Wednesday, April 21, 2010

ကိုယ်ပြုသမျှ ကိုယ်ခံရ

ကျွန်မသည် ရွှေတိဂုံစေတီတော်မြတ်ကြီး၏ ရေကြည်တော်ဝတ်အသင်းမှ အသင်းဝင်တဦး ဖြစ်ပါသည်။ အသင်း၏ လုပ်ဆောင်ချက်မှာ ရွှေတိဂုံရှိ မြတ်စွာဘုရားရှင်ကိုယ်တော်မြတ် လေးဆူတို့အား သက်တော်ထင်ရှားရှိသည့်အလား ကြည်ဖြူသဒ္ဓါစိတ်ဖြင့် ရိုသေစွာ အရုဏ်ဆွမ်းကပ်လှူပူဇော်ကြခြင်း ဖြစ်ပေသည်။

အပတ်စဉ် ၂-ရက်၊ ဥပုသ် တနင်္ဂနွေ စသောနေ့များ၏ အရုဏ်တက် နံနက် ၄-နာရီခွဲတိတိအချိန်တွင် ဆရာတော်ကြီးအမှူးထား၍ အသင်း၏ နာယကကြီးများ၊ အမှုဆောင်များ၊ အသင်းသူ အသင်းသားများ၊ အလှူရှင်များ စုပေါင်းဆက်ကပ် လှူဒါန်းကြခြင်းဖြစ်သည်။ ထိုသို့ ဆက်ကပ်ပူဇော်ရန်အတွက် အသင်းသားများသည် အဖိတ်နေ့နှင့် စနေနေ့ညများတွင် အသင်း၌ အိပ်ကြရသည်။ နံနက် ၃-နာရီခွဲ တိတိအချိန်တွင် အိပ်ရာမှ ထကြရသည်။ ထိုအချိန်တွင် အသင်း၏ နာယကကြီးတဦးဖြစ်သော ဆရာကြီး ဦးငွေတင် (ကျောင်းအုပ်ကြီး-ငြိမ်း) က ရွှေတိဂုံစေတီတော်မြတ်ကြီးအား ဖူးမြော်ရင်း-

မြတ်စွာဘုရား၊ ကိုယ်လုပ်သမျှ ကိုယ်ခံရ၊ ကိုယ်ပြောသမျှ ကိုယ်ခံရပါတယ်ဘုရား၊ ၀ဋ်ကြွေးတွေရှိခဲ့ရင် ကျေပါစေဘုရား။
ဟု ထပ်တလဲလဲ ရွတ်ဆိုလေတော့၏။ ကျွန်မသည် အစဦး၌ သတိမထားမိပေ။ တနေ့တွင် သတိပြု နားထောင်မိရာမှ ကြက်သီးမွေးညှင်းများ ထလာသည်အထိ ကြောက်ရွံ့တုန်လှုပ်သွားတော့၏။ ဘဘ ဆိုတာ တယ်မှန်ပါလား၊ မိမိရဲ့ အပြုအမူ၊ အပြောအဆိုများကို မမှားစေရအောင် သတိပေးနေတာလား-ဟုပင် ခံစားနေရသည်။

ကျွန်မတို့သည် ဗုဒ္ဓဘာသာဝင်များ ဖြစ်ကြသည့်အလျောက် ကံ ကံ၏အကျိုးကို လက်ခံရပေမည်။ ဘဘပြောသော ၀ဋ်ဆိုသည့်စကားသည် ၀ိပါက၀ဋ်မှ ဆင်းသက်လာသော လည်ပတ်ခြင်းသဘော ဆောင်၏။ မိမိပြုခဲ့သော ကောင်းမှု၊ မကောင်းမှု တို့သည် မိမိနောက်မှ အရိပ်သဖွယ် ထပ်တူထပ်မျှ လိုက်လာသဖြင့် နောင်ဘ၀သို့ မကူးဘဲ ချက်ချင်းပင် ခံစားစံစားရတော့၏။ ကောင်းတာလုပ်လျှင် ကောင်းကျိုးပေး၏။ မကောင်းတာလုပ်လျှင် မကောင်းကျိုးကို ဧကန်မုချ ရစေတတ်ပေသည်။ ကုသိုလ်ပဲဖြစ်ဖြစ်၊ အကုသိုလ်ပဲဖြစ်ဖြစ် ဒိဋ္ဌဓမ္မ တူသောအကျိုးကို ပေးခြင်းက ၀ဋ်လည်ခြင်း ဖြစ်သည်။

သို့သော် အကုသိုလ် အကျိုးပေးမှုက ပို၍ တိကျမြန်ဆန်လှပေသည်။ ဘ၀တခုမှာ မကောင်းတာလုပ်ခဲ့မိ၍ တချိန်၌ အကုသိုလ်ဝဋ်ကြွေး အကျိုးပေးပြီဆိုလျှင် မနုဿလူသားများအဖို့ မခံစားနိုင်တော့သည်အထိ ဖြစ်ရပေသည်။ ထိုအခါ အတိတ်ကံကြောင့် မိမိပြုခဲ့သမျှ ပြန်ခံနေရပါလားဆိုပြီး သည်းခံတရားလက်ကိုင်ထားကာ တည်ငြိမ်စွာ ခံယူနိုင်ရပေမည်။ နောင် ထိုကဲ့သို့သော အဖြစ်မျိုးနဲ့ မကြုံရလေအောင် ဆင်ခြင်ရပေလိမ့်မည်။ အတိတ်ဘ၀က ကောင်းမှုတွေ လုပ်ခံမိ၍ ရလာသော မိမိ၏ ကုသိုလ်ကံသည် ယခုဘ၀၌ ကံကောင်းထောက်မပြီးလျှင် အစအစအရာရာ အဆင်ပြေမှုများစွာဖြင့် ကြုံလာရပေလိမ့်မည်။ ၀ဋ်လည်ခြင်းဆိုသည့် အကြောင်းအကျိုး ဆက်စပ်တွေးမိရာ ငယ်စဉ်က အဖေပြောခဲ့ဖူးသည့် ပုံပြင်လေးတခုကို ပဲ့တင်ထပ်အောင် ကြားယောင်နေမိပါတော့သည်။

တခါတုန်းက မုဆိုးတယောက်သည် တောလိုက်ထွက်တိုင်း သူ့အိမ်ရှိ ခွေးနက်ကြီးတကောင်ကို အမြဲတမ်းခေါ်ဆောင်သွား၏။ ထိုသို့ သွားလေတိုင်း ရသေ့ကြီးတပါး ဆွမ်းခံကြွသည်နှင့် အမြဲတမ်း ကြုံလေသည်။ မုဆိုးသည် ထိုရသေ့ကို မြင်မြင်ချင်း ရင်ထဲ၌ ဒေါသဝေဒနာတခု ခံစားမိလေသည်။ တနေ့သောအခါ မုဆိုးကြီးက-

အင်း-ငါ ဒီရသေ့ကိုမြင်တိုင်း အမြဲတမ်း ဒေါသထွက်မိတယ်။ ဘယ်ဘ၀က ရန်ငြိုးတွေလည်းမသိ၊ မျက်နှာမြင်တာနဲ့ပဲ မုန်းမိတယ်။ ဒီတော့ ဒီရသေ့ သေမှ အေးမယ်။
ဤသို့ တွေးတောလေ၏။ သူနှင့်အတူပါလာသော ခွေးနက်ကြီးဖြင့် ရှူးတိုက်လေတော့သည်။ ခွေးကြီးက ရသေ့အား အတင်းလိုက်ကိုက်လေသည်။ ရသေ့ကြီးလည်း ကြောက်လန့်ပြီး သစ်ပင်ပေါ်သို့ ပြေးတက်သွားလေ၏။ ထိုအခါ ခွေးကြီးက အပေါ်သို့မတက်နိုင်တော့သဖြင့် ပို၍ ဒေါသထွက်ကာ သစ်ပင်ခြေရင်းမှ အပေါ်သို့မော့ပြီး အော်ဟစ်သောင်းကျန်းလေတော့၏။ မုဆိုးလည်း အသင့်ယူဆောင်လာသော ၀ါးချွန်ဖြင့် သစ်ပင်ပေါ်ရှိ ရသေ့၏ခြေထောက်ကို အကြိမ်ကြိမ် လှမ်းထိုး၏။ ရသေ့မှာ အမျိုးမျိုးရှောင်သော်လည်း မရ၊ နာလွန်းသဖြင့် ခန္ဓာကိုယ်ပေါ်ရှိ ဧကသီသင်္ကန်းကိုပင် မထိန်းနိုင်တော့ဘဲ သင်္ကန်းမှာ မုဆိုး၏ ခန္ဓာကိုယ်ပေါ်သို့ အမှတ်မထင် ပြုတ်ကျသွားလေသည်။ ထိုအခါ အပေါ်သို့မော့ပြီး အော်ဟစ်နေသော ခွေးနက်ကြီးက ဘေးသို့ ရုတ်တရက်ကြည့်လိုက်ရာ သင်္ကန်းလွှမ်းနေသော မုဆိုးကို သစ်ပင်ပေါ်မှ ပြုတ်ကျလာသော ရသေ့အထင်ဖြင့် အပြင်းအထန် ကိုက်လေတော့သည်။ ထိုအခါ မုဆိုးသည် ချက်ချင်းပင် ၀ဋ်လည်ကာ နေရာတွင် ပွဲချင်းပြီး သေဆုံးရတော့၏။

ဤပုံပြင်ကို အဖေပြောပြခဲ့သည်။ ထိုအချိန်မှစပြီး ၀ဋ်မှာအမြဲ၊ ငရဲမှာ အပ-ဆိုသည့် ဆောင်ပုဒ်လေးအတိုင်း ၀ဋ်ဆိုသည်မှာ နာရီမဆိုင်း၊ စက္ကန့်မဆိုင်း လည်ပတ်ခြင်းသဘောရှိပါလားဆိုပြီး သတိသံဝေဂလေး ရလာမိပါသည်။

မိမိကိုယ်တိုင် မကောင်းမှုကို တတ်နိုင်သမျှ မပြုဘဲ ကိုယ်၊ နှုတ်၊ နှလုံးကို ကောင်းစွာစောင့်ထိန်းရန် မိမိကိုယ်ကိုမိမိ သတိပေးကာ အတတ်နိုင်ဆုံး ကောင်းအောင် နေခဲ့ပါသည်။ ရခဲလှစွာသော လူ့ဘ၀၌ ကောင်းကျိုးနှင့် ဆိုးပြစ်များကို သေချာစွာမသိဘဲ ကုသိုလ်၊ အကုသိုလ်တွေကို မခွဲခြားနိုင်ခဲ့ပါလျှင် အလာကောင်းပေမယ့် အပြန်ခရီးမှာ အရှုံးနှင့်သာ ထွက်သွားရပေလိမ့်မည်။ ထို့ကြောင့် အမျိုးကောင်းသား အမျိုးကောင်းသမီးတို့အနေနဲ့ မိမိစိတ်၌ မကောင်းသောအတွေးနှင့် အကျင့်ဆိုးများ ပေါ်ပေါက်လာခဲ့သော် သတိထားရှောင်ကြဉ်နေကြရမည် ဖြစ်ပါသတည်း။

ယဉ်ငြိမ်းလှ
( မြတ်မင်္ဂလာ ၂၀၀၇-ခု မေလ)

No comments: