းတွင် နေထိုင်ကြသော မအေးဝင်း၊ မဌေးဝင်းတို့က မိမိသတင်းသုံးရာရွာသို့ အရောက်လာ၍ ဆွမ်းစားပင့်ကြသည်။ မိမိအား ပြည်မြို့က ဆွမ်းစားပင့်ကြသူဟူ၍ ဤညီအမနှစ်ယောက်သာ ရှိ၏။ သူတို့ကလည်း တကူးတကန့် လာရောက်ပင့်ကြ၍ ကြွလာပါမည်ဟု ကတိပေးလိုက်သည်။

ထိုနေ့သို့ရောက်သောအခါ လမ်းဘက်ကကားကိုစောင့်စီး၍ စောစီးစွာ ဆွမ်းစားကြွရသည်။ နံနက် ၈-နာရီခန့်မှ ကားကြုံစီးရာ ၉-နာရီကျော်ကျော်တွင် ရောက်ရှ်ိသည်။ မအေးဝင်းက ထိုင်းနိုင်ငံမှ ပြန်ရောက်လာတာ မကြာသေး၍ ထိုင်းမှဝယ်လာသော ပစ္စည်းမျိုးစုံ လှူဒါန်းဖို့ ပြင်ဆင်ထားသည်။

၁၀-နာရီထိုးချိန်တွင် မြို့သစ်ထဲမှ ရဟန်းသုံးပါး ကြွရောက်လာကြသည်။ အာလာပ သလ္လာပစကားပြောကြ၏။ ၁၀-နာရီသာသာတွင် ဆွမ်းဘုဉ်းပေးကြသည်။ ဟင်းတွေက စုံလင်လှသည်။ ဟင်းအမျိုးပေါင်း ၁၀-မျိုးရှိသည်။ ထိုအထဲတွင် ငါးဟင်းရနံ့ သင်းသင်းဖြင့် ဘုဉ်းပေး၍ ကောင်းလှသောကြောင့် ငါးဟင်းကို အဓိကထား၍ ဘုဉ်းပေးလိုက်သည်။

ဆွမ်းပန်းကန်တချပ် ကုန်သောအခါ မမျှော်လင့်ဘဲ ငါးရိုးမြက်သွားသည်။ ရှေ့ဆက် ဆွမ်းဘုဉ်းပေးသောအခါ လည်ချောင်းကနာလာ၍ ထိုနေရာမှာပဲ ရပ်ထားလိုက်သည်။
ဦးပဉ္ဖင်း ဆွမ်းဘုဉ်းပေးတာ နည်းလှချေလား၊ များများ ဘုဉ်းပေးပါဘုရား။
ငါးရိုးစူးမှန်းမသိသော မအေးဝင်းက ဆွမ်းစားနည်း၍ လျှောက်ထားသည်။ မိမိမှာ အောင်အီးသည်းခံကာ ရေနွေးကို သောက်လိုက်သည်နှင့် လည်ချောင်းက မြက်ခနဲ နာကျင်လှ၍ ရေနွေးပင် ဆက်လက် မသောက်နိုင်ဖြစ်ရသည်။

ဆွမ်းစားကြွလာသော ရဟန်းသံဃာများ ဆွမ်းဘုဉ်းပေးခြင်းကိစ္စ၊ ရေနွေးဘုဉ်းပေးခြင်းကိစ္စများ ပြီးဆုံးသောအခါ ခပ်သုတ်သုတ် ကားဂိတ်ရှိရာသို့ ကြွခဲ့သည်။ ကြုံရာကားကိုစီး၍လာခဲ့ရာ ရွှေတောင်မြို့အထွက်တွင် မိမိ၏လည်ချောင်းမှာ လွန်စွာနာကျင်လာသည်။ မည်သို့မှ အောင့်အီးသည်းခံခြင်းငှါ မစွမ်းသာတော့ပေ။ မျက်လုံးအစုံကလည်း နာကျင်လွန်းသောကြောင့် မျက်ရည်တွေ ကျလာသည်။ ကားခေတ္တရပ်သောအခါ လမ်းခုလတ်မှာ ဆင်း၍ ကျန်ခဲ့သည်။

ဒန့်ကျွဲပင်ဘေးမှာ ငုတ်တုတ်ထိုင်ကာ လည်ချောင်းထဲက စူးနေသော ငါးရိုးပျောက်ရန် ကြိုးစားပြီး အာခံတွင်းကို အကြိမ်ကြိမ် လက်ဖြင့် နှိုက်ယူသည်။ မသက်သာဘဲ ပို၍ဆိုးလာ၏။ မကြာခင် ဆိုက်ကားတစီးကိုမြင်ရာ အတင်းလှမ်းခေါ်၍ မိမိအဖြစ်အပျက်ကိုပြောကာ ကူညီခိုင်းသည်။ ဆိုက်ကားဆရာကလည်း သူတတ်ကျွမ်းသည့်ပညာဖြင့် လည်ပင်းကို အသာအယာ ဆွဲသည်။ မသက်သာဘဲ ပို၍ နာကျင်လာသည်။

ဦးပဉ္ဖင်း၊ ရွှေတောင်ဆေးရုံကို တပည့်တော် ပို့ပေးမယ်၊ ဆိုက်ကားခ မယူပါဘူး။
ဦးပဉ္ဖင်း တော်တော်နာကျင်နေပုံရတယ်။
ဟုတ်တယ်၊ တော်တော် နာနေတယ်။
မျက်နှာတခုလုံး ထူအမ်းလာပြီး ပါးစပ်က သွားရည်တွေကျနေပြီ၊ မျက်လုံးအစုံမှာ မျက်ရည်တို့ ဖုံးအုပ်နေပြီ။

ဆိုက်ကားဆရာက ဆိုက်ကားပေါ်တက်ဖို့ ပြောနေချိန်မှာ မိမိအသိဉာဏ်ထဲက အားကိုးစရာတခု ကြုံလာသည်။ ထိုအားကိုးစရာကား သစ္စာပြုဖို့ဖြစ်သည်။ သစ္စာသည် မိမိအတွက် အားကိုးစရာဟု မြင်လာပြီး သစ္စာဆိုလိုက်သည်။
မိမိသည် တောကျောင်းထဲတွင် တပါးတည်း ၁၀-နှစ်တာ နေထိုင်ပြီး ရရှိလာသော အလှူဝတ္ထုပစ္စည်းများကို ကိုယ်ကျိုးအတွက် အသုံးမပြုခဲ့ပါ။ ဤမှန်သောသစ္စာစကားကြောင့် ဤငါးရိုးစူးသော ဝေဒနာ ပျောက်ပါစေသား။

သုံးကြိမ်သုံးခါ သစ္စာဆိုလိုက်သောအခါ ၀မ်းထဲက အစားအစာတွေ အန်ထွက်လာသည်။ ထိုအစာထဲတွင် အလွန်စူးရှသော ငါးရိုးကြီးလည်း ပါလာခဲ့ရာ ချက်ချင်းပင် ရောဂါသက်သာသွားခဲ့ပါသည်။
ဆိုက်ကားဆရာက အရိုးကြီးကိုကြည့်ကာ အရှင်ဘုရား ကံကောင်းလို့ဘုရား၊ ဒီအရိုးမျိုးဆိုတာ လည်ပင်းတောင် ပေါက်ထွက်သွားနိုင်တယ်။

သံချောင်းတခုလို မာကျောစူးရှနေသော ငါးရိုးကြီးကိုကြည့်၍ အံ့သြရသလို သစ္စာတရား၏ အစွမ်းထက်ပုံကိုလည်း အံ့သြရပါသည်။
ထိုနေ့က ဆိုက်ကားဆရာသည် ၄-မိုင်ခန့် ခရီးကို ကုသိုလ်ယူ၍ ပို့ပေးခဲ့ပါသည်။ မိမိကလည်း ၀မ်းပမ်းတသာ ဆိုက်ကားဆရာကို လက်ဆောင်တွေ ပေးလိုက်ပါသည်။

နန္ဒသူမြတ် (ဖားအိုင့်တောရကျောင်း)
(မြတ်မင်္ဂလာ ၂၀၀၇-ခု မေလ)

No comments: