Thursday, April 8, 2010

ရတနာသုံးပါး အကျိုး

စာရေးသူသည် အစိုးရ၀န်ထမ်းတဦး မဟုတ်ပါ။ သို့သော်လည်း မိသားစု စားဝတ်နေရေးအတွက် ကိုယ်ပိုင် အသက်မွေးဝမ်းကြောင်း အလုပ်ကြောင့် နေ့စဉ် အလုပ်သွား အလုပ်ပြန်တွင် ကိုယ်ပိုင်ကားဝယ်စီးနိုင်သော လူတန်းစားမဟုတ်သည့်အတွက် အများနည်းတူ ဘတ်စ်ကားတိုးစီး၍ သွားရပါသည်။

တနေ့ အခန့်မသင့်သဖြင့် ကားပေါ်မှ အဆင်း ညာဘက်ဒူးခေါင်းမှ မြက်ခနဲဖြစ်သွားပြီး တဆစ်ဆစ်နာလာပါသည်။ အိမ်၌ ဒဏ်ကြေဆေးများ လူးပါသည်။ မသက်သာပါ။ ဆေးခန်းသွား၍ ဆေးစား၊ ဆေးထိုးများ ပြုပါသည်။ မသက်သာခဲ့ပါ။ စာရေးသူနေသော တိုက်ခန်းမှာလည်း မြင့်သဖြင့် ဒူးနာနှင့် အတက်အဆင်းလုပ်ရသဖြင့် ပို၍ဆိုးလာနာလာပါသည်။

တရုတ်ဒဏ်ကြေလိမ်းဆေးများ နှစ်ရက်တခါ သွားစီးပါသည်။ သက်သာသလိုသာ ရှိခဲ့ပါသည်။ အရှင်းမပျောက်ကင်းခဲ့ပါ။ သို့နှင့် ဆေးလိမ်းလိုက်၊ သက်သာလိုက်နှင့် နေခဲ့ရာ နှစ်နှစ်ခန့် ရှိလာခဲ့ပါသည်။ စာရေးသူ၏ခင်ပွန်းမှာ အစိုးရဌာနတခုမှ ၀န်ထမ်းတဦး ဖြစ်ပါသည်။ တနေ့တွင် ရှမ်းပြည်နယ်၊ တောင်ကြီးမြို့သို့ ပြောင်းရွှေ့တာဝန် ထမ်းဆောင်ရန် အမိန့်ကျလာသဖြင့် စာရေးသူမှာလည်း သျှောင်နောက်ဆံထုံးပါဖြင့် မိသားစုပြောင်းရွှေ့နေထိုင်ရပါသည်။ တောင်ကြီးမြို့ ရာသီဥတုက အေးမြလှပါသည်။ မြို့အနေအထား ကောင်းမွန်သန့်ရှင်းခြင်း၊ အစားအသောက် အသီးအနှံများ၊ ဒေသခံတိုင်းရင်းသားများ၏ ခင်မင် ချစ်ခင်ဖွယ်ရာ ပတ်ဝန်းကျင်အသစ်များကို ရင်းနှီးခွင့်ရခဲ့ပါသည်။ အားလုံးလည်း အစစအရာရာ အဆင်ပြေပါသည်။ အဆင်မပြေသည်က စာရေးသူ၏ ဒူးနာဖြစ်ပါသည်။ ရာသီဥတုက အေးသဖြင့် ဒူးမှ တဆစ်ဆစ်နာလာပါသည်။

ရှမ်းဆရာများ၏ ဆေးကောင်းများရှိသဖြင့် ပြသ၍ ကုသပါသည်။ ခဏသာကောင်း၍ ပြန်နာလာပါသည်။ တနေ့ သူငယ်ချင်းတယောက်က စာရေးသူ၏ ဒူးနာမသက်သာဖြင့် အရိုးကုဆေးဆရာတယောက်ရှိကြောင်း၊ အကြောအရိုးကု စွမ်းကြောင်း၊ ကုကြည့်ပါ၊ ပျောက်ကင်းသွားမည်ဟု တိုက်တွန်းလာသဖြင့် ခင်ပွန်းဖြစ်သူနှင့်အတူ ဆရာထံ သွားပြခဲ့ပါသည်။

ထိုအရိုးကုဆရာကြီးမှာ အသက် ၆၀-ကျော်ခန့် ခပ်၀၀ နှုတ်ခမ်းမွှေးတကားကားနှင့် ဖြစ်သည်။ သူက စာရေးသူကို အကြောညှပ်နေသဖြင့် အကြောပြင်ပေးမည်ပြော၍ စာရေးသူ၏ဒူးကို နှိပ်ပေးပါသည်။ စာရေးသူမှာ နာကျင်လှသည့် ဝေဒနာကို ခံစားရင်း အသားများ တဆတ်ဆတ်တုန်ကာ မျက်ရည်များပင် ကျလာသည်အထိနာပါသည်။ ကောင်းသွားမည်ပြော၍ ဆေးများလူးကာ ပတ်တီးဖြင့် စည်းပေးပါသည်။

စာရေးသူမှာ ကောင်းမလာသည့်အပြင် လမ်းလျှောက်၍မရသဖြင့် သူငယ်ချင်းနှင့် ခင်ပွန်းက သယ်မ၍ ကားပေါ်တင်ပြီး ပြန်လာပါသည်။ ဆေးကြောင့်လား၊ နှိပ်သည့်အရှိန်ကြောင့်လည်း မသိပါ။ စာရေးသူ၏ ဒူးခေါင်းမှာ ရောင်ကိုင်းလာပြီး လှုပ်၍မရပါ။ ခင်ပွန်းဖြစ်သူမှာ ဒူးကိုကြည့်ပြီး စိတ်မကောင်းဖြစ်ကာ ပြုစုပေးပါသည်။ စာရေးသူမှာ အတော်ကို ခံစားလိုက်ရပါသည်။ တလခန့်ကြာသောအခါ အရောင်လျော့ပြီး လမ်းပြန်လျှောက်၍ ရပါသည်။ လုံးဝမပျောက်ကင်းပါ။

တနေ့ စာရေးသူနှင့် အမရင်းသဖွယ် ခင်မင်သော အမတဦးက-ညီမလေးရေ၊ မမ တောင်ပေါ် ပအို့ရွာထဲမှာ ကိစ္စလေးရှိတယ်၊ လိုက်ခဲ့ပါ-ဟု ခေါ်သည်။ ထိုအမ၏ခြံလည်း ရှိသဖြင့် အလုပ်သမားများနှင့် အလုပ်ကိစ္စပြောရန် ရှိသဖြင့် လိုက်သွားပါသည်။ တောင်ပေါ်ရွာဖြစ်သဖြင့် အတက်တွင် ချွေးစို့အောင်တက်ရင်း ရွာသူရွာသားများကို နှုတ်ဆက်ခဲ့ပါသည်။ အမ၏ခြံထဲတွင် အသီးအနှံပင်၊ ဂန္ဓမာပန်းပင်၊ သစ်တော်ပင်၊ ကော်ဖီပင်၊ ရွှေဖရုံပင် စသဖြင့် စိုက်ပျိုးထားပါသည်။ လေကောင်းလေသန့် ရသဖြင့် မောရပန်းရမှန်းပင် မသိပါ။ ပအို့ကလေးငယ်များမှာလည်း မြေနီလမ်းမများပေါ်တွင် ဆော့ကစားနေကြပါသည်။ အချိန်မှာ ညနေ ၃-နာရီခန့်ရှိပါသည်။ ရာသီဥတုနှင့်အတူ အေးချမ်းသာယာသော သဘာဝပတ်ဝန်းကျင်ကို တွေ့ရသဖြင့် စိတ်ကြည်နူးခဲ့ရပါသည်။

စာရေးသူနှင့် အမဖြစ်သူသည် ကိစ္စများပြီးစီး၍ ခြံထွက် ရွှေဖရုံ၊ ကျောက်ဖရုံနှင့် မုန်ညင်း၊ မုန်လာ၊ ဂေါ်ဖီပန်းပွင့် စသည်တို့ကို ခြင်းတောင်းနှင့်ထည့်၊ အချို့ကိ်ု လက်ဖြင့်ပွေ့ပိုက်ပြီး ပြန်လာခဲ့ကြပါသည်။ ရွာထဲမှ အချို့အသိများက မြေပဲ၊ ပဲပုပ် စသဖြင့် လှမ်းပေးပါသည်။
ရွာအလွန် အပြန်လမ်းတွင် တောင်ချွန်းခေါ်သည့်နေရာမှာ အနည်းငယ်မတ်သဖြင့် သတိထားပြီး ဆင်းခဲ့ရပါသည်။ ခဲလုံးလေးများမှာ ချွန်ချွန်မာမာလေးများ ဖြစ်ပါသည်။ နှစ်ယောက်သား ခြင်းတောင်းအလယ်မှာထား၊ တဖက်စီကိုင်၍ ဆင်းလာခဲ့ကြပါသည်။ စာရေးသူမှာ အမှတ်မထင် ခြေချော်၍ လဲကျသွားရာ နှစ်ဦးစလုံး တလှိမ့်လှိမ့်ဖြင့် တောင်ခြေသို့ ရောက်သွားပါသည်။ အသီးများမှာလည်း တနေရာဆီ ပြန့်ကျဲကုန်ပါသည်။ အမက ပြေးလာပြီး ညီမလေး ဘယ်နာသွားလဲ-ဟု မေးပြီး လာထူပါသည်။ လက်အနည်းငယ် ပွန်းရုံမှလွဲ၍ ဘာမှ မဖြစ်ခဲ့ပါ။ မိမိတို့၏ အသီးအနှံများကို လိုက်ကောက်ပြီး ခြင်းတောင်းထဲထည့်ပြီး အိမ်ပြန်လာခဲ့ကြပါသည်။ အိမ်ရောက်ပြီး ဒဏ်ကြေလိမ်းဆေးများလူး၍ ကျွန်မစိုးရိမ်ထိတ်လန့်စွာဖြင့် နေခဲ့ပါသည်။

ထူးဆန်းသည်မှာ ဆေးစည်း၊ ဆေးထိုး၊ ဆေးလိမ်း၍ မပျောက်ခဲ့သော ၂-နှစ်ကျော်ခန့် ခံစားခဲ့ရသော ဒူးနာဝေဒနာမှာ လုံးဝ မနာကျင်တော့ဘဲ အတက်အဆင်းနှင့် လမ်းကောင်းကောင်းလျှောက်လာနိုင်ပါသည်။ ညှပ်နေသောအကြော ပြန်တည့်သွားသလား မပြောတတ်ပါ။ လမ်းလျှောက်လျှင်လည်း အကြောမမြက်တော့ပါ။

သို့သော် တခုတော့ရှိပါသည်။ စာရေးသူသည် ဗုဒ္ဓဘာသာဝင်တဦး ဖြစ်သဖြင့် နေ့စဉ်အနန္တောအနန္တငါးပါးကို အာရုံပြု၍ ဘုရားဂုဏ်တော်များ၊ ပရိတ်၊ ပဋ္ဌာန်းများကို နေ့စဉ်ရွတ်ဆိုပါသည်။ မေတ္တာပို့ပါသည်။
တောင်ပေါ်မတက်ခင် တော၊ တောင်စောင့် နတ်၊ သမ္မာဒေ၀နတ်ကောင်း နတ်မြတ်များ၊ အရပ်ဆယ်မျက်နှာ မေတ္တာပို့ဂါထာများကို ရွတ်ဖတ်သွားပါသည်။ ထို့ကြောင့်ထင်သည် ကျွန်မသည် ဆေးကု၍ မပျောက်သော်လည်း အမှတ်မထင်သောဖြစ်ရပ်ကြောင့် သမ္မာဒေ၀နတ်ကောင်း နတ်မြတ်များ၏ မေတ္တာကြောင့် ပျောက်ကင်းသွား သည်ဟု ယုံကြည်ယူဆမိပါသည်။

ထို့ကြောင့် စာဖတ်သူတို့လည်း အချိန်ရှိသရွေ့ သြကာသလောက၊ သတ္တလောက၊ သင်္ခါရလောကတွင်း၌ ရှိကြကုန်သော လူ၊ နတ်၊ သတ္တ၀ါ၊ ဗြဟ္မာအပေါင်းတို့အား မေတ္တာပို့ ဆုတောင်းပါက တနေ့နေ့ တချိန်ချိန်တွင် အကျိုးထူး ရရှိလာမည်ဖြစ်ကြောင်း ကိုယ်တွေ့ကြုံ၍ ရေးသားတင်အပ်ပါသည်။

မိဒန်းလှ (ရာမည)
( မြတ်မင်္ဂလာ ၂၀၀၇-ခု ဧပြီလ)

No comments: