Thursday, April 29, 2010

ဗောဇ္ဈင်္ဂသုတ်တော် အကျိုး

ကျွန်မတို့ မြန်မာလူမျိုး ဗုဒ္ဓဘာသာဝင်တို့သည် မိမိတို့ယုံကြည်ရာ အားထားရာအလိုက် မြတ်စွာဘုရား၏ ဂုဏ်တော်များ၊ ပရိတ်တော်များ၊ ဂါထာတော်များကို ရွတ်ဖတ်ပူဇော် ပွားများကြသည်များကို တွေ့ရှိရပါသည်။ ထိုသို့ ရွတ်ဖတ်ပူဇော်ခြင်းဖြင့် အကျိုးထူးများ ချမ်းသာခြင်းများ ရရှိသွားကြသည်များကိုလည်း အများအပြားပင် တွေ့ရှိခဲ့ဖူးပါသည်။

ကျွန်မသည် ဗုဒ္ဓဘာသာဝင်တယောက် ဖြစ်သည်နှင့်အညီ မြတ်စွာဘုရား၏ ဂုဏ်တော်များ၊ ပရိတ်တော်များကို အမြဲရွတ်ဖတ် ပူဇော်ပွားများခဲ့ပါသည်။ ထိုပရိတ်တော်ဟူသော စကားသည် ပရိတ္တဟူသော ပါဠိမှ ဆင်းသက်လာပါသည်။ အဓိပ္ပါယ်မှာ ပရိတ်ရွတ်ဖတ်ကြသူ ဗုဒ္ဓဘာသာဝင် သူတော်စင်တို့အတွက် မမြင်ရသော ဘေးအန္တရာယ်အသွယ်သွယ်တို့သည် မပေါ်ပေါက် မကျရောက်စေရန် ကြိုတင်ကာဆီးခြင်းဖြစ်ကြောင်း အဓိပ္ပါယ်သက်ရောက်ပါသည်။

ထိုပရိတ်ကြီး ၁၁-သုတ်မှ ဗောဇ္ဈင်္ဂသုတ်တော်ကို ရွတ်ဖတ်ခြင်းဖြင့် ၆-နှစ်တာမှ ခံစားခဲ့ရသော အရေပြားရောဂါကို မုချပျောက်ကင်း၍ ချမ်းသာခြင်းရရှိပုံ ကိုယ်တွေ့ဖြစ်ရပ်မှန်ကို ရေးသားတင်ပြအပ်ပါသည်။

ကျွန်မ၏ လက်ထိပ်တွင် လွန်ခဲ့သော ၆-နှစ်ခန့်မှစ၍ ရောဂါတမျိုး ဖြစ်ပေါ်ခံစားခဲ့ရပါသည်။ ထိုရောဂါမှာ အရေပြားများသည် အက်ကွဲလာခြင်း ဖြစ်ပါသည်။ အစပထမတွင် အရေခွံလဲသည်ဟုပင် ထင်မြင်မိပါသည်။ ဆောင်းတွင်းအခါ လက်မှ အရေခွံများ လဲတတ်သည်ဖြစ်ရာ ကျွန်မလည်း ထိုသို့ပင် အရေခွံလဲသည်ဟု ထင်မိလေသည်။ သို့သော် ထိုအရေခွံလဲခြင်းသည် ဆောင်းတွင်းအခါပင် မကဘဲ နွေ၊ မိုး၊ ဆောင်း ၃-ရာသီလုံးပင် အရေပြားများ ကွဲအက်နေပါသည်။ အစပထမတွင် နာကျင်ခြင်းမရှိသော်လည်း ၁-နှစ်လောက်အကြာတွင် ထိုလက်ထိပ်များမှာ နာကျင်လာပါသည်။ လက်ထိပ်မှ အရေပြားများမှာ ရေမထိလျှင် ကွဲအက်၍ သွေးများ ထွက်တတ်ပြီး ရေထိလျှင် အရေပြားမှာ ပါးလွှာ၍ သွေးခြည်များ ဥနေတတ်ပါသည်။ ကျွန်မလည်း မခံနိုင်သည့်အဆုံး အနီးရှိ ဆေးခန်းတခုသို့ သွားရောက်ပြသခဲ့ပါသည်။ ထိုဆရာဝန်က ကျွန်မအား ဗီတာမင် အီးဓာတ်လို၍ ဖြစ်ကြောင်းပြောပြီး Vitamin E ဆေးအား သောက်ရန် မှာကြားပါသည်။

ကျွန်မလည်း ဆေးကို ၂-ပတ်မျှလောက်သာ သောက်ပြီး ဆက်၍ မသောက်ဖြစ်တော့ပေ။ ကျွန်မ၏ရောဂါမှာလည်း သက်သာခြင်းမရှိဘဲ ပို၍ပင် ဆိုးလာပါတော့သည်။ အရေခွံမှာ အမြဲမပြတ် ကွာနေခြင်းကြောင့် ကျွန်မမှာ ထမင်းလည်း လက်နှင့်စား၍ မရဘဲ ဇွန်းနှင့်သာ စားရပါသည်။ အ၀တ်လျှော်၍လည်း မရပေ။ ကျွန်မ၏လက်မှာ ဆပ်ပြာ၊ ရေနှင့် ထိတွေ့ရမည်ကိုပင် အင်မတန် ကြောက်ရွံ့နေမိပါသည်။ ထို့ကြောင့် လက်အိတ်ကို အသုံးပြု၍ ကျွန်မအ၀တ်လျှော်၊ ပန်းကန်ဆေး စသည့် အလုပ်များ ပြုလုပ်ရာတွင် အဆင်ပြေလာသည့်အတွက် လက်အိတ်ကို ကျွန်မ အမြဲမပြတ် အသုံးပြုခဲ့ပါသည်။

အရေပြားကွာခြင်းမှာလည်း လက်ထိပ်တွင်သာ ဖြစ်သည့်အတွက် လက်အိတ်ကို အသုံးပြုပြီး အိမ်အလုပ်များကို လုပ်ကိုင်ရာတွင် အဆင်ပြေသဖြင့် ကျွန်မလည်း ပေါ့ပေါ့တန်တန်ပင် ပြန်၍နေခဲ့ပါသည်။ ထိုသို့ပင် ကျွန်မ ရောဂါခံစားရသည်မှာ ၆-နှစ်ပင် ပြည့်ခဲ့လေပြီ။ ကျွန်မလည်း ပေါ့ပေါ့တန်တန် နေခဲ့ရာမှ တနေ့တွင် ကျွန်၏လက်ထိပ်များကိုကြည့်ပြီး အင်မတန် ကြောက်ရွံ့လာမိပါသည်။ အဘယ်ကြောင့်ဆိုသော် အရေခွံကွာခြင်းမှာ လက်ထိပ်မှအောက်သို့ တဖြည်းဖြည်း ကူးစက်လာနေပြီ ဖြစ်သောကြောင့် ဖြစ်သည်။ ထိုအခါမှ ကျွန်မလည်း အလွန်ပင် ထိတ်လန့်တုန်လှုပ်မိပါတော့သည်။ လက်ချောင်းများမှာလည်း ကွေး၍ ဆန့်၍ မရအောင် နာကျင်နေပါတော့သည်။

ထိုအခါ ကျွန်မ၏စတ်ထဲတွင် တွေးထင်မိသည်က ကျွန်မ၏လက်ချောင်းများကို ဖြတ်ပစ်ရမည်လားဟုပင် သံသယ၀င်မိပါသည်။ ထိုသုိ့ ကျွန်မ အင်မတန် အားငယ်နေချိန်တွင် မြတ်စွာဘုရား၏ ပရိတ်ကြီး ၁၁-သုတ် စာအုပ်အား ဖတ်ရှုမိပါသည်။ ထိုပရိတ်ကြီး ၁၁-သုတ် စာအုပ်မှ ဗောဇ္ဈင်သုတ်တော်အား ရွတ်ဖတ်ခြင်းမှ ဗောဇ္ဈင်္ဂသုတ်တော်၏ အကျိုးကို သိရှိလာရပါသည်။ ထိုဗောဇ္ဈင်သုတ်တော်ကိုနေ့စဉ် ရွတ်ဖတ်ပွားများပါက ရောဂါဆိုး၊ ဝေဒနာဆိုးပင် မကပ်ငြိနိုင်ဘဲ ပျောက်ကင်းချမ်းသာစေနိုင်ကြောင်းကို သိရှိရပြီး ကျွန်မ အားတက်ခဲ့မိပါသည်။

ထိုအချိန်တွင် ကျွန်မသည် ဗောဇ္ဈင်္ဂသုတ်တော်ကို ရွတ်ဖတ်ပူဇော်ခဲ့ပါသည်။ ကျွန်မသည် ရွတ်ဖတ်ပူဇော်ပြီးတိုင်း ဆုတဆုကို တောင်းခဲ့ပါသည်။ ထိုဆုမှာ ဘုရားတပည့်တော်မသည် ဤဗောဇ္ဈင်္ဂသုတ်တော်ကို ယုံကြည်စွာ ရွတ်ဖတ်ပူဇော်ခြင်းကြောင့် တပည့်တော်မ၏လက်တွင် ခံစားနေရသော ရောဂါဝေဒနာများ အမြန်ပျောက်ကင်းပါစေဟု ဆုတောင်းမိပါသည်။ ကျွန်မသည် ဗောဇ္ဈင်္ဂသုတ်တော်ကို ရွတ်ဖတ်ရာတွင် ဘုရားရှိခိုးချိန်တွင်သာမကဘဲ အချိန်အားတိုင်း ရွတ်ဖတ်ပူဇော်မိပါသည်။

ဗောဇ္ဈင်္ဂသုတ်တော်ကို စတင်ရွတ်ဖတ်ပူဇော်ခြင်းမှစ၍ ကျွန်မ၏လက်တွင် ထူးခြားမှုများ ဖြစ်ပေါ်လာပါသည်။ အရေခွံကွာကျခြင်းမှာ အောက်သို့ ဆက်လက်မကူးစက်တော့ဘဲ လက်ထိပ်တွင်သာ ဖြစ်နေပါသည်။ လက်မှာလည်း ကွေးနိုင်၊ ဆန့်နိုင်ပြီဖြစ်၍ နာကျင်မှုလည်း မရှိတော့ပေ။ ကျွန်မလည်း အားများ ပို၍ တက်လာခဲ့ပြီး ဗောဇ္ဈင်္ဂသုတ်တော်ကို ယုံယုံကြည်ကြည်ဖြင့် ရွတ်ဖတ်ပူဇော်လာခဲ့ပါသည်။

ထိုသို့ ဗောဇ္ဈင်္ဂသုတ်တော်ကို ရွတ်ဖတ်ပူဇော်ခြင်းဖြင့် ကျွန်မတို့၏မိတ်ဆွေ ဆရာဝန်ထံ သွားရောက်ပြသခဲ့ရာ ကျွန်မ၏လက်ထိပ်မှ အနာမှာ ရိုးရိုးအရေခွံလဲသည်လည်းမဟုတ်၊ Vitarmin-E ဓာတ် လိုသည်လည်းမဟုတ်ဘဲ ၀ဲနှင်းခူ ဖြစ်နေကြာင်း သိရလေသည်။ သို့သော် အံ့သြစရာကောင်းသည်မှာ ကျွန်မ၏ရောဂါသည် လုံးဝမယားဘဲ ခြောက်နေခြင်းပင် ဖြစ်ပါသည်။ ဆရာဝန်က ကျွန်မအား ဆေးထိုးပေး၍ သောက်ဆေးများ တပတ်စာ ပေးလိုက်ပါသည်။

ကျွန်မလည်း ယခုမှပင် ကျွန်မ၏ ရောဂါမှာ ၀ဲနှင်းခူဖြစ်နေသည်ကို သိရှိရပြီး သောက်ဆေးများလည်း သောက်ကာ ဗောဇ္ဈင်္ဂသုတ်တော်ကိုလည်း ပို၍ပင် ရွတ်ဖတ်ပူဇော်မိပါသည်။ တပတ်ခန့်အကြာတွင် ကျွန်မ၏လက်ထိပ်မှ ၆-နှစ်ကြာမျှ ခံစားခဲ့ရသော အရေပြားရောဂါသည် ကင်းစင်ပပျောက်၍ ချောမွေ့နေသည်ကို အံ့သြစွာ တွေ့ရှိခဲ့ရပါသည်။

ထိုသို့ ကျွန်မ၏ အရေပြားရောဂါ ပျောက်သွားခြင်းသည် ဗောဇ္ဈင်္ဂသုတ်တော်ကို ယုံကြည်စွာ ရွတ်ဖတ်ပူဇော်ဖြင်းကြောင့် ဖြစ်မည်၏ဟု ယုံကြည်ပါသည်။ ထိုဗောဇ္ဈင်္ဂသုတ်တော်ကို ရွတ်ဖတ်ပူဇော်ခြင်းကြောင့် ဆရာကောင်း၊ သမားကောင်းကိုတွေ့ရှိကာ အနာနှင့်ဆေး တွေ့၍ ရောဂါပျောက်ကင်းခဲ့ရသည်။ ထို့ကြောင့် ရောဂါဝေဒနာ ကျရောက်နေသူများသည် ဤဗောဇ္ဈင်္ဂသုတ်တော်ကို ယုံကြည်စွာ ပီပီသသ ရွတ်ပေးပါက ရောဂါပျောက်ကင်းချမ်းသာခြင်းသို့ မုချရောက်ရှိလိမ့်မည်ဖြစ်ကြောင်း ရေးသားတင်ပြအပ်ပါသည်။

မနွဲ့-ယဉ်ကျေးမှု
( မြတ်မင်္ဂလာ ၂၀၀၇-ခု ဇွန်လ)

No comments: