Thursday, April 22, 2010

မြတ်သောအရိယာမဂ်ကို မရနိုင်သူ နှင့် ရနိုင်သူ

အခါတပါး၌ မြတ်စွာဘုရားသည် ရဟန်းတို့အား မြင့်မြတ်သော အရိယာမဂ်ကို မရနိုင်သောပုဂ္ဂိုလ်နှင့် ရနိုင်သော ပုဂ္ဂိုလ်တို့၏ အင်္ဂါ ၅-ပါးအကြောင်းကို ဟောတော်မူသည်။

ရဟန်းတို့၊ မြင့်မြတ်သော အရိယာမဂ်ကို မရနိုင်သော ပုဂ္ဂိုလ်တို့၌ အင်္ဂါ ၅-ပါးရှိသည်။ ယင်းတို့မှာ-
(၁) ဟောကြားအပ်သော တရားကို မထီမဲ့မြင် ပြုခြင်း။
(၂) တရားဟောပုဂ္ဂိုလ်ကို မထီမဲ့မြင် ပြုခြင်း။
(၃) မိမိကိုယ်ကို မထီမဲ့မြင် ပြုခြင်း။
(၄) ပျံ့လွင့်သောစိတ်၊ မတည်ကြည်သောစိတ်ဖြင့် တရားကိုနာခြင်း။
(၅) မသင့်မတင့် နှလုံးသွင်းခြင်းတို့ ဖြစ်သည်။
ထိုသူတို့သည် သူတော်ကောင်းတရားကို ကြားနာရသော်လည်း ကုသိုလ်တရားတို့၏ မှန်ကန်သော အရိယာမဂ်ကို မရနိုင်။

ရဟန်းတို့၊ မြင့်မြတ်သော အရိယာမဂ်ကို ရနိုင်သောပုဂ္ဂိုလ်တို့၌ အင်္ဂါ ၅-ပါးရှိသည်။ ယင်းတို့မှာ-
(၁) ဟောကြားအပ်သော တရားကို မထီမဲ့မြင် မပြုခြင်း။
(၂) တရားဟောပုဂ္ဂိုလ်ကို မထီမဲ့မြင် မပြုခြင်း။
(၃) မိမိကိုယ်ကို မထီမဲ့မြင် မပြုခြင်း။
(၄) ပျံ့လွင့်သောစိတ်၊ မတည်ကြည်သောစိတ်ဖြင့် တရားကို မနာခြင်း။
(၅) သင့်တင့်ကောင်းမွန်စွာ နှလုံးသွင်းခြင်းတို့ ဖြစ်သည်။
ထိုသူတို့သည် သူတော်ကောင်းတရားကို ကြားနာရလျှင် ကုသိုလ်တရားတို့၏ မှန်ကန်သော အရိယာမဂ်ကို ရနိုင်၏-ဟု ဟောတော်မူသည်။

ကျမ်းကိုး။ အင်္ဂုတ္တရ ပဉ္ဖကနိပါတ်၊ သဒ္ဓမ္မ၀ဂ်၊ ပထမသမ္မတ္တ နိယာမသုတ်။

ဦးငွေအောင်မွန်
( မြတ်မင်္ဂလာ ၂၀၀၇-ခု မေလ)

No comments: