Sunday, May 9, 2010

ဘာသာရေး ပြဿနာ ( ၁၂ )

( ဘဒ္ဒန္တ ၀ါယာမသာရ ဖြေသည် )
(မေး) (သိပ္ပံနှင့် နည်းပညာတိုးတက်မှုများ)
အရှင်ဘုရား၊ ဤဘဒ္ဒကမ္ဘာမတိုင်မီ ပျက်သုဉ်းပြီးသော အခြားကမ္ဘာများတွင် ဤကမ္ဘာကဲ့သို့ နေစကြာဝဠာ ဖွဲ့စည်းပုံဖြင့် တည်ရှိပါသလား။ ယခုမျက်မှောက်ခေတ် ကမ္ဘာကဲ့သို့ သိပ္ပံနည်းပညာ တိုးတက်သည့်ခေတ်များ ရှိပါသလား။ သိလိုပါသည်ဘုရား။
(မောင်ကျော်မင်း-ရန်ကန်)

(ဖြေ)
ကမ္ဘာတိုင်းမှာ နေစကြာဝဠာဖွဲ့စည်းပုံ အတူတူပင် ဖြစ်ပါသည်။ သိပ္ပံပညာဆိုသည်မှာ လူသားတို့၏ ကြံဆချက်၊ ဆောင်ရွက်ချက်သာ ဖြစ်သည့်အတွက် လူရှိသောကမ္ဘာမှာ နည်းပညာအမျိုးမျိုး ရှိမည်မှာ သေချာပါသည်။ လူရှိလျှင် စိတ်ဆိုသော နာမ်တရားလည်း ရှိ၏။ စိတ်သည် အလွန်ဆန်းကြယ်သောသဘော ရှိ၏။

စိတ်ဆန်းကြယ်၍ လိုချင် ဖြစ်ချင်သည့်တဏှာ ဆန်းကြယ်သည်။ တဏှာဆန်းကြယ်၍ သတ္တ၀ါတို့ပြုလုပ်သည့် ကံ အမျိုးမျိုး ဆန်းကြယ်သည်။ ကံဆန်းကြယ်၍ ပုဂ္ဂိုလ်သတ္တ၀ါအမျိုးမျိုး သက်ရှိသက်မဲ့ အရာဝတ္ထု အဆန်းတကြယ် အမျိုးမျိုးတို့ ပေါ်ပေါက်လာရ၏။

အရာရာ စိတ်ဖြင့် တီထွင်ကြံဆ ဖန်တီးကြခြင်းဖြစ်သည်။ ခေတ်အမျိုးမျိုး၊ ကမ္ဘာအမျိုးမျိုးမှာပင် သူ့ပုံစံနှင့်သူ အံ့သြဖွယ်ပညာရပ်များ ဖြစ်ထွန်းနေနိုင်ပါသည်။
ရိုက်ညီနောင်တို့သည် လွန်ခဲ့သော နှစ်ပေါင်း ၁၀၀-ကျော် ၁၉၀၈-ခုနှစ်က လေယာဉ်ပျံကို စတင်တီထွင်ခဲ့သလို လွန်ခဲ့သောနှစ်ပေါင်း ၂၅၀၀-ကျော်က ဂေါတမဘုရားရှင် လက်ထက်တွင် ဥတေနမင်းနှင့် ၀ါသုလဒတ္တာ မိဖုရားတို့၏ သားတော် ဗောဓိမင်းသားသည် အလွန်ခမ်းနားတင့်တယ်၍ ကောင်းကင် ပျံတက်လုမတတ်ဖြစ်သော ကောကနုဒမည်သော ပြာသာဒ်ကြီးကို တည်ဆောက်၏။ ထိုပြာသာဒ်သည် လူအပေါင်းတို့ စုတ်သပ်ရွှင်မော အံ့သြချီးမွမ်း၍မဆုံးအောင် တင့်တယ်လှ၏။ ဗောဓိမင်းသားသည် နောင်အခါတွင် ဤပြာသာဒ်နှင့်တူသော ပြာသာဒ်မျိုး မရှိစေရန် လက်သမားဆရာ ဗိသုကာပညာရှင်ကြီးအား သတ်ခြင်း၊ ခြေလက်ဖြတ်ခြင်း၊ မျက်စိကန်းအောင် ပြုခြင်းစသော အမှုတို့ကို ပြုရန် ရက်စက်ကြမ်းကြုတ်သော အကြံအစည်ကို ကြံလေ၏။ ထိုအကြောင်းကို ဗိသုကာဆရာကြီး လျှို့ဝှက်စွာ ဂဠုန်ငှက်ရုပ်ယာဉ်ပျံကြီးကိုပြု၍ ကောင်းကင်သို့ ပျံတက်ပြီး ဟိမ၀န္တာအထိ ပျံသန်းသွား၏။ ထိုဟိမ၀န္တာအရပ်၌ ကဋ္ဌ၀ါဟနမင်းအဖြစ် စိုးစံ၍နေလေ၏။ သူ့ခေတ် သူ့ကမ္ဘာ အမျိုးမျိုးမှာ သူ့ဟန် သူ့ပုံစံ အမျိုးမျိုးဖြင့် သိပ္ပံပညာကဲ့သို့ ထူးဆန်းအံ့သြဖွယ်တွေ ရှိနေမည်မှာ အမှန်ဖြစ်ပါသည်။
********************************************************************************

(မေး) (သံဃဒိသေသ်အာပတ်နှင့် တရားအားထုတ်ခြင်း )
အရှင်ဘုရား၊ တောရကျောင်း ရိပ်သာများတွင် တရားဘာဝနာအားထုတ်တော်မူလျက်ရှိကြကုန်သော သံဃာတော်များသည် ပရိဝတ်၊ မာနတ် စသော ၀တ်ဆောက်တည်မှ ကျေအေးပျောက်ကင်းနိုင်သော အပြစ်များရှိသည်ကို သိပါလျက် ၀တ်ဆောက်တည်ခြင်းမပြုဘဲ တရားဘာဝနာအားထုတ်လျှင် ဈာန်မဂ်ဖိုလ် ရနိုင်-မရနိုင် ဖြေကြားပေးတော်မူပါဘုရား။
(တောရဘိက္ခု-ဘဒ္ဓန္တအာစာရာလင်္ကာရ)

(ဖြေ)
ရဟန်းတော်များအတွက် ပညတ်အပ်သော ဘိက္ခုပါတိမောက်ပါဠိတွင် မိမိတို့၌ အပြစ်များရှိက ထုတ်ဖော်ပြောကြားရန် ဥပုသ်ပြုရာသိမ်ထဲ၌ သုံးကြိမ်သုံးခါ ကြေညာရသည်။ ထိုအခါ အာပတ်ရှိလျက် ထုတ်ဖော်ကြေညာခြင်း မပြုဘဲ ဆိတ်ဆိတ်နေခြင်းသည် မုသားစကားမပြောသော်လည်း ပြောသကဲ့သို့ လိမ်ညာရာရောက်ပေသည်။ ထို့ကြောင့် သမ္ပဇာနမုသာဝါဒ-လိမ်ညာအပြစ် သင့်ရောက်ပါသည်။ (သမ္ပဇာန မုသာဝါဒေါ ခေါပနာယသ္မတော အန္တရာယိကော ဓမ္မော ၀ုတ္တော ဘဂ၀တာ) ထိုအပြစ်ကလေးသည်ပင် ဈာန်မဂ်ဖိုလ်၏ အန္တရာယ်ဖြစ်သည်ဟု ဘုရားရှင်ဟောတော်မူပါသည်။

ထို့ပြင် မိလိန္ဒပဥှာ၌ မဂ်ဖိုလ်မရနိုင်သော ပုဂ္ဂိုလ် ၁၆-ဦးတွင်လည်း ပရိဝတ်မာနတ်စသော ၀တ်ဆောက်တည်မှ ပျောက်သော သံဃာဒိသိသ် အာပတ်ရှိနေသော ပုဂ္ဂိုလ်ပါရှိသည်။ ၄င်းအာပတ်ရှိသူအား ဈာန်မဂ်ဖိုလ် မရနိုင်ပါ။
မဂ်ဖိုလ်မရနိုင်သူ ၁၆-ဦးမှာ
(၁) တိရစ္ဆာန်
(၂) ပြိတ္တာ။ (ဝေမာနိကပြိတ္တာ အချို့မှတပါး။)
(၃) မိစ္ဆာဒိဋ္ဌိ
(၄) ကုဟက-အံ့ဖွယ်ပြု၍ ညာစားသူ
(၅-၆-၇-၈-၉) ပဉ္စာနန္တရိယကံ ထိုက်သူများ
(၁၀) ထေယျသံဝါသက-ထေရ်ခိုး
(၁၁) တိတ္ထိယပက္ကန္တက-တိတ္ထိအဖြစ်သို့ ပြောင်းသွားသူ
(၁၂) ဘိက္ခုနိဒူသက-ဘိက္ခုနီမကို ဖျက်ဆီးသူ
(၁၃) သံဃာဒိသိသ် အာပတ်သင့်ပြီး မကုစားရသေးသော ပုဂ္ဂိုလ်
(၁၄) ပဏ္ဍုတ် ၃-မျိုး
(၁၅) ဥဘတောဗျည်း
(၁၆) ၇-နှစ်အောက်ငယ်သော ပုဂ္ဂိုလ်။ (၅-နှစ်သားအချို့ တရားထူးရသည်များ အနည်းငယ်သာရှိသည်)။
********************************************************************************

(မေး) (ဂေါတမဘုရားရှင်၏ အလုပ်အကျွေးများ )
အရှင်ဘုရား၊ တပည့်တော် ဖတ်ဖူးသော ဗုဒ္ဓ၀င်အကျဉ်းတွင် မြတ်စွာဘုရား၏ အလုပ်အကျွေးသည် အရှင်အာနန္ဒာ-ဟု သိရပါသည်။ အရှင်အာနန္ဒာသည် ဘုရားရှင် အသက်ဘယ်အရွယ်ရောက်မှ အလုပ်အကျွေးပြုသည်ကို၎င်း၊ အရှင်အာနန္ဒာ အလုပ်အကျွေးမပြုခင်က အဘယ်ရဟန်းများ၊ အလုပ်အကျွေး ပြုစုခဲ့ကြသည်ကို၎င်း၊ အရှင်အာနန္ဒာသည် ညီတော်အာနန္ဒာလား၊ ဖွားဖက်တော် အာနန္ဒာလား ဖြေကြားပေးတော်မူပါဘုရား။
(အရှင်သာသန၊ မန္တလေး)

(ဖြေ)
အရှင်အာနန္ဒာသည် မြတ်စွာဘုရားရှင် သက်တော် ၅၅-နှစ်အလွန် ၀ါတော် ၂၀-ကျော်အချိန်မှစ၍ အမြဲတမ်း အလုပ်အကျွေးအဖြစ် လှည့်လည်လိုက်ပါတော်မူပါသည်။
မြတ်စွာဘုရား၏ ပထမဗောဓိခေါ် ၀ါတော် ၂၀-အတွင်းတွင် အမြဲတမ်းအလုပ်အကျွေး မရှိဘဲ တခါတရံ အရှင်နာဂသမာလမထေရ်၊ တခါတရံ အရှင်နာဂိတ၊ အရှင်မေဃိယ၊ အရှင်ဥပ၀ါန၊ လိစ္ဆ၀ီမင်းသား သုနက္ခတ္တရဟန်း၊ အရှင်သာရိပုတ္တရာ၏ ညီတော် အရှင်စုန္ဒ၊ အရှင်သာဂတ၊ အရှင်ရာဓမထေရ် စသော မထေရ်တို့ အလျဉ်းသင့်သလို ပြုစုလုပ်ကျွေး လှည့်လည်လိုက်ပါကြ၏။

ဘုရားရှင် ၀ါတော် ၂၀-ကျော်လာသောအခါ ရဟန်းတို့-ငါဘုရားသည် အသက်အရွယ် ကြီးရင့်လာပြီ။ အချို့ရဟန်းများသည် ငါဘုရားက ဤလမ်းခရီးဖြင့် သွားကြကုန်စို့-ဟု ပြောဆိုသော်လည်း အခြားခရီးဖြင့်သွား၍ ငါဘုရားကို စွန့်ခွာသွားကြကုန်၏။( အရှင်မေဃိယကို ညွှန်းပါသည်)။
အချို့ရဟန်းများကမူ ငါဘုရား၏ သပိတ်သင်္ကန်းတို့ကို မြေ၌ချထားမည့် အခြေအနေထိ ရိုင်းရိုင်းစိုင်းစိုင်း ပြုမူကြသေးသည်။ (အရှင်မေဃိယကို ညွှန်းသည်)။
သို့အတွက်ကြောင့် ငါဘုရားအတွက် အမြဲပြုစုလုပ်ကျွေးမည့် ရဟန်းတပါးကို သင်ချစ်သားတို့ စဉ်းစားရွေးချယ်ကြလော့-ဟု မိန့်တော်မုရသည်။

ထိုစကားကိုကြား၍ ရဟန်းအပေါင်းတို့ ဓမ္မသံဝေဂကြီးစွာ ဖြစ်တော်မူကြကုန်၏။ ဤသို့ အမြတ်ဆုံးဘုရားရှင်ကို လုပ်ကျွေးရသည်ကိုပင် မထေရ်မဲ့မြင် ပြုတော်မူကြကုန်သေး၏။ ထို့ကြောင့် အရှင်အာနန္ဒာက တာဝန်ယူခြင်း ဖြစ်သည်။
အရှင်အာနန္ဒာကိုပင် ဖွားဖက်တော် အာနန္ဒာဟု၎င်း၊ ညီတော် အာနန္ဒာဟု၎င်း၊ အမျိုးမျိုးခေါ်ခြင်းဖြစ်ပါသည်။

ဖွားဖက်တော် စာရင်းလင်္ကာမှာ-
ယသော်ခင်လေး၊ ညီထွေးအာနန်၊ ကဏ္ဍကမြင်း၊ ကျွန်ရင်းမောင်ဆန်၊ ကာဠုဒါယိ၊ ဗောဓိရုက္ခံ၊ ရွှေအိုးစွက်၊ ဖွားဖက်ခုနစ်တန်။
ကာဠု၊ ယသော်၊ ညီတော်၊ ဆန္ဒ၊ ကဏ္ဍက၊ သောဏ္ဏ၊ ဗုဒ္ဓဟေ-ဟု၎င်း။
အာ-ဗော-ကာ-ယ-ဆန်-ရွှေ-ကဏ် ဟု၎င်း။ အမျိုးမျိုး စပ်ဆိုထားကြကုန်၏။
********************************************************************************

(မေး) (စာပွဲတခုတည်း ရဟန်းနှင့်လူ အတူအသုံးပြုမှု)
အရှင်ဘုရား၊ ရဟန်းတပါးသည် လူပုဂ္ဂိုလ်များနှင့် စားပွဲကြီးတခုတည်းတွင် အတူထိုင်၍ ဘုဉ်းပေးနေသည်ကို တွေ့ရပါသည်။ ထိုသို့ အတူဘုဉ်းပေးသုံးဆောင်ခြင်းဖြင့် ဘုန်းကြီးနှင့်လူများ မည်သည့်အပြစ် သင့်သည်ကို ဖြေကြားပေးတော်မူပါဘုရား။
(လွင်ဇော်မိုး-မြောက်ဥက္ကလာပ)

(ဖြေ)
စားပွဲတခုတည်း ဖြစ်သော်လည်း ရဟန်းအတွက် သီးသန့်ထမင်း၊ ဟင်းတို့ကို ကပ်ထားပြီး သီးသန့်ပန်းကန်ခွက်ယောက်များဖြင့် ဘုဉ်းပေးသုံးဆောင်လျှင် အကပ်မပျက်၊ အပြစ်မသင့်ပါ။ ထမင်းဟင်းခွက်များ အတူတူနှိုက်ယူစားသုံးလျှင်ကား ရဟန်းတွင် ပါစိတ်အာပတ်သင့်ပြီး လူဒါယကာများအတွက် ရဟန်းတော်များကို မရိုသေခြင်းအပြစ် ဖြစ်ပါသည်။
********************************************************************************

(မေး) (ဘုရားပုံ-ဘုန်းကြီးပုံများ၊ လည်ပင်း၌ ဆွဲခြင်း)
အရှင်ဘုရား၊ လူ၏လည်ပင်း၌ ဘုရားပုံ၊ ဆရာတော်ပုံများ ဆွဲခြင်းသည် အပြစ်ရှိ-မရှိ၊ ၄င်းဘုရားပုံ၊ ဆရာတော်ပုံများ ဆွဲထားသူသည် သန့်စင်ခန်းသို့ဝင်လျှင် အပြစ်ရှိ-မရှိ ပြည့်စုံစွာ ဖြေကြားပေးတော်မူပါဘုရား။
(နန္ဒာမိုးမြေ-ရန်ကုန်)

(ဖြေ)
ရိုသေပူဇော် ကိုးကွယ်လိုသောအားဖြင့် ဆွဲလျှင် အပြစ်မရှိပါ။ မရိုမသေ ညစ်ညစ်ပတ်ပတ် ဆွဲလျှင်ကား အပြစ်ရှိနိုင်သည်။ ဤခန္ဓာသည် မသန့်ရှင်းသော အနံ့မကောင်းသော ခန္ဓာဖြစ်၍ မဆွဲခြင်းကား အပြစ်မဖြစ်တော့ပါ။ ပုံကို ဆွဲထားမည့်အစား စိတ်ထဲ နှလုံးသားထဲတွင် ဘုရားပုံတော်၊ ဂုဏ်တော်များ စွဲထုံထားဖို့ ပို၍ အရေးကြီးပါသည်။
********************************************************************************

(မေး) (သုံးနှစ်သားကလေး၏ ဖြစ်ရပ်ဆန်း)
အရှင်ဘုရား၊ ကျောက်တံတားမြို့နယ်တွင် အသက်သုံးနှစ်သာ ရှိသေးသော မောင်ဇေယျာလင်းအမည်ရှိ မူကြိုကျောင်းသားလေးသည် စာတွေကို လက်တန်းအမြန်ဖတ်နိုင်သည်ဆိုသည့် ဆန်းပြားသောသတင်းတပုဒ် ဂျာနယ်တစောင်တွင် ဖတ်ရှုလိုက်ရပါသည်။ ဤကဲ့သို့ ဖြစ်ရပ်ဆန်းများ ရှိနိုင်-မရှိနိုင် ဖြေကြားပေးတော်မူပါဘုရား။
(မမေကျော်ကြီး(ခ) မသြမေကျော်-ကယားရိုးမ)

(ဖြေ) ရှိနိုင်ပါသည်။ အနောက်နိုင်ငံသတင်းများအရ လွန်ခဲ့သော နှစ် ၂၀-ခန့်က ဖတ်ဖူးသည်မှာ ကလေးငယ်တဦးသည် သင်္ချာပါမောက္ခကြီးများသာ တွက်နိုင်သော သင်္ချာများကို အလွယ်တကူ တွက်နိုင်ကြောင်း သိရသည်။ ဘ၀ပါရမီ အလေ့အထုံပါလာလျှင် အလွယ်တကူ တတ်သိနိုင်သည်။ မဟောသဓာသည် ၇-နှစ်သားနှင့် တရားဆုံးဖြတ်သည်။ ထိုထက် ရဟန္တာပုဂ္ဂိုလ်အဖြစ် ၅-နှစ်၊ ၇-နှစ်သားများပင် တရားထူး၊ အသိဉာဏ်ထူးများကို ရရှိစေနိုင်သည်။ ကလေးငယ်ဘ၀ဖြင့် စာဖတ်တတ်သည်၊ သင်္ချာတွက်တတ်သည်ဆိုသည်မှာ အထူးအဆန်း မဟုတ်လှပါပေ။

( မြတ်မင်္ဂလာ ၂၀၀၇-ခု သြဂုတ်လ)

No comments: