Friday, April 16, 2010

ဘာသာရေး ပြဿနာ ( ၉ )

( ဘဒ္ဒန္တ ၀ါယာမသာရ ဖြေသည် )

(မေး) (ပရိသတ် လေးပါး)
အရှင်ဘုရား၊ ပရိသတ်လေးပါးဟူသည်
(က) မင်း၊ ပုဏ္ဏား၊ ရဟန်း၊ ဟူဌေး ဟူ၍၄င်း။
(ခ) မင်း၊ ပုဏ္ဏား၊ ရဟန်း၊ သူဆင်းရဲ ဟူ၍၄င်း မကွဲပြားပါ၍ ဘယ်အရာက အမှန်ဖြစ်ပါသနည်း။
ပရိသတ်လေးပါးဟူ၍ ခွဲခြားသတ်မှတ်ချက် ပေါ်ပေါက်လာရခြင်းကို ဖြေကြားပေးတော်မူပါဘုရား။
( ဦးလှမြင့်-မြန်မာ့စိုက်ပျိုးရေးဘဏ်၊ မြေပုံမြို့)

(ဖြေ)
ဦးလှမြင့်၏အမေးတွင် ပရိသတ် ၄-ပါးနှင့် အမျိုး ၄-ပါး မကွဲပြားဘဲ ဖြစ်နေသည်ကို တွေ့ရပါ၏။
ပရိသတ်ဟု သုံးရာတွင် ဘုရား တရားဟောတော်မူသောအခါ ပါဝင်ကြသော တရားနာပရသတ်ကို ဆိုလိုသည်။
တနည်းအားဖြင့် ဘုရားရှင်၏ သာသနာတော်မြတ်ကြီး ဆက်လက်ကြာရှည်အောင် စောင့်ရှောက်ရမည့် ပုဂ္ဂိုလ်များကိုလည်း ပရိသတ်ဟု ဆိုပါသည်။ ပရိသတ်အစု ၃-မျိုး တွေ့ရပါသည်။

(၁) ပထမအစု။
ပရိသတ် ၄-ပါး
(က) ဘိက္ခု- ရဟန်း အမျိုးသား ပရိသတ်။
(ခ) ဘိက္ခုနီ- ရဟန်းအမျိုးသမီး ပရိသတ်။( ယခုခေတ်မရှိတော့ပါ)
(ဂ) ဥပါသကာ-ရတနာသုံးပါး သီလမြဲသည့် အမျိုးသား။
(ဃ) ဥပါသကီ-ရတနာသုံးပါး သီလမြဲသည့် အမျိုးသမီးပရိသတ်-ဟု အင်္ဂုတ္တိုရ်ပါဠိ အဋ္ဌကထာများတွင် လာရှိပါသည်။

(၂) ဒုတိယအစု။
တနည်း ပရိသတ် ၄-ပါး
(က) လူပရိသတ်။
(ခ) နတ်ပရိသတ်။
(ဂ) ဗြဟ္မာပရိသတ်။
(ဃ) ရဟန်းပရိသတ်-ဟုလာရှိပြန်၏။

(၃) တတိယအစု။
တနည်း ပရိသတ် ၈-ပါး
(က) ခတ္တိယပရိသာ-မင်းပရိသတ်။
(ခ) ဗြဟ္မဏပရိသာ-ပုဏ္ဏားပရိသတ်။
(ဂ) ဂဟပတိပရိသာ-သူကြွယ် သူဌေး ပရိသတ်။
(ဃ) သမဏပရ်ိသာ-ရဟန်းပရိသတ်။
(င) စတုမဟာရာဇိကပရိသာ-စတုမဟာရာဇ် နတ်ပရိသတ်။
(စ) တာဝတိံသာပရိသာ-တာဝတိံသာ နတ်ပရိသတ်။
(ဆ) မာရ ပရိသာ-မာရ်မင်းပရိသတ်။
(ဇ) ဗြဟ္မပရိသာ-ဗြဟ္မာပရိသတ်။ (အင်္ဂုတ္တိုရ်မှာပင် လာရှိပါသည်)

အမျိုး ၄-ပါးအစုလည်း ၂-စုတွေ့ရသည်။
ပထမအစု-အမျိုး ၄-ပါး၊ ကိုယ်ကျင့်တရားနှင့် အလုပ်အကိုင်အရ ကွဲပြားခြားနားသော အမျိုး ၄-ပါး
(က) ခတ္တိယ-မင်းမျိုး။
(ခ) ဗြဟ္မဏ-ကိုယ်ကျင့်သီလရှိကြသည့် ရသေ့၊ ရဟန်း၊ ပုဏ္ဏား။
(ဂ) ဝေဿ-ကုန်သည်သူကြွယ်မျိုး။
(ဃ) သုဒ္ဒ-သူဆင်းရဲမျိုး။ ( နိဒါန၀ဂ္ဂသံယုတ်)

တနည်း ဒုတိယအစု အမျိုး ၈-ပါး
(က) ခတ္တိယ-မင်းမျိုး။
(ခ) ဗြဟ္မဏ-သီလရှိသည့် ပုဏ္ဏားမျိုး။
(ဂ) ဝေဿ-ကုန်သည်သူကြွယ်မျိုး။
(ဃ) သုဒ္ဒ-သူဆင်းရဲမျိုး။
(င) သမဏ-ရဟန်းမျိုး။
(စ) ကုလ-အမျိုးအနွယ်ကောင်းသည့်အမျိုး။
(ဆ) ရာဇ၀ံသ-မှူးမတ်မျိုး။
(ဇ) အရိယ၀ံသ-အရိယာသူမြတ်မျိုး-ဟု မဟာနိဒ္ဒေသ တို့၌ လာရှိပြန်၏။
(သုတေသန သရုပ်ပြအဘိဓာန်မှ ဖော်ပြခြင်း ဖြစ်ပါသည်)
********************************************************************************

(မေး) (ဓာတ်ပုံဆရာနှင့် သိမ်)
အရှင်ဘုရား၊ သိမ်တခုထဲတွင် ရဟန်းလောင်းနှင့် သံဃာတော် ၁၈-ပါး ရဟန်းခံပွဲ ပြုလုပ်နေပါသည်။ ရဟန်းခံပွဲမပြီးခင် ဓာတ်ပုံဆရာက ဓာတ်ပုံဝင်ရိုက်ပါသည်။ ဓာတ်ပုံဆရာသည် ရဟန်းလောင်းကို ရပ်ပြီးဆုံးမသည့် သိမ်ထောင့်အထိ ၀င်ပါသည်။ တပည့်တော်ကြားဖူးသည်မှာ ရဟန်းခံစဉ် ရှင်သာမဏေတောင် မ၀င်ရဟု ကြားဖူးပါသည်။ သိမ်ဝင်သော ရဟန်းလောင်းမှာ ရဟန်းဖြစ်-မဖြစ် သိချင်ပါသည်ဘုရား။
( ကြည်မောင်-မြောက်သားတောင်အရှေ့ရွာ၊ ပျော်ဘွယ်)

(ဖြေ)
သဒ္ဒါမှာ လိင်၊ ၀ိနည်းမှာ သိမ်-ဟု အရေးကြီးသော ကိစ္စနှစ်ခုကို ပြောရိုးထုံးစံရှိပါသည်။
ဂရမ်မာ (သဒ္ဒါ) မှာ လိုင်မခွဲတတ်လျှင် ၀ါကျရေးတာ မမှန်တော့ပါ။ သိမ်ဝင်၍ ကံကြီး ကံငယ်ဆောင်ရာမှာ သိမ်နှင့်ပတ်သက်၍ မကျွမ်းကျင်လျှင် ကံမမြောက်၊ ကံမအောင်တော့ပါ။ အလွန်အရေးကြီးသည့် ကိစ္စဖြစ်ပါ၏။

မကျွမ်းကျင်လျှင် အရေးမကြီးသည်ကို အရေးကြီးသည်ဟု ထင်တတ်သည်။ အရေးကြီးသည်ကိုတော့ အရေးမကြီးဟု ထင်တတ်ကြသည်။ သိမ်ထဲရဟန်းခံခြင်းစသော ကံဆောင်ကမ္မ၀ါစာ ဖတ်သောအခါ ရဟန်းပုဂ္ဂိုလ်များအားလုံး တပါးနှင့်တပါး ၂-တောင့်ထွာအတွင်း မကွာစေဘဲ တစုတဝေးတည်း ရှိနေရမည်။ ရဟန်းအုပ်စုနှင့် လူ၊ ရှင်သာမဏေ စသည်တို့သည် ၂-တောင့်ထွာထက် ဝေးကွာသောနေရာမှာ ရှိရမည်။ ရဟန်းအုပ်စု ၂-တောင့်ထွာအတွင်း ရောက်နေလျှင် ရဟန်းနှင့်လူ တစပ်တည်းဖြစ်နေသောကြောင့် ကံမမြောက်ပေ။ ၂-တောင့်ထွာထက်မက ဝေးကွာနေလျှင် ကံပြု၍ ရပါသည်။

အချို့က သိမ်ထဲ မိန်းမ မ၀င်ကောင်း။ လူတွေ မ၀င်ကောင်းဟု တားမြစ်တတ်သည်။ အမှန်မှာ ၀င်ကောင်းပါသည်။ ၂-တောင့်ထွာ ကွာနေဖို့သာ လိုပါသည်။ သိမ်ထဲဝင်ခြင်းဖြင့် ဆုံးမပြောကြားသည်တို့ကို နာယူရသဖြင့် ဗဟုသုတပင် ရရှိနိုင်ပါသည်။

လူ-ဓာတ်ပုံဆရာသည် သိမ်ထဲဝင်၍ ရဟန်းအုပ်စုနှင့် ၂-တောင့်ထွာအကွာကသာနေ၍ ဓာတ်ပုံရိုက်နိုင်ပါသည်။ ပို၍ အရေးကြီးသည်မှာယခုခေတ် ရဟန်းပုဂ္ဂိုလ်များ ဓာတ်ပုံရိုက်တတ်ကြသည်။ ဓာတ်ပုံရိုက်သောရဟန်းသည် သိမ်ဝင်သော ရဟန်းအုပ်စုထဲမပါလျှင် သိမ်နယ်နိမိတ်အတွင်း မ၀င်ရဘဲ သိမ်နယ်နိမိတ်နှင့် လွတ်ကင်းသော၊ ဝေးသောနေရာတွင် နေရမည်။ သိမ်နယ်နိမိတ်အတွင်းဝင်၍ ဓာတ်ပုံရိုက်လျှင် သံဃာအစုကွဲသွား၍ ကံပျက်ပါသည်။ ထို့ကြောင့် သိမ်ဝင်၊ ကံကြီးကံငယ်ဆောင်ရာ၌ လူဓာတ်ပုံဆရာများသာ ရိုက်စေပြီး ရဟန်းပုဂ္ဂိုလ်များ ဓာတ်ပုံရိုက်ခြင်းကို အထူးရှောင်ကြဉ်သင့်လှ၏။
********************************************************************************

(မေး) ( ရဟန်းတော်များနှင့် ရွှေငွေ)
အရှင်ဘုရား၊ ရဟန်းတော်များသည် ရွှေငွေမကိုင်ရ-ဟု ၀ိနည်းတရားတော်တွင် ပညတ်ထားပါသည်။ သို့သော်လည်း ယခုခေတ်တွင် ခရီးသွားရာ၌ ငွေမကိုင်၍ မဖြစ်သည့်အခြေအနေသို့ ရောက်နေပါပြီ။ အစဉ်အဆက် ဒကာ ဒကာမများကလည်း ငွေလှူဒါန်းနေကြပါသည်။

တပည့်တော်အနေဖြင့်မူ ငွေကြေးအစား သင့်တော်သောပစ္စည်းကို လှူရလျှင် ရဟန်းလည်းအာပတ်မသင့်၊ တပည့်တော်တို့လည်း ကုသိုလ်ပိုရမည်ဟု ထင်မြင်မိပါသည်။ ဗုဒ္ဓအလိုကျ ရှင်းလင်းဖြေကြားပေးတော်မူပါဘုရား။
(ဦးမောင်ဦး-မီးရထားဆေးပေးခန်း၊ တောင်ငူ)

(ဖြေ)
ရွှေငွေကို ရဟန်းတော်များ မခံယူကောင်း၊ အနီး၌ မိမိအတွက်ချထားသည်ကို၎င်း၊ အနီး၌ ချထားသည်ကို သာယာသော်၎င်း အာပတ်အပြစ်သင့်၏။
ဦးမောင်ဦး ပြောသလို ရဟန်းလည်းအပြစ်မဖြစ်၊ လှူသူလည်း ကုသိုလ်ပိုရအောင် အပ်စပ်သောပစ္စည်းကို လှူခြင်းသည် ကောင်းပါ၏။

ပစ္စည်းလှူရာ၌ တကယ်လိုအပ်နေသော ပစ္စည်းဖြစ်လျှင် ပို၍ အကျိုးများနိုင်ရာ၏။ လောလောဆယ် မလိုအပ်သေးလျှင် သိမ်းထားရဦးမယ်၊ တကယ်လိုအပ်နေသော ပစ္စည်းကို လိုအပ်ချိန်မှာ လှူဒါန်းနိုင်ဖို့ မေးလျှောက်နေရဦးမည်။ မေး၍ ဖြေလိုက်သောပစ္စည်းသည် မိမိရည်မှန်းထားသော တန်ဖိုးထက် ပိုများနေလျှင် စိတ် ကသိကအောက် ဖြစ်နိုင်သည်။

ထို့ကြောင့် ပစ္စည်းလေးဖြာ လိုအပ်ရာရာ အလိုရှိသည့်အခါ လိုသလိုသုံးနိုင်ဖို့ရန် အပ်စပ်သော လှူဒါန်းနည်းဖြင့် ကပ္ပိယကာရက ညွှန်၍ န၀ကမ္မ (ဆွမ်း၊ သင်္ကန်း၊ ကျောင်း၊ ဆေး လိုအပ်ရာ အမှုသစ်၊ ကိစ္စသစ်) အတွက် လှူဒါန်းနိုင်ကြောင်း ဘုရားရှင်ဟောကြားထားပါသည်။ ထိုသို့ ရဟန်း၏ လက်ထဲသို့ တိုက်ရိုက်လှူသောစနစ် မဟုတ်ဘဲ အပ်စပ်အောင် စီမံပေးမည့် တဦးဦးထံ အပ်နှံလှူးဒါန်းခြင်းဖြင့် လိုအပ်ရာရာ လိုသလိုသုံးနိုင်အောင်၊ အပြစ်ကင်းအောင် ကုသိုလ်ပို၍ရအောင် လှူဒါန်းနိုင်ပါသည်။
********************************************************************************

(မေး) (ဘုန်းကြီးရဟန်းများ မိဘအမွေ ဆိုင်သင့်-မဆိုင်သင့်)
အရှင်ဘုရား၊ တပည့်တော် အမြဲတမ်းကြည်ညိုကိုးကွယ် လှူဒါန်းနေသော ဘုန်းကြီးသည် ကွယ်လွန်ပြီးသော မိဘများ၏ အမွေစုကို ခံစားခွင့်ရလိုကြောင်း တောင်းဆိုလျက်ရှိပါသည်။ ထိုသို့ တောင်းဆိုခြင်းမှာ ၀ိနည်းတရားနှင့် ညီ-မညီ၊ အကယ်၍ ၀ိနည်းတရားနှင့်မညီသော ထိုရဟန်းကို တပည့်တော် လှူဒါန်းခြင်းဖြင့် အကျိုး ရှိ-မရှိ သိလိုပါသည်ဘုရား။
( ဦးမြလေး-ပညာရေးဝန်ထမ်းဟောင်း၊ ကံမမြို့၊ သရက်ခရိုင်)

(ဖြေ)
ပိဋကတ်တော်တွင် အမွေဆိုင်သင့်-မဆိုင်သင့် အချက်ကို အတိအကျ ပြဆိုချက် မရှိပါ။ သို့သော်လည်း မိဘအမွေ ရလိုခြင်းကြောင့် တောင်းခံခြင်းသည် ၀ိနည်းပြစ်အနေဖြင့် အပြစ်မရှိနိုင်ပါ။ ရဟန်းသီလ မပျက်နိုင်ပါ။
********************************************************************************

(မေး) (တရားထူး ရနိုင်-မရနိုင်)
အရှင်ဘုရား၊ သက်တော်ထင်ရှား မြတ်စွာဘုရားကို သွေးခြည်တော်ဥအောင် ပြုမိလျှင် ပဉ္စာနန္တရိယကံထိုက်ကြောင်း၊ တရားထူးမရနိုင်ကြောင်း သိရပါသည်။ ဗုဒ္ဓရုပ်ပွားတော် စေတီတော်များကို ပျက်စီးအောင် ပြုမိသောသူများကော တရားထူး ရနိုင်-မရနိုင် ဖြေကြားပေးတော်မူပါဘုရား။
( မောင်အောင်ကျော်-သာကေတမြို့နယ်၊ ရန်ကုန်)

(ဖြေ)
သက်တော်ထင်ရှား မြတ်စွာဘုရား၌ဖြစ်စေ၊ ပရိနိဗ္ဗာန် စံလွန်တော်မူပြီးသော ဘုရားရှင်တို့၌ဖြစ်စေ တူမျှသောစိတ်၊ တူမျှသော ယုံကြည်ချက်သဒ္ဓါ၊ တူမျှသော စေတနာ၊ တူမျှသော ပညာဖြင့် ဂုဏ်တော်အာရုံ ကောင်းစွာထုံလျက် ကြည်ညိုပူဇော်နိုင်မည်ဆိုလျှင် တူမျှသောအကျိုးကို ပေးနိုင်၏-ဟု ပီတ၀ိမာန ၀တ္ထု၌ ပါရှိသည်။(တိဋ္ဌန္တေ နိဗ္ဗူတေ စာပိ၊ သမေ စိတ္တေ သမံ ဖလံ၊ စေတောပဏိဓိ ဟေတုဟိ၊ သတ္တာ ဂစ္ဆန္တိ သုဂ္ဂတိံ။)

ကောင်းကျိုးပေးရာ၌ သဒ္ဓါ၊ စေတနာ၊ ပညာ၊ ထက်သန်တာချင်း တူမျှလျှင် သက်ရှိဘုရား၊ သက်မဲ့ဘုရား အကျိုးပေးတူ၏-ဟု ဆိုထားသည်။ သက်ရှိဘုရားကဲ့သို့ စေတီရုပ်ပွားတို့ကို ဖျက်ဆီးလိုသော စေတနာ၊ ဒေါသ၊ လုံ့လပယောဂ အစရှိသည်တို့ဖြင့် ဖျက်ဆီးခြင်း၊ ပျက်စီးအောင် ပြုလုပ်ခြင်းတို့သည်လည်း မကောင်းသောအကုသိုလ်ကံ အကျိုးပေးရာ၌ အပြစ်ကြီးတာခြင်း တူနိုင်ပါသည်။ ဖျက်ဆီးလိုသောစိတ်ဖြင့် မပြုမိအောင် အထူးရှောင်ကြဉ်ရပါမည်။ (ပြန်လည်၍ တင့်တယ်အောင်၊ အသစ်ဖြစ်အောင် ပြုပြင်ပူဇော်ခြင်းတို့၌ကား အပြစ်မရောက်သည့်အပြင် ကုသိုလ်ပင် လွန်စွာတိုးပွား အကျိုးများလှပါသည်။)
*********************************************************************************

(မေး) (သိမ်ပျက်-မပျက်)
အရှင်ဘုရား၊ သိမ်တခု တည်ဆောက်၍ ပြီးခါနီး ရေစက်မချရသေးခင် သိမ်ထဲ၌ သိမ်ဆောက်သည့် လက်သမားဆရာ သိမ်ထဲ၌အိပ်ရင်း သေဆုံးသွားပါသည်။ သည့်အတွက် သက်ရွယ်ကြီးသူတွေက သိမ်ပျက်သွားပြီဟု ပြောပါသည်။ တချို့က ရေစက်မချရသေးသည့်အတွက် သိမ်မပျက်ဟု ပြောကြပါသည်။ သိမ်ပျက်-မပျက် သိလိုပါသည်ဘုရား။
( ကိုဝင်းနိုင်-စလင်းမြို့)

(ဖြေ)
သိမ် မပျက်ပါ။ လူသေခြင်းနှင့် သိမ်ပျက်ခြင်း မသက်ဆိုင်ပါ။ ရေစက်ချပြီးခြင်း၊ မချရသေးခြင်းတို့ဖြင့်လည်း သိမ်ပျက်ခြင်းနှင့် မပတ်သက်ပါ။

( မြတ်မင်္ဂလာ ၂၀၀၇-ခု မေလ)

No comments: