Thursday, April 8, 2010

သစ္စာစကား အကျိုးများ

စာရေးသူတို့မြို့ရှိ ရပ်ကွက်တခုတွင် ကိုဝင်း-ဟုအမည်ရသူ လူတယောက်ရှိသည်။ မွေးချင်း ညီအကို နှစ်ယောက်ရှိသည့်အနက် ကိုဝင်းမှာအငယ်ဖြစ်သည်။ ဖခင်ဖြစ်သူ မရှိသည့်နောက် မိရိုးဖရာလုပ်ငန်းဖြစ်သော ပန်းပဲလုပ်ငန်းဖြင့် မိခင်အိုကြီးကို လုပ်ကိုင်ကျွေးမွေးနေသူဖြစ်သည်။

အတူနေ အကိုဖြစ်သူ ကိုတင့်မှာမူ စရိုက်ကြမ်းသည့် အရက်သမားလူရမ်းကားတဦး ဖြစ်သည်။ အလုပ်ကို ဟုတ်တိပတ်တိ မလုပ်ချင်ဘဲ ညနေခင်း အရက်ဖိုးကိုတော့ မိခင်အိုကြီးထံမှ ပုံမှန်လိုချင်သူ ဖြစ်သည်။
ကိုဝင်းမှာမူ အကိုနဲ့ ဆန်ကျင်ဘက်ဖြစ်သည်။ ယဉ်ကျေးလိမ္မာသူဖြစ်သည်၊ ရှာရသမျှငွေ မိခင်အိုကြီးထံ အကုန်အပ်ပြီး ရတနာမြတ်သုံးပါးကိုလည်း လေးနက်စွာ ယုံကြည်ကိုးကွယ်သည်။ အလုပ်အားချိန်တွင် ကိုဝင်းတယောက် ကက်ဆက်အိုလေးနှင့် အချိန်ကုန်နေတတ်၏။ သူဖွင့်သည့်တိပ်ခွေမှာ အများအားဖြင့် သီတဂူဆရာတော်၏ တရားခွေများ ဖြစ်သည်။

ဘုန်းကြီးကျောင်းထွက် ကိုဝင်းတယောက် ညအိပ်ရာဝင်ခါနီးတိုင်း ပရိတ်ကြီး ၁၁-သုတ်ကို ရွတ်လေ့ရှိသည်။ အသက်သုံးဆယ်ကျော်ပြီဖြစ်သော်လည်း မိခင်အိုကြီးကို ငဲ့ညှာပြီး အိမ်ထောင်မပြုပါ။ အကိုဖြစ်သူ လူပျိုဟိုင်းကြီး ကိုတင့်နှင့် မိခင်အိုကြီးကို ရာသက်ပန်လုပ်ကျွေးဖို့ ကြည်ဖြူစွာ ဆုံးဖြတ်ထားသူဖြစ်သည်။

ကိုဝင်းက သိတတ်ပေမဲ့ ကိုတင့်ကတော့ အခွင့်အရေးယူလွန်းသူ ဖြစ်သည်။ အရက်ကို ညနေတိုင်း ပုံမှန်သောက်ပြီး မူးပြီးပြန်လာလျှင် ပြဿနာရှာတတ်သူ ဖြစ်သည်။ ဟင်းမကောင်းလျှင်လည်း ဟင်းပန်းကန် ရိုက်ခွဲတတ်ပြီး အရက်မ၀သေးလျှင်လည်း တွေ့သည့်ပစ္စည်း ဆွဲကာ ပေါင်သောက်သူ ဖြစ်သည်။

တခုသောညနေတွင် ကိုတင့် စောစောအိမ်ပြန်ရောက်လာပြီး ကိုဝင်းထံမှ ကက်ဆက်အိုလေးကို ဆွဲလုပါတော့သည်။ ပါးစပ်ကလည်း ခဏလေး အကိုယူသွားမှာ-ဟု ပြောပါသည်။ သို့သော် အကြောင်းသိမို့ ကိုဝင်း မပေးပါ။ အကို ဒီလိုမလုပ်ပါနဲ့-ဟုဆိုကာ ကက်ဆက်ကို ပြန်ဆွဲလေသည်။ ကိုတင့်က ကိုဝင်းကို အံ့သြဟန်တချက်ကြည့်ပြီး ကက်ဆက်ကိုင်ထားသည့် လက်-လွှတ်ကာ ပါးစပ်ကလည်း မင်းကိုသတ်မယ်-ဟုပြော၏။ ထို့နောက် အနီးထရံတွင် ထိုးထားသော သံချေးတက်ဓားမြောင်တချောင်းကို ပြေးယူပါတော့သည်။ ကိုဝင်းမှာ ကြောက်ကြောက်နဲ့ အမေရေ-ဟုအော်ကာ ကက်ဆက်ဆွဲပြီး အိမ်ကိုပတ်ပြေးလေသည်။ ပြေးရင်းမှ နာတရားများဖြင့် နားရည်ဝနေသူပီပီ ခေါင်းထဲတွင် အတွေးတချက် လက်ကနဲပေါ်လာ၏။ ထို့ကြောင့် ဆက်မပြေးဘဲ လက်အုပ်ချီ မျက်စိစုံမှိတ်ကာ ဘုရားကို အာရုံပြု၍ စိတ်တွင်းမှ တပည့်တော်သည် မိခင်ကြီးကို ရိုသေစွာ လုပ်ကျွေးနေသူဖြစ်ပါသည်။ ဤမှန်သောသစ္စာစကားကြောင့် ယခုကြုံတွေ့နေရသော အန္တရာယ်မှ လွတ်မြောက်ပါရစေ-ဟုဆုတောင်းလိုက်လေတော့သည်။

အံ့သြဖွယ် ကောင်းလေစွ၊ ဓားကိုင်ပြေးလာသော ကိုတင့်မှာ ကိုဝင်းအနီးရောက်လုရောက်ခင်တွင် ခြေခေါက်လဲကာ ကိုင်ထားသည့်ဓားမြောင်ချွန်ပေါ်သို့ မှောက်လျက်ကျသွား၏။ အသံဗလံများကြောင့် ကိုဝင်း မျက်လုံးဖွင့်ကြည့်လိုက်သောအခါ ညာဘက်လက်မောင်းရင်းကို လက်ဖြင့်ဖိလျက် ညည်းညူနေသော အကိုဖြစ်သူအား နံဘေးတွင် တဟင့်ဟင့်ရှိုက်ငိုနေသော မိခင်နှင့်အတူ တွေ့လိုက်ရပါတော့သည်။

ကိုဝင်းအကို ကိုတင့်မှာ ထိုဒဏ်ရာနှင့် ဆေးရုံတလခန့် တက်လိုက်ရသည်။ ဆေးရုံမှ ဆင်းလာသောနေ့တွင် ကိုဝင်းအား-အကို ဘယ်တော့မှ အရက်မသောက်တော့ဘူး။ ငါ့ညီကိုလည်း နောင် အနိုင်မကျင့်တော့ပါ ဘူးကွာ-ဟု နောင်တမျက်ရည်များဖြင့် ပြောပါလေတော့သည်။

ရာဇာသိန်းထွန်း (၀မ်းတွင်း)
( မြတ်မင်္ဂလာ ၂၀၀၇-ခု ဧပြီလ)

No comments: